ǂAn i du go i?

Moseb ǂhanub di ǁgaraga Israelǁîn xa amabes ǃnâ sîsenūhe i gere, tsēkorobe ǁnâusaguna ǂhanuǂhanus ǃaroma?

ǀNÎ ǁAEB ai o. Nēs ge ǀgui aiǁgausa. Deuteronomium 24:14, 15 ge ra mî: “ǀGâsa tsî ǂhâ hâ ǃgaesabats ge ǁgâiǀā tide, sa ǃgâsan dib kas, ǃhaokhoen dib kas . . . îb tā sa ǃoagu ǃKhūba ǂgaiǀî, îb tā ǁoreba hâ sa ǃnâ ti.”

Nē ǀkhomas ǃnaeǃkhais ge 700ǁî kurib Jesub aiǃâsa ǃoa ra ǁnaeǁgau. Nēs ge Ashdods ǀgūse ge ī. Nēs ge ǂâihe i rasa ǃoa, sîsen-ao i hîna ge māsa ǃgôab ǃhoroba ǀhaobe tama hâ-i ixa ge xoahe ǂgoaba xu kurusa xoa-ai xaba-i ai mî rase: “Sa ǃgāb ge [ǀkhoma-aob] ǃhoroba ǀhaobe tsî go sâu toa ǁaero i ǃkharu hâse, Hoshajahub hîna Shobaib ôab ge tita ǃoa hā tsî sa ǃgā ta sarana go ū. . . . Tita ǀkha go ǀguiba sores ǃnâ goro sîsen khoegu ge nēsa nî ǃkhō-am . . . Nēn hîna ta ra mîn a amasa. Tita ge xū-e tsūdī tama. . . . Toxobab ga ti ǀhonkhoeba ǁîb di ǁguiǂams ase mû tama io ǁîb ǃgāb sarana mâ-oa kaisa toxoba nēsa ǀhomxaǂgaosiba xū dī re! Tā toxoba ǃnō re sa ǃgāb sara i ose hâ hîna.”

Nē ǀkhomas ge “Nē sîsen-aob di ǀkhomas ǁîb sarana hō oas xa ǀgui hâ tama hâ” dib ge Simon Schamaba ra mî. Nēs ge ra ǁgau ǀkhomma-aob ge Elobmîs ǁgaragu xa xū-e ǂan-īsa. “Nēs ge Levitikus tsî Deuteronomiums tsîn ǃnâ ra mîhe, mati da ǀgâsa khoen ǀkha nî hâ ǀgausa.”