ရောမအင်ပါယာရဲ့ အုပ်ချုပ်သူ၊ ဆီဇာဩဂတ်စတပ်က ဂျူးအားလုံး ကိုယ့်မြို့ကိုယ့်ရွာပြန်ပြီး နာမည်စာရင်းပေးဖို့ အမိန့်ထုတ်တယ်။ ဒါနဲ့ ယောသပ်နဲ့ မာရိဟာ ယောသပ်မွေးရပ်မြေ ဘက်သလီဟင်မြို့ကို ခရီးထွက်လာကြတယ်။ အဲဒီအချိန်မှာ မာရိ ကိုယ်ဝန် နေ့စေ့လစေ့ ဖြစ်နေပြီ။

ဘက်သလီဟင်မြို့ ရောက်တဲ့အခါ တည်းဖို့ နွားတင်းကုပ်ပဲရှိတော့ အဲဒီမှာ ယေရှုကို မွေးလာတယ်။ ပြီးတော့ ကလေးကို အနှီးနဲ့ပတ်ပြီး နွားစားခွက်ထဲ သိပ်ထားလိုက်တယ်။

ဘက်သလီဟင်မြို့အနီးမှာ သိုးထိန်းတချို့ ကွင်းပြင်မှာ သိုးထိန်းနေကြတယ်။ ရုတ်တရက်၊ ကောင်းကင်တမန်တစ်ပါး ပေါ်လာပြီး ပတ်လည်မှာ ယေဟောဝါရဲ့ ဘုန်းအသရေကြောင့် လင်းနေတယ်။ သိုးထိန်းတွေ ကြောက်လန့်သွားလို့ ကောင်းကင်တမန်က ‘မကြောက်ပါနဲ့။ သတင်းကောင်း လာပြောတာ။ ဒီနေ့ ဘက်သလီဟင်မြို့မှာ မေရှိယ မွေးဖွားပြီ’ တဲ့။ အဲဒီအခါ ကောင်းကင်တမန်အများကြီး ပေါ်လာပြီး ‘ကောင်းကင်မှာ စံမြန်းတဲ့ ဘုရားသခင်ကို ဂုဏ်တင်ချီးမွမ်းကြ။ မြေကြီးမှာ ငြိမ်သက်ခြင်းရှိပါစေ’ လို့ ချီးမွမ်းပြီး ပျောက်ကွယ်သွားတယ်။ သိုးထိန်းတွေ ဘာလုပ်ကြသလဲ။

‘အခုပဲ ဘက်သလီဟင်မြို့ကို သွားကြစို့’ လို့ပြောကြပြီး ခပ်သုတ်သုတ် သွားကြည့်တဲ့အခါ နွားတင်းကုပ်မှာရှိတဲ့ ယောသပ်၊ မာရိနဲ့ မွေးကင်းစကလေးကို တွေ့လိုက်ရတယ်။

သိုးထိန်းတွေကို ကောင်းကင်တမန်တွေ ပြောတဲ့စကားတွေအကြောင်း ကြားတဲ့သူတိုင်း အံ့ဩသွားကြတယ်။ မာရိက ကောင်းကင်တမန်ရဲ့ စကားတွေကို သေချာစဉ်းစားပြီး မှတ်ထားတယ်။ သိုးထိန်းတွေလည်း မြင်ရ၊ ကြားရသမျှအတွက် ယေဟောဝါကို ဂုဏ်တင်ချီးမွမ်းပြီး ပြန်သွားကြတယ်။

အစ္စရေးပြည်ရဲ့ အရှေ့အရပ်က လူတွေဟာ ကြယ်တွေ လမ်းပြပေးနိုင်တယ်လို့ ယုံကြတယ်။ တစ်ညမှာ လင်းလက်တောက်ပတဲ့ ကြယ်တစ်လုံးကို အရှေ့အရပ်ကလူတချို့ တွေ့ပြီး အဲဒီ “ကြယ်” နောက် လိုက်လာတာ ဂျေရုဆလင်မြို့ကို ရောက်လာတယ်။ သူတို့က ‘ဂျူးတွေရဲ့ ဘုရင်ဖြစ်လာမယ့် ကလေး ဘယ်မှာလဲ။ သူ့ကို ဦးညွှတ်ချင်လို့ပါ’ လို့ မေးမြန်းကြတယ်။

ဂျေရုဆလင်မြို့ရဲ့ဘုရင် ဟေရုဒ်က ဘုရင်အသစ်အကြောင်းကြားတော့ သိပ်စိုးရိမ်သွားတယ်။ ပုရောဟိတ်မင်းတွေကိုခေါ်ပြီး ‘အဲဒီဘုရင် ဘယ်မှာမွေးမှာလဲ’ လို့မေးတော့ ‘ပရောဖက်တွေပြောတာတော့ ဘက်သလီဟင်မြို့မှာ မွေးမှာတဲ့’ လို့ပြန်ဖြေကြတယ်။ ဒါနဲ့ ဟေရုဒ်မင်းဟာ အရှေ့အရပ်ကလူတွေကို ခေါ်ပြီး ‘ဘက်သလီဟင်မြို့ကိုသွား၊ အဲဒီကလေးကို ရှာပါ။ တွေ့ရင် ငါ့ဆီ ပြန်သတင်းပို့ကြ။ ငါလည်း သွားဦးညွှတ်မယ်’ လို့ပြောတယ်။ အဲဒါ လိမ်နေတာ။

“ကြယ်” ပြန်ရွေ့သွားတာနဲ့ သူတို့ ကြယ်နောက်လိုက်သွားတာ ဘက်သလီဟင်မြို့ကို ရောက်လာတယ်။ အိမ်တစ်လုံးပေါ်မှာ “ကြယ်” ရပ်သွားတော့ အဲဒီအိမ်ထဲ ဝင်သွားကြတယ်။ အဲဒီမှာ မိခင်ဖြစ်သူ မာရိနဲ့အတူ ယေရှုကိုတွေ့တယ်။ ဒါနဲ့ ကလေးကို ဦးညွှတ်ပျပ်ဝပ်ပြီး ရွှေ၊ တန်ဖိုးကြီး နံ့သာခဲ၊ သစ်စေးမွှေးတွေပေးတယ်။ ယေရှုကို ဒီလူတွေ တွေ့ဖို့ ယေဟောဝါ လွှတ်လိုက်တာလား။ မဟုတ်ဘူး။

အဲဒီညမှာပဲ ယေဟောဝါက ယောသပ်ကို အိပ်မက်ပေးပြီး ‘ဟေရုဒ်က ယေရှုကို သတ်ချင်နေတယ်။ ဇနီးနဲ့ သားကိုခေါ်ပြီး အီဂျစ်ပြည်ကိုပြေးပါ။ ပြန်လာဖို့ မခေါ်မချင်း အဲဒီမှာနေပါ’ လို့မှာတယ်။ ယောသပ်လည်း သားနဲ့ မိန်းမကိုခေါ်ပြီး အီဂျစ်ပြည်ကို ချက်ချင်း ထွက်သွားတယ်။

ယေဟောဝါက ဟေရုဒ်ဆီ ပြန်မသွားဖို့ အရှေ့အရပ်ကလူတွေကို ပြောတယ်။ ဒီလူတွေ ပြန်မလာမှန်း ဟေရုဒ်သိတဲ့အခါ စိတ်ဆိုးသွားတယ်။ ယေရှု ဘယ်မှာရှိမှန်းမသိတော့ ဘက်သလီဟင်မြို့က ယေရှုအရွယ် ယောက်ျားလေးအားလုံးကို သတ်ဖို့ အမိန့်ပေးလိုက်တယ်။ ယေရှုကတော့ အီဂျစ်ပြည်ကို ရောက်နေပြီ။

နောက်ပိုင်းမှာ ဟေရုဒ်သေသွားတယ်။ ယေဟောဝါက ယောသပ်ကို ‘ပြန်လာလို့ရပြီ’ လို့ပြောတယ်။ ယောသပ်၊ မာရိနဲ့ ယေရှုဟာ အစ္စရေးပြည်ကို ပြန်လာပြီး နာဇရက်မြို့မှာ အခြေချလိုက်တယ်။