Mati du a Elob di ǀhō kai ǁkhā?

1, 2. Mâ khoega ge Jehovab di ǀhōsa ī?

HAM-E du sadu ǀhōsase ǂhâba hâ? Sadu a ǃgâiba khoe-e. Khoe-i hîna du ra hōgu-ū i tsî ǁî-i ge sadu ǀkha ra hōgu. Khoe-i hîna ǃgâi khoexaǃnâ ǀgauba ūhâ i hîna sado ra ǂgae-e.

² Jehovab ge ǀnî khoena ge ǁhûibasen în ǁîb ǀhōsa kai. Aiǁgause, Abrahammi ge ge Jehovab di ǀhōsa i. (Jesajab 41:8; Jakobub 2:23) Jehovab tsîn ge Davib xa ge ǃgâibahe i. ǁÎb ge ge mî Davib ge ǁîb “ǂgaob ǃoa ī” khoeba. (ǃNaeǃkhaidi 13:22) Tsî kēbo-aob Danieli ge Jehovab mûǁae “kaise ǀnamǀnamsa” ge ī.—Danieli 9:23.

3. Tae-i ǃaroma gu ge Abrahammi, Davib tsî Danieli tsîna Jehovab ǀhōsa kai?

³ Matigu ge Abrahammi, Davib tsî Danieli tsîna Jehovab ǀhōsa kai? Jehovab ge Abrahammi ǃoa ge a mî: “Ti dommats go ǁnâuǀnam.” (Genesis 22:18) Jehovab ge ǃgamǃgamsen tsî ra ǁnâuǀnam bi khoen ǀkha ra ǀhōgu kai. ǁAedi khoen tsîn ge a ǁîb ǀhō kai ǁkhā. Jehovab ge Israelǁaesa ge ǁguiǃāba: “ǁNâu ti domma, o ta ge tita Elose nîra ība du, tsî sadu ge tita ǁaese nîra ība.” (Jeremiab 7:23) Sadu tsîn ge Jehovaba nî ǁnâuǀnam ǁÎb di ǀhōsa kai ǂgao du ga ra o.

JEHOVAB GE ǁÎB ǀHŌSANA RA HUI

4, 5. Jehovaba mati ǁîb ǀhōsana ra hui?

⁴ Elobmîs ge ra mî Jehovab ge ǀgauga ra ôa “ǀgaisaseb nî ǁgausenga, ǁnān ǂgaob ân ǀoasase ǁîb tawa ǂae hâna.” (2 Kroniks 16:9) Psalmdi 32:8 ǃnâb ge Jehovaba ǁîb ǀhōsana ra mîmâiba: “Tita ge nî ǁgau tsî nî ǁkhāǁkhā tsi ǁnā daob, ǁîb aits nî ǃgûb xa; tita ge nî ǀapemā tsi, ti mûs ge sa ai nî hâ.”

⁵ ǀGaisa khākhoeb ge ǂhâba hâ î da tā Elob di ǀhōsa kai. Xawe Jehovab ge ra hui da ǂgao. (Khomai re Psalmdi 55:22.) Jehovab ǀhōn ase da ge ǁîba ǂgaob hoab ǀkha ra ǃoaba. Tsî da ge ǂgomǂgomsase ra hâ mâsigu ga ǃgoms tsîna. Tsî ǁkhā ǂgomǃgâsiba da ge ūhâ psalmdi xoa-aob ūhâba. ǁÎb ge Jehovab xa ge xoa: “Ti amǀkhāb tawab hâ amaga ta ǁnobe tide.” (Psalmdi 16:8; 63:8) ǁGâuaba mati ra ǁkhae î da tā Elob di ǀhōsa kai?

SATANNI ǂGĀ-AMS

6. Satanna tae-e khoen xa ge mî?

⁶ Disiǀguiǀāǁî danaǃâs ǃnâ da ge go ǁkhāǁkhāsen Satanni ge Jehovaba mâǃoasa tsî ǀhapiǂgā-amsa ǂhumi tsîb ǂhauǃnâ tama hâsa, Adammi tsî Evas tsînab ge mā-am tama hâ io îra aitsama mîǁguibasen tae-i a ǂhanus tsî tsūs tsîn ǁaegu. Elobmîs ǂkhanis Jobi dis ge ra mîba da Satanni khoena ra ǀhapiǂgā-amsa Elob di ǀhōsa kai ǂgao rana. Satanni ge ra mî khoen xū-en nî hō ga ǀgui Eloba ra ǃoabasa tsî ǀnam Bi tama hâsa. Satanni ge ge mî mâ khoe-i hoa-eb nî Elob ǃoagu dawa ǃkhaisa. Hā re î da kē Joba xu tae-e da a ǁkhāǁkhāsen ǁkhāsa tsî Jehovab ge mati hui bi ǀgaus tsîna.

7, 8. (a) Jehovaba mati Jobi xa gere tsâ? (b) Satanna tae-e Jobi xa ge mî?

⁷ Joba ge ham-i? ǁÎb ge ge ǃgâi khoe-i 3 600 kurigu ǃkharu hâse ge ûi hâ iba. Jehovab ge ge mî khoe-i xare-i ge ǁîb khami ge ī tama hâ i ǃhūbaib ai. Jobi ge ǃgam ǃgôasiba Eloba ge ūba hâ i tsî ǁîb ge ǁgai xūna ge ǃhui hâ i. (Job 1:8) Î, Jobi ge amabes ǃnâ ge Jehovab ǀhōsa i.

⁸ Satanni ge ge mî Jobi Eloba ra ǃoabasa xū-eb nî hō ga ǀgui. Satanni ge Jehovab ǃoa ge mî: “Sats ge ǃhara-e ge dī ǁîb ǂnamipe tsî ǁîb oms ǂnamipe tsî mâ ǀkhāb hoab ai ūb hâ xūn hoan ǂnamipe. Sîsenni ǁîb ǃomkha dibats ge satsa ge ǀkhae, tsî ûitsama xūn âba ǃhūb ǃnâ kaise ge ǂguiǂgui. Xawe ǃommi âtsa nēsi ǀhōǂui, îts ūb hân hoana tsâǀkhā, ob ge ais âts ǃnâ nîra ǀâxare tsi.”—Job 1:10, 11.

9. Jehovaba tae-e Satanna ge mā-am îb dī?

⁹ Satanni ge Joba ge a ǂgā-am ǁîb Jehovaba xū-eb nî hō ga ǀgui ra ǃoaba di. Satanni ge ge mî ǁîb nî ǁkhaesa îb Joba tā Jehovaba ǃoaba. Jehovab ge Satanna ge ǃkhō-am tama hâ i, xaweb ge Satanna ge mā-am îb Joba ǃâitsâ tsî mû Jehovab ǀhōsab asa, ǁîba a ǀnamma.

SATANNI ǁNĀǂAMDI JOBI AI

10. Satanna mati Joba ge a ǁnāǂam tsî Joba tae-e ge dī?

¹⁰ ǂGurose, Satanni ge Jobi di hoa xamarina ge ǃnari tamas ka io ge a dīkākā. ǁNāpaxūb ge Satanna Jobi ǃgān hoana ge a ǃgam. Jobi ge ūb ge hâ i xūn hoana ge a ǂoaǃnâ. ǀUniga ǁnāǂams ǃnâb ge Satanna Jobi disi ǀgôan hoana ge a ǃgam ǂoab ǀkha. Xawe Jobi ge ǂgomǂgomsase Jehovab ǀkhāb ai ge mâ. “Nēn hoan ǃnâb ge Joba ǁore tama, tsî Eloba ǀhapimā tama ge i.”—Job 1:12-19, 22.

11. (a) Satanna tae-i tsîna Joba ge dī? (b) Joba tae-e ge dī?

¹¹ Satanni ge ǀûsen tama ge hâ i. ǁÎb ge Eloba ge a mâǃoa mîb ge o: “ǁÎb di ǂkhōn tsî ǁîb di ǁgans tsîna tsâǀkhā, ob ge ais âts ǃnâ nîra ǀâxare tsi.” ǁNāpaxūb ge Satanna Joba tsûtsûsa ǁōb ǀkha ge a tsâǀkhā. (Job 2:5, 7) ǁKhawab ge Joba ǂgomǂgomsase Jehovab ǀkhāb ai ge mâ. ǁÎb ge ge mî: “ǁŌ ta nîs kōse ta ge ti ǂhauǃnâsiba tita xu sîsenbē tide.”—Job 27:5.

12. Matib ge Joba ǁgau Satanni a ǂhumi-aosa?

¹² Jobi ge xū-e ge ǀū i Satanni di ǂgā-amdi xa tamas ka io tae-i ǃaromab gere nētikōse ǃgomma tsâs tsîna. ǁÎb ge ge ǂâi hâ i Jehovab ǁîb ǃgomsina ra ǃaroma ti. (Job 6:4; 16:11-14) Xawe ǁnās ǂamaib ge Joba ǂgomǂgomsase Jehovab ǀkhāb ai ge mâ. Îganǀgē tamase da ge a mî ǁkhā. Jobi ge ǁîb xa ǀgui ge ǂâi tama hâ i. ǁÎb ge ge Elob ǀhōsa i, ǁÎbab ge ǀnam i amaga. Satanni ǂgā-amdi hoadi ge ge kai ǂhumi i!

13. Jobi ǂgomǂgomsasib di ǀamsa ge tae-i?

¹³ Jobi ge ge ǀū i tae-i ǀhommi ǃnâ gere īsa xaweb ge ǂgomǂgomsase Elob ǀkhāb ai ge mâ tsî ge a ǁgau Satanni a ǂkhabadī-aosa. Jehovab ge Joba ge mādawa-am ǁîb ǂgomǂgomsa ǀhōsasis ǃaroma.—Job 42:12-17.

SATANNI MATI SADO RA ǂGĀ-AM ǀGAUS

14, 15. Satanni di ǀhapiǂgā-amsa a tae hoa khoen ǃoagu?

¹⁴ Sadu ge ǂhâǂhâsa xūna a ǁkhāǁkhāsen ǁkhā Jobi ǀkha ge ī xūna xu. Nētsēb ge Satanna sada ra ǂgā-am Jehovaba da hō da ra xūn ǃaroma ǀgui ra ǃoaba ti. Job 2:4 ǃnâb ge Satanna ra mî: “Tsî mâ xū-i khoe-i ūhâ-i hoa-e i ge ra mā ǁî-i di ûib ǃaroma.” Satanni ge hoa khoena ra ǀhapiǂgā-am ǁîn xa ǀguin da ǂâi ti, Jobi ǀguib ose. Kaidisidi kurigu Jobi ge ǁōs khaoǃgâb ge Satanna noxoba Jehovaba ra ǃkhāǃkhā tsî ǁîb ǃoaba-aona ra ǀhapiǂgā-am. Aiǁgause, ǂKhoamîdi 27:11 tawa da ge ra khomai: “Gā-aise ī ti ôa, îts ti ǂgaoba ǃgâiaǂgao kai, î ta tita ga ǃkhāǃkhāba xū-e ǃeream ǁkhā.”

¹⁵ Sadu ge a ǁhûi ǁkhā Jehovaba ǁnâuǀnamsa tsî ǁÎb di ǂgomǂgomsa ǀhōsasis ǃnâ-ūs tsîna a ǁgau ǁkhā Satanni a ǂhumi-aosa. Kai ǀkharaǀkharana du ga dī o, î du Eloba sadu ǀhōsase ūhâ sadu ûib ǃnâ, o du ge ǃgâi mîǁguiba go dī! Nē mîǁguib ge kaise a ǂhâǂhâsa. Satanni ge ra mî sadu ge ǂgomǂgomsase hâ tide Elob ǀkhāb ai, ǃgomsina du ga ra hōǃâ o. ǁÎb ge gāxaǃnâsiba ra sîsenū î da tā ǂgomǂgomsase Elob ǀkhāb ai mâ. Mati i io?

16. (a) Tae-i ǀgaugab Satanna ra sîsenū sada ǁkhaesa î da tā Jehovaba ǃoaba? (b) Matib ǁGâuaba ra dītsâ sado ǁkhaesa î du tā Jehovaba ǃoaba?

¹⁶ Satanni ge ǂgui ǃkharagaǃnâgu ǀgauga ra sîsenū sada ǁkhaesa î da tā Elob di ǀhōsa kai. ǁÎb ge ra ǁnāǂam “ǃguru ra xammi xase ra ǃgûma, tsî mâ-eb nî hapu ǃkhaisa ra ôa.” (1 Petrub 5:8) Tā buru re sadu ǀhōsan, ǀaokhoen tamas ka io ǀnî hân ga ra dītsâ o, sado ǁkhaesa Elobmîsa ǁkhāǁkhāsensa tsî ǂhanuse dīs tsîna. Sadu ge ǁnāǂamhe du ra khami nî tsâ.a (Johaneb 15:19, 20) Satanni tsîn ge ra ǀkharaǀkharasen “ǃnâb di ǀhomǃgāse.” ǁNās ǀkhab ge a gāxaǃnâ da ǁkhā î da Jehovaba ǁnâuǀnamoǃnâ. (2 Korinteǁîn 11:14) ǀNî hâ ǀgaub Satanni ra ǂâi kai dab ge xū-e da ǃoaǂui tama hâsa Jehovaba ǃoabas diba.—ǂKhoamîdi 24:10.

JEHOVAB DI MÎMĀDE ǁNÂUǀNAM RE

17. Tae-i ǃaroma da Jehovaba ra ǁnâuǀnam?

¹⁷ Jehovaba da ga ra ǁnâuǀnam o, o da ge ra ǁgau Satanni a ǂhumi-aosa. Tae-e nî hui î da ǁnâuǀnamxa? Elobmîs ge ra mî: “Ots ge ǃKhūb [“Jehovab,” NW], sa Eloba nî ǀnam sa ǂgaob hoab ǀkha, sa ǀoms hoas ǀkha tsî sa ǁkhāsib hoab ǀkha.” (Deuteronomium 6:5) Jehovaba da ge ra ǁnâuǀnam, ǀnam bi da a amaga. Jehovab ǀnammi sada ǃnâ ra kai khami da ge ǁîb sada xu ra ǂgan xūna ra dī. Apostel Johaneb ge ge xoa: “Nēb ge ǀnammi Elob diba, ǁîb di mîmāde da ga ǃkhōǀgaipeo; tsî ǁîb di mîmādi ge ǃgom tama hâ.”—1 Johaneb 5:3.

18, 19. (a) Mâ xūna Jehovab di mûǁae a tsū? (b) Mati da a ǂan Jehovab dīǁoa da a xū-e sada xu ǂgan tama hâsa?

¹⁸ Mâ xūna Jehovab di mûǁae a tsū? ǀNî aiǁgaudi ge boksis ǃnâ hâ “ǁKhan re Jehovab ǁkhan hâna.” ǂGuro ǁae du ge nî ǂâi nē xūn tsū tama hâ ti. Xawe Elobmîs ǁaraǃāde du ga khomai o tsî ǃamkuse ǂâiǃgâ o, o du ge gā-aisiba nî hō Jehovab di ǂhanuga ǁnâuǃā tsî ǁnâuǀnamsa. Sadu tsîn ge nî dītsâ ǀkharaǀkharana sadu ûib ǃnâ dīsa. ǃGomse i ga ra mûsen xawe nē ǀkharaǀkharana dī re, o du ge ǂkhîba nî ūhâ tsî ǃgâiaǂgaob Elob di ǂgomǂgomsa ǀhōsisa xu ra hāba. (Jesajab 48:17, 18) Mati da a ǂan ī ǁkhā i asa nē ǀkharaǀkharana dīsa?

¹⁹ Jehovab ge tātsēs tsîna dīǁoa da a xū-e sada xu ǂgan tama hâ. (Deuteronomium 30:11-14) Ama ǀhōsab aseb ge sada ǃamkuse a ǂan, sada a ǂansens xa. ǁÎb ge sada ǀgaib tsî ǂkhabusigu tsîna a ǂan. (Psalmdi 103:14) Apostel Paulub ge ra ǂkhâǃnâ da: “ǀNî ǃâitsâ-i ge sado gorose hāǂam tama hâ, khoesi ǃâitsâ-i ǀgui-i: Tsî Elob ge a ǂgomǂgomsa, ob ge ǁkhā du as ǂamai ǃâitsâ du tide, tsîb ge ǃâitsâb ǃnâts nî mâǃkharusa nî īǁkhā kaiba tsî, ǁîsa du nî tani ǁkhāse.” (1 Korinteǁîn 10:13) ǂGomǃgâsiba da ge a ūhâ ǁkhā Jehovab nî hoaǁae ǀgaiba mā dasa î da ǂhanuse dī. ǁÎb ge “ǃnāǂamsasib” ǀgaiba nî mā du, î du mâ ga hâ ǃgom mâsib hoaba tani ǁkhā. (2 Korinteǁîn 4:7) Jehovab di huibab ge ǃgomǁaegu ǃnâ hōs khaoǃgâb ge Pauluba ge mî: “Hoana ta a ǁkhā ǁîb, tita ra ǀgaiǀgaib” ǃnâ.—Filipeǁîn 4:13.

ǁKHĀǁKHĀSEN RE Î DU ELOB ǀNAM XŪNA ǀNAM

20. Mâ ǀgauga da nî ǁgae tsî tae-i ǃaroma?

²⁰ Jehovab di ǀhōsa kai ǂgao da ga ra o, o da ge ǂhanu tama xūna nî ǀû xawe ǃnāsases tsîna nî dī. (Romeǁîn 12:9) Elob ǀhōsan ge ǁÎb a ǀnam xūna a ǀnam. ǁÎn ge ra ǁguiǃāhe Psalmdi 15:1-5 ǃnâ. (Khomai re.) Jehovab di ǀhōsan ge ǁîb ǀgauga ra ǁgae tsî “ǀnammi, ǃgâiaǂgaob, ǂkhîb, ǃnūǃnâxasib, khoexasib, ǃgâixasib, ǂgoms, tsamtsiǃnâsib tsî ǀgausib tsîna” ra ǁgau.—Galateǁîn 5:22, 23.

21. Mati du Eloba a ǃgâiba ǀgauga a ǁgauǂui ǁkhā?

²¹ Mati du nē îsa ǀgauga ǁgau ǁkhā? Sadu ge nî ǁkhāǁkhāsen Jehovab tae-e ǀnamsa Elobmîsa khomais tsî ôaǃnâs ǃnâ-ū. (Jesajab 30:20, 21) Nēsa du ra dī khamib ge sadu ǀnammi Jehovaba du ūbâ hâba nî kai tsî sadu ǀnammi ra kai khami du ge ǁîba nî ǁnâuǀnam ǂgao.

22. Tae-e nî ī Jehovaba da ga ra ǁnâuǀnam o?

²² ǀKharaǀkharan sadu ûib ǃnâ du ra dīn ge a ǀgopeǀnōhe ǁkhā ǀoro saran hîna du ra ǁhûn tsî ǀasa saran hîna du ra anan ǀkha. Elobmîs ge ra mî î du “ǀoro khoeba ǁîb di dīgu ǀkha ǁhûǁnâ” tsî “ǀasa khoeba ana.” (Koloseǁîn 3:9, 10) Supu tama i ga i xawe nē ǀkharaǀkharana dīsa tsî Jehovaba ǁnâuǀnamsa xaweb ge ra mîmâiba da [ǀkhaega] tamas ka io “kai amǃnâ-e” nî mâ da sa. (Psalmdi 19:11) Î, ǁhûi re Jehovaba ǁnâuǀnamsa tsî ǁgau re Satanni a ǂhumi-aosa. Jehovaba ǃoaba re, hānîǁaeb ǀkhaegu ǃaromas ose xawe ǀnam bi du a amaga. O du ge nî ǁÎb ama ǀhōsa kai!