“လူတိုင်းကိုရွှင်လန်းစေသင့်တဲ့ အရာတစ်ခု”

တောင်ပစိဖိတ်ရှိ ကျွန်းကိုးကျွန်းဖြင့်ဖွဲ့စည်းထားသော လှပသည့်တူဗာလူနိုင်ငံတွင် လူဦးရေ ၁၀,၅၀၀ ခန့်ရှိ၏။ သို့သော် “လူအပေါင်းတို့သည် ကယ်တင်ခြင်းသို့ရောက်၍ [အမှန်] တရားကိုသိစေခြင်းငှာ ဘုရားသခင်အလိုတော်ရှိ” ကြောင်းအသိအမှတ်ပြုကာ ဒေသခံယေဟောဝါသက်သေများသည် မိမိတို့ဘာသာစကားဖြင့် ကျမ်းစာစာပေများကို ရရှိလိုစိတ်ပြင်းပြကြသည်။ (၁ တိမောသေ ၂:၄) မိမိတို့ဘာသာစကားဖြင့် အဘိဓာန်မရှိသောကြောင့် ယင်းက စိန်ခေါ်ချက်တစ်ခုဖြစ်စေသည်။ ၁၉၇၉ ခုနှစ်တွင် တူဗာလူနိုင်ငံ၌အမှုထမ်းနေသော ယေဟောဝါသက်သေများ၏ ခရစ်ယာန်သာသနာပြုတစ်ဦးသည် ထိုစိန်ခေါ်ချက်ကိုရင်ဆိုင်ခဲ့သည်။ သူနှင့် သူ့ဇနီးသည်သည် ဒေသခံမိသားစုတစ်ခုနှင့်အတူနေထိုင်ကာ ဘာသာစကားကိုသင်ယူ၍ တူဗာလူခက်ဆစ်အဘိဓာန်တစ်ခုကို တဖြည်းဖြည်းပြုစုခဲ့သည်။ ၁၉၈၄ တိုင်သော် နယူးယောက်၊ ကင်းမျှော်စင်သမ္မာကျမ်းစာနှင့်ဝေစာအသင်းမှ သင်သည် ကမ္ဘာ့ပရဒိသုအတွင်း ထာဝစဉ်အသက်ရှင်နိုင်သည်ဟူသောစာအုပ်ကို တူဗာလူဘာသာစကားဖြင့်ထုတ်ဝေခဲ့သည်။

တူဗာလူနိုင်ငံ၏ဝန်ကြီးချုပ်ဟောင်း ဒေါက်တာ တီ. ပူအာပူအာက ထာဝစဉ်အသက်ရှင်စာအုပ်အတွက် ကျေးဇူးတင်ကြောင်းဖော်ပြသည့်စာတစ်စောင်ကိုရေးခဲ့သည်။ သူဤသို့ရေးသားခဲ့၏– “ဒီစာအုပ်ဟာ တူဗာလူရဲ့မရှိမဖြစ်အမွေအနှစ်ထဲမှာ အသစ်စက်စက်ထပ်တိုးလာသောအရေးကြီးတဲ့အရာဖြစ်တယ်။ သင်တို့လုပ်ဆောင်ခဲ့တဲ့အပိုင်းကဏ္ဍဖြစ်တဲ့ ဒီနိုင်ငံသားတွေရဲ့ ဝိညာဉ်ရေးအသက်တာကို ပြုစုပျိုးထောင်ပေးရာမှာ ထူးကဲပြောင်မြောက်တဲ့အပိုင်းကဏ္ဍနဲ့ပတ်သက်လို့ သင်တို့အလွန်ဝမ်းမြောက်သင့်ပါတယ်။ ဒီလုပ်ဆောင်မှုကို ပညာပေးစာအုပ်တွေပုံနှိပ်ခြင်းနဲ့ပတ်သက်တဲ့ တူဗာလူနိုင်ငံရဲ့သမိုင်းမှာ မှတ်တမ်းတင်ခံရမယ်လို့ ကျွန်တော်ယုံကြည်တယ်။ . . . ဒီ [ပြီးမြောက်အောင်မြင်မှု] ဟာလူတိုင်းကိုရွှင်လန်းစေသင့်တဲ့အရာတစ်ခုပါပဲ။”

ဘာသာပြန်သူစုဆောင်းထားသောစကားလုံးစာရင်းက ၁၉၉၃ တွင် တူဗာလူ-အင်္ဂလိပ်အဘိဓာန်ကို ပုံနှိပ်ထုတ်ဝေဖို့ဖြစ်စေခဲ့သည်။ ၎င်းသည် ထိုဘာသာစကားဖြင့် လူထုအတွက် ပထမဦးဆုံးအဘိဓာန်ဖြစ်၏။ မကြာသေးမီက တူဗာလူအမျိုးသားဘာသာစကားဘုတ်အဖွဲ့က သူတို့၏ပထမဦးဆုံး တိုင်းရင်းဘာသာစကားအဘိဓာန်ကိုပြုစုရာ၌ ယင်းကိုအသုံးပြုခွင့်တောင်းခဲ့ကြသည်။

၁၉၈၉၊ ဇန်နဝါရီ ၁ ရက်မှစ၍ တူဗာလူဘာသာစကားဖြင့် တစ်လတစ်ကြိမ်ထုတ် ကင်းမျှော်စင်မဂ္ဂဇင်းကို ထုတ်ဝေလာခဲ့ပြီ။ သင်၏ဒုတိယဘာသာစကားဖြင့် ဤမဂ္ဂဇင်းကိုဖတ်ရှုနေပါက သင်၏မိခင်ဘာသာစကားသည် ကင်းမျှော်စင်ထုတ်ဝေသည့်ဘာသာစကားများတွင် ပါမပါသိရှိဖို့ စာမျက်နှာ ၂ ကိုစစ်ဆေးကြည့်ပါ။ သင်၏မိခင်ဘာသာစကားဖြင့် ၎င်းကိုဖတ်ရှုခြင်းက သင့်အတွက်ထပ်ဆင့်ပျော်ရွှင်မှုဖြစ်စေမည်အမှန်။