2ǁÎ DANAǃÂS
Elobmîs—ǂkhanis Eloba xu ra hās
1, 2. Tae-i ǃaromas Elobmîsa buruburuxa ǀkhaeb ase ī, Eloba xu ra hāse?
MATI du ra tsâ sadu ǀhō-i ga ǀkhaeba a mā du o? Sadu ge ǀnîsi ǃâu ǂgao tide ǁnā ǀkhaeba ǁkhopa-amsa tsî du ge kaise nî ǃgâiaǂgao sadu ǀhō-i go sado xa ǂâi ǃkhais ǃaroma. ǁÎ-e du ge nî gangan.
2 Elobmîs ge Eloba xu ra hā ǀkhaeba. ǁÎs ge ǀkhara ǃkhai i ai da hō ǁoa ǂansa ra mā da. Aiǁgauses ge Elobmîsa ra mîba da Elob ge ǀhommi, ǃhūbaib tsî ǂguro aob tsî taras tsîna ge kuru. Elobmîs ge tsoatsoade ra mā da, î da ǃgomsin hîna da ūhâna sîsenǂam. Elobmîs ge ra ǁkhāǁkhā matib Eloba ǁîb di ǂâisa nî dīǀoaǀoa ǀgausa ǃhūbaiba ǃgâiǃgâis ǃnâ-ū. Elobmîs ge buruburuxa ǀkhaeb ase ī!
3. Elobmîsa du ra ǁkhāǁkhāsen khami du tae-e nî mûǂan?
3 Elobmîsa du ra ǁkhāǁkhāsen khami du ge nî mûǂan, Elob ta ǂhâbasa î du ǁÎb ǀhō kai. ǁÎb xa du ǃnāsase ra ǁkhāǁkhāsen khamis ge sadu ǀhōsasisa ǁÎb ǀkha nî ǀgai.
4. Tae-e Elobmîs xa ra mâǂoaba du?
4 Elobmîs ge 2 600 gowagu ǃnâ ǂnûiǃkhunisa tsî biliundi Elobmîdi ge ǀnai ǁgâihe hâ. ǃHūbaib ǃnâ i ge 90 persents xa ǃnāsa khoena Elobmîsa ǁîn ǁgûsi gowab ǃnâ a khomai ǁkhā. Mâ wekheb hoaba i ge miliundi khoena ǀasa Elobmîde ra hō! Î, Elobmîs khami ī ǂkhani i ge a ǀkhai.
5. Tae-i ǃaroma da a mî ǁkhā Elobmîs Elob xa “ǃgomǂgāǃnâhe hâ” ti?
5 Elobmîs ge Elob xa “ǃgomǂgāǃnâhe hâ.” (Khomai re 2 Timoteub 3:16.) ǀNîn ge a mî ǁkhā, ‘Elobmîs ge khoen xa xoahe hâ xawe mati i ios Eloba xu ra hā?’ Elobmîs ge ra ǃeream: “ǃAnu Gagab xa doeǁgarihe hâsen ge ǃanu khoen Elob dina gere ǃhoa.” (2 Petrub 1:21) Nēs ge a ǀgui sîsenni danab hîna ǁîb di xoa-aosa ra mîbab is sîǂkhani-e xoaba bis ǀkha. Nē sîǂkhanisa a ham-i ti? Sîsenni danab ti a tsî xoa-aos ti tama hâ. ǁNā ǀgaus ais ge Elobmîsa a Elob di ǂkhani tsî khoegu hînab gere sîsenū gu ti tama hâ. Elob ge ǁîga gere daoǁgau î gu ǁîb ǂâide xoa. Elobmîs ge amabes ǃnâ ‘Elob di mîsa.’—1 Tesalonikaǁîn 2:13; 2ǁî ǀArosa ǃgāsasiba khomai re.
New World Translation of the Holy Scriptures ge ǂgui gowagu ǃnâ ra hōhe
ELOBMÎS GE A ǂGOMǂGOMSA
6, 7. Tae-i ǃaroma da a mî ǁkhā Elobmîs a ǀguiǃnâxa ti?
6 ǁAubexas ge Elobmîsa 1 600 kurigu ǁaeb ǃnâ ge xoahe. ǁÎs di xoa-aogu ge ǃkharagu ǁaegu ai ge ûi hâ i. ǀNîgu ge ǀgapi ǁkhāǁkhāsa ge ūhâ i tsî ǀnîgu ge ge ǁkhāǁkhāsa tama hâ i. Aiǁgause, ǀguib ge ge ǀaedī-ao-i. Tsî ǀnîgu ge ge ǂgāri-ao, ǁauǃkhō-ao, gure-ao, kēbo-ao, ǂhanuǂhanu-ao tsî gao-aos tsîna ge i i. Xoa-aogu ge ǃkharagagu i xawe i ge Elobmîs ǃân hoana a ǀguiǃnâxa. ǁÎs ge ǀgui danaǃâs ǃnâ nē xū-e mî tsî nau di ǃnâ ǀkhara xū-e sī mî tama hâ.a
7 ǂGuro danaǃâdi ǃnâ i ge ra ǁgau mati i ge ǃhūbaib di ǃgomsiga tsoatsoa ǀgausa. Tsî ǀuniga danaǃâdi ge ra ǁgau matib Eloba nē ǃgomsiga ūbē tsî ǃhūbaiba nî paradais ǃnâ ǀkharaǀkhara ǀgausa. Elobmîs ge ǀoadisidi kurin khoesi ǃnaeǃkhaidi dina ra ǃgū-ai tsî ra ǁgau Elob di ǂâis hoaǁae ra dīǀoaǀoahesa.
8. Aiǁgaude mā re Elobmîs kurus ǂnamipe hâ ǂans ǀkha a ǂgomǂgomsade.
8 Elobmîs ge kurus ǂnamipeb ǂansas nî ǁkhāǁkhā ga xoahe tama hâ tsî skolǂkhanis ase i tama hâ, xawe hoaǁae a ǂgomǂgomsa kurus ǂnamipe hâ ǂans xas ga ǃhoa o. Nēn hoana da ge Eloba xu ra hā ǂkhanisa xu a ǃâubasen ǁkhā. Aiǁgause, Levitikus ǂkhanis ge Elob di ǂgaoǀkhāde ǃkhōǂgā hâ, matin Israelǁaesa ǀaega khoraǂuisa nî ǁkhaesa. Nēs ge gaxuǁaeba ǃkharu hâse ge xoahe khoen ge xū-e kimgu hîna ǀaega ra ǃaroman xa ǀū i hîna. Elobmîs ge ra ǁkhāǁkhā ǃhūbaib xū-i ai ǂgāmâihe tamasa. (Job 26:7) ǂGui khoen ge ge ǂâi hâ i ǃhūbaib a ǂhāba ti hînas ge Elobmîsa ǃhūbaib a ǃgubu ti ge mî.—Jesajab 40:22.
9. Elobmîs xoa-aogu di ǂhauǃnâsiba tae-e sida ra ǁkhāǁkhā?
9 ǃNaeǃkhaidi Elobmîs ǃnâ xoasadi ge hoaǁae a ǂgomǂgomsa. ǂGui ǃnaeǃkhaidi ǂkhanin ge hoaǁae ǂgomǂgomsa tama, xoa-aogu ǂhauǃnâ tama hâ amaga. Aiǁgause ǁîgu ge hoaǁae ǁîgu ǃhūb gere torob ǃnâ dāhe ǃnādi xa ge xoa tama hâ i. Xawe Elobmîs di xoa-aogu ge hoaǁae ge ǂhauǃnâ i, Israelǁaes gere dāhe os tsîna. ǁÎgu dīsādi xas tsîna gu ge gere xoa. Aiǁgause Numeris ǂkhanis ǃnâb ge Moseba ǁkhōǁkhōsa dīsās tsî Elob ge ǁîba a ǁnama ǀgaub xa ge xoa. (Numeri 20:2-12) Elobmîs xoa-aogu di ǂhauǃnâsib ge ra ǁgau Elobmîs Eloba xu ra hāsa. Nēs ge ra ǁgau Elobmîs ǃnâ da a ǂgom ǁkhāsa.
ǂKHANIS ǃGÂI ǀAPEMĀDI XA ǀOA HÂS
10. Tae-i ǃaromas Elobmîs ǀapemāde nētsē kai huib ase ība da?
10 Elobmîs ge “Elob xa ǃgomǂgāǃnâhe hâ, tsî a harebe ǁkhāǁkhās ǃoa, tsî ǂgōǀaus ǃoa, tsî ǀkharaǀkharas ǃoa, tsî ǂhanu-aisib ǃnâ kaikais ǃoa.” (2 Timoteub 3:16) Amase, Elobmîs ta nētsē mā da ǀapemādi ge ra sîsen. Jehovab ge sadab kuru hâ ǀgauba ǃgâise a ǂan ǁnā-amagab ge sada ǂâidi tsî tsâ ǀgaub tsîna ǃamkuse ra ǁnâuǃā. ǁÎb ge sada ǃgâise a ǂan aitsama da a ǂansens xa, tsîb ge ra ǂhâba î da ǂkhîba ūhâ. ǁÎb ge a ǂan tae-i sada a ǃgâiba tsî tsūbasa.
11, 12. (a) Tae-i ǃgâi ǀapemādeb ge Jesuba Mateub di 5ǁî danaǃâsa xu 7ǁî danaǃâs kōse mā da? (b) Taen tsîna da Elobmîs ǃnâ a ǁkhāǁkhāsen ǁkhā?
11 Mateub di 5ǁî danaǃâsa xu 7ǁîs kōse da ge Jesub ge mā da ǃgâi ǀapemāde ra khomai, mati du nî ǂkhîba ūhâs, khoen ǀkha ǃgâise hōgus, mati du nî ǀgores tsî mati du sadu mariǁhōga nî mû ǀgaus tsîna. Nē ǀapemādeb ge 2 000 kurigu ǃkharu hâse ge a mā da xawe di ge nētsēs tsîna ǃgâi sîsenǂuiba ūhâ.
12 Elobmîs ǃnâb ge Jehovaba tsoatsoade ra ǁkhāǁkhā da î da ǃgâi omaris ûiba ūhâ, ǃgâi sîsenao kai tsî ǂkhîb ǃnâ hoa khoen ǀkha hâ. Elobmîs tsoatsoadi ge hoaǁae a hui da ǁkhā, mapa ǀgui da ga hâ xawe tamas ka io ū da hâ ǃgomsin hoan ǃnâ.—Khomai re Jesajab 48:17; 3ǁî ǀArosa ǃgāsasiba khomai re.
SADU GE ELOBMÎS KĒBODI ǃNÂ A ǂGOMǃGÂ ǁKHĀ
Elobmîs xoa-aob Jesajab ge ge kēbo Babilons nî dīkākāhesa
13. Jesajaba tae-e ge kēbo Babilons xa?
13 ǂGui Elobmîs kēbodi ge ǀnai ge ama kai. Aiǁgause, Jesajab ge ge kēbo Babilons nî dīkākāhesa. (Jesajab 13:19) ǁÎb ge ge ǁguiǃā ǃamkuse matis Babilonsa nî danhe ǀgauba. ǁNā ǃās ge kai dao-amdi tsî ǃāb xa gere ǁkhaubahe. Xawe Jesajab ge ge kēbo ǁnā ǃāb nî ǂnâǂnâhe tsî di dao-amde ǁkhowa-amsase nî ǁnāxūhesa. ǁNāǂam-aon ge ǃāsa ǃkham-i ose nî dan. Jesajab tsîn ge ge kēbo Koreb di ǀon hâ khoeb Babilonsa nî dansa.—Khomai re Jesajab 44:27–45:2; 4ǁî ǀArosa ǃgāsasiba khomai re.
14, 15. Jesajab di kēbosa mati ge dīǀoaǀoahe?
14 ǀGamkaidisi kurigu nē kēbos ge xoamâihes khaoǃgâ gu ge toroǃkham-aoga ge hā Babilonsa gu nî ǁnāǂamse. Ham-e nē toroǃkham-aoga gere ǂgaeǂgui? Kēbos ge mî khamib ge Koreb Persiab di gao-aoba ge ǁî-i. Hoa xūn ge ge ī kēbohe ge khami.
15 Nē ǃās gere ǁnāǂamhe ǃuis ain ge Babilonǁîna ǁâudība ge ūhâ i. ǁÎn ge ǃnorasase gere tsâ kai mirgu tsî ǃāb ǁgammi xa. ǃĀs ǃaugab ge Koreb tsî ǁîb toroǃkham-aoga ǃgam āga ge khao îb ǃāb di ǁgamme ǂhere ǁkhā. ǁGammi ge ǂhere o, o gu ge Persiab toroǃkham-aoga ge ǃgû ǃkharu ǁkhā i. Xawe mati gu nē toroǃkham-aoga Babilons di mirgu xa ǁkhaehe tamase ga ǃkharu hō hâ? Kēbos ge mî khami ǀguis ge ǃās di dao-amde ǁkhopa-amsase ge ǁnāxūhe, ǁnās ǀkha gu ge toroǃkham-aoga ǃkham tamase ǃās ǃnâ ge ǂgâ.
16. (a) Jesajaba tae-e ge kēbo Babilons xa? (b) Matis ge Jesajab di kēbosa ge dīǀoaǀoahe?
16 Jesajab ge ge kēbo khoe-i xare-i Babilons ǃnâ tātsēs tsîna ǁan tidesa. ǁÎb ge ge xoa: “ǁNāpa i ge ǁanǃkhai-i xare-e hâ tide ǀamos kōse tsîs ge ǁanǃnâhe tide ǃhaosa xu ǃhaos kōse.” (Jesajab 13:20) Nēsa dīǀoaǀoahes ge? Babilons ge mâ i ǃkhaib ge ǁaubexa 80 kilometerde Baghdads ǃkhabagas, Iraki dis ǃnâ ra hōhe tsî ǁîs mâǃgaugu tsîna. Nētsēs tsînas ge khoe-i xa ǁan ǃnâhe tama hâ. Jehovab ge Babilonsa “ǀnapus ǁgaoǁgaos dis ǀkha” ge dīkākā.—Jesajab 14:22, 23.b
Babilons di mâǃgaugu
17. Tae-i ǃaroma da Elob di mîmâidi hoade a ǂgomǃgâ ǁkhā?
17 ǂGui Elobmîs kēbodi ǀnai ama kai hâs ge ra ǁgau da Elobmîs ta hānîǁaeb xa mî xūna da ǂgomǃgâ ǁkhāsa. ǂGomǃgâ ǁkhā da ge a Jehovab ǁîb di mîmâis ǃhūbaiba paradais ǃnâ ǀkharaǀkharasa nî dīǀoaǀoasa. (Khomai re Numeri 23:19.) Î, ǃâubasensa da ge ūhâ “ǀamo ûib di ǃâubasens ǃoa, ǁnā Elob, ǂhumi ǁoab ge ǀamo ǁaegu aiǃâ mîmâis ǃoa.”—Titub 1:2.c
ELOBMÎS GE SADU ÛIBA A ǀKHARAǀKHARA ǁKHĀ
18. Pauluba mati ‘Elobmîsa’ ra ǁguiǃā?
18 ǁKhāǁkhāsen da ge go ǀnî hâ ǂkhani-i ge a ǀkhai Elobmîs khami ī-e. ǁÎs ge a ǀguiǃnâxa tsî kurus ǂnamipeb ǂans tamas ka io ǃnaeǃkhaidi ǁhōgu tawa i ga hā o, o hoaǁae a ǂōrisa. ǁÎs ge ǃgâi ǀapemāde ra mā da tsî ǂgui kēbodi hîna ge ǀnai ī di tsîna ǃkhōǂgā hâ. Xawe Elobmîs ge ǁnās xa ǃnāsana ra dī. Apostel Paulub ge ge mî: Elobmîs a “ûitsama tsî ǀgaisa” ti. ǁNāsa tae-e ra ǂâibasen?—Khomai re Hebreǁîn 4:12.
19, 20. (a) Elobmîsa mati nî hui du î du aitsama ǂansen ǁkhā? (b) Mati du ra ǁgau Elobmîs ǀkhaeba du ra ǃgôaǃgâsa?
19 Elobmîs ge sadu ûiba a ǀkharaǀkhara ǁkhā. ǁÎs ge a hui du ǁkhā î du ǂanǂui sadu amabes ǃnâ a tae ǃnôa khoesa. ǁÎs ge nî hui du î du sadu ǃgam ǂâidi tsî tsâsigu tsîna ǁnâuǃā. Aiǁgause, sada ge ǀnîsi a mî ǁkhā Eloba da a ǀnam ti. Xawe ǁîba da a ǀnamsa ǁgauǁgaus ǃaroma da ge Elobmîs ta mî xūna nî ûiǂui.
20 Elobmîs ge amabes ǃnâ Eloba xu ra hā ǂkhanisa. ǁÎb ge ra ǂhâba î du Elobmîsa khomai, ôaǃnâ tsî ǀnam. ǃGôaǃgâ re nē ǀkhaeba tsî ôaǃnâ ǀgara re. O du ge Elob di ǂâibasensa khoesib ǃaroma nî ǁnâuǃā. Sao ra danaǃâs ǃnâ da ge nē ǂâibasens xa ǃnāsase nî ǁkhāǁkhāsen.
a ǀNî khoen ge ra mî Elobmîs ge ǀguiǃnâxa tama hâ, xawe ǁnās ge ama tama hâ. Mû re 7ǁî danaǃâs The Bible—God’s Word or Man’s? ti ǀon hâ ǂkhanisa Jehovab di ǀHûǀguitimî-aon xa māǂuihe hâsa.
b Elobmîs kēbodi xa du ga ǃnāsase ǁkhāǁkhāsen ǂgao o, ots ge 27 sa xu 29ǁî ǂhawega a khomai ǁkhā A Book for All People di ǀon hâ ǂkhanis ǃnâ, Jehovab di ǀHûǀguitimî-aon xa māǂuihe hâsa.
c Babilons di dīkākās ge Elobmîs di kēbodi ǀguis hîna ge ama kaisa. Sadu ge ǃnāsa ǃgāsasiba a hōǁkhā Jesub Xristub xa hâ kēbodi ai 5ǁî ǀArosa ǃgāsasib tawa.