5ǁÎ DÎS

Tare-e ta nî dī skoli ai ta ga ǁorehe o?

TARE-I ǃAROMA I A ǂHÂǂHÂSA

Sats ta ǃeream ǀgaub ge mâsiba a ǁgaiǁgai ǁkhā tamas ka io a ǃgâiǃgâi ǁkhā.

**TARENATS SATSA A DĪ ǁKHĀ?**

ǂÂi re sao ra-i xa: Tomab ge nētsē skola ǃoa ī ǂgao tama hâ. Tsî sao ra tsēs tsîna. Tsî tātsēs tsîna ī ǂgao tama hâ. Nēn hoan ge ǃnona ǁkhâga ǃkharu hâse ge tsoatsoa, ǁîb di skol ǀhōsagu ge ǃgâi tama xūna ǁîb xa a ǃhoa tsoatsoa o. Tsî gu ge ǁîba ǁgai ǀonde ge ǂgai tsoatsoa. ǀNî ǁaeb ai gu ge axaga Tomab di ǂkhanina gere ǂnauǂui ǁîb ǃommde xu tsî gere ǃgûbē. Tamas ka io gu ge gere ǂhā bi tsîb gere dawasen o, ob ge ge ǀū i ham-i gere ǂhā bisa. Tsî sao ra tsē i ge ǁkhōǁkhōsa xū-e go ī Tomab ge internets ǃnâ-ū ǁgai xū-e go sîbahe . . .

Tare-ets ga dī hâ, Tomab ǁharodi ǃnâts ga hâhâ o?

ǁAEBA Ū TSÎ ǂÂI RE!

Sats ge ǀgaio tama hâ! Sats ge satsa ra ǁore khoe-e a ǃkham ǃoa hōǁkhā sa ǃomra sîsenū tamase. Matits ǁnāsa a dī ǁkhā?

TĀ ǃEREAM RE. Elobmîs ge ra mî: “Gâreb ra gagas âba ǁhōǂuitoa, xawe gā-aib ra ǁîsa ūdawa.” (ǂKhoamîdi 29:11) Sats ga ra dītsâ o ǃnōsase tanisensa tsî ǁgauǂui tama ga ra io, on ge ǁore tsira na nî ǁnāxū tsi.
TĀ DĪ ǃOA RE. Elobmîs ge ra mî: “Tā khoe-e ǂkhaba-i ama ǂkhaba-e dīdawa-am re.” (Romeǁîn 12:17) ǁOre tsira khoena ǁore ǃoas ge mâsiba ǁgaiǁgais ǀguisa nî dī.
ǂKHABABA XU ǂGŌSEN. Elobmîs ge ra mî: “Gā-ai khoeb ǂkhababa mû tsî ra gaugausen.” (ǂKhoamîdi 22:3) Sats a ǁkhās kōse dītsâ re khoen hîna ra ǁore tsina xu ǂgōsensa tamas ka io ǃgûbēsa.
ǃNOMSASE ǃEREAM RE. Elobmîs ge ra mî: “Tsamtsiǃnâ ǃereams” ge ǁaiba ra ūbē. (ǂKhoamîdi 15:1) ǃNōs tsîn ge a ǃeream. Aiǁgause i ga satsa ra ǁore khoe-e mî o, sats ge a kausa ots ge sa ǃhōde a ūkhâi ǁkhā tsî a mî ǁkhā “tā ǁae ǂgabaǂgabasen ta nî.”
ǃGÛBĒ RE: “Khoe-ets ga ǃeream oa tama io, ots ge ra ǁgau ǁî-i xats a ǀgaisa ǃkhaisa” dis ge 19 kurixa Nonisa ra mî. “Nēs tsîn ge ra ǁgau sats a ǁkhaesen ǁkhāsa, xawe satsa ra ǁore khoe-i ge a ǁkhaesen ǁoa.”—2 Timoteub 2:24.
ǀGAISA ǂGOMǃGÂSIBA ŪHÂ RE. ǁOre ra khoen ge a mû ǁkhā haman ra ǃnôaǁnâsensa tsî ǁîna ǃkham ǃoa tidesa. Tsî ǃnāsasen ge ǁore-aona ra ǁnāxū tsi mûn ga ra o, ǁînats ge a mâǃoa ǁkhā ti.
KHOE-E MÎBA RE. ǀNî skoli dawa gere ǁkhāǁkhā ǁgauǃnâ-aos ge ra mî: “An khoen hîna ra ǁorehe na khoe-e mîba. Nēsa dīs ge kaise a ǃgâi, nēs ge nî dī î-i ǀnî hâ khoe-e tā ǁorehe.”

ǂKham axab ge ǁore bi ra axaga ra mâǃoa — ǀGaisa ǂgomǃnâsensa ūhâs ge ǀgaiba nî mā tsi satsa ra ǁore khoe-i ūhâ tama hâba

ǂAN ÎTS A?

Sorosise ǁnāǂamhes ǂamais ge ǁorehesa sao rana ǃkhōǂgā hâ:

ǁGai mîde mîhes. “Tita ge tātsēs tsîna ǀondi tsî xūn hîna ta gere mîhen tsîna ǀuru tide. Ti ǀhōsan ge tita xū tama i khami tsî ǂhâbasa tamase gere tsâ kai. ǂHoa mûsa ǂnauhes ge ga ǃgâi hâ, mîna mîhes xa.”—Dis ge 20 kurixa ǂKhîtagosa ra mî.
ǁNāxūǂuihe hâse tsâs. “Ti skol ǀhōsan ge tita xu gere ǂgōsen. ǁÎn ge ǂûs ǁaeb ai tita ǀkha ge ǂû ǂgao tama hâ i. Hoaraga kuriba ta ge gere ā tsî ǀguri gere ǂû.”—Dis ge 18 kurixa Mûtagosa ra mî.
Internets ǃnâ-ū mî ǁgaiǁgaihes. “Internetsa sîsenūs ǃnâ-ū i ge khoe-e sa ǃgâi ǀonsa a ǁgaiǁgai ǁkhā tamas ka io sa ûib tsîna. Nēs ge ī ǁoa xū-i khami ra mûsen xawe ra ama ī.”—Dib ge 14 kurixa Danili ra mî.

**ǁOREHES XA HÂ DÎDI**
AMAB TAMAS KA IO ǂHUMIB	ǃEREAMDI
1 ǁOrehes ge ǂgui kuriga ǃgôaxa.	1 Amab. Elobmîs ge ǁē-aogu xa ra ǃhoa tsî ǁîgu ǀons ǂâibasen ge “khoena ǁore tsî tsûtsûsa.”—Genesis 6:4.
2 ǁOrehes ge tsûtsû tama hâ. ǁÎs ge ǁkhōǁkhōsa tama hâ.	2 ǂHumib. ǁOrehes ge ra ǃaroma în ǂgui ǂkhamkhoena ǃgamsen.
3 ǃGâi ǀgaub ǁorehesa ǀû kais ge ǃkham ǃoas ǃnâ-ūsa.	3 ǂHumib. ǁOre-aon ge ǃnāsa ǁaeba ǁîn ra ǁore khoe-i xa a ǀgaisa. Tsî ǁî-e dī ǃoas ge hui tide.
4 Khoe-i hîna ra ǁorehets ga ra mû o, ots ge mû tama hâ khoe-i khami nî tanisen.	4 ǂHumib. ǀHapio khoe-i hîna nē xūna mû tsî ra ǃkharu i ge a ǀkhai. Sats ga ǁorehe ra khoe-e mû tsî xū-e mî tama io, ots ge sats tsîna ǃereamsa tani hâ.
5 Nēsin ga ǀgapiǂâixa xawen ge ǁore-aona ǁî-aitsama xū tamase ra tsâsen.	5 Amab. ǁOre-aon ga ǀgapiǀgapisen xawen ge ǁîna aitsama xū tama i khami ra tsâ, ǁnā-amagan ge nau khoena ra ǃgôaǁnâ în ǁîna ǃgâise tsâ.
6 ǁOre-aon ge ǁîn ǀgauba a ǀkharaǀkhara ǁkhā.	6 Amab. ǁOre-aon ge ǁîn di tanisen ǀgaub tsî ǂâi ǀgaub tsîna a ǀkharaǀkhara ǁkhā.