LESONA 2

Ataovy Hoatran’ny hoe Miresaka Andavanandro Ianao

2 Korintianina 2:17

AHOANA IZANY? Aza amboamboarina ny teninao fa ataovy hoatran’ny rehefa miresaka andavanandro, ary ataovy vokatry ny fo.

Omano tsara izay holazainao, ary mivavaha rehefa manomana. Mivavaha mba tsy hatahotahotra, fa hahavita hamoaka tsara an’izay tianao holazaina. Ataovy azo tsara izay hevi-dehibe horesahinao. Avereno amin’ny feo avo ilay izy avy eo, nefa aza atao tsianjery fa lazao araka izay tena fahazoanao azy.

Rehefa manomana vakiteny ao amin’ny Baiboly na ao amin’ny boky sy gazety ianao, dia averimbereno ilay izy mba hisosa tsara. Raha misy tenin’olona ao, dia avoahy tsara ny fihetseham-pony, nefa aza atao tafahoatra.
Ataovy vokatry ny fo ny teninao. Eritrereto hoe nahoana no mila mihaino an’izay lazainao ny olona. Izay no ifantohy, dia hangoraka azy ianao, ka ho tsapany hoe vokatry ny fo ny teninao. Ho hitany amin’ny fihetsikao sy ny endrikao izany.

Tandremo anefa sao tsy manaja olona. Tadidio foana fa avy amin’Andriamanitra ny zavatra resahinao, ka ataovy mety tsara ny teny lazainao. Miezaha koa hanaraka fitsipi-pitenenana.
Jereo ny olona iresahanao. Jereo eo amin’ny masony izy raha tsy manafintohina izany any aminareo. Rehefa mandaha-teny ianao, dia aza jerena maimaika fotsiny ny mpanatrika, fa mijere kely any amin’ny olona iray, dia avy eo mijere any amin’olon-kafa indray.