LESONA 14

Ataovy Misongadina ny Hevi-dehibe

Hebreo 8:1

AHOANA IZANY? Ataovy mazava tsara hoe inona avy ny hevi-dehibe, dia inona no ifandraisany amin’ny tanjon’ilay lahateny sy ny foto-kevitra.

Fantaro hoe inona no tanjona amin’ilay lahateny. Natao hampianarana zava-baovao ve ilay izy, sa handresena lahatra, sa hampirisihana ny olona hampihatra torohevitra? Ataovy hita tsara ilay tanjonao isaky ny miresaka hevi-dehibe ianao.

Eritrereto hoe: ‘Inona no mety hanitikitika ny sain’ny olona amin’ity foto-kevitra ity? Dia inona avy no mety hanontaniany momba an’ilay izy? Inona koa no mety tsy heken’ny sainy?’ Alaharo mifanaraka amin’izay avy eo ny hevitra horesahinao, dia ho arany tsara sy ho azony ary handresy lahatra azy.
Ataovy misongadina ilay foto-kevitra, mandritra ny lahateninao. Resaho kely foana izay teny hitanao hoe mila asongadina ao amin’ilay foto-kevitra, na mampiasà teny mitovy dika aminy.
Ataovy mora azo, dia aza atao be loatra. Lazao mazava tsara ny hevi-dehibe horesahinao, ary miatoa isaky ny avy manazava anankiray. Ataovy hita hoe mifampitohy amin’ny hevi-dehibe manaraka ilay izy. Aza miresaka hevi-dehibe tsy mifandray amin’ilay foto-kevitra, mba tsy hihoatra ny lahateninao. Fero ny isany mba ho voazava tsara.

Vao manomboka ny lahateninao, dia efa azonao lazaina tsirairay ny hevi-dehibe mba haharaka tsara ny fanazavanao ny olona. Na koa azonao averina kely ilay izy any amin’ny farany, mba ho tadidiny.