ဂျေရုဆလင်မြို့ရိုး ပြန်တည်ဆောက်ပြီး နှစ်ပေါင်း ၄၀၀ ကျော် ကြာပြီးတဲ့နောက် မြို့အနီးမှာ ပုရောဟိတ် ဇာခရိနဲ့ ဇနီးဖြစ်သူ ဧလိရှဗက် နေတယ်။ သူတို့အိမ်ထောင်ပြုထားတာ နှစ်တော်တော်ကြာနေပေမဲ့ ကလေးမရဘူး။ တစ်နေ့၊ ဗိမာန်တော်ရဲ့ သန့်ရှင်းရာဌာနမှာ ဇာခရိ နံ့သာပေါင်းပူဇော်နေတုန်း ကောင်းကင်တမန် ဂါဗြေလ ပေါ်လာတယ်။ ဇာခရိ ထိတ်လန့်သွားပေမဲ့ ဂါဗြေလက ‘မကြောက်နဲ့၊ ယေဟောဝါဆီက သတင်းကောင်းကို လာပြောတာ။ ခင်ဗျားဇနီး ဧလိရှဗက် သားလေး မွေးမယ်၊ သူ့ကို ယောဟန်လို့ နာမည်ပေးရမယ်။ ယေဟောဝါက ယောဟန်ကို အထူးအလုပ် လုပ်ဖို့ ရွေးထားတယ်’ လို့ပြောတော့ ဇာခရိက ‘ဖြစ်နိုင်ပါ့မလား။ ကျွန်တော်တို့ ဇနီးမောင်နှံဟာ အသက်ကြီးလွန်းနေပြီ’ လို့ပြောတော့ ဂါဗြေလက ‘ခင်ဗျားကို ဒီသတင်းပေးဖို့ ဘုရားက ကျွန်တော့်ကို လွှတ်လိုက်တာ။ ခင်ဗျားမယုံတဲ့အတွက် ကလေးမမွေးမချင်း စကားပြောနိုင်မှာမဟုတ်ဘူး’ တဲ့။

ဇာခရိဟာ သန့်ရှင်းရာဌာနမှာ ပုံမှန်ထက် ကြာနေတယ်။ အပြင်မှာ စောင့်နေတဲ့လူတွေက ဘာဖြစ်လို့ ကြာနေတာလဲဆိုတာ သိချင်နေကြတယ်။ ဇာခရိထွက်လာတဲ့အခါ စကားမပြောနိုင်ဘဲ အမူအရာနဲ့ပြတယ်။ ဇာခရိဟာ ဘုရားဆီက သတင်းစကား ရခဲ့ပြီဆိုတာ လူတွေ သိလိုက်ပြီ။

နောက်တော့ ကောင်းကင်တမန် ပြောတဲ့အတိုင်း ဧလိရှဗက် ကိုယ်ဝန်ရှိလာပြီး သားလေး မွေးတယ်။ မိတ်ဆွေတွေ၊ ဆွေမျိုးတွေက ကလေးကို လာကြည့်ပြီး ပျော်နေကြတယ်။ ဧလိရှဗက်က ‘သူ့ကို ယောဟန်လို့ မှည့်မယ်’ လို့ပြောတော့ သူတို့က ‘မင်းရဲ့ဆွေမျိုးထဲမှာ ဒီနာမည်မှမရှိတာ၊ ဇာခရိလို့ ပေးပေါ့’ လို့ ပြောကြတယ်။ ဒါပေမဲ့ ဇာခရိက ‘သူ့နာမည်ဟာ ယောဟန်ပဲ’ လို့ရေးပြတယ်။ အဲဒီအချိန်ကျမှ ဇာခရိ စကားပြန်ပြောနိုင်တယ်။ ဒီကလေးသတင်းက ယုဒပြည်တစ်လျှောက် ပျံ့သွားပြီး ‘ဒီကလေး ကြီးလာရင် ဘာဖြစ်မလဲ’ လို့ စိတ်ဝင်စားနေကြတယ်။

ဇာခရိဟာ သန့်ရှင်းသောစွမ်းအားတော်နဲ့ ပြည့်ပြီး အခုလို ပရောဖက်ပြုတယ်– ‘ယေဟောဝါကို ချီးမွမ်းကြပါ။ ကယ်တင်မယ့်သူ မေရှိယကို စေလွှတ်မယ်လို့ အာဗြဟံကို ကိုယ်တော် ကတိပေးခဲ့တယ်။ ယောဟန်ဟာ ပရောဖက်ဖြစ်လာပြီး မေရှိယအတွက် လမ်းကို ပြင်ဆင်ပေးလိမ့်မယ်။’

ဧလိရှဗက်ရဲ့ဆွေမျိုး မာရိလည်း အံ့ဩစရာအဖြစ် ကြုံခဲ့တယ်။ အဲဒီအကြောင်း နောက်အခန်းမှာ လေ့လာကြည့်ရအောင်။

ဧလိရှဗက်မှာ ညီမလေးလို ချစ်ရတဲ့ မာရိ ဆိုသူ ရှိတယ်။ သူက ဂါလိလဲပြည်၊ နာဇရက်မြို့မှာ နေပြီး လက်သမား ယောသပ်နဲ့ စေ့စပ်ထားတယ်။ ဧလိရှဗက် ကိုယ်ဝန်ခြောက်လ ရှိတော့ ကောင်းကင်တမန် ဂါဗြေလဟာ မာရိကို ကိုယ်ထင်ပြပြီး ‘မင်္ဂလာပါ၊ မာရိ။ ခင်ဗျားဟာ ယေဟောဝါရဲ့ မျက်နှာသာရသူပါ’ လို့နှုတ်ဆက်တယ်။ မာရိခမျာ ဘာကြောင့် အဲဒီလိုပြောမှန်း မသိရှာဘူး။ ဂါဗြေလက ‘ခင်ဗျားမှာ ကိုယ်ဝန်ရှိလာပြီး သားလေးမွေးလိမ့်မယ်။ အဲဒီကလေးကို ယေရှုလို့ နာမည်ပေးရမယ်။ သူက ဘုရင်ဖြစ်လိမ့်မယ်။ သူ့နိုင်ငံက အမြဲတည်မယ်’ လို့ပြောတယ်။

ဒါနဲ့ မာရိက ‘ကျွန်မဟာ အပျိုစင်ပါ။ ဘယ်လိုလုပ် ကလေးရမှာလဲ’ လို့ပြန်ပြောတော့ ဂါဗြေလက ‘ယေဟောဝါအတွက် ဘာမဆိုဖြစ်နိုင်တယ်။ သန့်ရှင်းသောစွမ်းအားတော် ခင်ဗျားအပေါ် သက်ရောက်ပြီး သားရလိမ့်မယ်။ ခင်ဗျား ရင်းနှီးတဲ့မိတ်ဆွေ ဧလိရှဗက်လည်း ကိုယ်ဝန်ရှိနေပြီ’ လို့ ပြောပြတယ်။ ဒါနဲ့ မာရိက ‘ကျွန်မဟာ ယေဟောဝါရဲ့ အစေခံပါ။ သခင်ပြောတဲ့အတိုင်း ဖြစ်လာပါစေ’ လို့ ပြန်ဖြေတယ်။

မာရိဟာ ဧလိရှဗက်ရှိတဲ့ တောင်တန်းမြို့ဆီ ထွက်လာတယ်။ မာရိနှုတ်ဆက်တဲ့အခါ ဧလိရှဗက်ရဲ့ ဗိုက်ထဲက ကလေးခုန်လိုက်တာကို ဧလိရှဗက် ခံစားလိုက်ရတယ်။ သန့်ရှင်းသောစွမ်းအားတော်နဲ့ ပြည့်ပြီး သူက ‘မာရိ၊ ညီမကို ယေဟောဝါ ကောင်းချီးပေးပြီ။ ငါ့သခင်ရဲ့ မိခင် လာလည်တာ ဂုဏ်ယူစရာပါ’ လို့ ပြောတယ်။ မာရိက ‘စိတ်နှလုံးအပြည့်နဲ့ ယေဟောဝါဘုရားကို ဂုဏ်တင်ချီးမွမ်းပါတယ်’ လို့ပြန်ဖြေတယ်။ ဧလိရှဗက်နဲ့ သုံးလအတူနေပြီး နာဇရက်မြို့ကို ပြန်လာတယ်။

ယောသပ်ဟာ မာရိဆီမှာ ကိုယ်ဝန်ရှိမှန်းသိတော့ စေ့စပ်ထားတာကို ဖျက်လိုက်ချင်တယ်။ ဒါပေမဲ့ အိပ်မက်မှာ ကောင်းကင်တမန်ပေါ်လာပြီး ‘သူ့ကို လက်ထပ်ဖို့ မစိုးရိမ်ပါနဲ့။ သူဘာအမှားမှ မလုပ်ပါဘူး’ လို့ပြောတယ်။ ဒါနဲ့ ယောသပ်လည်း မာရိကို ဇနီးအဖြစ် လက်ထပ်ယူပြီး အိမ်ခေါ်သွားတယ်။