ǂAn i du go i?

Om mûǂam-aob di sîsen-e ge tae-i Elobmîs ǁaeb ǃnâ?

Elobmîs ǁaeb ǃnâb ge om mûǂam-aoba nau khoe-i di omsa gere kōǃgâ. Hebreǁî tsî Grikegowa mîs hîna ‘omkōǃgâ-ao’ di hâs ge mûǂam-aoba ǃoas tsîna ra ǁnaeǁgau.

Joseb Jakobub di ǀgôab ge Egipteb ǃnâ ǃgā i o, ob ge ǁîba ge omkōǃgâ-ao kai ǁîb gao-aob oms ǂam ai. Joseb gao-aob ge ‘ūb hân hoana Joseb ǃomǁae ge mā.’ (Gen. 39:2-6) Egab ge Joseba gao-ao kai o Egipteb ǃnâ ob ge omkōǃgâ-aoba ge ǁgaumâi îb ǁîb omsa kōǃgâ.—Gen. 44:4.

Jesub tsēdi ǃnâ i ge ǃgaroǃāde ge ūhâ i khoena kai ǃādi ǃnâ sī gere hâ ǁîn ǂgariba xu ǃnūse. ǁNās ǀkha i ge ǁî-e kōǃgâ-aoba gere ǁgaumâi hîna ge ǂgariba gere kōǃgâba.

Ham-e omkōǃgâ-ao sîsen-e ge dī ǁkhā i? ǂGuro ǁaeb Romeǁî xoa-aob Columellab ge ra mî ǃgā i hîna ga mûǂam-ao tamas ka io omkōǃgâ-aose ǁgaumâihe i ge “ǁnā sîsenni ǃnâ ǂansa nî ūhâ” di. Nē khoeb ge nî kōǃgâ în sîsen-aona ǁîn sîsen-e dī “xaweb ge nēsa gaoǂam ra ǀgaub ǃnâ dī tide.” ǁÎb ge ge ǀaro: “Omkōǃgâ-ao i ge tā ǁî-i hoa xūna a ǂan di nî ǂâi tsî hoaǁae nau khoena xu nî ǁkhāǁkhāsen ǂgao.”

Elobmîs ge omkōǃgâ-aob tsî ǁîb sîsenni tsîna ra sîsen-ū Xristeǁî ǀhaohâgu ǃnâ ra ī xūna ǁguiǃās ǃaroma. Aiǁgause apostel Petrub ge Xristeǁîna ra ǂkhâǃnâ în ǁîn ǁkhāsiga sîsen-ū tsî ‘ǃoabagu.    . ǃgâi om mûǂam-aose ǃkharaga ǀkhommi Elob dib dise.’—1Pet. 4:10.

Jesub tsîn ge omkōǃgâ-aob di aiǁgausa ge sîsen-ū ǁîb ǂkhōs hîna Lukab 16:1-8 ǃnâ hâs ǃnâ. ǁÎb kēbos hîna ǁîb gao-aose nî hās xa hâs ǃnâb ge xoa o, ob ge Jesuba ǁîb saosabena ge mîba, ǁîb “ǂgomǂgomsa tsî gā-ai ǃgāb” tamas ka io ‘ǂgomǂgomsa om mûǂam-aoba’ nî ǁgaumâi ǃkhaisa. Nē ǃgāb di ǂam ǁgaumâis ge îb Xristub di saosabena ǁîn gagasi ǂû-e nē ǀuni tsēdi ǃnâ mā. (Mat. 24:45-47; Luk. 12:42) Kaise da ge nē ǂkhanin hîna sida ǂgomsa ra ǀgaiǀgaina ra ǃgôaǃgâ nē ǂgomǂgomsa ǃgāba xū da ra hōna.