Tae-i ǃaromab Eloba ǀApeǂhumisa ūhâ?

1. Mati i iob ge Eloba Israel ǁaesa ǀguiǃnâxasib ǃnâ aiǂhumi?

Elob ge Abrahami di suriba ǀhaoǀhao tsî ge ǁae dī tsî ǂhanuga ge mā nî. ǁÎb ge nē ǁaesa “Israeli” di ge ǂgai tsî ǁîna mûǂam-aon ama ǀgoreǀîs tsî ǁÎb di mîs tin ase ge ǁgaumâi. (Psalmti 147:19, 20) Nēs ǀkhan ge nau hâ ǁaedi khoena Israel ǁaesa xu hōdawa-amhe ga hō hâ.​—Khomai re Genesis 22:18.

Elob ge Israel ǁaesa ǁîb di ǀHûǀguitimî-aon ase ge ǁhûi. ǀOrogam ǃnaeǃkhaidi ge nēsa ra ǁgau matin khoena Elob di ǂhanuga ǁnâuǀnamsa xu ǃgâiba gere hōdawasa. (Deuteronomium 4:6) Israel ǁaes, ǃnâ-ūn ge nau hâ khoena ama Eloba ga ǂan hâ.​—Khomai re Jesajab 43:10, 12.

2. Tae-i ǃaroman ama Xristeǁîna aiǂhumisa?

ǁAeb ǀkhas ge Israel ǁaesa Elob di ǃgâiba ge ǂoaǃnâ, tsî Jehovab ge ǁnā ǁaesa Xristeǁî ǀhaohâb ǀkha ge ǃkhōǃkhuni. (Mateub 21:43; 23:37, 38) Nēsisan ge Israeli ǃkhais ǃnâ ama Xristeǁîna hâ Jehovab di ǀHûǀguitimî-aona.​—Khomai re Ap. ǃNaeǃkhaidi 15:14, 17.

Jesub ge ǁîb di saoǃgon-aona ge aiǂhumi in aoǁnâ tsî ǁkhāǁkhāsabena dī hoa ǁaedi ǃnâ. (Mateub 10:7, 11; 24:14; 28:19, 20) Nē sîseni ge nētsē ǁîb ǀams ai hâ, nē ǀuni tsēdi ǃnâ. ǂGuro ǃnās aseb ge Jehovaba miliundi khoena, hoa ǁaede xu ama ǀgoreǀîs ǃaroma ǀguiǃnâxasib ǃnâ ǀhaoǀhao hâ. (ǂHaiǂhais 7:9, 10) Ama Xristeǁîn ge aiǂhumisa in ǂkhâǃnâgu tsî huigu. ǃHūbaib ǂhawasen ge ǀgui Elobmîs ǁkhāǁkhāsa ǁîn ǀhaodi tawa ra ǃkhōǃoa.​—Khomai re Hebreǁîn 10:24, 25.

3. Matis ge nētsē hâ ǀApeǂhumis Jehovab di ǀHûǀguitimî-aon tisa tsoatsoa?

ǂKhari ǃgubis Baibels ôaǃnâ-aon ge 1870ǁî kurib ǃnâ Elobmîs amaba ge hō oa. ǁÎn ge ge ǂan i Jesub ge Xristeǁîn ǀhaohâba aiǂhumi hâ-i ǃkhaisa aoǁnâ sîseni ǃaroma. ǁÎn ge ǃhūbaib ǂhawase hâ aoǁnâ sîsena ge tsoatsoa. ǁÎn ge 1931ǁî kurib ǃnâ Jehovab di ǀHûǀguitimî-aon di hâ ǀonsa ge ūǃoabasen.​—Khomai re Ap. ǃNaeǃkhaidi 1:8; 2:1, 4; 5:42.

4. Matin Jehovab di ǀHûǀguitimî-aona a aiǂhumisa?

ǂGuro kurigu sida ǃgôa ǁaeb digu, ǃnân ge Xristeǁî ǀhaohâba ǂgui ǃhūgu ǃnâ ǂGaeǂgui ra sorosa xu gere ǀama. ǁNā soros ge Jesuba ǀhaohâb di danab ase gere ǂanǃgâ. (Ap. ǃNaeǃkhaidi 16:4, 5) ǁNās khamin ge nētsē Jehovab di ǀHûǀguitimî-aona ǂGaeǂgui ra soros hîna ǂansa ūhâ ǀHaohâb ǃûi-aoga xu ǃamǀhaosa sa xu ra ǀama. Nē ǂGaeǂgui ra soros ge ǁNâub berodi Jehovab di ǀHûǀguitimî-aon dite ra mûǂam. ǂNûiǃkhunis, ǁgâis tsî Elobmîs ǁkhāǁkhāsens māǂuidi 600 gowagu ǃnâ ra dīhen tsîna. ǁNās ǃgâ-ais ge ǂGaeǂgui ra sorosa Xoasa xu hâ ǂkhâǃnâs tsî daoǁgaus tsîna 100 000 ǀhaohâga ra mā ǃhūbaib ǂhawase. Mâ ǀhaohâb hoab ǃnâgu ge ǀHaohâb ǃûi-aoga hâ tamas ka io mûǂam-aoga. Nē aogu ge ǀnamxa ǀgaub ai Elob di gūna ra kēǃgâ.​—Khomai re 1 Petrub 5:2, 3.

Jehovab di ǀHûǀguitimî-aon ge a aiǂhumisa in ǃgâiǂhôasa aoǁnâ tsî khoena ǁkhāǁkhāsabe dī. Apostelgu khami da ge omsa xu oms ǀkha ra aoǁnâ. (Ap. ǃNaeǃkhaidi 20:20) Sida tsîn ge Elobmîs ǁkhāǁkhāsensa khoena ra mā, ǂhauǃnâ tsî amaba a ǀnamna. Xawe Jehovab di ǀHûǀguitimî-aon ge ǀApeǂhumis ǀguisa i tama. Sida ge ǀgui kai omari ǀnamxaǃnâ ǁGûb ǀkha. Sida ge a khoeǃgâgu tsî da ge ra tsâbagu. (2 Tesalonikaǁîn 1:3) Jehovab khoen ge aiǂhumisa in Eloba ǂkhîǂkhî tsî nau hâ khoena hui. ǁÎn ge ǂkhîb xa ǀoa hâ ǃhūbaisi omarisa ra kuru.​—Khomai re Psalmti 33:12; Ap. ǃNaeǃkhaidi 20:35.