ǃGaos ge a kai!

JESUB ge ge mî ǁîb saosaben ǀuniga tsēdi ǃnâ ǃgaos kaisiba nî hōǃâ ǃkhaisa. (Mat. 9:37; 24:14) ǂÂi re, Jesub mîdi ge mati a ama kaisa Transcarpathia di ǀon hâ ǃās ǃnâ, Ukraineb ǃnâ hâsa. ǁNā ǃās xōǀkhādi ge ǃnona ǃārode ǂnôa tsî 50 ǀhaohâgu ge ǁnāpa hâ tsî 5 400 xa ǃnāsa ǁāǁnâsa ǃgâsan tsîna.a Haka khoena xu i ge ǀgui khoe-e ge Jehovab di ǀHûǀguitimî-aona ǁnā ǃnona ǃādi ǃnâ ra ǂnûǁkhaeba.

Khoena mati aoǁnâ sîsen-e ǁnā ǂharis ǃnâ ra ūǃoa? “Khoen ge Elobmîsa ǃgôasiba ūba hâ, ǂhanu-aisiba ǃgôaǃgâ tsî ǀgaisa omaris ǃgaeǁaen tsîna ūhâ. Tsîn ge ǂhauǃnâse ra huigu,” dib ge Vasile di ǀon hâ ǃgâsaba ra mî. ǁÎb ge ǀaro tsî ra mî: “ǁÎn ge hoaǁae sida ǂgom ǀgaub ǀkha ǀgui ǂâixa tama hâ. Xawe da ga Elobmîsa xu xū-e khomaiba nî o, on ge ǃgaoǃgâxase ra ǃgâ da.”

Sida ǃgâsan ge ǃgomsiba ra hōǃâ aoǁnâ sîsenni tawa i ga hā o, ǃnāsa khoen a ǀHûǀguitimî-ao amaga. Aiǁgause, ǀgui ǀhaohâb ǃnân ge 134 ǁāǁnâsa ǃgâsana hâ xawe i ge ǁîn ǂharis ǃnâ 50 omdi ǀguide hâ. Nē ǃgâsana mati nē mâsiba ra sîsenǂam?

ǂGui ǃgâsan ge ǂhâsib hâba sī ra aoǁnâ. “ǁĀǁnâsa ǃgâsan sida ǀhaohâb ǂharis ǃnâ ra sîsen an ǃgao-i ge ǀgui omsa ǀgam ǃgâsan ǃgao hâ” dib ge Ionash di ǀon hâ ǃgâsab hîna 90 kurixaba ra mî. “Tita ge ǃgaroǃāro-i ǃnâ gere aoǁnâ. Xaweb ge ti ǂurusiba nēsi ra khao-oa. ǁAubexa 160 km na ta ge sida ǂharis ǃnâ gere ǃgû tsî ta ge Hungarian gowab ǃnâ ge gere aoǁnâ.” ǁĀǁnâsa ǃgâsan ge aoǁnâ sîsenni ǃnâ nî ǁguiǂgāsen. “Trains ǀkha ta ge ǁgoas 4ǁî khamab ai gere ǃnari tsî kharab 6ǁî khamab ai gere aoǁnâ toa tsî omsa ǃoa gere oa. Nēsa ta ge ǀgam tamas ka io ǃnona ǃnāde wekheb ǃnâ gere dī” dib ge Ionasha ra mî. ǁÎb ǁguiǂgāsens a ǁau khamib gere tsâ? “Kaise ta ge gere ǃgâiaǂgao aoǁnâ sîsen-e dīsa,” dib ge ra mî. “Tita ge aiǂhanuba ge ūhâ i ǀguri hâ omaris ǁanina amaba ǁkhāǁkhāsa.”

ǁNâuǃāxa as ge hoa khoen hîna ǀhaohâgu ǃnâ hân ge gaxuse a ǃgû ǁoa. Xawe hoan ge ǁîn aoǁnâ ǂharis ǃnâ ǂōrisase a sîsen ǁkhā, nēs ge kairan tsîna ǃkhōǂgā hâ. Nēs ge ge ǃaroma îs Jesub ǁōb di ǂÂiǂâisensa ǂgui khoen xa hâǃnâhe 2017ǁî kurib ǃnâ. Nē ǃnona ǃgaroǃādi khoen ge ǃgâsan xa ge ǂgui i, ǁnā ǁaxasib tawa. Mâpa ǀgui da ga ǃoaba xawe i ge ǂgui sîsen-e hâ “ǃKhūb di sîsenni ǃnâ” da nî dīse.​—1 Kor. 15:58.