Sa omarisa mati a ǂkhî ǁkhā?

1. Mati i iob ǃgameba a ǂhâǂhâsa ǂkhîsa omaris ǃaroma?

ǃGâiǂhôas ge Jehovaba xu ra hā, ǂkhîsa Eloba, ǁÎb ǁkhoreb ge omari di nî ǂkhîxasa. (1 Timoteub 1:11) ǁÎb ge ǃgameba ge ǂnûiǂgā. ǂHanub xa ǂanǃgâsa ǃgameb ge ǂhâǂhâsa omaris ǃnâ ǁîb ta ǃnorasa ǀgauba mā ǀgôana ǃamkuse kaikais ǃnâ. Xristeǁîn ge ǂhanuga nî ǁnâuǀnam hân a ǃhūb ǃnâ tsî ǂhanub xa ǂanǃgâsa ǃgamega nîra dī.​—Khomai re Lukab 2:1, 4, 5.

Eloba ǃgameba mati ra mû? ǁÎb ge ra ǂhâba ǁîb nî hoaǁae aob tsî taras tsî ǁaegu hâhâ ra ǃgaeǁaes ase nî ī sa. Jehovab ge ǂhâba hâ aob tsî taras tsîn nî ǂgomǂgomsase hâ ūgu ǃkhaisa. (Hebreǁîn 13:4) ǁÎb ge ǃgameba ǀgorasa ǃhui hâ. (Maleaxib 2:16) Xaweb ge ra mā-am Xristeǁîna ǀgora tsî ǁkhapa ǃgamesa ǀgui i ga ǃgameb ǃauga ǀnî hâ khoe-i ǀkha ǁgoe o.​—Khomai re Mateub 19:3-6, 9.

2. Aob tsî taras tsîna mati nî hâ ūgu?

Jehovab ge aob tsî taras tsîna ge kuru huigu ra ǃâte ǃgameb ǃnâ nî ūhâse. (Genesis 2:18) Omaris danaseb, ge aoba omarisa nî ai-mâba. ǁÎna ǂûmās tsî tsēkorobeb di ǂhâsiba mās ǃnâ tsî ǁîna Elob di ǂhanuga ǁkhāǁkhās ǃnâ. ǁÎb ge nî ǁguiǂgāsen ǁîb ǀnami ǃnâ ǀgôan tsî taras ǃaroma. Aob tsî taras ge ǀnamgu tsî ǃgôasiba nî ūhâba gu, Hoa ra ǀoasa tama amaga i ge ǂhâǂhâsa ǀûbagusa, ǁnāb a ǁkhowa-am amaga ǂkhîsa ǃgameb diba.​—Khomai re Efeseǁîn 4:31, 32; 5:22-25, 33; 1 Petrub 3:7.

3. ǃGameba khôa its nî ǂkhîxa tamab ga i o?

ǃGomsin ga ǃgameb ǃnâ hâ o, oro ge hoa ro ǁnās ai nî sîsen ǀnamgusa. (1 Korinteǁîn 13:4, 5) Elobmîs ge ǀgorasa mā-am tama ǃgameb ǃnâ hâ ǃgomsina ǀamǀams ǃaroma.​—Khomai re 1 Korinteǁîn 7:10-13.

4. ǀGôado, Eloba tae ǂgaoǀkhāsa ūba du hâ?

Jehovab ge ǂhâba hâ ǂkhî du nîsa. ǁÎb ge kaise ǃgâi ǀawe māde ra mā du mati du sadu ǂkhamsis ǃnâ nî ǃgâiaǂgaosa. ǁÎb ge ǂhâba hâ ǁÎb gā-aisib tsî sado ǁgûn ǂansa xu du nî ǃgâiba ǀamasa. (Koloseǁîn 3:20) Jehovab ge ǁÎb tsî ǁÎb ǀgôaba du ra dība xūna xu da ǃgâiaǂgaoba nî hōsa ra ǂhâba.​—Khomai re Aoǁnâ-aob 11:9–12:1; Mateub 19:13-15; 21:15, 16.

5. ǁGûdo, matin sadu ǀgôana ǂkhîba a hōǁkhā?

ǃGarisedu ge nî sîsen i du ǂû-i, hâǃkhais tsî saran tsîna sadu ǀgôana mā. (1 Timoteub 5:8) Xawe sadu ǀgôana ǃgâiaǂgaoba hōs, ge ǂhâba hâ i du ǁîna Eloba ǀnamsa ǁkhāǁkhā tsî ǁÎba xu ǁkhāǁkhāsensa. (Efeseǁîn 6:4) Sa aiǁgaus Eloba ǀnams ǃnâs ge kai ǃgam sîsenǂuiba sa ǀgôa-i ǂgaob ai a ūhâ ǁkhā. Elobmîs aigu ga sa ǁgaraga ǃgaoǃgaosa o, ogu ge sa ǀgôana ǃgâiǀgaub ai a ǂâi kai ǁkhā.​—Khomai re Deuteronomium 6:4-7; ǂKhoa-mîdi 22:6.

ǀGôan ge ra omkhâihe ǂkhâǃnâ tsîts ga goa nî o. ǁÎn ge ǁgau oahes tsî ǂgōǀauhes tsîna ǂhâba hâ. ǁNās ge nî hui ǁgai xūna xu ūbē nîsa tsū tanisen ǀgaub tsî ǂū-oǃnâsiba xu nî ǁkhaen nî. (ǂKhoa-mîdi 22:15) Xawe ǂgōǀaus ge tā nî ǁgaora tsî khoexaǃnâ tama nî ī.​—Khomai re Koloseǁîn 3:21.

Jehovab di ǀHûǀguitimî-aon ge ǂkhanina xoahâ ǁgûn tsî ǀgôan tsîna ra hui na. Nē ǂkhanin ge Elobmîs ai a ǃgaoǃgaosa.​—Khomai re Psalmti 19:7, 11.