ယေဟောဝါသက်သေတွေရဲ့ ယုံကြည်ချက်က ဘာလဲ

‘ကျမ်းဂန်ရှိသမျှသည် ဘုရားသခင့် စွမ်းအားတော်၏ လမ်းညွှန်မှုဖြင့် ရေးထားသောကြောင့် အကျိုးရှိ’ တယ်ဆိုတာ ယေဟောဝါသက်သေတွေ ယုံကြည်ထားတယ်။ (၂ တိမောသေ ၃:၁၆) ဖန်ဆင်းရှင်အကြောင်းသိရှိဖို့၊ အဓိပ္ပာယ်ရှိရှိနေထိုင်နိုင်ဖို့ လမ်းညွှန်စာအုပ်အဖြစ် သမ္မာကျမ်းစာကို ကျွန်ုပ်တို့ အသုံးပြုကြတယ်။

“ဤအမှုကို ဖန်ဆင်းစီရင်သောဘုရား၊ ယေဟောဝါအမည်ရှိသော ထာဝရဘုရား” ဆိုပြီး ကျမ်းစာမှာ ဖော်ပြထားပါတယ်။ (ယေရမိ ၃၃:၂) ဒါကြောင့် ကျွန်ုပ်တို့က ယေဟောဝါဘုရားတစ်ပါးတည်းကိုပဲ ကိုးကွယ်ပြီး ကိုယ်တော်ရဲ့သက်သေတွေအနေနဲ့ ယေဟောဝါရဲ့နာမည်ကို လူတွေသိလာအောင် ကြိုးစားနေကြပါတယ်။—ဟေရှာယ ၄၃:၁၀-၁၂။

ယေဟောဝါသက်သေတွေဖြစ်တဲ့ ကျွန်ုပ်တို့က အောက်ပါအချက်တွေကို ယုံကြည်ထားကြတယ်။ ယေရှုက မြေကြီးပေါ်ဆင်းလာတဲ့ “ဘုရားသခင်၏သားတော်၊”a မေရှိယဖြစ်တယ်။ (ယောဟန် ၁:၃၄၊ ၄၁; ၄:၂၅၊ ၂၆) ယေရှုသေဆုံးပြီးနောက် ကောင်းကင်ပေါ် တက်ကြွသွားပြီ။ (၁ ကောရိန္သု ၁၅:၃၊ ၄) အဲဒီနောက် ယေရှုဟာ ဘုရားနိုင်ငံတော်ရဲ့ဘုရင် ဖြစ်လာတယ်။ (ဗျာဒိတ် ၁၁:၁၅) ဘုရားနိုင်ငံတော်ကသာ အစိုးရအစစ်အမှန်ဖြစ်ပြီး မကြာခင် ကမ္ဘာမြေကို သာယာလှပတဲ့ဥယျာဉ်ဖြစ်အောင် လုပ်ပေးပါတော့မယ်။ (ဒံယေလ ၂:၄၄၊ ၄၅) “စိတ်နှိမ့်ချသောသူတို့မူကား ပြည်တော် [“မြေကြီး၊” ကဘ] ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်” လို့ ကျမ်းစာမှာ ကတိပြုထားပါတယ်။—ဆာလံ ၃၇:၁၁၊ ၂၉။

ကျမ်းစာလမ်းညွှန်ချက်တွေက ဒီနေ့အထိ အကျိုးရှိနေတုန်းပဲဆိုတာ ယေဟောဝါသက်သေတွေ ခံယူထားကြတယ်။ (ဟေရှာယ ၄၈:၁၇၊ ၁၈) ဒါကြောင့် ကျမ်းစာလမ်းညွှန်ချက်တွေကို ကျွန်ုပ်တို့ အတတ်နိုင်ဆုံး ကြိုးစားလိုက်လျှောက်ကြတယ်။ ဥပမာ၊ ကိုယ်စိတ်နှစ်ပါးကို ညစ်ညမ်းစေနိုင်တဲ့ အကျင့်ဓလေ့တွေကိုရှောင်ဖို့ ကျမ်းစာမှာ သတိပေးထားလို့ ဆေးလိပ်သောက်တာ၊ မူးယစ်ဆေးတလွဲသုံးတာတွေ ကျွန်ုပ်တို့ မလုပ်ကြဘူး။ (၂ ကောရိန္သု ၇:၁) အထူးသဖြင့် ကျမ်းစာမှာ ရှုတ်ချထားတဲ့ အကျင့်ဓလေ့တွေကို ရှောင်ကြဉ်ကြတယ်။ အဲဒီထဲမှာ အရက်အလွန်အကျွံသောက်တာ၊ လိင်အကျင့်ယိုယွင်းတာ၊ ခိုးတာတွေပါဝင်တယ်။—၁ ကောရိန္သု ၆:၉-၁၁။