Matits sa ǀgôa-e nî ǁkhāǁkhā ǀgaus

Jehovab ge omarisa a ǂnûiǂgā o, ob ge ǁgûna ǀgôan ǂam-ai ge mâi. (Koloseǁîn 3:20) Sa ǃereams ge ǁgûts axase sa ǀgôana ǁkhāǁkhāsa, Jehovaba ǀnamsa tsî ǃereamsa nî tani kaikhoe kain ga ra o. (2 Timoteub 1:5; 3:15) ǁKhāǁkhāsens tsînats ge nî hî ǂansa sa ôab tamas ka io ôas di ǂgaob ǃnâ i tae-e ra īsa. Xawe sa aiǁgaus ge kaise a ǂhâǂhâsa. Sa ôa-ets ge kaise ǃgâise Jehovab mîsa nî ǁkhāǁkhā xawets ge aibe satsa sa ǂgaob ǃnâ nē mîsa nî ūhâ.—Psalmdi 40:8.

1 SA ǀGÔANA SUPUSUPUBA RE SATS ǀKHA ǃHOASA

ELOBMÎS TA MÎS: “ǃHae re ǁnâu i nîsa, î-i ǁgarasa ǃhoa i nîsa.” (Jakobub 1:19) ǂHâbats ge ra sa ôan nî tsâ sa harasen sats ǀkha a ǃhoa ǁkhā sa. ǁÎn ge nî ǂan sats hoaǁae ǁîna hâbasa tsî nî ǃgâ sa ǃhoan ga o. ǁKhoaxa ǂkhîba ūhâ ǂnamipeba dība nî re in supubahe ǁgâiǂuisen ǂgaon ga ra o. (Jakobub 3:18) ǁÎn ga ǂâi o sats ge a karosa tamas ka io ǀgoraǃgâxa ti, on ge amabes ǃnâ sa ǃoa-ai hara tite. Sa ôan ǀkhats ge nî ǃnūǃnâxa tsî ǃnās hoasa ǂanǂan nî re ǁînats a ǀnam sa.—Mateub 3:17; 1 Korinteǁîn 8:1.

SATS A DĪ ǁKHĀ I:

• ǀGôana hâba re ǃhoa ǂgaon ga ra o

• Hoaǁae ǀgôan ǀkha ǁgam re, ǃgomsin ga hâ ǁaeb ai ǀguis ose

2 DĪTSÂ RE ǁNÂUǃĀSA TAE-EN AMABES ǃNÂ RA ǂÂIBASENSA

ELOBMÎS TA MÎS: “ǁNâuǃāxase mîs ai ga ǃgaoǃgâ i, ǁnā-i ge ǃgâiba nîra hō.” (ǂKhoamîdi 16:20) ǀNî ǁaegats ge sa ôa i mîs ǃgâb ai nî ǃgâ, ǁî-i ama tsâsiba ǁnâuǃās ǃaroma. ǁNaetisasen ge ǂkham khoena xūna ra kaikai tamas ka io ǂâibasen taman hâ xūna ra mî. “ǁNâu tamab hâ hîa ga ǃereammi, ǁnābas ge ǁî ǃkhaisa gâresib tsî taob ase nîra ība.” (ǂKhoamîdi 18:13) Tā ǃhae ǁaib ǃaroma.—ǂKhoamîdi 19:11.

SATS A DĪ ǁKHĀ I:

• ǁKhaesen re i tā ǃhaese ǃhoaǂgâ tamas ka io kaikai, tae-i ǀgui-e i ga sa ôa-e mî xawe

• ǂÂi-oa re sats tsîn gere tsâ ǀgausa ǂkhamrots ge i o tsî tae-i ge satsa ǂhâǂhâsaba i sa

3 HOAǁAE ǀGUI XŪ-I AI M RE

ELOBMÎS TA MÎS: “ǁNâu re, ti ôatse, saob di ǂgōsǀausa îts saos di ǁkhāǁkhāsa tā ǂkhā.” (ǂKhoamîdi 1:8) Jehovab ge ǁgûra ge mā-am ǀgôana gaoǂamsa. ǁKhāǁkhā re ǀgôana in ǃgôa tsî ǁnâuǀnam ro. (Efeseǁîn 6:1-3) ǀGôan ge a hōǃâ ǁkhā ǁgûra ga hoase “ǁkhā ǂâis tsî ǁkhā tsâsens” tsîna ūhâ tama i o. (1 Korinteǁîn 1:10) ǂKhaba ro ga o, tā ǁnāsa ǀgôan ais ai dī re, nēs ge ǁîn ūba ro hâ ǃgôasiba a khôa ǁkhā.

SATS A DĪ ǁKHĀ I:

• ǃHoaǃgâ tsî hōgu re mati ro ǀgôa-e nî ǁnama ǀgausa

• ǃKharagagu ǂâide ro nî ūhâs ga o mati ro ǀgôa-e nî ǁkhāǁkhā tsî kaikai ǀgaus xa, o khoe-aoguse ǃgâgu re

4 ǀAPE-E ŪH RE

ELOBMÎS TA MÎS: “ǀGôaba ǂguro tsoatsoana ǁkhāǁkhā, ǁîb di daob nî ī xase.” (ǂKhoamîdi 22:6) ǃGâi ǁkhāǁkhās ǀgôan dis ge aitsamaba xu hā tite. Aiǂhomisens ge a ǂhâbasa, nēs ge ǀgôana ǁnamas tsîna ǃkhōǂgā hâ. (Psalmdi 127:4; ǂKhoamîdi 29:17) ǁNamas ge ǁkharas ǀguisa ǂâibasen tama hâ xawets ge ǀgôana nî hui in ǁnâuǃā tae-i ǃaroman go ǁkharaheba sa. (ǂKhoamîdi 28:7) ǁKhāǁkhā nî re in Jehovab mîsa ǀnam tsî matin tsoatsoade a ǂanǂui ǁkhā ǀgausa. (Psalmdi 1:2) Nēs ge nî hui ǂuru ǂâiǂâisen sa ûhâs ǀkha.—Hebreǁîn 5:14.

SATS A DĪ ǁKHĀ I:

• Hui re sa ǀgôana in Eloba ama Khoese mû ǂgomǃgâ ǁkhān aba

• Hui nî re in ǁgau-oǃnâ xūna mûǃā tsî ǂgō, internets di ǂhawegu ai ra hōhe xūna xu. ǁKhāǁkhā nî re in ǂgōsen internets ai ǁgoeb ǃaroma khoena ra ôa khoena xu