Khoexaǃnâsiba du aoǁnâ sîsenni ǃnâ ǁgau re

1. Mâǀgaub Jesub diba ra mâǂoaba du? ǁGuiǃā re.

MÂǂOA ra ǀgaub Jesub dib ge ǁîb ge khoesib ra hōǃâ ǃgomsiga gere ǁnâuǃā. ǃHūbaib aib ge hâ i o, ob ge ǁîba “ǃgâiaǂgao ran ǀkha ǃgâiaǂgao” tsî ‘ā ran ǀkha gere ā.’ (Rom. 12:15) Aiǁgause ǁîb di 70 ǁkhāǁkhāsaben ge ǂkhîb ǀkha a oaǀkhī o ǁîn di aoǁnâ sîsenni khaoǃgâ ob ge Jesuba ‘gagab ǃnâ ge dâ.’ (Lukab 10:17-21) Jesub tsîn ge ge mû, matin ge Lasarub di ǀaokhoena a tsâǀkhāhe ǀgauba ǁîb di ǁōb xa. Jesub ge “gagas ǃnâ ǁgonaǂgao tsî ge gongonǃnâhe.”—Johaneb 11:33.

2. Tae-e Jesuba ge hui îb khoexaǃnâsiba ǁgau?

² Tae-e nē ǀoasa kurusa ūhâ khoeba ge ǂgae îb ǀoasa kurusa ūhâ tama khoena ǀkhomxaǃnâsib tsî khoexaǃnâsib tsîna ǁgau? Jesub ge ǂgurose khoena kaise ge ǀnam i. ǂOa goro xoaǀgoras go ǁgau khami, Jesub ge “khoen ôan” ǃnâ ǃgâiǃgâibasensa ge ūhâ i. (ǂKhm. 8:31) Nē ǀnammi ge ǁîba ge ǂgae îb khoen ra ǂâi ǀgauba ǃgâise ǂan ǁkhā. Apostel Johanneb ge Jesub xa ge ǁguiǃā: “Khoe-i ǃnâ hâ-e ge ǂan i” di. (Johaneb 2:25) Jesub ge khoexaǃnâsiba nau khoen ǃoagu gere ǁgau. Khoen ge ǁîb ǀnamma gere hōǃâ tsîn ge khoena ǁnās ǀkha Gaosib ǃgâiǂhôasa gere ūǃoa. Sida tsîn ge ǁnā tsâsiga khoena a ǁgau ǁkhā, nēs nî hui da amaga î da sida aoǁnâ sîsenni ǃnâ ǃgâise dī.—2Tim. 4:5.

3-4. (a) Khoexaǃnâsiba ūhâsa mati nî hui da aoǁnâ sîsenni ǃnâ? (b) Tae-e da nē ǁkhāǁkhāǃâs ǃnâ nî ǃhoaǃgao?

³ Apostel Paulub ge ge ǂan i ǁîb aoǁnâs ǁgaumâisa ūhâ ǃkhaisa tsî da ge sada tsîna ǁnā ǁgaumâisa ūhâ. (1Kor. 9:16) Khoexaǃnâsiba da ga ūhâ o, o da ge sida aoǁnâ sîsen-e ǁgaumâis ase ǀgui mû tide. Khoexaǃnâ tsâsiba ūhâs ge aoǁnâ sîsenni ǀkha nî hui da khoena da ra tsâba ǃkhais ǃaroma. Hoa da ge a ǂan “mās ge ūs ǃgâ-ai a ǃgâi.” (ǃNaeǃkhaidi 20:35) Sida mûǂui ǀgaub ga ǁnāti ga ra ī o, o da ge aoǁnâ sîsen-e dīs xa kaise nî ǁkhoaxabahe.

⁴ Nē ǁkhāǁkhāǃâs ǃnâ da ge mati da khoexaǃnâsiba a ǁgau ǁkhā ǀgauba nî ǃhoaǃgao. ǂGurose da ge aibe nî mû matib ge Jesuba khoen xa gere tsâ ǀgauba. Tsî da ge ǁnāpaxū haka ǀgaugu hîna da a ǁgae ǁkhāgu tsîna nî ǃhoaǃgao.—1 Pet. 2:21.

JESUB GE KHOEXAǃNÂSIBA AOǁNÂ SÎSENNI ǃNÂ GERE ǁGAU

5-6. (a) Jesuba ham-i ǃoagu khoexaǃnâsiba gere ǁgau? (b) Jesuba tae-i ǃaroma khoen hînab gere aoǁnâbana gere ǀkhom Jesajab 61:1, 2 ǃnâ i ra ǁgauhe khami?

⁵ ǀGui ǀgaub hînab ge Jesuba khoexaǃnâsiba a ǁgaub xa ǂâi re. Jesub tsî ǁîb ǁkhāǁkhāsabegu tsîn ge tsau gu ge hâ i xawe gere aoǁnâ. ǁÎgu ge “ǂû gu nî ǁaeb” tsîna ge ūhâ tama hâ i. Jesub ge ǁîb ǁkhāǁkhāsabega “ǃū-aisa ǃkhais ǃoa ǀguri ge hâǃgû” tsî gu ge ge “sâro.” Xawen ge ǂnūbis khoena ǀnai Jesub tsî ǁîb ǁkhāǁkhāsabegu tsîn gere ī ǃkhaisa ǃoa ge ī. Jesub ge ǁnāpa sī tsî khoena a mû o, ob ge tae-e dī? Jesub ge “ǁîna ge ǀkhomxab, gūn ǃûi-ao-i ose hân khamin ge ī i xui-ao; tsîb ge ǂgui xūna ǁîna ge ǁkhāǁkhātsoatsoa.”—Markub 6:30-34.

⁶ Kō re ǀnî hâ ǃaromas hînab ge Jesuba khoena gere tsâbasa. ǁÎb ge ge ǃgaoǃgâ “gūn ǃûi-ao-i ose hân khamin” khoena īsa. Jesub ge ǀnîsi gere mû ǀnîn ge ǀgâsa i tsî ǃgarise gere sîsensa ǁîn omaride kōǃgâs ǃaroma. ǀNîsin ge ǀnîna ǀnamsabena ǁōb ǃnâ ge ǂoaǃnâ. Tsîb ge Jesuba nē tsâsiga ge ǂan i. ǂOa goro ǁkhāǁkhāǃâs go ǁgau khamib ge Jesub tsîna nē ǃgomsiga ge hōǃâ. Jesub ge khoenab gere tsâba ǃkhais ǃgao ǁîna ǁkhaeǂgaos haisi-ams xa gere aoǁnâba.—Khomai re Jesajab 61:1, 2.

7. Mati da Jesub aiǁgausa a ǁgae ǁkhā?

⁷ Tae-e da Jesub aiǁgausa xu ra ǁkhāǁkhāsen? Jesub khami da ge sada tsîna khoen hîna “gūn ǃûi-ao-i ose hân” ǀkha ǀguiba ra hâ ǀhao. ǁÎn ge ǂgui ǃgomsina ra hōǃâ. Tsî da ge sada ǁîna nî hui xū-e ūhâ, ǁnās ge Gaosib ǃgâiǂhôasa. (J.ǂHa. 14:6) ǁNās ǀkha da ge sida Gao-aoba ǁgaes ǃnâ-ū ǃgâiǂhôasa ‘ǀgâsa tsî ǂhâb ǃnâ hâ-e sâus’ ǃgao ra aoǁnâ. (Psa. 72:13) Khoena da ra ǀkhom amaga da ge xū-e ra dī ǁîna huis ǃgao.

MATI DA KHOEXAǃNÂ TSÂSIBA NÎ ǁGAU

8. Mâ ǀgaub ǃnâ da aoǁnâ sîsenni ǃnâ khoexaǃnâsiba a ǁgau ǁkhā? ǂKhō re.

⁸ Tae-e nî hui da khoexaǃnâ tsâsiba ǁîn hîna da ra aoǁnâbana ǁgaus ǃnâ? ǁÎn hîna da aoǁnâ sîsenni ǃnâ ra ǀhao-ūn di mâsib ǃnâ da ge ra mâisen ǂgao tsî sada ga hâ-ūhe hâ ǀgaub ǂûb ǃnâ ǁîn ǀkha ra hâ ǂgao.c (Mat. 7:12) Hā re î da haka xūna ǃhoaǃgao nēsa da mati a dī ǁkhāsa. ǂGurose, mâ khoe-i hoa-i ǂhâsiga ǂâis ǃnâ ūhâ re. Sida aoǁnâ sîsenni ge ǀaeǃkhō-aob ra dī sîsenni ǀkha a ǀgui. ǃGâi ǀaeǃkhō-aob ge ǁîb ǁkhāsib ǃnâ hâ xūn hoana ra dī khoena huis ǃgao. ǁÎb ge dîna ra dî tsî ǃgâise ra ǃgâ khoe-i ga ǁî-i ra tsâ ǀgauba mî o. ǂGurose sōǀôa-i ǀgui-e mā tama hâsab ge ǁîba aibe ǁaeba nî ǃkharu kai îb kō khoe-i mâsib mati tsâsa tsî ǁnāpaxū ǂhanu sōǀôa-e nî mā. Mâ khoe-i hoa-i di mâsigu tsî ǂâi ǀgaub tsîna da ge ǂâis ǃnâ nî ūhâ.

9. Tae-e da tā nî dī? ǁGuiǃā re.

⁹ Khoe-e du ga aoǁnâ sîsenni ǃnâ a ǀhao-ū o, o tā ǀnai du ǁî-i mâsiba a ǂan khami ǃhoa re tamas ka io ǁî-i ra ǂgom ǀgauba du a ǂan khami. (ǂKhm. 18:13) ǁNās ǂam-ai khoe-i di ǂâi ǀgauba du nî hōse dîde dî re. (ǂKhm. 20:5) Sada ǃhaos ǃoagu i ga ūǃoahe o, o da ge ǁî-e ǁî-i di sîsenni, omaris, khaoǃhūb tsî ǂâi ǀgaub tsîna a dî ǁkhā. Dîna da ga dî o, o da ge khoena ǃēsa ra mā în mîba da tae-i ǃaroman ǃgâiǂhôasa ǂhâ hâsa. Nēsa da ga ǂan o, o da ge nî ǂan ǁîna da mati khoexaǃnâsiba nî ǁgausa tsî ǁîna ǂhâban hâ huiba nî mā, Jesub ge dī khami.—ǀGopeǀnō re 1 Korinteǁîn 9:19-23.

10-11. 2 Korinteǁîn 4:7, 8 ǃoagu da mâǀgaub ǃnâs tsîna khoexaǃnâsiba a ǁgau ǁkhā? Aiǁgau-e mā re.

¹⁰ ǀGamǁîse, ǁîn ûib a ī ǁkhā ǀgaub xa ǂaiǃgâ re. ǀNî ǀgaugu ǃnâ da ge ǁîn mâsiga a ǁnâuǃā ǁkhā. Sida tsîn ǀoasa kurusa ūhâ tama hâ amaga da ge ǃgomsina nî hōǃâ. (1Kor. 10:13) Hoa da ge a ǂan ûib nē ǃhūbaib ǃnâ supu tama hâsa. Jehovab huib ǀkha ǀgui da ge a mâǁapo ǁkhā. (Khomai re 2 Korinteǁîn 4:7, 8.) Xawe ǁnān xa ǂâi re hîna nē ǃhūbaib ǃnâ ǃgâi ǀhōsagusisa Jehovab ǀkha ūhâ tama hâna. Jesub khami da ge ra ǀkhom nî tsî ǁnās ǀkha ‘ǃgâi ǂhôa-e ra’ mā nî ǂgao.—Jes. 52:7.

¹¹ ǃGâsab Sergeb aiǁgaus xa ǂâi re. Amabab nî ǁkhāǁkhāsens aiǃgâb ge ǁîba kaise taoxa tsî ge ǃnōsa i. ǁÎb ge kaise ge ǃgombahe i khoen ǀkha ǃhoasa. Tsîb ge ega Elobmîsa ge ǁkhāǁkhāsen tsoatsoa. Sergeb ge ra mî: “Elobmîsa ta ra ǁkhāǁkhāsen khami ta ge ge mû Xristeǁîn nau khoen ǀkha amaba ǀgoragus ǁgaumâisa ūhâ ǃkhaisa.” “Mîbasen ta ge gere nēsa ta a dī ǁoa ǃkhaisa.” Xaweb ge noxoba ǁîn hîna amaba ǁnâu tama hân xa gere ǂâi, ǁîn ûib mati nî ī ǃkhaisa Jehovab ǀkhan ga ǀhōsagu tama io. “Xūn hîna ta gere ǁkhāǁkhāsen an ge ǂkhîb tsî ǃomsasib tsîna ge mā te” dib ge ra mî. “ǂAn ta ge ge i nau khoen tsîn nē amaba nî ǁkhāǁkhāsensa.” Sergeb di khoexaǃnâsib ra kai khamib ge aoǁnâs di ǁkhoaǂgaosiba ge omkhâi. Sergeb ge ra mî: “Kaise ta ge ge buru nau khoena ta ge Elobmîs xa a mîba tsoatsoa o tsîs ge nēsa ti ǁkhoaǂgaosiba ge omkhâi. Tsî nau khoen ǀkha amab xa ǃhoas tsîn ge ti ǂgomsa ge ǀgaiǀgai.”d

12-13. Tae-i ǃaroma da ǁîn hîna da Elobmîsa ra ǁkhāǁkhāna ǃnūǃnâxasiba nî ǁgau? ǁGuiǃā re.

¹² ǃNonaǁîse, ǃnūǃnâxa re ǁnān hîna du ra ǁkhāǁkhān ǃoagu. ǂÂis ǃnâ ūhâ re ǁîn ge amaba ge ǁnâu tama hâ i tsîn ge ǁîna nēsa a ǀū. Tsîn ge ǂguina noxoba ǁîn di ǂgom ǀgauba a ǀnam. ǁÎn ge ǁîn ǂgomsa ǂhâǂhâsase ra mûǂan hîna ǁîna ra ǀguiǃnâxa kaisa omaris, ǃhaos tsî ǀhûhâsib ǁanin ase. Mati da ǁîna a hui ǁkhā?

¹³ Nēs xa ǂâi re: Tae-e ra hā ǀoro broxos ra dī-ūnūhe o? Khoen noxoba ǀoro broxosa ra sîsen-ū hîna i ge ǀasasa ra omhe. ǀAsa broxos ga ra omhe toa o, o i ge ǀorosa ra khôahe. ǁNās ǁkhās khami da ge khoena da ǁîn ‘ǀoro’ ǀgauga xu nî ǂgō kais aiǃâ aibe ǁîna nî hui în ‘ǀasa’ Elobmîs tsoatsoadi hînan ǁîna a ǀū de ǂan tsî ǀnam. Nē ǀkharaǀkharana dīs ge ǁaeba a ūǁkhā.—Rom. 12:2.

14-15. Mati da khoena paradais ǃhūbaib xa a ǁkhāǁkhā ǁkhā? Aiǁgau-e mā re.

¹⁴ Aoǁnâ sîsenni ǃnâ da ge khoen ǃoagu nî ǃnūǃnâxa. Tsî da ge tā nî ǃâubasen în ǁîna Elobmîs amaba ǁnâuǃā tamas ka io ǁnā ǁaeb ai ūǃoa. Xaweb ge khoexaǃnâsiba nî hui da î da ǁîna hui în Elobmîs tae-e ra mîsa ǂōrisase ôaǃnâ. Aiǁgause, mati da khoe-e a hui ǁkhā î-i ǀamosib kōse ûis di ǃâubasensa ǂan. ǀNîn ge ǁnātikōse amaba paradais ǃhūbaib xa ǂan tama hâ. ǀNîn ge ra ǂgom ǁōb a ûib di ǀamsa. Tamas ka ion ge ra ǂgom ǃgâi khoen ge ǀhomma ǃoa ra ī di. Mati da ǁîna a hui ǁkhā?

¹⁵ ǀGui ǃgâsab aiǁgaus xa ǂâi re, hîna ǃgâise ra sîsensa. ǁÎb ge ǂgurose Genesis 1:28 sa ra khomai. Tsîb ge ǁnās khaoǃgâ oms khoe-e ra dî, mâpa tsî mâ mâsib ǃnân khoena nî ûisab ge Eloba ǂhâba hâ i? ǂGui khoen ge ra ǃeream, “ǃhūbaib ai, ǃgâi mâsib ǃnâ.” Tsîb ge ǁnās khaoǃgâ Jesajab 55:11 sa khomai tsî ra dî Elob ǂâibasens a dawasa ǃkhaisa. ǃNāsa ǁaeban ge oms khoena hî-î di ra ǃeream. Tsîb ge ǁkhawa Psalmdi 37:10 tsî 11 tsîna khomai tsî ra dî khoesib ǀamǂoas mati nî īsa hānîǁaeb ǃnâ. Nē ǀgauba sîsen-ūs ǃnâ-ūb ge ǂgui khoena ge hui în Elob ǂâibasensa ǁnâuǃā tsî mû Elob ra ǂhâbasa khoen ǀamosib kōse nî ûisa paradais ǃhūbaib ai.

16-17. ǂKhoamîdi 3:27 sa ǂâis ǃnâ ūhâse da mâ hoaǃnâ-aixa ǀgaugu ǃnâ tsâbaǁhaoxasiba a ǁgau ǁkhā? ǂKhō re.

¹⁶ Hakaǁîse, khoena a hui ǁkhā hoaǃnâ-aixa ǀgauga ôa re. Aiǁgause, khoen a ǁāxa ǁaeb ai da ra sari? ǀÛbaba ǂgan tsî da ge ǁkhawa sarisa a ǂgan ǁkhā. O i ga oms khoe-e huiba ǂhâ os? Tamas ka io ǀaesen hâ khoe-i ga huiba ǂhâ o, oms xūn ǀkha huihes ǃgao? Nē mâsigu ga hâ o, o da ge nî hui.—Khomai re ǂKhoamîdi 3:27.

¹⁷ ǀGui ǃgâsas ge nē khoexaǃnâsiba ǁgaus ǃnâ ǃgâi ǀamǂoasa ge ūhâ i. Khoexaǃnâ tsâsiba ǁgaus ǃnâ-ūs ge ǁîsa omaris hîna ge ǁîn ǀgôasa ǁōb ǃnâ a ǂoaǃnâna sîǂkhanisa ge xoaba. Nē sîǂkhanis ge ǁkhaeǂgaos xoade ge ūhâ i. Omaris ǁanina mati nē sîǂkhanis xa ge tsâǀkhā-e? ǁGûs ge ge mî, “ǁaris ge kaise go ǃgomba te i.” “Sadu ge a ǀū matikōse du ge tsâǀkhā da ǃkhaisa nē sîǂkhanis ǃnâ-ū. Kaise ta ge sîǂkhanis ǃaroma ra ǃgôaǃgâ du hîna ge ǁkhaeǂgao dasa. Tita ge sadu sîǂkhanisa 20 ǃnāde ǁari go khomai. ǁNā sîǂkhanis ge kaise khoexaǃnâ, ǀkhomxaǃnâ tsî ge omkhâide. Ti ǂgaob ǃgamsiba xu ta ge ra gangan du.” Sada tsîn ge amabes ǃnâ ǃgâi ǀamǂoade nî ūhâ, ǂhâsib ǃnâ hâna mû tsî da ga hui o.

ǀNŌSA ǂÂI ǀGAUBA DA GE NÎ ŪHÂ

18. 1 Korinteǁîn 3:6, 7 ǃoagu da mâ ǀnōsa ǂâi ǀgauba ra ūhâ ǂgao?

¹⁸ Amase da ge ǀnōsa ǂâi ǀgauba ra ūhâ ǂgao aoǁnâ sîsenni xa. Khoena Elob xa ǁkhāǁkhās aiǂhanuba da ge ūhâ xawe da ge sada kai ǃâba ǀhuru tama hâ. (Khomai re 1 Korinteǁîn 3:6, 7.) Jehovab ge khoena ǁîb ǃoa ra ǂgae. (Johaneb 6:44) Tsî ǀams ai mâ khoe-i hoa-i ge aitsama ǁî-i ǂgaob mâsib ǃoagu ǃgâiǂhôasa nî ūǃoa. (Mat. 13:4-8) Jesub tsîn ge ge ǃgâi ǁkhāǁkhā-ao-i xawen ge khoen tsîna ǁîb haisi-amsa ge ūǃoa tama hâ i. ǁNās ǀkha da ge tā nî ǂkhabuǂâi khoen ga ǃgâ da tama io.

19. Mâ ǃgâi ǃnuriga da nî hō khoexaǃnâsiba aoǁnâ sîsen i ǃnâ ǁgaus ǃnâ-ū?

¹⁹ Khoexaǃnâsiba ǁgaus ge ǃgâi ǃnuriba nî mā da. Tsî da ge sada aoǁnâ sîsenni xa kaise nî ǁkhoaxabahe. Tsî da ge nēs ǃnâ-ūs tsîna māsa xu hâ ǂkhîba nî hōǃâ. Tsîs ge nēs tsîna ǁîn hîna “ǀamo ûiba ǃoa ǃkhōǂuibasenhe hân” tsîna nî supuba ǃgâiǂhôasa ūǃoasa. (ǃNaeǃkhaidi 13:48) ǁNās ǀkha “ǁaeba da ūhâ hîa, a da ǁnâi hoana ǃgâidība.” (Gal. 6:10) Tsî da ge ǁnās ǀkha sada ǀhomsi ǁGûba nî ǃgâiaǂgao kai.—Mat. 5:16.