နိုင်ငံတော်ခန်းမမှာကျင်းပတဲ့ ဝတ်ပြု အစည်းအဝေးတွေကို ဘာကြောင့် တက်ရောက်သင့်သလဲ

ယေဟောဝါသက်သေတွေဟာ နိုင်ငံတော်ခန်းမလို့ ခေါ်တဲ့ နေရာတွေမှာ တစ်ပတ်ကို နှစ်ကြိမ် ဝတ်ပြုစည်းဝေးကြပါတယ်။ အဲဒီခန်းမမှာ ဘာတွေ လုပ်ဆောင်ကြသလဲ။ ဝတ်ပြု အစည်းအဝေးတွေ တက်ရင် ဘာအကျိုးကျေးဇူး ရရှိမလဲ။

• နိုင်ငံတော်ခန်းမမှာ ဘာတွေ လုပ်ဆောင်ကြသလဲ

• ဝတ်ပြု အစည်းအဝေးတွေ ဘာကြောင့် တက်ရောက်သင့်သလဲ

• ရွယ်တူတွေ အဆို

နိုင်ငံတော်ခန်းမမှာ ဘာတွေ လုပ်ဆောင်ကြသလဲ

လက်တွေ့ကျတဲ့ ကျမ်းစာသွန်သင်ချက်တွေကို အဓိကသင်ပေးတဲ့ နေရာတစ်ခု ဖြစ်တယ်။ အစည်းအဝေးတွေ တက်ရင်

• ဘုရားသခင်နဲ့ပတ်သက်တဲ့ အမှန်တရားကို သိလာနိုင်တယ်။

• လတ်တလောဖြစ်ရပ်တွေ ဘာကြောင့် ဖြစ်ပျက်နေမှန်း နားလည်လာမယ်။

• ပိုကောင်းတဲ့သူ ဖြစ်လာမယ်။

• အကောင်းဆုံး မိတ်ဆွေတွေ ရလာမယ်။

သင် သိပါသလား။ ယေဟောဝါသက်သေတွေ ဝတ်ပြုစည်းဝေးတဲ့နေရာမှာ ဘုရားနိုင်ငံတော်အကြောင်း ဆွေးနွေးလေ့ရှိလို့ နိုင်ငံတော်ခန်းမလို့ ခေါ်တယ်။​—မဿဲ ၆:၉၊ ၁၀။ ၂၄:၁၄။ လုကာ ၄:၄၃။

ဝတ်ပြု အစည်းအဝေးတွေ ဘာကြောင့် တက်ရောက်သင့်သလဲ

ကြားသိရတာတွေကနေ အကျိုးခံစားရနိုင်ပါတယ်။ ယေဟောဝါသက်သေတွေရဲ့ ဝတ်ပြု အစည်းအဝေးတွေမှာ ကျမ်းစာလမ်းညွှန်ချက်တွေ ကြားသိရပြီး “ဉာဏ်ပညာကို ဆည်းပူး” နိုင်တယ်။ (ပညာအလိမ္မာ ၄:၅) ဘဝမှာ ဆုံးဖြတ်ချက်ကောင်းတွေ ချနိုင်အောင် ကျမ်းစာက ကူညီပေးနိုင်တယ်။ ဒါတင်မက ဘဝနဲ့ပတ်သက်တဲ့ အောက်ပါမေးခွန်းတွေရဲ့ အဖြေ ကျမ်းစာထဲမှာ ပါတယ်–

• ဘဝရဲ့ အဓိပ္ပာယ်က ဘာလဲ။

• ကျွန်တော်တို့ ဆင်းရဲဒုက္ခ ကြုံနေရတာ ဘုရားသခင်ကြောင့်လား။

• သေသွားရင် ဘာဖြစ်မလဲ။

စနေ၊ တနင်္ဂနွေ အစည်းအဝေးတွေမှာ အောက်ပါဟောပြောချက်တွေ ကြားသိနိုင်တယ်–

• ဘေးရောက်ရာကာလတွင် သင် အဘယ်နေရာမှ အကူအညီ ရရှိနိုင်မည်နည်း

• သမ္မာကျမ်းစာ၏ လမ်းညွှန်မှုကို အဘယ်ကြောင့် ခံယူရ

• ဘုရားနိုင်ငံတော်က ကျွန်ုပ်တို့အတွက် ယခု လုပ်ဆောင်ပေးရာ

“အတန်းဖော်တစ်ယောက်က အစည်းအဝေး လာတက်တယ်။ ကျွန်မတို့ မိသားစုနဲ့အတူ လာထိုင်လို့ စာစောင်တွေ အတူကြည့်ကြတယ်။ ပရိသတ် ပါဝင်ပြီး မှတ်ချက်ပေးတာကို သူသိပ်သဘောကျတယ်။ သူတို့ဘုရားကျောင်းမှာဆိုရင် ကျွန်မတို့လို လေ့လာစရာစာစောင်တွေ မရှိဘူးလို့ ပြောတယ်။”​—ဘရန်ဒါ။

သင် သိပါသလား။ နိုင်ငံတော်ခန်းမမှာ ဝင်ကြေးပေးစရာ မလိုသလို အလှူငွေလည်း မကောက်ပါဘူး။

ပေါင်းသင်းရလို့ အားရှိသွားပါလိမ့်မယ်။ ခရစ်ယာန်တွေ အတူဝတ်ပြုစည်းဝေးရတဲ့ အကြောင်းရင်းတစ်ခုက “အချင်းချင်း အားပေး” ဖို့လို့ ကျမ်းစာ ဆိုထားတယ်။ (ဟီဘရူး ၁၀:၂၄၊ ၂၅) ကိုယ့်အတွက်ပဲ အာရုံစိုက်တတ်ကြတဲ့ ဒီလောကကြီးမှာ ဘုရားသခင်၊ တခြားသူတွေကို ဦးစားပေးတတ်သူတွေနဲ့ ပေါင်းသင်းရတာ တကယ် လန်းဆန်းအမောပြေစေပါတယ်။

“တစ်နေ့တာ အကုန်ပိုင်းမှာ စိတ်မောလူမော ဖြစ်ကျန်ခဲ့ရင်တောင် နိုင်ငံတော်ခန်းမမှာ ညီအစ်ကို/မတွေနဲ့ တွေ့တဲ့အခါ စိတ်သက်သာရသွားတယ်။ အိမ်အပြန်မှာတော့ နောက်တစ်နေ့အတွက် အားအင်အပြည့်နဲ့ ပျော်နေတာပေါ့။”​—အယ်လီဇာ။

သင် သိပါသလား။ ကမ္ဘာတစ်ဝန်းက ယေဟောဝါသက်သေတွေရဲ့ အသင်းတော် ၁၂၀,၀၀၀ ကျော်ဟာ နေရာပေါင်း ၆၀,၀၀၀ ကျော်မှာ အတူဝတ်ပြုစည်းဝေးကြတယ်။ တက်ရောက်သူတွေ တိုးများလာတဲ့အတွက် နိုင်ငံတော်ခန်းမပေါင်း ၁,၅၀၀ နီးပါး နှစ်စဉ် ဆောက်လုပ်နေရတယ်။a