Khomai-aon dîdi
Tae-eb ge Jesuba gere ǂâibasen mîb ge o: “Tā ǂâi, ǂkhîba ta nî ǃhūbaib ai hā-ūse ta ge hā ti.”?
Jesub ge khoena gere ǁkhāǁkhā în ǂkhîbagu. ǀGui ǁaeb ge ǁîb di ǁkhāǁkhāsabega ge mîba: “Tā ǂâi, ǂkhîba ta nî ǃhūbaib ai hā-ūse ta ge hā ti. Hî-î, tita ge khoen ǁîǃnābe ǁnâuǃāgu tidega ge hā. Tita ge khoeba ta nî ǁgûba xu tsî ǀgôasa ǁgûsa xu tsî ǀuiǀgôasa ǀuiǁgûsa xu ǀgorase ge hā.” (Mat. 10:34, 35) Jesuba tae-e gere ǂâibasen?
Jesub ge omaride ge ǀgora ǂgao tama hâ i. Xaweb ge ge ǂan i ǁîb di ǁkhāǁkhādi, ǀgorasa omaridi ǃnâ nî ǃaromasa. ǁNā-amagan ge ǁnān hîna ra Xristub di ǁkhāǁkhāsabe kaina nî ǂan. ǁÎn omaridi ǂkhî tidesa, ǁîn di mîǁguigu xa. ǀNî ǁaega î ge ǃgammen hâ khoe-i tamas ka io omaris ǁani-e a mâǃoa nî ǁkhā. Tsî a ǃgom kai ǁkhā în ǂgomǂgomsase, Xristub di ǁkkhāǁkhādi ǃoagu hâ.
Elobmîs ge hoa Xristeǁîna ra ǂkhâǃnâ în ‘hoa khoen ǀkha ǂkhîba’ ūhâ. (Rom. 12:18) Xawe Jesub di ǁkhāǁkhādi ge, ǀnî omaridi ǃnâ “gôab” khami a ī ǁkhā. Nēs ge ra ī omaris di ǁani-i ga Jesub di ǁkhāǁkhāde ūǃoa o. Naun ra ǁî-e mâǃoa hîna. Tsî i ge oms ǃnâ hâna ra “khākhoe” kai. Amaba ra ǁkhāǁkhāsenan ǃoagu.—Mat. 10:36.
Jehovaba ǃoaba tama omaridi ǀkha ra hân ge. ǀNî ǁaegu ai nî mîǁgui Jehovab tsî Jesuban nî ǂkhîǂkhî. Tamas ka ion omaris ǁanina nî ǂkhîǂkhîsa. Aiǁgausen ge Jehovaba ǃoaba tama khoena. ǁÎna a ǁgari ǁkhā în Elobmîs ǃnâ hâ tama sâtsēde tsēdī. ǃÂitsâhen ga ǁaeb ai, ham-en nî ǂkhîǂkhî? Jesub ge ge mî: “Naun hîa ǁgûb tsî ǁgûs tsîra ti ǂamai ǀnam hân ge tita anu tama.” (Mat. 10:37) Ama as ge Jesub ge ge mî tama hâ i. ǁÎb xa ǂhâǂhâsase mûhe ǂgaos ǃaroman. ǁÎb di ǁkhāǁkhāsabena nî ǁgûna ǀorose ǀnam di. Xaweb ge ǁîna gere ǁkhāǁkhā în ǂhâǂhâsa xūna ǁîn di ǃkhais ai mâi. Jehovaba ǃoaba tama omaris ǁanin ga mâǃoa da. Xawes tsîna da ge noxoba a ǀnam nî. Tsî da ge ra ǂganǃgâ, Jehovaba ǀnams ǂgurose ra ǀkhīsa.
Omaris ǁanin xa mâǃoahes ge kaise a tsûtsûsa ǁkhā. Xawen ge Jesub di ǁkhāǁkhāsabena ǁîb mîde ra ǂâihō: “Tsî ǁî-i ǃgâuhaiba ūkhâi tsî tita sao tama-i ge tita anu tama-e.” (Mat. 10:38) ǀNî mîdi ǃnâ, Xristeǁîn ge omaridi xa mâǃoahesa. Xristub di ǁkhāǁkhāsaben di ǃâ-i ase ra mû. Tsîn ge ǁkhā ǁaeb ai ra ǃâubasen, î-i ǁîn di tanisen ǀgauba. Jehovaba ǃoaba tama omaris ǁanina tsâǀkhā. În ǁîba ǃoaba tsoatsoa tsî Elobmîs xa ǁkhāǁkhāsen.—1Pet. 3:1, 2.