Elob di ǂâibasensa a tae ǃhūbaib ǀkha?

1. Eloba tae-i ǃaroma ǃhūbaiba ge kuru?

Jehovab ge ǃhūbaiba khoena ge mā. Sida di oms ge. ǂGuro khoe-aogu ra, Adami tsî Eva hâra ge kuruhe tama ge hâ-i ira ǀhommi ǃnâ ǁan ga. Xaweb ge Eloba ǀhomǃgāna ge kuru ǀhommi ǃnân nî ǁanse. (Job 38:4, 7) Elob ge ǂguro khoe-aogu ra ǃgâi sâsa hâ ǃkhaib Eden ti ra ǂgaihe paradais ǃhanab ǃnâ ge ǁan kai. (Genesis 2:15-17) Jehovab ge Adami tsî ǁîb hānî suriba ǂkhîb ǀguiba ge ǂâibasenba hâ-i ǃhūbaib ain ǀam-e ūhâ tamase nî ûise.​—Khomai re Psalmti 37:29; 115:16.

Eden ǃhanab ǀguib ge ge paradais i. ǂGuro khoe-aogu ra ge ǁîra ôananôagub ǀkha ǃhūbaiba ga ǀoaǀoa hâ. ǁAeb ǀkhan ge hoaraga ǃhūbaiba paradais ǃnâ ga ǀkharaǀkhara hâ. (Genesis 1:28) ǃHūbaib ge tātsēs tsîna dīkākāhe tite. Khoesib di ǁan ǃkhaise hoaǁae nî hâ.​—Khomai re Psalmti 104:5.

Vidioba kō re Tae-i ǃaromab ge Eloba ǃhūbaiba kuru?

2. ǃHūbaiba tae-i ǃaroma nēsi paradai tama hâ?

Adami tsî Eva hâra ge Eloba ge ǁnâuǀnam-oǃnâ, ǁnā-amagab ge Jehovaba ǁîra ǃhanaba xu ge ǃhaeǂui. Paradais ge ge ǂoaǃnâhe tsî i ge ǀgui khoe-i tsîna dī-oa hōsi tama ge i. Elobmîs ge ra mî: ‘ǃHūbaib ge eloxoresan di ǃomǁae ra māhe.’—Job 9:24.​—Khomai re Genesis 3:23, 24.

Jehovaba ǁîb di ǂâibasensa khoen ǀkhasa ǀuru i ge? Tātsē! ǁÎb ge a hoaǀgaixa. ǁÎb ge xū-i xa dahe tama. (Jesajab 45:18) ǁÎb ge khoesib hoaba nî dī-unu tsoatsoas ǃnâb ge ūhâ i ǂâibasensa ǃoa.​—Khomai re Psalmti 37:11, 34.

3. Paradaisa mati nî oa ǀkhī-ūhe?

Paradais ge nî oa ǀkhī-ūhe ǃhūbaib ai Jesub di ǂgaeǂguis ǃnāga Elob di Gaose. Armageddoni di ra ǂgaihe torob ǃnâb ge Jesuba ǁîb di ǀhomǃgāgu ǀkha ǁnān hîna Eloba ra mâǃoana nî dīkākā. ǁNāpaxūb ge Jesuba ǁGâuaba 1 000 kurigu ǀgaiba ǃkhō-oms khami i mâsib ǃnâ nî ǂgā. Elob di khoen ge nî ûiǃkharu ǁnā dīkākāsa Jesub xan ǂgaeǂguihe tsî nî huihe amaga. ǁÎn ge ǀamo ûiba Paradais ǃhūbaib ai nî hō.​—Khomai re ǂHaiǂhais 20:1-3; 21:3, 4.

4. ǃGomsina mâǁae nî toa?

Eloba mâǁae eloxoresasiba nîra toa kai? Jesub ge “sao-e” ge mā da ǀams mâǁae nî hāsa. Nētsē ǃhūbaib ai hâ mâsib ge khoeda di ûiba ra ǃaoroxa kai. Nēs ge ra ǁgau “nē hâ ǁaeb toas” ǃnâ da ûi hâsa.​—Khomai re Mateub 24:3, 7-14, 21, 22.

Jesub ge ǀhomma xu ǃhūbaib ǂama nî ǂgaeǂgui 1 000 kurigu ǀgaiba. ǁÎb ge hoa ǃgomsina nî ǀamǀam. (Jesajab 9:5, 6; 11:9) Gaose ǀguib ge hâ tite xaweb ge Jesuba ǀGawi Pristerse nî i. Tsîb ge Eloba ǀnam khoen hoan di ǁorena nî dībē. Nēs ge ra ǂâibasen Jesub ǃnâ-ūb ge Eloba ǀaeb, kairasib, tsî ǁōba nîra ūbē.​—Khomai re Jesajab 25:8; 33:24.

5. Ham na hānîǁaeb Paradais ǃnâ nî hâ?

Eloba ra ǁnâuǀnam khoen ǀguin ge Paradais ǃnâ nî hâ. (1 Johaneb 2:17) Jesub ge ǁîb di saoǃgon-aona ge sî in tsamtsi ǂâixana ôa, tsî ǁkhāǁkhā matin Elob di ǃgâib ǃnâ a hâ ǁkhā ǀgausa. Nētsēb ge Jehovaba miliundi ǃnâ hâ khoena ra aiǂhomi Paradais ǃhūbaib ai ǁansa. (Tsefanjab 2:3) Jehovab di ǀHûǀguitimî-aon di Gaosib ǀHû-omi tawan ge khoena ra ǁkhāǁkhāsen matin nî ǃgâi ao, tara tsî ǁgû kaisa. ǀGôan tsî ǁgûn tsîn ge ǀguiba ra ǃoaba tsî ra ǁkhāǁkhāhe matin ǃgâiǂhôasa xu a ǀama ǁkhā ǀgausa.​—Khomai re Mixab 4:1-4.