Sadu omaris ge ǂkhîba a ūhâ ǁkhā

1, 2. Jehovaba tae-e omaride ra ǁkhoreba?

JEHOVA ELOB ge ǂguro ǃgameba ge a ǃgaeǀhao. Elobmîs ge ra mîba da ǁîb ge ǂguro tarasa kuru “tsîb ge ǁîsa Adammi ǃoa ge ūhā.” Adammi ge kaise ge ǃgâiaǂgao mîb ge o: “Nēs ge a nē ǃnās ai ti ǂkhōgu di ǂkhō tsî ti ǁgans di ǁgan.” (Genesis 2:22, 23) Nēs ge ra mîba da Jehovab ta ǂhâbasa în ǃgame hâ khoena ǂkhîba ūhâ.

² Tsûtsûsa as ge ǂgui khoen ǁîn omaridi ǃnâ ǂkhîba ūhâ tama hâsa. Xawe Elobmîs ge tsoatsoade ǃkhōǂgā hâ hoa omaris ǁanina huis ǀkha în omaris ûiba ǂoaǂamsa kai tsî ǀguiba hâǁaes xa ǃgâibahe.—Lukab 11:28.

ELOB AOGA XU TAE-E ǃÂUBASEN HÂS

3, 4. (a) Aoba mati ǁîb tarasa nî sîsenū? (b) Tae-i ǃaroma i ǂhâǂhâsa aob tsî taras tsîn nî ǀûbagu ǃkhaisa?

³ Elobmîs ge ra mî ǃgâi aob ge ǁîb tarasa ǀnammi tsî ǃgôasib ǀkha nî sîsenū. Toxoba khomai re Efeseǁîn 5:25-29. Aob ge hoaǁae tarasa ǀnamxaǃnâ ǀgaub ai nî sîsenū. ǁÎb ge hoaǁae nî ǁkhaubasi, kēǃgâsi tsî xū-e dī tide ǁîsa nî tsûtsû-e.

⁴ Xawe aoba tae-e nî dī ǁîb taras ga ra dīsā o? Aogu ge ra mîbahe: “Sago aogo, sago tarade ǀnam, î go ǁîdi ǃoagu tā au-ausen.” (Koloseǁîn 3:19) Aogu tsîn ge ǂâis ǃnâ nî ūhâ ǁîgu tsîn ge ra dīsā. Tsî ǂgao du ga ra o, îb Eloba sado ǀûba, o du ge sadu taras tsîna nî ǀûba. (Mateub 6:12, 14, 15) Aob tsî taras tsîn ga ra māsenxase ǀûbagu o, os ge ǁnāsa nî hui î ra ǂkhîba ūhâ ǃgameb ǃnâ.

5. Tae-i ǃaromab aoba ǁîb tarasa nî ǃgôa?

⁵ Jehovab ge ra ǂhâba îb aoba ǁîb tarasa ǃgôa. Aob ge kaise ǃamkuse ǁîb taras ǂhâsigu xa nî ǂâi. Nēb ge kaise ǂhâǂhâsa ǁhōba. Aob ga ǁîb tarasa ǃgâise sîsenū tama io, ob ge Jehovaba ǁîb ǀgorede ǃgâ tide. (1 Petrub 3:7) Khoeda Jehovab aisi ra anusa gai xū-i ge ǁîba ǀnamsa. ǁÎb ge aogu tsî taradi ǁaegu ǀgora-e dī tama.

6. Tae-e i ra ǂâibasen aob tsî taras tsîn a “ǀgui ǁgansa”?

⁶ Jesub ge ge mîǃgāǃgā aob tsî taras tsîn “ge ǀgam tama, tsî a ǀgui ǁgan.” (Mateub 19:6) ǁÎra ge ǂgomǂgomsase nî hâ-ūgu tsî tātsēs tsîna ǂgomoǃnâ-ūgu tide. (ǂKhoamîdi 5:15-21; Hebreǁîn 13:4) Aob tsî taras tsîn ge sorosise ǂharugub di ǂhâba nî dīǀoaǀoabagu. (1 Korinteǁîn 7:3-5) Aob ge ǂâis ǃnâ nî ūhâ “khoe-i xare-i ge tātsē ǁî-i ǁgans ǂûsa ǁkhan tama hâ xui-ao; xawe i ge ǂûmā tsî ra sâu si.” ǁÎb ge taras âba ǀnam tsî nî ǀgapi ǃgôa. Xūn hoan ǂamai, taras ge nî ǂhâba ǁîs aob nî khoexaǃnâ tsî nî ǀnamxaǃnâ ǃkhaisa ǁîs ǀkha.—Efeseǁîn 5:29.

ELOB TARADE XU TAE-E ǃÂUBASEN HÂS

7. Tae-i ǃaromas omarisa dana-e ǂhâ hâ?

⁷ Mâ omaris hoas ge danaba ǂhâ hâ, khoe-i hîna omarisa nî daoǁgau-e în ǃamkuse ǀguiba sîsenǁae. Elobmîs ge ra mî 1 Korinteǁîn 11:3 ǃnâ: “Xristub a mâ aob hoab di dana ǃkhaisa, tsî aob a taras di dana ǃkhaisa, tsî Elob a Xristub di dana ǃkhaisa.”

8. Tarasa mati ǃgam ǃgôasiba aoba a ǁgau ǁkhā?

⁸ Mâ aob hoab ge ra dīsā. Xawe taras ga aob di mîǁguiga ǂkhâǃnâ o tsî māsenxase ǁîb ǀkha sîsenǁae o, os ge hoa omarisa a omkhâihe ǁkhā. (1 Petrub 3:1-6) Elobmîs ge ra mî: “Tarasa as aoba ǃgôa.” (Efeseǁîn 5:33) O tae-e a ī ǁkhā aob ga taras âb ǀkha ǀgui ǂgoms ǃnâ hâ tama io? ǁÎs ge noxoba ǃgam ǃgôasiba aoba nî ūhâba. Elobmîs ge ra mî: “Saso taraso, saso aoga ǃnaga hâba, ǀnîgu ga Elob mîsa ǁnâuǀnam tama i xawe, î gu taradi di tanisens ǀkha mî-i ose hōhe, saso di îǂhôa tanisensa gu ga mûǂano ǃaoǃgâb ǃnâ.” (1 Petrub 3:1, 2) Taras di ǃgâi aiǁgaus ge aoba a hui ǁkhā îb ǁnâuǃā tsî taras ǂgom ǀgauba ǃgôa.

9. (a) Tarasa tae-e nî dī aob ǀkhas ga ǁnâugu tama io? (b) Tae-i ǀapemāsa da Titub 2:4, 5 tawa ra hō?

⁹ Tarasa tae-e a dī ǁkhā aob ǀkhas ga ǁnâugu tama io? ǁÎs ge ǃgâi ǀgaub ai a ǁgâiǂuisen ǁkhā. Aiǁgause Saras ge Abrahamma ge ǃgâiba tama hâ i xū-e a mî o, ob ge Jehovaba ge mîba bi: ǁÎsa “ǃgâ re.” (Genesis 21:9-12) Xristeǁî aogu ǀuniga mîǁguib ge kaise ǀorose Elobmîs ta mî xūn ǃoagu hâ, ǁnās ǀkhas ge tarasa aoba hoaǁae nî ǂkhâǃnâ. (ǃNaeǃkhaidi 5:29; Efeseǁîn 5:24) ǃGâi taras ge ǁîs omarisa ra kēǃgâ. (Khomai re Titub 2:4, 5.) ǁÎs aob tsî ǀgôan ga ra mû o, matikōses ra ǃgarisase sîsensa o, on ge ǃnāsase nî ǀnamsi tsî nî ǃgôasi.—ǂKhoamîdi 31:10, 28.

10. Elobmîsa tae-e ra mî hâǀgoras tsî ǀgoras tsîn xa?

¹⁰ ǀNî ǁaegan ge ǃgame hâ khoena ǃhaese ra mîǁgui hâǀgorasa tamas ka io ǀgorasa. Elobmîs ge ra mî “taras aoba xu ǀgora tidesa” tsî “aoba tarasa tā ǁnāxū.” (1 Korinteǁîn 7:10, 11) ǃGâi tama mâsigu ǃnâ-i ge ǃgame hâ khoe-e a hâǀgora ǁkhā xawe nēs ge ǁkhōǁkhōsa mîǁguisa. O ǀgoras? Elobmîs ge ra ǁgau hoara hâ ǃaromas ǀgoras dis ge aob tamas ka io taras ga ǀnî hâ khoe-i ǀkha ǃgameb ǃauga ǁgoe-ūgu o.—Mateub 19:9.

ELOB ǁGÛNA XU TAE-E ǃÂUBASEN HÂS

11. ǀGôana tae-e ǃnāsase ǂhâ hâ?

¹¹ ǁGûn ge ǁkhān a i hoa-e nî dītsâ în ǁîn ǀgôan ǃaroma ǁaeba ǁamaǂui. Sadu ǀgôan ge ǂhâ du hâ, xūn hoan ǂamai, ǁîn ge ra ǂhâba î du ǁîna Jehovab xa ǁkhāǁkhā.—Deuteronomium 6:4-9.

12. ǁGûna tae-e nî dī în ǁîn ǀgôana ǁkhauba?

¹² Satanni ǃhūbaib ge ǁgaiǂoas ǀguisa ra dī tsî khoen ge hâ sada ǀgôana ra tsūdī ǂgaona ǁîna sorosise ǁgoe-ūs ǃnâ-ū. ǀNî ǁgûn ge a ǃgombahe ǁnā ǃhoaǃâs xa ǁîn ǀgôan ǀkha ǃhoasa. Xawe ǁgûn ge ǁîn ǀgôana nî ǃkhâikhom ǁnāti ī khoen ǃoagu tsî nî ǁkhāǁkhā ǀgôana matin ǁîna xu nî ǂgōsen ǀgauba. ǁGûdo, sado ǀgôana ǁkhauba re.a—1 Petrub 5:8.

13. Matin ǁgûna ǁîn ǀgôana nî ǁkhāǁkhā?

¹³ ǁGûn ge ǃereamsa ūhâ în ǁîn ǀgôana ǁkhāǁkhā matin nî tanisen ǀgauba. Mati du, sadu ǀgôana a ǁkhāǁkhā ǁkhā? Sadu ǀgôan ge daoǁgauhesa ǂhâ hâ xawe tā ǁnāsa karoǂgaoxase tamas ka io ǃaoroxase dī re. (Jeremiab 30:11) Tā sadu ǀgôana ǁaixa du hâ hîna ǁnama [ǃhoa-ū] ǂgao re. Sadu ge ǂgao tide sadu “mîdi ǀkha ǂâioǃnâse gôab ra ǃkhā khami” sadu ǀgôan ǀkha ǃhoasa tsî ǁîna tsûtsûsa. (ǂKhoamîdi 12:18) ǁKhāǁkhā re sadu ǀgôana în ǁnâuǃā tae-i ǃaroman nî ǁnâuǀnamxasa.—Efeseǁîn 6:4; Hebreǁîn 12:9-11; 30ǁî ǁArosa ǃgāsasib mû re.

ELOB ǀGÔANA XU TAE-E ǃÂUBASEN HÂS

14, 15. Tae-i ǃaroman ǀgôana ǁîn ǁgûna nî ǁnâuǀnam?

¹⁴ Jesub ge hoaǁae ǁîb di Îba gere ǁnâuǀnam, supu tama i ge i xawe. (Lukab 22:42; Johaneb 8:28, 29) Jehovab tsîn ge ra ǂhâba în ǀgôana ǁîn ǁgûna ǁnâuǀnam.—Efeseǁîn 6:1-3.

¹⁵ ǀGôado, sadu ǁgûna ǁnâuǀnams ga kaise ǃgom i xawe ǂâis ǃnâ ūhâ re ǁnâuǀnamxa du ga ra o, ob ge Jehovab tsî sadu ǁgûn tsîna sadu ǀkha nî ǂkhîǂâixa.b—ǂKhoamîdi 1:8; 6:20; 23:22-25.

16. (a) ǁGâuaba mati ǂkhamkhoena ra ǃâitsâ în ǃgâi tama xūna dī? (b) Tae-i ǃaroma i a ǂhâǂhâsa îts Jehovaba a ǀnam ǀhōsana ūhâ?

¹⁶ ǁGâuab ge sa ǀhōsan tsî ǀnî hâ ǂkhamkhoen tsîna a sîsenū ǁkhā îts ǃgâi tama xūna dī. ǁÎb ge a ǂan sa ǀhōsana mâǃoas xats nî kaise ǃgombahesa. Aiǁgause, Jakobi ti ǀgôas Dinas ge Jehovaba ge ǀnam tama hâ i ǀhōsan ǀkha gere hâǁae. Nēs ge kai tsûba ǁîs tsî ǁîs omaris tsîn ai ge hau. (Genesis 34:1, 2) Sa ǀhōsan ga Jehovaba ǀnam tama io, on ge Jehovab ǃhui hâ xūna nî dī kai tsi. ǁNā xūn ge tsûb ǀguiba sa omaris tsî Jehovab tsîn ai nî hau. (ǂKhoamîdi 17:21, 25) ǁNā-amaga i ge kaise a ǂhâǂhâsa îts Jehovaba a ǀnam ǀhōsana ūhâ.—1 Korinteǁîn 15:33.

SADU OMARIS GE ǂKHÎBA A ŪHÂ ǁKHĀ

17. Tae-i ǃereamsan mâ ǀguiǀguibe ǁanin omaris dina ūhâ?

¹⁷ Omaris ǁanin ga ra Elob ǁgaraga sao o, on ge hoana tsūb tsî ǂgui ǃgomsin tsîna xu nî ǁkhaesen. Oms ao du ga ra o, sadu tarasa ǀnam tsî ǀnamxaǃnâ ǀgaub ai sadus tarasa sîsenū re. Oms taras ge ǁîs aoba ǃgôasiba nî ūhâba tsî aoba ǃnaga nî hâba tsî ǂKhoamîdi 31:10-31 ǃnâ hâ taras aiǁgausa nî sao. ǀGôana du ga ūhâ o, ǁîna ǁkhāǁkhā re în Eloba ǀnam. (ǂKhoamîdi 22:6) Dadasaba ab “ommi âba ǃgâise ra ǂgaeǂguib” ase ī re. (1 Timoteub 3:4, 5; 5:8) Tsî ǀgôado sadu ǁgûna ǁnâuǀnam re. (Koloseǁîn 3:20) ǂÂis ǃnâ ǀgui ūhâ re mâ ǁani-i hoa-i omaris di-i ge a dīsā ǁkhā xawe ǃgamǃgamsen tsî ǀûbagu re. Î, Elobmîs ge Jehovab daoǁgaude ǃkhōǂgā hâ mâ ǀguiǀguibe-i hoa-i omaris din ǃaroma.