9ǁÎ DÎS

Evolusib ǃnâ ǂgom i ta nî?

TARE-I ǃAROMA I A ǂHÂǂHÂSA

Evolusib ga ra ama io, ob ge ûiba ǂâibasen-e ūhâ tama hâ. Elob kurus ga ra ama io, o da ge ǂkhîǂkhî ra ǃereamde a ūhâ ǁkhā, ûib di kai dîdi ai nēsis tsî hānîǁaeb ǃaromas tsîna.

**TARENATS SATSA A DĪ ǁKHĀ?**

ǂÂi re sao ra i xa: Aleksi ge ra are. ǁÎb ge Elob kurus ǃnâ hoaǁae gere ǂgom. Xawe kurusǂans ǁgauǃnâ-aos ge ra mî, evolusib ǂgomhe ǁkhā tsî kurusǂans [science] i ai a ǃgaoǃgaosa ǃkhaisa. ǁNās xab ge Aleksa gârese ǂnôa ra tsâ. ‘Hoan ǂamai,’ tib ge ra mîbasen, ‘ôaǃnâ-aon ga ra mî o Evolusib a ama ti, o tita a ham ǁîna dîǃnâsa?’

Sats ga Aleks hâ o, ots ga Evolusiba ama xū-i ase ūǃoa hâ skoli ǂkhanidi ra mî amaga?

ǁAEBA Ū TSÎ ǂÂI RE!

Khoen ge hoaǁae ra ǃhoa tsî ra mî ǁîn da ǂgom ǀgaub xa xawen ge ǁîna a ǀū tare-i ǃaroman di ra mîsa.

ǀNî khoen ge kurus ǃnâ ra ǂgom kerkegu ain gere ǁkhāǁkhāhe xūn ǃaroma.
ǃNāsan ge kurus ǃnâ ra ǂgom skoli ain gere ǁkhāǁkhāhe xūn ǃaroma.

ǃNANI DÎDI ǂÂIǃGÂS ǃAROMA

Elobmîs ge ra mî: “Mâ om-i hoa-i khoe-i xa ra kuruhe xui-ao; xawe xūn hoana ge kurub ge a Elo.” (Hebreǁîn 3:4) ǁNāsa ǁnâuǃāxa-e ǂgomsa?

Axab ge omsa mâ ra kō — Ûib ge Kuru-ao-e ūhâ tama hâ, ti hâ ǂâi ǀgaub ge a gâre, oms tsîn ǁîs kuru-aoba ūhâ amaga

KHOEN RA MÎ XŪN: ǀHommi tsî ǃhūbaib ai hâ xūn ge xū tama-e xu ge hā.

1. Ham-e tamas ka io mapaxūn ge xūn hoana hā?

2. Tare-e a ǁnâuǃāxa—xūn hoan ge khoe-i xa kuruhe tama īsa tamas ka io xūn hoan ge khoe-i xa kuruhesa?

KHOEN RA MÎ XŪN: Khoen ge ǀnōrab tamas ka io ǁaruba xu ra hā.

3. Khoen ga ǀnōrab tamas ka io ǁaruba xu ga ra hā o. Aiǁgause, tare-i ǃaroman khoena ǀnōrab tamas ka io ǁarub xa a gā-ai?

4. Tare-i ǃaroma i “hoaǃnâ-aixa” ǀgaugu ûib diga a ǃgom ǁnâuǃāsa?

KHOEN RA MÎ XŪN: Evolusib ge a ama.

5. Khoen hîna di ra mîna ǁgauǁgaude ôaǃnâ tsâ în hâ?

6. Matikō khoena evolusib ǃnâ ra ǂgom khoe-i xan mîbahe hâ amaga, hoa ǁnâuǃāxa khoena amabes ǃnâ evolusib ǃnâ ra ǂgom?

“ǃGarob ǃnâts ta ǃgû hînats ga îxa omsa mû o, matits nî mî: ‘Tae kōse a îxa omsa! Haidi ge ǃgâi ǃkhaib ǃnâ ǀgui ge ǁnā tsîs ge îxa omsa ge hā.’ ǁNās ge a ī ǁoa! ǁNās ge toxoba ǁnâuǃāxa tama hâ. Tare-i ǃaroma da nî ǂgom ǀhommi tsî ǃhūbaib ai hâ xūn ge xū tama-e xu hās ǀguisa dīsa?”—Julias.

“ǂÂi re khoe-i ga mîba tsi o, ǂkhanin ra ǁgâihe ǃkhaib go ǃhuisa tsî i go ink-e muri tsî ceilingi tsîna a ǀuriǀurisa. Tsî i go ǁnās khaoǃgâ dītoasa ǂkhaninsa a ǂoaxasa. Satsa ǁnāsa ǂgom îts nî?”—Khoetis.

TARE-I ǃAROMATS ELOB ǃNÂ NÎ ǂGOM?

Elobmîs ge ra hui tsi îts “ǂuru ǂâisa” ūhâ. (2 Timoteub 1:7) ǁNās ge ra ǂâibasen sa ǂgoms Elob ǃnâts ūhâs sao ra xūn ai tā nî ǃgaoǃgaohesa

TSÂSIB (ǀGaisa ǀgaib hâ tita ge ra tsâ)
KHOEN XA ǃHOAǁNÂ DANAHES (Tita ge eloǃaoǃgâxa ǀhûhâsib ǃnâ ra hâ)
ǁGÂIB (Ti ǁgûra ge tita Elob xa ge ǁkhāǁkhā îta ǁîb ǃnâ ǂgom—mîǁguibasen ǁoa ta ge ī amaga)

Xawe sats ge ǂuru ǁnâuǃāba nî ūhâ sa ǂgom ǀgaub xa.

“ǁGauǃnâ-aos ra sida sorodi ra sîsen ǀgauba ǁguiǃā o, os ge ǁnāsa ra ǁgau te Elob amabes ǃnâ hâsa. Soros ǃnâ hâ ǃâ-i hoa-i ge ǁî-i aib ai ra sîsen, ǂkhariro-i kōse. Tsî nē sîsen ǀgaub ge ǃnāsa ǁaeba sida ǂanǃgâs ose ra sîsen. Khoe-i soros ge kaise a buruburuxa!”—Teresias.

“Kaise ǀgapi ǂgō-omi, kai ǂgaub tamas ka io ta ga audosa mû o, o ta ge ra dîsen, ‘ham-e nē xūna ge kuru?’ Gā-ai khoe-e i ge ra ū audo-e kurusa, aiǁgause ǂgui ǂkhari ǃâron ge nî ǃamǀhaohe is audosa ǀguiba ǃamkuse sîsenǀhao ǁkhā. Audodi ga khoe-i xa ga ra kuruhe o, on kom o, khoen tsîna kuru-ao-e ūhâ.”—Rikib.

“Kurusǂansa ta ra ǁkhāǁkhāsen khami ta ge evolusib ǃnâ ra ǂgom ǀoro tsoatsoa. . . . Kai ǁguiǂgāsensa i ge ra ū evolusib ǃnâ ‘ǂgomsa,’ Elob ǃnâ ǂgoms xa.”—Antonib.

ǂÂIǃGÂ RE

ǂGui kuruga ôaǃnâs ǂamain ge kurusǂans ôaǃnâ-aona xū-e nî dī evolusiba ǃamkuse ǁguiǃāsa. Kurusǂans ôaǃnâ-aon ga evolusib ǃnâ ǂgom tama io, ǁîn hîna mîhe ra ǂansa ūhâna. Tsū-e xūn hînan ǁîna ra ǁguiǃāna dîǃgâsa?