ǂAn I Du Go I?

Mati i steendi hîna Babylons ǃnâ ge hōhen tsî ǁîn ge kuruhe ǀgauba Elobmîs di amaba ra ǁgau?

ÔAǃNÂSA RA DĪ KHOEN ge ǂgui steendi hîna Babylons gere om-ūhe hâ i de ge hō. Ôa-ǃnâ aob Robert Koldeweb ǃoagu i ge ǁnā steende stoovs ǃnâ gere dīhe ǃās ǃauga, “ǁnāpa i ge ǂgoab tsî ǂgui ǀaena hōhe ǁkhā-i ǃkhais ǃaroma.”

Ôaǃnâsa ra dī khoegu tsîn ge ge mû Babylons di dana khoegu ge ǁnā stoovna ǁgai xūn ǃaroma gere sîsen-ū sa. Paul-Alain Beaulieub University of Torontos dib ge ra mî: “Xoahe ge xūn ge ra ǁgau Babylons di Gao-aob ǁnān hîna gere māǃoan. Tamas ka io ǃôasiba ǂhâǂhâsa xūn ǃaroma ge ǁgau tama hâ in, stoovs ǃnâ nî khauhesa.” Gao-aob Nebukadnesari tsēdi ǃnâ ge xoahe xoas ge nēti ra mî: Hîkākā nî, khau nî, a-i ǁîn di ǀana stoovsa xu ǂoaxa, ǃgaman nî ǀaes ǃnâ aoǂga nîs ǃnâ-u.”

Nēs ge khomai aona Danieli 3ǁî danaǃâs ǃnâ xoasa xūn xa ra ǂâiǂâiǃnâ. ǁNāpa da ge ra khomai Gao-aob Nebukadnesari kai ai-īsaba Durabǂgāb ai ge ǂnubisa hîna ǃhuniǀurib xa ge kuruhesa Babylons ǃauga. ǂKham Hebreǁî khoegu, Sadraxi, Mesaxi tsî Abednego hâgu ge ge ǂkhā ǁnâ ai-īsb aiǃâ ǃhonǁgoasa. Nebukadnesari ge ǁnās ǃaroma ǁaixa tsî ge mî is stoovsa “ǁnaetisases ra ǀgams xa hû ǃnāde ǃnāsase ǀgamǀgamhe.” Tsîb ge ǁnā ǃnona khoega ‘ǂhubi ra ǀaes hâǃnâ ǃnā-oms ǃnâ ge aoǂgā.’ ǀGaisa ǀhomǃgāb ge ǁîga ǁōba xu ge huiǂui.—Dan. 3:1-6, 19-28.

© The Trustees of the British Museum. Licensed under CC BY-NC-SA 4.0. Source

Babylons di steendi tsîn ge Elobmîs da mî xū-e ra ǃkho-am. ǂGuin xoasa xūn hîna Gao-aoba ra koan ge hâ. ǀGuib ge nēti xoa-aisa: “Nebukadnesar, Babylons di Gao-aoda. . . Tî kai oms aitsma da ge omsa. . . A-i ti suriba ǁîs ǃnâ hoaǁae ǂgaeǂgui.” Nēpa ge xoahe xū-i ge Danieli 4:30 ǃnâ xoasa i ǀkha ra ǃgûǀhao, ǁnāpab ge Nebukadnesara nēti ge mî: “Kō re mâtikōses Babilonsa kaisa. Ti ǀgaib di ǁkhāsiba xu ta ge ǁîsa, ti ǃgôasib tsî ǂkhaisiba ǃoa, gao-aosi danaǃāse ge ǂnubi.”