ယေရှုကို ဒီဇင်ဘာလမှာ မွေးဖွားခဲ့သလား

သမ္မာကျမ်းစာမှာ ယေရှုမွေးတဲ့အချိန်ကို မဖော်ပြထားဘူး။ ဒါပေမဲ့ ယေရှုကို ဒီဇင်ဘာလမှာ မွေးတာမဟုတ်ဘူးလို့ ပြောနိုင်တဲ့ ခိုင်လုံတဲ့အကြောင်းရင်းကို ဖော်ပြပေးတယ်။

ယေရှုမွေးဖွားရာနေရာဖြစ်တဲ့ ဗက်လင်မြို့ရဲ့ အဲဒီအချိန်က ရာသီဥတုအခြေအနေကို သုံးသပ်ကြည့်ပါ။ ဂျူးပြက္ခဒိန်လဖြစ်တဲ့ ခိသလုလ (နိုဝင်ဘာ/ဒီဇင်ဘာ) ဟာ ချမ်းအေးပြီး မိုးရွာသွန်းတဲ့လဖြစ်တယ်။ ခိသလုလပြီးရင် နောက်တစ်လဟာ တေဗက်လ (ဒီဇင်ဘာ/ဇန်နဝါရီ) ဖြစ်တယ်။ အဲဒီလက အပူချိန်အနည်းဆုံးလဖြစ်ပြီး ကုန်းမြင့်ဒေသတွေမှာ အခါအားလျော်စွာ ဆီးနှင်းတွေကျတတ်တယ်။ အဲဒီဒေသရဲ့ ရာသီဥတုနဲ့ပတ်သက်တဲ့ ကျမ်းစာဖော်ပြချက်ကို ကြည့်ကြစို့။

ကျမ်းရေးသူ ဧဇရက ခိသလုလဟာ တကယ်ချမ်းအေးပြီး မိုးရွာသွန်းတဲ့လဖြစ်ကြောင်း ဖော်ပြတယ်။ “နဝမလ [ခိသလုလ] အရက်နှစ်ဆယ်” မှာ လူတွေက ဂျေရုဆလင်မြို့မှာ စုဝေးကြတယ်လို့ ဖော်ပြပြီးနောက် ‘သည်းထန်စွာမိုးရွာသွန်းသောကြောင့် တုန်လှုပ် [“ခိုက်ခိုက်တုန်၊” ကဘ]’ နေကြတယ်လို့ ဧဇရက မှတ်တမ်းတင်ထားတယ်။ အဲဒီအချိန်ရဲ့ ရာသီဥတုနဲ့ပတ်သက်ပြီး စုဝေးရောက်ရှိနေသူတွေကိုယ်နှိုက်က “သည်းထန်စွာမိုးရွာသောကာလ ဖြစ်ပါ၏။ အကျွန်ုပ်တို့သည် အိမ်ပြင်မှာ မရပ်မနေနိုင်ပါ” လို့ပြောခဲ့ကြတယ်။ (ဧဇရ ၁၀:၉၊ ၁၃; ယေရမိ ၃၆:၂၂) အဲဒီဒေသမှာနေထိုင်တဲ့ သိုးထိန်းတွေဟာ ဒီဇင်ဘာလဝန်းကျင်မှာ မိမိတို့ရဲ့သိုးအုပ်နဲ့အတူ ညဘက် အိမ်ပြင်ထွက်ကြမှာမဟုတ်ဘူးဆိုတာ သေချာတယ်။

ဒါပေမဲ့ ယေရှုမွေးဖွားတဲ့ညမှာ သိုးထိန်းတွေဟာ သူတို့ရဲ့သိုးတွေကို ကွင်းပြင်မှာ ထိန်းကျောင်းနေကြတယ်လို့ ကျမ်းစာမှာဖော်ပြထားတယ်။ ကျမ်းရေးသူလုကာက အဲဒီအချိန်မှာ သိုးထိန်းတွေဟာ ဗက်လင်မြို့အနီး ကွင်းပြင်မှာရှိနေပြီး ‘မိမိတို့၏သိုးအုပ်များကို ညအခါထိန်းကျောင်း’ နေကြတယ်လို့ ဖော်ပြထားတယ်။ (လုကာ ၂:၈-၁၂) သိုးထိန်းတွေဟာ နေ့ဘက်မှာသာ သိုးတွေကို လှည့်လည်ထိန်းကျောင်းတာမဟုတ်ဘူး။ ညအချိန်မှာလည်း သိုးတွေနဲ့အတူ ကွင်းပြင်မှာရှိနေကြတာဖြစ်တယ်။ ကွင်းပြင်မှာရှိနေတယ်ဆိုတဲ့ အဲဒီဖော်ပြချက်က ဒီဇင်ဘာလမှာ ဗက်လင်မြို့ရဲ့ အေးစိမ့်ပြီး မိုးရွာတဲ့ရာသီဥတုအခြေအနေနဲ့ ကိုက်ညီပါ့မလား။ မကိုက်ညီပါဘူး။ ဒါကြောင့် ယေရှုမွေးဖွားချိန်မှာ ဖြစ်ပျက်တဲ့အခြေအနေတွေက သူ့ကို ဒီဇင်ဘာလမှာ မွေးဖွားတာမဟုတ်ဘူးဆိုတာ ဖော်ပြတယ်။a

ကျမ်းစာမှာ ယေရှုသေဆုံးချိန်ကို တိတိကျကျ ဖော်ပြထားတယ်၊ ဒါပေမဲ့ မွေးဖွားချိန်ကိုတော့ အနည်းငယ်ပဲ ဖော်ပြတယ်။ ဒါက ဘုရင်ရှောလမုန်ရဲ့ ဒီစကားတွေကို ပြန်အမှတ်ရစေတယ်– “ကောင်းသောအသရေသည် နံ့သာဆီထက် သာ၍ကောင်း၏။ သေရသောနေ့သည်လည်း ဖွားမြင်သောနေ့ထက် သာ၍ကောင်း၏။” (ဒေသနာ ၇:၁) ဒါကြောင့် သမ္မာကျမ်းစာက ယေရှုရဲ့အမှုဆောင်ခြင်း၊ သေခြင်းတို့နဲ့ပတ်သက်ပြီး အသေးစိတ်အချက်အလက်များစွာကို ဖော်ပြထားပေမဲ့ မွေးဖွားချိန်နဲ့ပတ်သက်ပြီး အနည်းငယ်ပဲဖော်ပြတာက အံ့ဩစရာမဟုတ်ပါဘူး။