Elob tsî ǀgūkhoen tsîna ǀnams​—Nēsa da mati a omkhâi ǁkhā?

Moseb ǂhanub ǃnaga da hâ tama hâ xawe da ge ǀgam kai mîmara xu xū-e a ǁkhāǁkhāsen ǁkhā. Elob tsî sida ǀgūkhoen tsîna ǀnams ge Jehovab tae-e sida xu ǂgaoǀkhā hâsa ra ǁgau. (Mat. 22:37-39) ǁNā ǀnammi ge khoe-e xu ǀumihe tama hâ. Nēsa da ge aitsama nî omkhâi. Mâ ǀgaub ǃnâ? ǀGui ǂhâǂhâsa ǀgaub ge Elobmîsa tsēs hoasa khomaisa. Elob di ǃkharagaǃnâgu ǀgauga da ga Elobmîs xoade xu khomai o, o da ge “ǃKhūb di îsasiba” nî mû. (Psa. 27:4) Nēs ge ra ǃaroma îb sida ǀnamma ǁÎb ǃoagu ǀgai tsî ǁÎb ǂâi ǀgauba ūhâ. Nēs ge ra ǁgari da î da Elob mîmāde ǁnâuǀnam tsî nau khoena ǂgaoba xu ǀnam. (Jhn. 13:34, 35; 1Jhn. 5:3) Nēgu ge ǃnona ǀgauga hîna da a sîsen-ū ǁkhā ga î-i Elobmîsa khomaisa ǁkhoaxa kai:

• Sadu ǂâi ǀgauba sîsen-ū re. Mûnan-ai re sadu ǁnāpa hâ ǃkhaisa. Tae-e du mû, ǁnâu tsî ra ǃkhapa? Nau khoena mati ra tsâ?

  

• ǃKharagaǃnâgu ǀgauga sîsen-ū re. Nēgu ge ǀnî ǀgauga: ǃGarise khomai tamas ka io du ge audio ǃkhōǁnâde a ǃgâ ǁkhā. Elobmîs ǃnâ xoasa khoe-i xa khomai re, danaǃâ-e du nî khomais xa. Aiǁgause, Appendix A7 tamas ka io B12 sa New World Translation of the Holy Scriptures ǃnâ khomai re Jesub ûib xa. Hoa danaǃâs tsēs xoas ai a ǃgaoǃgaosasa khomai re. Elobmîs ǂkhanide sao gu rase khomai re.

  

• Khomai tsî ǁnâuǃā re. ǀGui danaǃâsa mâ tsēs hoasa khomai tsî ǁnâuǃās ge a ǃgâi hoa danaǃâde toa ǂgao da ra amaga khomais xa. Nēs xa ǂâi re. Tsî ǂōrisase ôaǃnâ re. ǃHūǂhapeb tsî ǃnaga ra mâhe ǁnaeǁgaudi tsîna sîsen-ū re. ǁNâuǃā tama du hâ ǀgui ǃâ-e ôaǃnâ re. Khomai da ra ǁaeb ge ǂâiǃgâ da ra ǁaeb ǀkhā nî ǀgui.