ǂGomǃgâsiba ūhâ re, nē ǃhūbaib ǀunis ai da nî sâuhesa

ǃHae ǁaeb ǃnâb ge Jehovaba nē ǃhūbaibab ūba hâ ǃnūǃnâxasiba nî ǀamǀam. Ama tama ǂgomdi ge nî dīkākāhe. ǂGui ǃhūgu ge mâǀhao tsî Elob khoena nî ǁnāǂam. Tsîb ge Jehovaba eloxoresa khoena Armagedons tawa nî dīkākā. Xristeǁîn ge nē ǂhâǂhâsa xūn nî ī ǁaeba ǃoa ra mûǂui.

Tae hân hoan kai ǁgâiǀāb ǃnâ nî ī ǃkhaisa da ge a ǀū. Aiǁgause mâǁae i nî tsoatsoasa da ge a ǀū. Tsî da ge a ǀū politike ǃnândi mâ ǃaromade sîsenū tsî ǂgomde nî ǁnāǂamsa. ǀŪ da ge a matikō ǁaeban khoena Elob khoena nî ǁnāǂam tsî taen hoanan nî dīsa. ǀŪs tsîna da ge i tae-eb Jehovaba Armagedons tawa nî sîsenū tsî eloxoresa khoena nî dīkākāsa.

Xawes ge Elobmîsa ǂhâ da hâ xūna ra mîba da, î da ǁkhoaǂgaosib ǀkha hānîse i xūna ǃoa ǃâubasen. Aiǁgause da ge a ǂan “ǀuni tsēdi” di ǀuniga ǁaeb ǃnâ da ûi hâsa. (2Tim. 3:1) Tsî da ge a ǂan ǁnāǂams di tsēdi nî ‘ǀoroǀorohesa.’ Îs ama ǂgomsa tā dīkākāhe. (Mat. 24:22) ǂAn da ge a Jehovab ǁîb khoena nî huisa. (2Pet. 2:9) ǁÎb Jehovab ge ǁhûib ge eloxoresana nîra dīkākā. Tsîb ge kai ǂnubis khoena Armagedons ǁaeb ai nî huiǂui. ǂAn da ge a ǁîb a ǂhanu-ai tsî a ǀgaisa ǃkhaisa.​—J.ǂHa. 19:11, 15, 16.

Hānîǁaeb ǃnân ge khoena ī nî xūn xa kaise nî ‘ǃao.’ Xawe da ga sida Jehovab ge ǁîb khoena ǃkharu gere ǁaeb ǃnâ sâu ǀgaub xa khomai tsî ǂâiǃgâ o. Tsî hānîǁaeb ǃnâb nî dī xūn xas tsîna ǂâiǃgâ o. O da ge ‘ǂgōse mâ, sida danade ǃhâkhâi’ tsî ǂgomǃgâsib ǀkha sida ores ǀgūǁae nî hāsa nî ǃâu.​—Luk. 21:26, 28.