Nanasitrana Tamin’ny Sabata i Jesosy

Tsy tia an’i Jesosy ny Fariseo ka nitady hevitra hisamborana azy. Tsy tokony hanasitrana marary, hono, i Jesosy rehefa Sabata. Nahita lehilahy jamba sady mpangataka teny an-dalana anefa i Jesosy indray Sabata izay. Dia hoy i Jesosy tamin’ny mpianany: ‘Jereo fa ho sitrana izao io lehilahy io noho ny herin’Andriamanitra.’ Naka vovoka i Jesosy dia nasiany rora, dia iny no nataony teo amin’ny mason’ilay lehilahy. Hoy i Jesosy: ‘Mandehana sasao any amin’ny dobon’i Siloama ny masonao.’ Dia nataon’ilay lehilahy izany ka nahita izy. Sambany izy vao nahita!

Gaga be ny olona! Dia hoy ry zareo: ‘Tsy io ve ilay mpangataka iny, sa olona mitovy aminy fotsiny io?’ Hoy ilay lehilahy: ‘Ie, izaho iny!’ Dia hoy ny olona: ‘Fa maninona ianao no lasa mahita?’ Notantarainy an-dry zareo izay nitranga taminy, ka nentin-dry zareo tany amin’ny Fariseo izy.

Dia hoy ilay lehilahy tamin’ny Fariseo: ‘Nasian’i Jesosy zavatra ny masoko dia nasainy nosasako ilay izy, dia izao aho mahita.’ Hoy ny Fariseo: ‘Sabata ve ny andro dia manasitrana i Jesosy? Tena tsy avy amin’Andriamanitra ny hery nanaovany an’izany.’ Nisy anefa niteny hoe: ‘Izy ve dia ho nahavita an’izany raha tsy avy amin’Andriamanitra ny heriny?’

Nantsoin’ny Fariseo ny ray aman-drenin’ilay lehilahy dia nanontaniany hoe: ‘Ahoana no nahatonga ny zanakareo hahita?’ Natahotra be ry zareo satria efa niteny ny Fariseo hoe izay olona mino an’i Jesosy, dia horoahina ao amin’ny synagoga. Dia hoy ry zareo: ‘Tsy hainay fa anontanio an’azy.’ Mbola nanontany an’ilay lehilahy foana ny Fariseo. Dia hoy izy: ‘Efa izay noteneniko izay daholo. Fa maninona ianareo no mbola manontany foana?’ Tezitra be ny Fariseo ka nandroaka azy.

Nandeha nankany amin’ilay lehilahy i Jesosy, ary nanontany azy hoe: ‘Mino ny Mesia ve ianao?’ Dia hoy izy: ‘Ie, raha ohatra ka fantatro izy.’ Hoy i Jesosy: ‘Izaho no Mesia.’ Tena tsara be ny nataon’i Jesosy. Sady nanasitrana an’ilay lehilahy mantsy izy no nanampy azy hanana finoana.