Khomai-aon dîdi

2 Tesalonikaǁîn 3:14 ǃnâ ra mîhe ‘saosa’ ǀhaohâb tamas ka io ǀgui Xrîsteǁî-i xa ra dīhe?

Apostel Paulub ge Tesalonikas ǃnâ ge hâ ǃgâsana sao ra-e ge mîba: “Tsî khoe-i ga sige di mîs nē sîǂkhanis ǃnâ mâsa ǁnâuǀnam tama io, ǁî-e ǃgaoǃgâ, î du sado ǁî-i ǀkha tā ǁaeǁaesen î-i ǁî-e taotaohe.” (2 Tes. 3:14) ǂGurose i ge nē daoǁgausa ǀhaohâb ǃûi-aogu ǃaroma ge māhe. Kharu ge ǁaeb ǃnâ gu ge ǀhaohâb ǃûi-aoga ǃhoasa ǀhaohâb ǃnâ gere mā, khoe-i ga Elobmîs daoǁgaude sao ǂgao tama io. ǁNās khaoǃgân ge ǃgâsana sao-e hâ khoe-i ǀkha nî hâ ǀû.

ǀKharaǀkharana dīs ge a ǂhâbasa. Nēsi da ge Paulub ǁnamasa ra ǁnâuǃā, mâ Xristeǁî-i hoa-i mîǁguiba nî dīsa mâsigu ǃoagu. ǁNā-amaga i ge ǂhâbasa tama i gu ǀhaohâb ǃûi-aoga ǃkhâikhom ra ǃhoasa mā. Tae-i ǃaroma da nē xoasa nēsi ǀkhara ǀgaub ǃnâ ra ǁnâuǃa? Kō re Paulub tae-i xa ge re ǃhoasa nē ǁnamasab gere mā o.

Paulub ge ge ǃgaoǃgâ ǀnîn ge ǀhaohâb ǃnâ ‘ǀopesa tsî ǁkhāǁkhāhen ge ǁnaetigu ǃoa ûi’ tama hâ isa. ǁÎb ge Elobmîs ǃnâ-ū ge ǁnama nî xawen ge noxopa ge ǃgâ tama hâ i. ǁÎb di ǂguro saris ǃnâb ge sao ra ǁnamasa ge mā: “Khoe-i hîa sîsen ǂgao tama-i ge ǂû tide.” Xawen ge ǀnîna noxopa ge sîsen ǂgao tama i, ǁkhāsiban ge ūhâ i xawe. Tsîn ge naun di ǂhôan ǀkha gere ǁaeǁaesen. Xrîsteǁîna mati ǁnāti i khoena ga hâ-ū hâ?—2Tes. 3:​6, 10-12.

“ǁÎ-e sao” tib ge Pauluba ge mî. Nē grikeǁî gowab mîs ge ra ǂâibasen, ǁnāti ī khoe-e ǃgaoǃgâsa î du tā ǁî-i ǀgaugu xa ǂgaeǂhapuhe. Paulub ge nē ǃkhâikhomsa hoa ǀhaohâba ǃoa ge mî, ǀhaohâb ǃûi-aogu ǀguigu ǃoas ose. (2Tes. 1:1; 3:6) Mâ Xristeǁî-i hoa-i ge Xristeǁî-i hîna Elobmîs ai ǃgaoǃgaosa ǁnamasa ra ǁnâuǀnamoǃnân ǀkha tā nî ‘hâ ǀhao.’

Nēsa ra ǂâibasen nē khoe-e da ǀhaohâba xu ūǂûihe hâ khoe-i ase nî hâ-ūsa? Hî-î, Paulub ge ge ǀaro: ǁÎ-e Xristeǁî “ǃgâsa-i ase ǁnama.” Mâ Xristeǁî-i hoa-i ge noxopa sao-e hâ-i ǀkha ǀhaodi tawa hâ ǀhao tsî aoǁnâ sîsenni ǃnâ ǁhao ǁkhā. Xawen ge ǁî-e sari tide. Tae-i ǃaroma? Paulub ge ge mî, “î-i ǁî-e taotaohe.” Sida ǃgâsa-i sao-e hâ-i ǀkha da ga sarigu ǀû, o i ge ǁî-e ǀnîsi ǁî-i ǁgai ǀgauga ǀû tsî a ǀkharaǀkharasen ǁkhā.—2Tes. 3:​14, 15.

Xristeǁîna mati a ǂan mâǁaen khoe-e nî saosa? ǂGurose da ge khoe-i tanisen ǀgaub Paulub ge mîn ǀkha ra ǃgû ǀhaosa nî kō, ǁnās ge ‘ǁkhāǁkhāhen ge ǁnaetigu’ ǃoan ra ûisa. ǁÎb ge khoen hîna sida ǃgâiǂâisa xu ǀkhara ǀgaub ǃnâ xūna ra dīn ǃkharagagusib xa ge ǃhoa tama hâ i. Xawe Elobmîs ǁgaragu ǀkha ǀgui tama xūna ra dī khoen xa gere ǃhoa. ǁÎb ge tsûaǂgao hâse ra hân xas tsîna ge ǃhoa tama hâ i. Xawe Paulub ge ǁnā khoen hîna ǂanapegase Eloba ra ǁnâuǀnamoǃnân xa gere ǃhoa.

Nēstē i ga ǃgâsa-e aiǃgû tsî Elobmîs ǁgaraga ǁnâuǀnamoǃnâ,a o da ge aitsama nî mîǁgui ǁî-i ǀkha da hâ ǀhao tidesa. Nē mîǁguiba da aitsama ra dī amaga da ge tā sida omaris ǁani tama khoen ǀkha nēs xa nî ǃhoa. ǁÎ-î ǀkha da ge noxopa ǀhaodi tsî aoǁnâ sîsenni ǃnâs tsîna ǀguiba a hâ ǁkhā. ǁÎ-i tanisen ǀgauba i ga ǀkharaǀkhara, o da ge ǁî-i ǀkha sarigu ǁkhā.