ǂAn I Du Go i?

ǃKharu ge ǁae ge ī xūn ǂansa ūhâ khoena Belsasari Babilons tib gere dī xūn xa tae-e ra mî?

ǂGUI kurigan ge māǃoa-aona gere mî Gao-aob Belsasari hîna Danieli ǂkhanis ǃnâ ra mîheb ge ûitsama tama hâ i di. (Dan. 5:1) ǁÎn ge nēsa gere mî ǃkharu ge ǁaeb xūn ǂansa ūhâ khoen ge ǁîb xa xū-e ǂanǂûi tama hâ i amaga. Xawen ge xūna ge ǀkhara 1854ǁî kurib ǃnâ. Tae-i ǃaroma?

ǁNā kurib ǃnâb ge British ǂnûǁkhaeba aob J. G. Taylorba ǃkharu ge ǁaeb xūn Urs ǃās ǃnâ ge hâ îna gere ôaǃnâ hîna nētsē a Iraka. ǁÎb ge ǁnāba xûi ǃgabadi hîna ǀoro ǁaeb ǃnâ gere sîsen-ūhe de ge a hō. Nē ǃgabadi ge hoade 10 cm ga ge xaxū-i tsî ǀoro ǁaeb xūna ge xoa-aisa i. ǀGui ǃgabab ais ge ǀgoresa ge xoasa i hîna Babilons Gao-aob Nabonidusi tsî ǁîb ǀgôab Belsasari tsîkha di gaxūse ûis xa ge hâ isa. Mâǃoa-aon tsîn ge ge mûǂan nē ǀgoresa xū Belsasari ge amabes ǃnâ ûitsama isa.

Xawe Elobmîs ge Belsasari ge ûitsama i ǃkhais ǀguis xa ǃhoa tama hâ xaweb ge ǁîba gao-ao i ǃkhais tsîna ra ǁgau. Xawen ge mâǃoa-aona noxoba ge ǂgom tama hâ i. Aiǁgause 1875ǁî kurigu ǃnâ ge ǀapaǃaogowab ôaǃnâ-aob William Talbota ge xoa “Bel-sar-ussuri [Belsasari] ge ǁîb ǁgûb Nabonidusi ǀkha ǀgui ǁaeb ǃnâ gere ǂgaeǂguisa. Xawe nēs xa i ge ǁgauǁgau-e a ǀkhai.”

Xawes ge nē ǂnoagusa ge sîsenǂam-e nau ǃgabagu ai xoasa xūn ge ǁgau o Belsasari ǁgûb Gao-aob Nabonidusi ge ǃāsa xū ǂgui kuriga a ǀkhai i ǃkhaisa. Tae-e ǁîb ge ǀkhai i ǁaeb ǃnâ ge ī? “Nabonidusi ge ǃkhōsis ǃnâ a ūhe o,” dis ge Encyclopaedias Britannica ǂkhanisa ra mî “ob ge ǁîb ǁgûba ǁîba gaosisa ge mā tsî ǂhâǂhâsa xūn tsîna.” Nēs ǃaromab ge Belsasara huiǃnâ ra gao-aob ase ǁnā ǁaeb ai gere ǂgaeǂgui. Nēs ǃaroma gu ge ǃkharuge ǁaeb xūn ôaǃnâ-aogu tsî gowagu ǂansa ūhâ Alan Millardi tsîna ra mî “ǂhanu i ge ge i Danieli ǂkhanis ge Belsasara ‘gao-aob’ di a ǂgai o” di.

Xawe Elob khoen ǃaromas ge Danieli ǂkhanisa a ǂgomǃgâhe ǁkha Elob xas ǃgomǂgāǃnâhe hâ amaga.—2Tim. 3:16.