ဂျော်ရှူဝါ၏ ယုံကြည်ခြင်း—ကလေးသူငယ်များအခွင့်အရေး ဆိုင်ရာ အောင်ပွဲတစ်ရပ်

ကနေဒါနိုင်ငံမှ နိုးလော့! သတင်းထောက် ပေးပို့သည်

“ရင့်ကျက်မှုရှိသော အရွယ်မရောက်သေးသူနှင့်ဆိုင်သည့် စီရင်ထုံးကို အယူခံတရားရုံးအဆင့်တွင် စဉ်းစားသုံးသပ်သည်မှာ ဤအကြိမ်သည် ပထမအကြိမ်ဖြစ်သည်။ ဤစီရင်ဆုံးဖြတ်ချက်သည် နယူးဘရန့်ဇဝိခ် စီရင်စုနယ်ရှိ ဆရာဝန်များနှင့် ဆေးရုံများအတွက်လောက်သာ ရှင်းလင်းပြတ်သားသည့်လမ်းညွှန် ချမှတ်ပေးသည်မဟုတ်ဘဲ ကနေဒါနိုင်ငံတစ်ဝန်းလုံးနှင့်လည်း အကျုံးဝင်ဖွယ်ရှိသည်ဟု အချို့ကဆိုကြသည်။”—Canadian Medical Association Journal.

အထက်ပါဂျာနယ်က နယူးဘရန့်ဇဝိခ် စီရင်စုနယ်တွင်ပြဋ္ဌာန်းထားသည့် အရွယ်မရောက်သေးသူ ဆေးကုသမှုသဘောတူညီချက်ဆိုင်ရာ အက်ဥပဒေနှင့်ပတ်သက်သော အမှုတစ်ခုကို ရည်ညွှန်းနေခြင်းဖြစ်ပါသည်။ ထိုဥပဒေအရ အသက် ၁၆ နှစ်အောက် အရွယ်မရောက်သေးသူတစ်ဦးသည် အတွေးအခေါ်ရင့်ကျက်ပြီး ၎င်း၏ရောဂါဝေဒနာနှင့် အဆိုပြုထားသည့်ကုသမှုတို့ကို ကောင်းစွာနားလည်ကြောင်း ဆရာဝန်နှစ်ဦးကဆုံးဖြတ်ချက်ချလျှင် ထိုသူသည် လူကြီးတစ်ဦးကဲ့သို့ ဆေးကုသမှုကို လက်ခံပိုင်ခွင့်၊ သို့မဟုတ် ငြင်းပယ်ပိုင်ခွင့်ရှိသည်ဟု ပြဋ္ဌာန်းထားသည်။ နယူးဘရန့်ဇဝိခ် စီရင်စုနယ်၏ အယူခံရုံးမှ တရားသူကြီးချုပ်ဖြစ်သူ ဒဗ္ဗလျူ.အယ်လ်.ဟွိုက်ဆိုသူက ခြင်ဆီသွေးဆဲလ်ဖြူကင်ဆာပြင်း ခံစားခဲ့ရသူ အသက် ၁၅-နှစ်အရွယ်ရှိ ဂျော်ရှူဝါ ဝေါ့ကာနှင့်ပတ်သက်၍ အောက်ပါအတိုင်းရေးသားခဲ့သည်– “ဂျော်ရှူဝါသည် လုံလောက်သောရင့်ကျက်မှုရှိကြောင်း၊ လက်ရှိအခြေအနေ၌ အဆိုပြုထားသည့်ကုထုံးမှာလည်း သူ၏ကျန်းမာရေးနှင့် ကောင်းစားရေးအတွက် အကောင်းဆုံးစဉ်းစားထားခြင်းဖြစ်ကြောင်း သက်သေအထောက်အထား အများအပြားရှိသည်။ . . . ကျွန်ုပ်၏သဘောအရဆိုလျှင် [ဂျော်ရှူဝါကို ရင့်ကျက်သော အရွယ်မရောက်သေးသူအဖြစ် သတ်မှတ်ပေးရန်] အယူခံလွှာတင်သွင်းရန်မလိုအပ်ပါ။” ကနေဒါ ရိုးရာဥပဒေက “ရင့်ကျက်မှုရှိသော အရွယ်မရောက်သေးသူနှင့်ဆိုင်သည့် အခြေခံဥပဒေမူကို အသိအမှတ်ပြုထားသည်” ဟု တရားသူကြီးချုပ် ဟွိုက်က ၎င်း၏ဆုံးဖြတ်ချက်ထဲတွင် ဖော်ပြထားသည်။

ဂျော်ရှူဝါ၏ရှေ့နေတစ်ဦးဖြစ်သူ ဒန်နီယယ် ပိုးလ်ဆိုသူက အယူခံတရားရုံး၏ အဆိုပါစာဖြင့်ဆုံးဖြတ်ချက်သည် “ကနေဒါနိုင်ငံတစ်ဝန်းလုံးတွင် စံအဖြစ်သတ်မှတ်သည့်အမှု ဖြစ်လာလိမ့်မည်” ဟုဆိုသည်။ ဤအမှုသည် သာမန်အမှုမဟုတ်သောကြောင့် သာမန်အခြေအနေတွင်ရုံးထိုင်သည့် တရားသူကြီးသုံးဦးအစား ယခုငါးဦးရုံးထိုင်သည်။ “အလွန်ထူးခြားအရေးပါသော အခြေအနေမျိုး၌ တရားရုံးတွင် တရားသူကြီးများ စုံစုံညီညီတက်ရောက်ကြသည်။ ချမှတ်မည့်စီရင်ဆုံးဖြတ်ချက်သည် ကနေဒါနိုင်ငံအတွက် အရေးကြီးသောဆုံးဖြတ်ချက်ဖြစ်သည်ဟု ယူဆသောကြောင့်ဖြစ်နိုင်သည်” ဟု ပိုးလ်ကဆို၏။ သူက ချမှတ်လိုက်သည့်ဤစီရင်ထုံးသည် ရင့်ကျက်မှုရှိသော အရွယ်မရောက်သေးသူများအတွက် သူတို့ဘာသာသူတို့ ဆုံးဖြတ်ချက်ချနိုင်ရန် လမ်းစပွင့်လာသည်၊ “နောက်နောင်တွင် ဤအမှုမျိုး တရားရုံးရောက်စရာအကြောင်း မရှိတော့၊ ဤအမှုသည် အခြားလူငယ်များအတွက် ကြီးမားသည့်အောင်မြင်မှု ရရှိစေခဲ့သည်” ဟုယူဆသည်။ ဤအမှုအနိုင်ရရှိခြင်း၏ ကျယ်ပြန့်သည့်အကျိုးကျေးဇူးအကြောင်းကို ထပ်ဆင့်လေးနက်စေသည့်အနေနှင့် ပိုးလ်က “ဤအောင်နိုင်မှုသည် မိမိတို့ကိုယ်ခန္ဓာကို မည်သို့ပြုမူစေလိုကြောင်း ဆုံးဖြတ်နိုင်စွမ်းရှိသော ကလေးသူငယ်များ၊ ငယ်ရွယ်သောယောက်ျားကလေး၊ မိန်းမကလေးများ၏ အခွင့်အရေးများကို အကြီးအကျယ်ထောက်ခံမြှင့်တင်လိုက်သည်” ဟုထုတ်ဖော်ပြောကြားခဲ့သည်။

Telegraph Journal သတင်းစာတွင် “‘အရွယ်မရောက်သေးသူ’ တစ်ဦး၏အောင်ပွဲ” ဟူသောခေါင်းစဉ်ဖြင့် အယ်ဒီတာ့အာဘော်တစ်ပုဒ်က အောက်ပါအတိုင်းဆိုထားသည်– “၁၅-နှစ်အရွယ်ရှိ ဂျော်ရှူဝါ ဝေါ့ကာသည် ဆေးကုထုံးကို သဘောတူခွင့်၊ သို့မဟုတ် ငြင်းပယ်ခွင့်ရှိသည်ဟူသော နယူးဘရန့်ဇဝိခ် အယူခံတရားရုံး၏ စီရင်ဆုံးဖြတ်ချက်မှာ ယေဟောဝါသက်သေများ၏ အောင်ပွဲမျှသာမဟုတ်ဘဲ ကျွန်ုပ်တို့အားလုံး၏ အောင်ပွဲပင်ဖြစ်သည်။ . . . တစ်ခါတစ်ရံတွင် လူတစ်ဦးတစ်ယောက် ချလိုက်သည့်ဆုံးဖြတ်ချက်များသည် လူ့အဖွဲ့အစည်းအတွက် လက်ခံရန်အလွန်ခဲယဉ်းတတ်သည်။ အထူးသဖြင့် လူငယ်တစ်ဦး၏ သေရေးရှင်ရေးကိစ္စမျိုးဆိုလျှင် လက်ခံရန် အထူးပင်ခဲယဉ်းတတ်သည်။ သို့သော် တိုင်းသူပြည်သားတို့၏ ရုပ်ခန္ဓာနှင့်စိတ်ဝိညာဉ်တို့ကို ပုံမှန်ထိပါးနှောင့်ယှက်သည့် လူ့အဖွဲ့အစည်းတစ်ခုဆိုလျှင် သာ၍ပင်ခံရခက်ပေမည်။ ထိုသို့ ကျွန်ုပ်တို့မခံရလေအောင် ဂျော်ရှူဝါ ဝေါ့ကာသည် သူ၏တာဝန်ကို ကျေပွန်စွာထမ်းဆောင်သွားသည်။”

ရဲစွမ်းသတ္တိရှိသော ဆရာဝန်

ဂျော်ရှူဝါသည် ဖျားစကတည်းက သွေးရောဂါနှင့် ကလေးမြင်းဖုရောဂါ အထူးကုသမားတော် ဒေါက်တာ မေရီ ဖရန့်စစ္စ စကားလ်လီနှင့် စစ်ဆေးကုသမှုခံယူခဲ့သည်။ သူမ၏အလုပ်ထဲတွင် ကလေးသူငယ်များ၌ဖြစ်ပွားသည့် ကင်ဆာရောဂါကို ရောဂါအမည်ဖော်ခြင်းနှင့် ကုသခြင်းပါဝင်သည်။

ဂျော်ရှူဝါ၏ သွေးဆဲလ်ဖြူကင်ဆာအမျိုးအစားအတွက် ယေဘုယျကုထုံးမှာ ဓာတုကုထုံးနှင့် သွေးသွင်းကုသခြင်းဖြစ်သည်။ ဂျော်ရှူဝါ၏မိသားစုမှာ ယေဟောဝါသက်သေများဖြစ်သဖြင့် ကျမ်းစာအကြောင်းပြချက်ကြောင့် သွေးသွင်းခြင်းကိုလက်မခံကြချေ။ ခရစ်ယာန်တို့အားပေးထားသည့် ဘုရားသခင့်အမိန့်တော်မှာ “ရုပ်တုတို့၏ညစ်ညူးရာကိုလည်းကောင်း၊ မတရားသောမေထုန်ကိုလည်းကောင်း၊ လည်ပင်းကိုညှစ်၍သတ်သော အရာကိုလည်းကောင်း၊ အသွေးကိုလည်းကောင်း ကြဉ်ရှောင်” ရမည်ဟူ၍ဖြစ်သည်။ (တမန်တော် ၁၅:၂၀၊ ၂၉) ဂျော်ရှူဝါသည် စကတည်းက ‘သွေးကိုရှောင်ပါ’ ဟူသော ယေဟောဝါ၏ပညတ်ကိုလိုက်နာရန် ပြတ်သားစွာရပ်တည်လာခဲ့သည်။

ဒေါက်တာစကားလ်လီက ဂျော်ရှူဝါသည် ဤကိစ္စနှင့်ပတ်သက်၍ “အလွန်တင်းမာပြတ်သားသည်” ဟူ၍ ဂျော်ရှူဝါ၏ဆေးမှတ်တမ်း၌ ရေးမှတ်ထားသည်။ ၎င်းဆေးရုံရှိ လူကြီးမြင်းဖုဆိုင်ရာ သိပ္ပံဌာနမှ ဦးစီးဖြစ်သူ ဒေါက်တာ ဒိုးလန်က ဂျော်ရှူဝါနှင့် ကိုယ်တိုင်တွေ့ဆုံစကားပြောခဲ့သည်။ သူနှင့် ဒေါက်တာ စကားလ်လီတို့ နှစ်ဦးစလုံးက ဂျော်ရှူဝါသည် ရင့်ကျက်မှုရှိသော အရွယ်မရောက်သေးသူဖြစ်ကြောင်း ဆုံးဖြတ်ကြသည်။ ဝေါ့ကာမိသားစု၏ မိသားစုဆရာဝန်ဖြစ်သူ ဒေါက်တာ လောဒန်ကလည်း ဂျော်ရှူဝါကို ရင့်ကျက်သောအရွယ်မရောက်သေးသူအဖြစ် သဘောရသည်။ ဆရာဝန်နှစ်ဦးမက သုံးဦးက ဂျော်ရှူဝါကို ရင့်ကျက်သောအရွယ်မရောက်သေးသူအဖြစ် ထုတ်ဖော်ကြေညာသဖြင့် အရွယ်မရောက်သေးသူ ဆေးကုသမှုသဘောတူညီချက်ဆိုင်ရာ အက်ဥပဒေအရ ဆေးကုထုံးကိုရွေးချယ်နိုင်သည့် အရည်အချင်း လိုသည်ထက်ပင်ပိုနေပေသည်။ တရားစွဲဆိုသည့်အဆင့်ပင် ရောက်စရာမလိုပေ။

သို့သော် အခြေအနေမှာ ပြောင်းလဲသွားခဲ့သည်။ ဂျော်ရှူဝါကို ရင့်ကျက်မှုရှိသော အရွယ်မရောက်သေးသူအဖြစ် ယူမှတ်သည့်၎င်းဆေးရုံက မိမိကိုယ်ကိုကာကွယ်သည့်အနေဖြင့် ဤအချက်ကို တရားရေးဆုံးဖြတ်ချက်ဖြင့် အခိုင်အမာဖြစ်စေလိုသည်။ သို့နှင့် ရှည်လျား၍ သည်းညည်းခံရခက်သော ကြားနာစစ်ဆေးမှု ပြုလုပ်ပြီးနောက် တရားသူကြီးက ဂျော်ရှူဝါသည် ဆေးကုထုံးကို ငြင်းပယ်ပိုင်ခွင့်မရှိကြောင်း စီရင်ဆုံးဖြတ်လိုက်သည်။ ၎င်းဆုံးဖြတ်ချက်ကိုမကျေနပ်၍ အထက်တရားရုံးသို့ ချက်ချင်းပင်အယူခံဝင်ခဲ့ရာ ပထမစာပိုဒ်၌ဖော်ပြထားသည့် အကျိုးရလဒ်များ ရရှိလာသည်။

ဂျော်ရှူဝါ၏ တုန်လှုပ်ချောက်ချားဖွယ် အတွေ့အကြုံများတစ်လျှောက် ဒေါက်တာ စကားလ်လီက ဂျော်ရှူဝါစိတ်ပြောင်း၍ သဘောမတူမချင်း မည်သည့်အခြေအနေမျိုး၌မျှ ဂျော်ရှူဝါအား သွေးမသွင်းပါဟူသော သူမ၏ကတိအတိုင်း စောင့်ထိန်းခဲ့သည်။ သူမ၏အနေအထားနှင့်စပ်လျဉ်း၍ Canadian Medical Associstion Journal က သူမ၏ပြောကြားချက်ကိုကိုးကား၍ ရေးသားရာ၌ “ကျွန်မအကြီးအကျယ်စိတ်ပူမိတာက ဂျော်ရှူဝါနဲ့သူ့မိသားစုဟာ သူတို့မှာ ရွေးစရာဆိုလို့ ဘာမှမကျန်တော့တဲ့အတွက် သိပ်ကိုဝမ်းနည်းပူဆွေးမိမယ် ဆိုတဲ့အချက်ပါပဲ။” ဆောင်းပါး၌ ဤသို့ဆက်လက်ရေးသားထားသည်– “နောက်ပိုင်းတွင် အခြားဆရာဝန်တို့က မိမိတို့သာဆိုလျှင် ဂျော်ရှူဝါကို လုံးဝဆေးကုသပေးမည်မဟုတ်ကြောင်း သူမကိုပြောပြသည်။ သို့သော် ထိုစိတ်ကူးမျိုး သူမ၏စိတ်ထဲ၌ လုံးဝမပေါ်ခဲ့ချေ။” ကျိုးကြောင်းဆီလျော်၍ မြင့်မြတ်သော သူမ၏ရပ်တည်ချက်သည် ဂျော်ရှူဝါနှင့်သူ၏မိသားစုအတွက် အလွန်အားတက်စရာဖြစ်သည်။

ဂျော်ရှူဝါသည် အသက်ကိုမြတ်နိုးသည်၊ ကရုဏာသက်စရာကောင်းသည်

ဂျော်ရှူဝါ ဝေါ့ကာသည် အသက်ကိုမြတ်နိုးသည်။ အသက်မသေချင်ပါ။ သူ့မိသားစုကလည်း သူ့ကိုမသေစေချင်ပါ။ သူ၏ဝိညာဏညီအစ်ကိုများဖြစ်ကြသော တိုင်းပြည်အများအပြားမှ ယေဟောဝါသက်သေများက သူပြန်လည်ကျန်းမာ၍ ဆက်လက်အသက်ရှင်မည်ကို မျှော်လင့်ကြသည်။ ဂျော်ရှူဝါသည် သူ၏အခြေအနေကို လိုလိုလားလားနှင့်လက်ခံသည်၊ ​ဘုရား​သခင်အပေါ်ထားရှိသော သူ၏ယုံကြည်ခြင်းက သူပြန်လည်ရှင်ပြန်ထမြောက်လာမည်ကို အခိုင်အမာစိတ်ချစေသည်။ “သင်္ချိုင်းများမှာရှိသောသူ အပေါင်းတို့သည် [ဘုရားသခင့်] သားတော်၏စကားသံကိုကြား၍ ထွက်ရမည့်အချိန်ကာလ ရောက်လတ္တံ့” ဟူသော ယေရှု၏စကားတော်မှ သူခွန်အားရရှိခဲ့သည်။—ယောဟန် ၅:၂၅၊ ၂၈၊ ၂၉။

နေရာဒေသများစွာမှလူတို့ကလည်း ဂျော်ရှူဝါကို အားပေးထောက်ခံကြသည်။ “မိဘနှစ်ပါးစလုံးက ဂျော်ရှူဝါကို သူတို့လက်မလျှော့ကြောင်း ယမန်နေ့က အလေးအနက်ပြောကြားသည်။ သူတို့သည် သွေးမပါသည့်ဆေးဝါးကုသမှုအကောင်းဆုံး ရရှိရေးအတွက် ဒေသန္တရဆေးရုံသို့ သားဖြစ်သူကိုခေါ်ဆောင်ခဲ့သည်။ ‘သူ့ကိုသေစေလိုတဲ့စိတ်သာရှိရင် သူ့ကိုအိမ်မှာပဲထားခဲ့မှာပေါ့။ ဂျော်ရှူဝါကို ကျွန်တော်တို့မသေစေချင်ပါဘူး။ သူဆက်ပြီးအသက်ရှင်ဖို့ အတတ်နိုင်ဆုံးဆေးကုပေးနေပါတယ်။ ကိုယ်ချစ်တဲ့သူအတွက်ဆိုရင် ဘယ်သူမဆို ဒီလိုလုပ်ကြမှာပဲ။ သူသေဆုံးတာကိုကြောင်တောင်ကြည့်ဖို့ ဆေးရုံကိုခေါ်လာကြတာမဟုတ်ပါဘူး။ သူပြန်ကျန်းမာပြီးလမ်းလျှောက်နိုင်ဖို့၊ ကစားစရာမီးရထားကို ပြန်ကစားနိုင်ဖို့၊ နိုင်ငံတော်ခန်းမကိုသွားနိုင်ဖို့၊ စည်းဝေးနဲ့အမှုဆောင်သွားနိုင်ဖို့၊ ဒါထက်မကပါဘူး ဘတ်စကက်ဘောပြန်ကစားနိုင်ဖို့ ဆိုတဲ့မျှော်လင့်ချက်နဲ့ ရောက်လာကြတာပါ’ ဟု ဖခင်ဖြစ်သူက အကျိုးအကြောင်းပြ၍ရှင်းပြသည်” ဟူ၍ Evening Time Globe သတင်းစာကဆိုသည်။

ဂျော်ရှူဝါ၏မိသားစုသည် သူ့အားကိုယ်ဖိရင်ဖိပြုစုကြသည်။ ဤအကြောင်းနှင့်ပတ်သက်၍ သတင်းစာတစ်စောင်က “ဂျော်ရှူဝါကို တစ်ယောက်တစ်လှည့် ပြုစုစောင့်ရှောက်နေစဉ် ကျန်အိမ်သားများသည် အနီးရှိအနားယူသည့်အခန်းတွင် စုပြုံနေကြသည်။ အချို့သည် ဝတ်ရုံဝတ်လျက် လည်ပင်းတွင် မျက်နှာဖုံးတွဲလောင်းနှင့်ပင်ရှိကြသည်။ ဤမြင်ကွင်းသည် ဂျော်ရှူဝါဆေးရုံရောက်စ မတ်လ ၃၁ ရက်မှစ၍ ယနေ့အထိတွေ့ မြင်ရသည့်မြင်ကွင်းပင်ဖြစ်သည်။ ရက်သတ္တပတ်သုံးပတ်အတွင်း ဂျော်ရှူဝါ၏ဆေးရုံအခန်းတွင် ဝတ်ရုံဝတ်၍မျက်နှာဖုံးစွပ်ထားသော အိမ်သားတစ်ယောက်ယောက် မရှိသည့်အချိန်ဟူ၍မရှိခဲ့ချေ။ . . . အများအားဖြင့် မိဘနှစ်ပါးသည် သူတို့၏သားထွေးဂျော်ရှူဝါနံဘေးရှိ ခုတင်ပေါ်တွင်အိပ်၍ ညလုံးပေါက်ပြုစုကြသည်။ [မိခင်ဖြစ်သူက] ‘ကျွန်မတို့ကို သူလိုအပ်နေတယ်လေ၊ ဂျော့်ရှ်အတွက်တင်မကပါဘူး ဘယ်သားသမီးအတွက်မဆို ဘာချည်းပဲလုပ်ရလုပ်ရ လုပ်ပေးမှာပါ’ ဟုပြောသည်။ ဖခင်ဖြစ်သူကလည်း ‘အပြင်ဘက် ကားရပ်တဲ့နေရာမှာ စောင့်ရမယ်ဆိုရင်လည်း ကျွန်တော်စောင့်မှာပါပဲ’ ဟုပြောပြသည်” ဟူ၍ရေးသားဖော်ပြသည်။

ရင်ဖွင့်ပြောဆိုမှုများ

မိခင်ဖြစ်ဖြစ်၊ ဖခင်ဖြစ်ဖြစ် အတူရှိသည့်ညနေခင်းအချိန်များ၌ သူတို့သည် ရင်းရင်းနှီးနှီး ရင်ဖွင့်ပြောဆိုလေ့ရှိကြသည်။ တစ်ညတွင် ဂျော်ရှူဝါက ဤသို့ပြောသည်– “မေမေ၊ ကျေးဇူးပြုပြီး ဒီစကားကိုရေးထားပါ။ အသင်လူငယ်အပေါင်းတို့၊ ယေဟောဝါထံချဉ်းကပ်ကြပါ။ သို့ပါမှ တစ်စုံတစ်ရာဖြစ်ပျက်ခဲ့သည်ရှိသော် ကိုယ်တော့်အပေါ်မှာ သစ္စာစောင့်သိနိုင်ကြမည်ဖြစ်သည်။ အကယ်၍ ကျွန်တော့်ရောဂါ သက်သာပျောက်ကင်းခဲ့သော် ယေဟောဝါ၏နာမတော်ကို တိုး၍ကြေညာမည်ဖြစ်ကြောင်း ကျွန်တော်ကတိပြုပါသည်။ ကျန်းမာသန်စွမ်းကြသော အသင်လူငယ်တို့၊ တတ်စွမ်းသ၍ ကြိုးစားပါဝင်လုပ်ဆောင်ကြပါ။”

ဂျော့ရှ်ဆေးရုံ၌ရှိစဉ်တစ်ည၌ သူက “မေမေ၊ မေမေအိမ်သာသွားတဲ့အချိန်နဲ့ ဖေဖေကိုသွားရှာတဲ့အချိန်တွေမှာ ဆရာဝန်တွေလာပြီး ဘယ်လိုပြောသလဲဆိုရင် ‘ဂျော့်ရှ်၊ မင်းသွေးသွင်းဖို့လိုနေတယ်။ သွေးမသွင်းရင်တော့ မင်းသေမှာပဲ။ တို့ကမင်းကိုကူညီချင်တယ်’ ဆိုပြီးလာလာပြောတာ အကြိမ်ပေါင်းမနည်းတော့ဘူး။ သားကလည်း ‘ဒီလိုဆိုရင် သွေးနဲ့ပတ်သက်တဲ့ ကျွန်တော့်ဆန္ဒကိုလေးစားကြပါ’ ဆိုပြီးပြန်ပြောလိုက်တယ်။ သားကိုသွေးသွင်းဖို့ ကြိုးစားဖျောင်းဖျတဲ့ဆရာဝန်တစ်ဦးကို သားက ‘ဆရာ့အနေနဲ့ ကျွန်တော့်ကိုအရူးလို့ ထင်ချင်ထင်မယ်။ ဒါပေမဲ့ ကျွန်တော့်မှာ စဉ်းစားတွေးခေါ်နိုင်စွမ်း အပြည့်ရှိပါတယ်။ သွေးနဲ့ပတ်သက်တဲ့ ယေဟောဝါရဲ့ပညတ်တော်အတိုင်းပဲ ကျွန်တော်အသက်ရှင်ချင်ပါတယ်။ ကျွန်တော်တို့အတွက် ဘယ်ဟာကအကောင်းဆုံးဆိုတာ ကိုယ်တော်ကောင်းကောင်းသိတယ်။ ကျွန်တော့်အတွက် အကောင်းဆုံးကတော့ အသက်ရဲ့မြင့်မြတ်မှုကို လေးစားဖို့ပဲဖြစ်တယ်။ တကယ်လို့ ကျွန်တော်သေသွားရင်လည်း ပြန်ပြီးအသက်ရှင်လာမှာပါ’ ဆိုပြီးပြောပြလိုက်တယ်။”

ကလေးရောဂါကုဌာနအကြီးအကဲဖြစ်သူ ဒေါက်တာဂယ်ရီက ဂျော့်ရှ်၏မိဘတို့အား “ဂျော့်ရှ်အတွက်ဂုဏ်ယူကြပါ။ သူ့လိုယုံကြည်ခြင်းမျိုးကို ကျွန်တော့်တစ်သက်တာမှာ တစ်ခါမှမတွေ့ဖူးဘူး” ဟူ၍ပြောပြသည်။ သူက သူတို့နှစ်ဦးစလုံးကိုပွေ့ဖက်၍ “ခင်ဗျားတို့မိသားစုကတော့ တကယ့်သတ္တိခဲတွေပါပဲ” ဟူ၍ဆက်ပြောသည်။

တစ်ညနေ ဆေးရုံတွင် ဂျော်ရှူဝါ၏အခြေအနေနှင့်ပတ်သက်သည့် စိတ်မကောင်းဖွယ်သတင်းကို မိသားစုဝင်များ ကြားသိပြီးနောက် ဂျော်ရှူဝါနှင့်အတူ အစ်ကိုဖြစ်သူဂျက်ဖ်နှင့် အမဖြစ်သူ ဂျဲန်းနီးစ်တို့ရှိနေကြသည်။ ဂျက်ဖ်ကငိုနေသဖြင့် ဂျော့်ရှ်က “အစ်ကိုဂျက်ဖရီ၊ မငိုပါနဲ့၊ ကျွန်တော်ဟာ ဘယ်နည်းနဲ့မဆို အောင်နိုင်သူဖြစ်မှာပါ။ ကျွန်တော့်အတွက် စိတ်မကောင်းမဖြစ်ကြပါနဲ့” ဟူ၍နှစ်သိမ့်ရှာသည်။ သူဆိုလိုသည်မှာ အကယ်၍ သူပြန်ကျန်းမာလာလျှင် သူသည် အောင်နိုင်သူဖြစ်မည်၊ အကယ်၍ ပြန်ကောင်းမလာဘဲသေခဲ့လျှင်လည်း ပရဒိသုမြေကြီးပေါ်တွင် ရှင်ပြန်ထမြောက်လာမည်ဖြစ်သောကြောင့် အောင်နိုင်သူမုချဖြစ်မည်။

ရိုးတွင်းခြင်ဆီအစားထိုးကုသရန် လိုအပ်လာသည့်အခါ၌ ရိုးတွင်းခြင်ဆီပေးမည်ဟု ပထမဆုံးကမ်းလှမ်းလာသူမှာ သူ၏အစ်ကိုကြီးဖြစ်သူ ဂျယ်ရီပင်ဖြစ်သည်။ ယခင်အခါက အစ်ကိုများဖြစ်ကြသော ဂျွန်နှင့်ဂျိုးတို့သည် ဂျော့်ရှ်ကို ညအိပ်ရာဝင်တိုင်း နမ်းလေ့ရှိကြသည်။ အသက် ၁၃ နှစ်ထဲဝင်လာသည့်အခါ၌ သူက သူသည်အနမ်းခံသင့်သောအရွယ် မဟုတ်တော့ကြောင်း မိခင်အား တစ်ဆင့်ပြောခိုင်းခဲ့သည်။ သို့သော် ယခုဖျားနာနေစဉ်အတွင်း အသက် ၁၅ နှစ်ရှိလင့်ကစား သူ့အစ်ကိုတို့က သူ့ကိုပြန်နမ်းကြသည်။ သူ့ကိုဖက်၍ အတူဆုတောင်းကြသည့်အခါ ဂျော့်ရှ်က ယခုအခါ အစ်ကိုတို့ဤသို့ပြုကြသည်ကို သူလက်ခံကြောင်း၊ သူ့အား အစ်ကိုတို့ချစ်နေသေးသည်ကို ပြသရာရောက်ကြောင်း မိခင်အား ပြောပြသည်။

လူမှုရေးနယ်ပယ်မှ အားပေးထောက်ခံမှုများ

ဂျော်ရှူဝါထံရောက်လာသော လူမှုရေးနယ်ပယ်မှ အားပေးထောက်ခံမှုများမှာ များပြားကျယ်ပြန့်လှသည်ဟု မိဘဖြစ်သူ ဂျယ်ရီနှင့်စန္ဒရာတို့ကဆိုသည်။ ၁၉၉၄ ခုနှစ်မေလအတွင်း “ဂျော်ရှူဝါသည် နေ့စဉ်ပျမ်းမျှ ကတ် ၂၀ လက်ခံရရှိသည်။ ၎င်းတို့မှာ ရိုမေးနီးယားနှင့် မက္ကဆီကိုကဲ့သို့ ဝေးလံသောဒေသများမှ ရောက်ရှိလာသည်။ အယ်ဘာတာနှင့်ဝါရှင်တန်ကဲ့သို့ ဝေးလံသောဒေသများမှ တယ်လီဖုန်းနှင့်ဖက်စ်များကိုလည်း ဆေးရုံမှနေ၍လက်ခံရရှိသည်။ ထိုမျှမက သစ်သီးခြင်းခြောက်ခြင်းနှင့် ပန်းအများအပြားကိုလည်း ရရှိခဲ့သည်။ . . . သူ၏အခြေအနေ . . . တိုးတက်သည့်လက္ခဏာပြလာသောအခါ သူနာပြုများက သူ့ကိုဂုဏ်ပြုသည့်အနေနှင့် ဟာဝိုင်ယီစားပွဲစီစဉ်ကျင်းပကြသည်။ သူတို့သည် ပလတ်စတစ်အိတ်များကိုဖြတ်၍ မြက်စကတ်သဏ္ဌာန်ပြုလုပ်ကာ သူ့အခန်းထဲ၌ ဟူးလားအကကကြသည်။ ‘သားလေးခမျာ မျက်ရည်ကျမတတ် အူတက်အောင်ရယ်ရှာသည်’ ဟုစန္ဒရာကပြောပြသည်။

ဂျော့်ရှ်၏ဖခင်ဂျက်ဖရီကလည်း မှတ်သားဖွယ်ရာအချို့ ဖြည့်စွက်ပြောကြားခဲ့သည်။ “သူ့ကျောင်းကကျောင်းသားအားလုံးကို ဆေးရုံပေါ်လာကြည့်ဖို့ ကျွန်တော်တို့ခွင့်မပေးနိုင်ဘူးလေ။ ဒါနဲ့ ကျောင်းအုပ်ဆရာကြီးတစ်ဦးတည်းလာပြီး ဂျော့်ရှ်နဲ့ပတ်သက်တဲ့သတင်းကို မှတ်ယူသွားတယ်။ ကျောင်းသားတွေက ဂျော့်ရှ်ဆီကို အပိုင်း ၁,၀၀၀-ပါတဲ့မီးရထားလမ်းရှုခင်း ပဟေဠိပုံတစ်ပုံပို့ပေးလိုက်တယ်။ ဂျော့်ရှ်က မီးရထားအကြောင်း သိပ်ဝါသနာကြီးတာကိုး။ ရဲတပ်ဖွဲ့ကလည်း ဂျော့်ရှ်ရဲ့ကုန်ကျစရိတ်တချို့ကိုကာမိဖို့အတွက် ရန်ပုံငွေရှာဖို့ ကပွဲကျင်းပလိုပေမဲ့ ကျွန်တော်တို့က အခွင့်မပေးခဲ့ဘူး။ ကျောင်းက လူမှုရေးလေ့လာမှုဘာသာရပ်အတန်းမှာ လူ့အခွင့်အရေးအကြောင်း ပြောကြဆိုကြတဲ့အတွက် အဲဒီအတန်းထဲကကျောင်းသားအားလုံးက ဂျော့်ရှ်ကို ဒီအကြောင်းလာဆွေးနွေးဖို့၊ သူ့ရဲ့ခံစားချက်ကိုရှင်းပြဖို့ စာရေးကြတယ်။”

ဤကာလတစ်လျှောက်အတွင်း နေ့စဉ်ထုတ်သတင်းစာ အတော်များများက မျက်နှာဖုံး၌ ရုပ်ပုံများနှင့်တကွ သူ၏သတင်းများကို ရေးသားဖော်ပြကြသည်။ အချို့ကျောင်းအုပ်များက ဂျော်ရှူဝါ၏ကျန်းမာရေးနှင့်ပတ်သက်သော သတင်းလွှာများကို ဖြန့်ဝေကြသည်။ ဂျော့်ရှ်အနေဖြင့် ကျန်းမာလာလျှင် ဟောပြောချက်ပေးရန် ဖိတ်ကြားချက်များကို လက်ခံရရှိသည့်ပြင် ကျောင်းများကလည်း ဤအမှုနှင့်စပ်လျဉ်းသည့် အသေးစိတ်ဆွေးနွေးခန်းများပင် ပြုလုပ်ကြသည်။

“ဂျော်ရှူဝါဟာ ဒီရောဂါဆိုးရပြီး အသက်အန္တရာယ်နဲ့ပက်ပင်းတွေ့လာတဲ့အခါမှာ ဘာများထူးထူးခြားခြားပြောင်းလဲတာကို သတိထားမိသလဲ” ဟူ၍ နိုးလော့! ကမေးမြန်းရာ၌ ဂျော့်ရှ်၏ဖခင်ဂျယ်ရီက “ပြောင်းလဲမှုအကြီးအကျယ် ရှိခဲ့ပါတယ်။ ပြီးတော့ နေ့ချင်းညချင်းလိုလိုပါပဲ။ ဂျော့်ရှ်ဟာ အရင်ကဆိုရင် အပူအပင်မရှိ အေးအေးဆေးဆေးနေတတ်တဲ့ ကလေးတစ်ယောက်ပါ။ တစ်ခါတစ်ခါကျတော့ ၁၅-နှစ်အရွယ်ကလေးတွေ လိုအပ်နေကျ အကြံဉာဏ်ကိုတော့လိုတယ်။ အခုတော့ သူဟာ ကျွန်တော့်အတွက် အံ့ဩစရာပါပဲ။ သူဟာ နေ့ချင်းညချင်း ကြီးပြင်းလာသလိုပဲ။ တစ်ညနေခင်းမှာ သူ့ရှေ့နေက သူနဲ့စကားပြောချင်တယ်ဆိုလို့ ဂျော်ရှူဝါက ရှောင်ပေးပါလို့ပြောတယ်။ မနေ့တစ်နေ့က သူဟာ သူတို့အတန်းထဲမှာ လူရွှင်တော်ဖြစ်ခဲ့တယ်။ နောက်တစ်နေ့မှာ ချက်ချင်းရင့်ကျက်လာပြီး ရှေ့နေတွေ၊ တရားသူကြီးတွေနဲ့တောင် စကားပြောတတ်လာတယ်။ အကျပ်အတည်းနဲ့ရင်ဆိုင်လာတဲ့အခါမှာ ရှိတယ်လို့တောင်မထင်ရတဲ့ နှလုံးသားရဲ့အတွင်းပိုင်းမှာ ကိန်းအောင်းနေတဲ့အရာတွေ ပေါ်ထွက်လာနိုင်တယ်” ဟူ၍ သူ၏ထင်မြင်ချက်ကို ထုတ်ဖော်ပြောပြသည်။

ဒေါက်တာစကားလ်လီက ဂျော်ရှူဝါကို လှပတင့်တယ်စွာ ချီးမွမ်းဂုဏ်ပြုခဲ့သည်။ သူမက “ကျွန်မဆေးကုသပေးခဲ့သမျှလူနာတွေထဲမှာ ဒီသငယ်လေးဟာ ခင်မင်စရာအကောင်းဆုံး၊ ထောက်ထားစာနာမှုအရှိဆုံး၊ ယဉ်ကျေးရည်မွန်မှုအရှိဆုံး၊ သနားကရုဏာအရှိဆုံး သငယ်လေးဖြစ်တယ်။ သူဟာ အင်မတန်သတ္တိကောင်းတယ်။ ကျွန်မတို့ဘယ်တော့မှ မေ့နိုင်မှာမဟုတ်တဲ့သငယ်လေးပါပဲ။ သိပ်ကိုချစ်စရာကောင်းတဲ့သငယ်လည်း ဖြစ်ပါတယ်။ မစ္စက်ဝေါ့ကာအနေနဲ့ အင်မတန်ဂုဏ်ယူစရာကောင်းပါတယ်” ဟူ၍ဂျော်ရှူဝါ၏မိခင်ကို ထုတ်ဖော်ပြောကြားခဲ့သည်။

သီတင်းပတ်အနည်းငယ်ကြာပြီးနောက် ဂျော်ရှူဝါ၏သွေးကင်ဆာရောဂါအခြေအနေ ပြောင်းလဲသွားသည်။ ရောဂါသက်သာသည့်ကာလတိုလေး ကုန်ဆုံးသွားပြီး ကင်ဆာရောဂါပြန်ပေါ်လာသည်။ ဒေါက်တာစကားလ်လီက ဂျော်ရှူဝါသည် ကြာကြာအသက်ရှင်ရတော့မည်မဟုတ်ကြောင်း၊ သီတင်းပတ်အနည်းငယ်၊ သို့တည်းမဟုတ် အလွန်ဆုံးနှစ်လသုံးလလောက်သာ အသက်ရှင်ရန် မျှော်လင့်ချက်ရှိတော့ကြောင်း ဂျော်ရှူဝါ၏မိသားစုကို အသိပေးလိုက်သည်။ နောက်တစ်ညနေတွင် ဂျော်ရှူဝါ၏မိဘများရှေ့တွင် ဒေါက်တာစကားလ်လီက ကင်ဆာရောဂါပြန်ပေါ်လာကြောင်း၊ ယခုတစ်ကြိမ်တွင် အစာအိမ်အတွင်း၌ပင် ရောက်နေနိုင်ကြောင်း ဂျော်ရှူဝါအားပြောပြလိုက်သည်။ ဂျော်ရှူဝါက “အို- မဖြစ်နိုင်ပါဘူး၊ ပြန်မပေါ်ပါဘူး။ သေချာလို့လား” ဟူ၍ပြောလိုက်သည်။ ဒေါက်တာစကားလ်လီက “ဂျော့်ရှ်၊ မင်းရဲ့သွေးစစ်ချက်အဖြေက အခြေအနေသိပ်မကောင်းဘူးကွယ်” ဟုပြောပြသည်။ များမကြာမီ ဂျယ်ရီကအခန်းထဲမှထွက်သွားသည်။ ထိုနောက် ဒေါက်တာစကားလ်လီ လိုက်၍ထွက်သွားသည်။

နာကျင်လျက်ရှိသောနှလုံးသားနှစ်ခု အေးငြိမ်းရာရှာကြ

ဂျော့်ရှ်၏မိခင်က ထိုစဉ်ကမြင်ကွင်းကို ဤသို့ဖော်ပြသည်– “တစ်ခန်းလုံး တိတ်ဆိတ်ငြိမ်သက်နေတယ်။ ကျွန်မ သားလေးရဲ့ခုတင်ဘေးကို ထိုင်ခုံတစ်လုံးဆွဲထိုင်ပြီး သူ့လက်ကိုဆုပ်ကိုင်ထားလိုက်တယ်။ ဆရာဝန်ပြောသွားတဲ့စကားကြောင့် သားလေးစိုးရိမ်ပူပန်သွားသလား၊ စိတ်ဓာတ်ကျသွားသလားလို့ မေးကြည့်တော့ သူက ‘သားသေမယ့်အကြောင်း တစ်ခါမှမစဉ်းစားခဲ့သလို ဒီလိုမြန်မြန်ဆန်ဆန်နဲ့ ခွဲခွာသွားရမှာကိုလည်း မစဉ်းစားမိဘူး။ ဒါပေမဲ့ မေမေရယ်၊ မစိုးရိမ်ပါနဲ့၊ သားသေရမှာကိုမကြောက်သလို သေခြင်းတရားကိုလည်း မကြောက်ပါဘူး။ သားအသက်ထွက်တဲ့အခါ သားအနားမှာရှိနေပါနော်၊ သားတစ်ယောက်တည်းနဲ့ မသေချင်ဘူး’ ဟူ၍ပြောရှာတယ်။ ကျွန်မလည်း စိတ်မထိန်းနိုင်ဘဲငိုပြီး သားလေးကိုဖက်ထားလိုက်တယ်။ သူကလည်းငိုရင်းနဲ့ ‘မေမေ၊ သားဟာ ယေဟောဝါရဲ့လက်ထဲမှာရှိပါတယ်။ မေမေတို့အားလုံးကို သစ္စာတရားမှာတည်မြဲနေကြစေချင်တယ်။ ဒါမှလည်း သားရှင်ပြန်ထမြောက်လာတာကို ကြိုဆိုနိုင်ကြမှာ။ မေမေ၊ သားသေချာပေါက်ပြောနိုင်တာက သားကို ယေဟောဝါကျိန်းသေ ရှင်ပြန်ထမြောက်စေမယ်ဆိုတာ သားကောင်းကောင်းသိတယ်။ ကိုယ်တော်ဟာ သားရဲ့နှလုံးကိုတွေ့ပြီး သားဟာကိုယ်တော်ကို တကယ်ချစ်တယ်ဆိုတာ သိလို့ပါပဲ’ ဆိုပြီးဆက်ပြောတယ်။

“ကျွန်မတစ်ခါထပ်ငိုမိပြန်တယ်။ သူ့ကိုကျွန်မတို့ ဘယ်လောက်ချစ်ကြောင်း၊ ဒီ ၁၆ နှစ်အတွင်းမှာ ကျွန်မတို့နဲ့အတူနေခဲ့တာကို ကျွန်မတို့ဘယ်လောက်ဂုဏ်ယူဝမ်းမြောက်ကြောင်း၊ ဒိထက်ပိုအရေးကြီးတာက သူ့ကိုယေဟောဝါ ဘယ်လောက်နှစ်သက်မြတ်နိုးကြောင်း ကျွန်မပြောပြတယ်။ သူကလည်း ‘မေမေ၊ သားသိပါတယ်’ လို့ပြန်ပြောတယ်။ ကျွန်မက ‘ဂျော့်ရှ်၊ သားလေးမေမေတို့ကို ခွဲသွားတော့မယ်ဆိုတဲ့အသိကြောင့် မေမေတို့အကြီးအကျယ် စိတ်ထိခိုက်ရပါတယ်။ ဒါပေမဲ့ သားလေးကို ဆက်ပြီးအသက်ရှင်နေအောင် ကြိုးစားပြန်ရင်လည်း မေမေတို့ဘက်က တစ်ကိုယ်ကောင်းဆန်ရာကျမယ်’ ဆိုပြီးပြောပြလိုက်တယ်။ သူက ‘မေမေ၊ သားသိပါတယ်၊ သားလည်းဒီတိုက်ပွဲအတွက်နဲ့ ပင်ပန်းနွမ်းနယ်လှပြီ’ လို့ပြောသွားရှာတယ်။”

ဥပဒေဆိုင်ရာ အခက်အလက်များ

ဂျော်ရှူဝါ၏ရှေ့နေတစ်ဦးဖြစ်သူ ဒန်နီယယ်ပိုးလ်က အခြားရှေ့နေများနှင့်အတူ ဂျော်ရှူဝါ ဝေါ့ကာ၏အမှုကြောင့် ပေါ်ထွက်လာသည့်ပြဿနာများကို ကိုယ်တွယ်ဖြေရှင်းကြသည်။ အရွယ်မရောက်သေးသူ ဆေးကုသမှုသဘောတူညီချက်ဆိုင်ရာ အက်ဥပဒေအရ ရင့်ကျက်မှုရှိသော အရွယ်မရောက်သေးသူဆိုသည်မှာ အဘယ်နည်း။ ကုသမှုတစ်ခုခုကို သဘောတူလက်ခံသည်ဆိုရာ၌ ကုသမှုတစ်ခုခုကိုငြင်းပယ်ပိုင်ခွင့် အကျုံးဝင်သလော။ ဤကိစ္စ၌ မိမိဘာသာဆုံးဖြတ်ချက်ချနိုင်သည့် စွမ်းရည်မရှိသူအဖို့ အစိုးရကဆောင်ရွက်ပေးရသည့် နိုင်ငံ၏အမိအဘ (parens patriae) လျှောက်လဲချက်သည် သက်ဆိုင်မှုရှိပါသလော။ ပုဂ္ဂိုလ်တစ်ဦးအနေဖြင့် မိမိ၏ကိုယ်ခန္ဓာကို မည်သို့ပြုသင့်သည်ဟု ဆုံးဖြတ်ပိုင်ခွင့်ရှိသလော။ ဤပိုင်ခွင့်သည် ကျူးလွန်ဖောက်ဖျက်၍မရသော ပိုင်ခွင့်ဖြစ်သလော။ ကနေဒါနိုင်ငံ၏ရိုးရာဥပဒေက မည်သို့ဆိုသနည်း။ ဤအမှုတွင် ၎င်းရိုးရာဥပဒေသည် သက်ဆိုင်မှုရှိသလော။ နောက်ဆုံးအနေနှင့် ဂျော်ရှူဝါဝေါ့ကာ၏အမှုသည် ကနဦးကတည်းက တရားရုံးသို့ရောက်စရာလိုခဲ့သလော။

ဤပြဿနာကို အယူခံတရားရုံး၏ဆုံးဖြတ်လွှာတွင် အပြီးသတ်ဖြေရှင်းထားပါသလော။ ဟုတ်ကဲ့၊ ဖြေရှင်းထားပါသည်။ စစ်ဆေးကြားနာခြင်းပြီးဆုံးသည့်အခါ၌ တရားသူကြီးငါးဦးထိုင်သည့် တရားခုံရုံးကို ခေတ္တရပ်နားပြီးနောက် ပြန်လည်စတင်သည့်အခါ ဗဟိုတရားရုံးတရားသူကြီးတို့၏ တညီတညွတ်တည်းသောဆုံးဖြတ်ချက်ကို အောက်ပါအတိုင်း နှုတ်ဖြင့်ဖတ်ကြားသွားသည်–

“အထက်ပါအယူခံမှုကို ခွင့်ပြုလက်ခံလိုက်သည်။ [အောက်တရားရုံးတရားသူကြီး] တန်ဘူးလ်၊ ဂျေ၏ဆုံးဖြတ်ချက်ကို ပယ်ဖျက်လိုက်သည်။ ဂျော်ရှူဝါဝေါ့ကာသည် အရွယ်မရောက်သေးသူ ဆေးကုသမှုသဘောတူညီချက်ဆိုင်ရာ အက်ဥပဒေအရ ရင့်ကျက်မှုရှိသည့် အရွယ်မရောက်သေးသူဖြစ်ကြောင်း ကြေညာလိုက်သည်။ ဆေးကုသမှုနှင့်စပ်လျဉ်း၍ ကာယကံရှင်၏မိဘတို့၏ သဘောတူညီချက်ကို ရယူရန်မလိုအပ်ပါ။ တရားစရိတ်ကိစ္စကို ကျွန်ုပ်တို့၏စီရင်ဆုံးဖြတ်လွှာတွင် ဖော်ပြပါမည်။”

ကနေဒါရိုးရာဥပဒေသည် ဤအမှုနှင့်သက်ဆိုင်ခြင်းရှိသလော။ ရှိပါသည်။ “ကနေဒါနိုင်ငံတွင် ရိုးရာဥပဒေက ရင့်ကျက်မှုရှိသော အရွယ်မရောက်သေးသူနှင့်ဆိုင်သည့် စီရင်ထုံးကို အသိအမှတ်ပြုသည်။ ဆိုလိုသည်မှာ ကာယကံရှင်သည် ကမ်းလှမ်းထားသည့်ကုထုံး၏ သဘောသဘာဝနှင့် အကျိုးဆက်တို့ကို ကောင်းစွာနားလည်သဘောပေါက်သည် ဟူ၍ဖြစ်သည်။ . . . နယူးဘရန့်ဇဝိခ် စီရင်စုနယ်သည် ၎င်း၏ရိုးရာဥပဒေတွင် အရွယ်မရောက်သေးသူ ဆေးကုသမှုသဘောတူညီချက်ဆိုင်ရာ အက်ဥပဒေ ကိုပင် ထည့်သွင်းဖော်ပြထားသည်အထိ ဥပဒေများကို စနစ်တကျ စီစဉ်စုစည်းထားသည်” ဟူ၍ စစ်ဆေးကြားနာခြင်းဆိုင်ရာမှတ်တမ်းလွှာတွင် ဖော်ပြထားသည်။

နောက်ဆုံးတွင် ဂျော်ရှူဝါအနေဖြင့် သွေးသွင်းခြင်းကို တရားဝင်ငြင်းပယ်ပိုင်ခွင့်ရှိကြောင်း အတည်ပြုချက်ရယူရန် သူ၏အမှုကို တရားရုံးသို့တင်ပြစရာလိုသလော။ မလိုပါ။ “အက်ဥပဒေ ၌ပါရှိသည့်ပြဋ္ဌာန်းချက်များနှင့် ကိုက်ညီနေမည်ဆိုလျှင် တရားရုံးသို့လျှောက်ထားစရာမလိုပါ။”

တရားသူကြီးချုပ် ဒဗ္ဗလျူ.အယ်လ်.ဟွိုက်က အောက်ပါအတိုင်းကောက်ချက်ချလိုက်သည်– “ဤလျှောက်ထားချက်ကို သဘောရိုးနှင့် သတိဝီရိယကြီးစွာဖြင့် တင်လျှောက်ခဲ့ခြင်းဖြစ်သည်။ သို့ရာတွင် ဤလျှောက်ထားချက်၏အကျိုးဆက်ကြောင့် ဂျော်ရှူဝါနှင့်၎င်း၏မိသားစုသည် မလိုအပ်ဘဲ တရားစွဲဆိုခြင်းခံရသည်။ ဤအကြောင်းကြောင့် သူတို့သည် ဆေးရုံမှ တရားစရိတ်တောင်းခံနိုင်သည်ဟု ဤခုံရုံးမှ စီရင်ချက်ချမှတ်လိုက်သည်။”

ဂျော်ရှူဝါသည် ၁၉၉၄ ခုနှစ် အောက်တိုဘာလ ၄ ရက်နေ့တွင် ကွယ်လွန်ခဲ့သည်။

[စာမျက်နှာ ၁၂ ပါ အကျဉ်းဖော်ပြချက်]

“ဤစီရင်ဆုံးဖြတ်ချက်သည် . . . ဆရာဝန်များနှင့်ဆေးရုံများအတွက် . . . ရှင်းလင်းပြတ်သားသည့်လမ်းညွှန် ချမှတ်ပေးသည်။”—Canadian Medical Association Journal

[စာမျက်နှာ ၁၃ ပါ အကျဉ်းဖော်ပြချက်]

“ယေဟောဝါသက်သေများ၏ အောင်ပွဲမျှသာမဟုတ်ဘဲ ကျွန်ုပ်တို့အားလုံး၏ အောင်ပွဲပင်ဖြစ်သည်။”—Telegraph Journal

[စာမျက်နှာ ၁၄ ပါ အကျဉ်းဖော်ပြချက်]

“သွေးနဲ့ပတ်သက်တဲ့ ယေဟောဝါရဲ့ပညတ်တော်အတိုင်းပဲ ကျွန်တော်အသက်ရှင်ချင်ပါတယ်။”—ဂျော်ရှူဝါ ဝေါ့ကာ

[စာမျက်နှာ ၁၅ ပါ အကျဉ်းဖော်ပြချက်]

“သူ့လိုယုံကြည်ခြင်းမျိုးကို ကျွန်တော့်တစ်သက်တာမှာတစ်ခါမှမတွေ့ ဖူးဘူး။”—ဒေါက်တာ ဂယ်ရီ