Paulub ge “Eloba gangan tsî ge ǃgâiǂâixa”

Romes di ǀhaohâb ge ǁnâu o Paulub ra sīsa on ge 64 kilometerga ge ǃgû în ǁîb ǀkha sī ǀhao. Nē ǃgâsan ǀnamma mati Pauluba ge tsâǀkhā? Paulub ge ǁîna a mûo, “ob ge Eloba gangan tsî ge ǃgâiǂâixa.” (ǃNǃkh. 28:15) Paulub ge hoaǁae ǀhaohâga sari tsî gere omkhâi xaweb ge ǁîba ǃkhōsis ǃnâ hâ i o, on ge ǁîba gere ǂkhâǃnâ.​—2Kor. 13:10.

Nētsēs tsîna gu ge ǃnarimâra mûǂam-aoga ǀhaohâga ra sari îgu sī ǂkhâǃnâ nî. ǁÎgu tsîn ge khoe-i khami tsaub, ǂâiǂhansendi tsî tsûaǂgaob tsîna ra hōǃâ. Sao ra ǃnās aib ga ǃnarimâra mûǂam-aob tsî ǁîb taras tsîna sadu ǀhaohâba sari o, o du tae-e a dī ǁkhā ǁîra ‘ǀgaiǀgaiǃnâs’ ǃgao?​—Rom. 1:11, 12.

• 

  Aoǁnâ sîsenni ǀhaode ǂkhâǃnâ re. ǃNarimâra mûǂam-aob ge kaise ra ǂkhâǃnâhe mûb ga o matin ǃgâsana māsenxase nē ǀhaode ra ǂkhâǃnâ ǀgausa. (1Tes. 1:2, 3; 2:20) Kō re î du huiǃnâ ra aimâba-aose xoaǂgāsen ǁîb ga sadu ǀhaohâba sari o. ǀNîsi du a xoamâisen ǁkhā ǁîb tamas ka io ǁîb taras ǀkha sîsensa aoǁnâ sîsenni ǃnâ. Tamas ka io sadu Elobmîsa ra ǁkhāǁkhā khoe-e ǃoa ǁîra ǀgui-e ī ūsa? ǁÎra ge kaise a ǁkhoaxabahe ǃkharagagu ǃgâsan ǀkha sîsensa, ǁnās ge amab ǃnâ a ǀasan tamas ka io aoǁnâ sîsenni xa ǁnātikōse ǁkhoaxabahe tama hân tsîna ǃkhōǂgā hâ.

• 

  ǃHaokhoeǃkhōǃoaxasiba ǁgau re. ǁÎra du hâǃkhais tamas ka io ǂûǀhaos ǃgao ǁkhau ǂgao tama hâ? Nēs ge ǁîra a ǁgau ǁkhā sadu ǁîra a ǀnam ǃkhaisa. ǁÎra ge ǀgapi tsî ǀâ xūna ǂhâ tama hâ.​—Luk. 10:38-42.

• 

  ǁÎb daoǁgaus tsî ǁnamas tsîna ǃgâ tsî ūbasen re. ǃNarimâra mûǂam-aob ge ǀnamxaǃnâ ǀgaub ǃnâ ra hui da î da sida ǀhōsagusisa Jehovab ǀkha ǀgaiǀgai. ǀNî ǁaeb aib ge ǁîba ǀnîsi ǀgaisase a ǁnama da ǁkhā. (1Kor. 5:1-5) ǁÎb ge ra ǂkhî ǁnâuǀnamxa tsî da ga ǃgamǃgamsen o.​—Heb. 13:17.

• 

  ǃGôaǃgâxasiba ǁgau re. ǃNarimâra mûǂam-aob tsî ǁîb taras tsîna mîba re, matikōse du ǁîra saride xu ra ǀama ǃkhaisa. Nēsa du ge ǁîra aitsama a mîba ǁkhā tamas ka io sîǂkhanisa a xoa ǁkhā.​—Kol. 3:15.