Khomai-aon dîdi

ǁÎb ǁōb di ǃuis aiǃgâb ge Jesuba haman ǃoa ǃgâidī-aon ase gere ǁnaeǁgau tsî ǁîna tae-i ǃaroma di ra ǂgaihe?

ǁÎb ǁōb ǃuis aiǃgâb ge Jesuba ǁîb apostelga ge ǁnama îgu tā ǀgapi ǂhārode ôabasen tamas ka io dībasen ǂgao ǁîb ǃoaba-aon ǁaegu. ǁÎb ge ge mîbagu: “ǁAedi di gao-aogu ge ǁîna ra gaoǂam, tsî ǁîn ǂama ǀgaiba ūhâgu ge ǃgâidī-aogo, ti ra ǂgaihe.”—Luk. 22:25, 26.

Jesub nēpa ra mî ǃgâidī-aoga a ham? Mîdi tsî mari-i tsîn ge Grikeǁîn ǃhaos tsî Romeǁîn ǃhaos ǃoagu ǂanǂansa khoega ǀgapi ǃgôasiba gere mā Euergetes tamas ka io ǃgâidī-ao di gere ǂgaihe ga. Nē ǃgôasib ge gere māhe nē aogu ge ǀhûhâsiba ǂhâǂhâsaba ī amaga.

ǂGui gao-aogu ge ǃgâidī-aogu ase gere ǂgaihe. Nē gu ǁaegu i ge Egipteb di ǂgaeǂgui-aogu Ptolemy III Euergetesi (c. 247-222 B.C.E.) tsî Ptolemy VIII Euergetesi II (c. 147-117 B.C.E.). Romeǁîn ǂgaeǂgui-aokha Julius Kaesari (48-44 B.C.E.) tsî Augustub (31 B.C.E.–14 C.E.) tsîn ge ǁnāti ge ǂansa i tsî Herodeb, Judab di Gao-aob tsîn ge ǁnāti gere ǂgaihe. Herodeb ge ǀnîsi ǃgâidī-aob ase ge ǂgaihe tsoatsoa, ǃâtsūǀkhāba gere hōǃâ khoenab ge a hui tsî ǂhâsib ǃnâ hâna sarana a mā o.

German Bibles di ǁgauǃnâ-aob Adolf Deissmanni ge ǃgâidī-aob di hâ mîsa ǃnāsase gere sîsen-ū. ǁÎb ge ge xoa: “ǃGâidī-ao di hâ mîs ge hoaǃnâ-aixase ǃkharu ge ǁaeb ǃnâ gere sîsen-ūhe, ǁnās ǀkha î ge kaise ge supu i ǁnā mîsa ūhâ ǂkhanina ǃhaese hōsa.”

Jesuba tae-e gere ǂâibasen ǁîb ǁkhāǁkhāsabegab ge mîba o “xawe go ge sago ǁnāti ī tide”? Jesuba gere ǂâibasen î gu ǁîga tā khoen di ǂhâsigu ǀkha ǁae? Tātsēs tsîna. Jesub ge gere ǂhâba îgu ǁîga māxasib di ama ǂâibasensa ǂan.

Jesub ǁaeb ǃnân ge khoena ǃgâi ǀonsa gere dībasen, ǂhâsiba ǂhâ hâna huis, ǁaxasiga ǂhomis, ǀgôaron nî ǀuruǃnâ ǃkhaiga oms tsî tempela oms ǃnâ-ū. Xawen ge nēn hoana ǃgôasiba māhes, ūǃoahes tsî khoen xa ǁhûibahe ǂgaos ǃgao ǀgui gere dī. “Māxasib ǃnâ-ū ǃgôaǃgâsiba ǁgauhes ge kaise ge ǂanǂansa i. Xawe î ge ǁkhawa nau ǀkhāb ai ǁnāti i ǀgauba ǂgīǂgōsi ǃnandi ǃnâ ra sîsen-ūhe” dib ge ǀnî ôaǃnâs ǂkhaniba ra mî. Nēti i ǀgaub ge aitsama ǀgapiǃgôasensa ra khâikhâiǃnâ ǁnās ǀkhāb ge Jesuba ǁîb saosabena ge mîba în nēti i ǀgauba xū ǂgōsen.

ǀNî kurigu khaoǃgâb ge Pauluba ǁnāti i ǀgaub xa ge ǃhoa, ǁnās ge ǂhanu ǃaromas ǀkha māxasa. ǁÎb ge Korintes ǃnâ hâ Xristeǁîn ǃoa ge xoa: “Î mâ-i hoa-e ǂgaob ǃnâ i go ǂâibasen khami dī, ǀaraǂams ǀkha tama tsî ǁgarihesa xu tama; ǃgâiaǂgaoxase ra mā-eb Eloba ǀnam xuige.”—2Kor. 9:7.