Jehovab sada ǁGûba da ge kaise a ǀnam

1-2. Tae-i ǃaroma tsî matib ge Jehovaba ǁîb omaris di ǃâ kai da?

JEHOVAB ge ra ǁkhau da i da ǁîb ǃoaba-aon di ǃâ kai. Nē ǁkhauǂuis ge kaise a ǀō-aisa. Nē omaris ǁanin ge Elob ai māǁnâsen tsî ǁîb ǀGôab di xoremarib ǃnâ ǂgomsa ūhâ. Nē omaris ge kaise a ǂkhî. Nēsib ge sida ûiba ǂâibasensa ūhâ tsî da ge hānîǁaeb ǃnâ ǀam-e ūhâ tama hâ ûiba ǃoa ra mûǂui—ǀhommi ǃnâs gas tamas ka io paradais ǃhūbaib ai.

² Jehovab ge ge īǁkhā kai i da ǁîb omaris di ǃâ kai, sadab kaise a ǀnam amaga. Xawe nēsa īǁkhā kais ǃaromab ge kai ǁguibasa ge dī. (Jhn. 3:16) “ǃGomǀgausase” da ge ge ǁamahe. (1Kor. 6:20) Xoremarib ǃnâ-ūb ge Jehovaba ge ǃaroma i da ǀgū ǀhōsagusisa ǁîb ǀkha ūhâ. Aiǂhanuba da ge ūhâ hoaǀgaixa Eloba sida di ǁGûb di ǂgaisa. Tsî ǂoa goro ǁkhāǁkhāǃâs ǃnâ da go ǃhoaǃgao khamib ge Jehovaba a ǂoaǂamsa ǁGû.

3. Mâ dîde da a dî ǁkhā? (“Jehovaba mû te i ra?” di hâ boksisa mû re)

³ ǀNî Elobmîs xoa-aob khami da ge a dîsen ǁkhā: “Tare-e ta kha ǃKhūba nî mādawa-am, ǁîb di ǃgâidīgu ti tawab ge dīgu di amǃnâs ǃnâ?” (Psa. 116:12) ǃEreams ge, sida ǀhomsi ǁGûba da ge tātsē a mādawa-am ǁoa. Xawe ǁîb sida ūba hâ ǀnammi ge ra ǁgari da ǁîba ǀnamsa. Apostel Johaneb ge ge xoa: “ǁÎba ǀnam, ǁîb ge sada aibe ǀnam hâ i xuige.” (1Jhn. 4:19) Mâ ǀgaugu ǃnâ da sada ǀhomsi ǁGûba a ǁgau ǁkhā ǀnam bi da a ǃkhaisa?

JEHOVAB ǀGŪSE H RE

4. Jakobub 4:8 ǃoagu da tae-i ǃaroma nî ǁgūtsâ Jehovab ǀhō kaisa?

⁴ Jehovab ge ra ǂgao i da ǁîb ǀhōsa kai tsî ǁîb ǀkha hoaǁae ǃhoa. (Khomai re Jakobub 4:8.) ǁÎb ge ra ǂkhâǃnâ da i da ‘ǀgores ǃnâ hâhâ’ tsîb ge hoaǁae sida ǀgorede nî ǃgâ. (Rom. 12:12) ǁÎb ge tātsē ǀhape tamas ka io tsau tama hâ sada ǃgâsa. Tsî sada ge ǁîba sao ra ǀgaugu ǃnâ ra ǃgâ, Elobmîs tsî Elobmîs ai ǃgaoǃgaosa ǂkhanin tsîna khomais ǃnâ-ū. ǀHaodi tawa ǃgaoǃgâxase ǃgâs ǃnâ-ūs tsîna da ge ǁîba ra ǃgâ. Hoaǁae ǁî-i ǁgûn ǀkha ra ǃhoa ǀgôa-i ǁîn ǀkha ǃgâi ǀhōsagusisa ra omkhâi khami da ge sada tsîna Jehovab ǀkha da ga hoaǁae ǃhoa o, o ǁîba ǃoa nî ǀgū.

5. Mati da sada ǀgorede a ǃgâiǃgâi ǁkhā?

⁵ Sadu ǀgoredi Jehovaba ǃoa du ra dī di xa ǂâi re. Jehovab ge ra ǂgao i da sada ǂâidi tsî tsâsigu tsîna ǁîb ǀkha ǀgores ǃnâ-ū ǀgoragu. (Psa. 62:8) Sao ra dîsa da ge nî dîsen: ‘Ti ǀgorede ǂkhanib ai xoasa haisi-ams khami ī tamas ka io i ti ǂgaoba xu ra hā sîǂkhanis khami ī?’ Jehovaba du ge kaise a ǀnam, ǁnā-amaga du ge ǁîb ǀkha du ūhâ ǀhōsagusisa ǀgaisase ra ūhâ ǂgao. Nēsa dīs ǃgao du ge hoaǁae ǁîb ǀkha nî ǃhoa. Sadu ǂgaob ǃgamsib ǃnâ hâ xūna ǁîb ǀkha ǀgoragu re. Tae-i ra ǃgâiaǂgao kai dus tsî tae-i ra tsûaǂgao kai dus tsîna ǁîb ǀkha ǀgoragu re. ǂGomǃgâsiba ūhâ re ǁîb ai du huiba a ǂgan ǁkhāsa.

6. Tae-e da nî dī sada ǀhomsi ǁGûb ǀgūse hâs ǃaroma?

⁶ Sada ǀhomsi ǁGûb ǀgūse da ga hâ ǂgao o, o da ge hoaǁae ǁîba ǃgôaǃgâsiba nî ǁgau. Psalmdi xoa-aob ǀkha da ge a ǀguiǂâixa, hîna ge xoaba: “Sats ǃKhūts, ti Elots, ge sida tawa ǂgui buruxana gere dī, tsî sa ǂâidi ge ǂgui ge i; khoe-i ge sats ǀkha ǀguiti-ī ǁoa; tita ge ǁîna ǂhôa tsî ǃhoaǂui ǂgao, xawen ge ǃhoan ta nîs ǂamai a ǂgui.” (Psa. 40:5) ǃGôaǃgâsiba da ge tsâs ǀguisa hî tama hâ xawe da ge ǃgôaǃgâsiba Jehovaba sada dīgu tsî mîdi ǃnâ-ū ra ǁgau. Nēs ge ra ǁgau ǂgui khoena xu da nētsē ra ǀkharasa. ǂGui khoen ge nētsē Elob ra dība nî xūna ǃgôaǃgâ tama hâ. ǀGui xū-i hîna “ǀuni tsēdi” ǃnâ da ûi hâsa ra ǁgau i ge khoen ge a ganganoǃnâ. (2Tim. 3:1, 2) Sada ge nē ǀgauba ūhâ ǂgao tama hâ.

7. Jehovaba tae-e da nî dīsa ra ǂgao tsî tae-i ǃaroma?

⁷ ǁGûn ge ǁîn ǀgôan nî ǃkham ǃkhaisa ǂgao tama hâ xawen nî ǀhōsagusa ra ǂgao. ǁKhā ǀgaub ǃnâb ge Jehovaba ra ǂgao în ǁîb ǃoaba-aon hoana ǃgâi ǀhōsagusisa ūhâ. ǀNammi hîna da ūhâb ge ama Xristeǁî da a ǃkhaisa ra ǁgau. (Jhn. 13:35) Psalmdi xoa-aob ǀkha da ge a ǀguiǂâixa, hîna ge xoaba: “Matikōse i a ǃgâi tsî ǀnamǀnamsa, ǃgâsaga ǁkhāti ǀhû hâse ǁansa.” (Psa. 133:1) Sada ǃgâsana da ga ǀnam o, o da ge Jehovaba ra ǁgau ǁîba da a ǀnam ǃkhaisa. (1Jhn. 4:20) Kaise i ge a ǂoaǂamsa ǃgâsan hîna ‘khoexagu tsî ǀkhomxagun’ di ǃâse isa.—Efe. 4:32.

SADU ǀNAMMA ǁNÂUǀNAMXASIB ǃNÂ-Ū ǁGAU RE

8. 1 Johaneb 5:3 ǃoagu da mâ ǂhâǂhâsa ǃaromas ǃgao Jehovaba ra ǁnâuǀnam?

⁸ Jehovab ge ǀgôan ǁîn ǁgûna nî ǁnâuǀnamsa ra ǃâubasen tsî sada tsîn ǁîba nî ǁnâuǀnamsa ra ǂgao. (Efe. 6:1) ǁÎb ge sada xa ǁnâuǀnam-esa anu hâ, ǁîb a sada kuru-ao, ûib di mā-ao tsî gā-ai ǁgû amaga. Xawe ǂhâǂhâsa ǃaromas hîna da Jehovaba ra ǁnâuǀnambas ge ǁîba da a ǀnam amaga. (Khomai re 1 Johaneb 5:3.) ǂGui ǃaromade da ūhâ Jehovaba ǁnâuǀnams dide xaweb ge ǁîba nēsa dīsa ǁgari da tama hâ. Jehovab ge aitsama ǁhûis di ǁkhāsiba ge mā da tsîb ge kaise ra ǃgâiaǂgao ǁîba da ga ǀnam bi da a ǃkhais ǃaroma ǁnâuǀnam o.

9-10. Tae-i ǃaroma i a ǂhâǂhâsa Elob di ǁgaraga ǂan tsî ǁîgu ǃoagu ûisa?

⁹ ǁGûn ge ǁîn ǀgôan ǃnorasase nî hâ ǃkhaisa ǂhâba hâ. ǁNā-amagan ge ǁgaraga ra mā ǁîn ǀgôana ǁkhaubas ǃgao. ǀGôan ga nē ǁgaraga ǁnâuǀnam o, on ge ra ǁgau ǁîn ǁgûnan ra ǂgomǃgâ tsî ǃgôaǃgâ ǃkhaisa. Kaise i ge ǂhâǂhâsa sada ǀhomsi ǁGûb di ǁgaraga da ǂan tsî ǁîga nî ǁnâuǀnamsa. Nēsa da ga dī o, o da ge Jehovaba ra ǁgau ǁîba da a ǀnam tsî ra ǃgôaǃgâsa tsî da ge sada tsîna nēsa xu ra ǀama. (Jes. 48:17, 18) Xawe ǁnān hîna Jehovab ǁgaraga ǁnâuǀnam tama hân ge aitsama ra tsûtsûsen.—Gal. 6:7, 8.

¹⁰ Jehovaba ra ǃgâiaǂgao kai ǀgaub ǃnâ da ga ûi o, o da ge sorosises, emosionelses tsî gagasises tsîna nî tsûtsû da xūna xu ra ǁkhauba-e. Jehovab ge tae-i sada ǃgao a ǃgâisa a ǂan. Auroras hîna Amerikab ǃnâ ra hâs ge ra mî, “tita ge a ǂan Jehovaba da ga ǁnâuǀnam o, o da ge kaise ǂoaǂamsa ûiba nî ūhâsa.” Nēs ge hoaǁae a ama. Mati du ge Jehovab di ǀnamxaǃnâ daoǁgausa ǁnâuǀnamsa xu ǀama?

11. ǀGoresa tae-e dīs ǀkha ra hui da?

¹¹ ǀGores ge ra hui da i da ǁnâuǀnamxa, kaise i ga ǃgom xawe. ǀNî ǁaegu ai i ge kaise nî ǃgom i Jehovaba ǁnâuǀnamsa xawe da ge hoaǁae ǁores di tsâsiga nî ǃkhamǃoa. Psalmdi xoa-aob ge Eloba ge ǀkhoma: “Mā te re sa ǃgâiǃōb di ǃgâiaǂgaoba.” (Psa. 51:12) Denis hîna a aimâba-aos ge ra mî, “Jehovab di ǁgaraga ǁnâuǀnams xa ta ga ǃgombahe o, o ta ge ǀgaiba ra ǀgoreba ǂhanu xū-e dīsa.” ǂGomǃgâsiba da ge nî ūhâ Jehovab nēti i ǀgorede ra ǁnâu-amsa.—Luk. 11:9-13.

NAU KHOENA HUI RE ÎN SADA ǁGÛBA ǀNAM

12. Efeseǁîn 5:1 ǃoagu da tae-e nî dī?

¹² Khomai re Efeseǁîn 5:1. Jehovab di ‘ǀnamǀnamsa ǀgôan’ ase da ge ǃgarise ra ǁgūtsâ ǁîba ǁgaesa. ǁÎb ǀgauga da ge ra ǁgae, nau khoen ǃoagu da ga ǀnamxaǃnâ, khoexaǃnâ tsî ǀûbaǀnamxa o. ǁNān hîna Eloba a ǀūn ge sada ǃgâi tanisen ǀgauban ga mû o, o nî ǁgari-e Elob xa ǁkhāǁkhāsensa. (1Pet. 2:12) Xristeǁî ǁgûn ge nî ǁgūtsâ ǁîn ǀgôan ǀkha Jehovab sada ra hâ-ū ǀgaub ǃnâ ǁîn ǀkha hâsa. ǁGûn ga Jehovaba ga ra ǁgae o, on ge ǀgôana ra ǁgūtsâ ǁîb ǀkha ǀhōsagusisa ūhâsa.

13. Tae-e da nî dī ǁkhoaǂgaosiba omkhâis ǃgao?

¹³ ǂKham ǀgôan ge ǁîn ǁgûgu ǃnâ kaise a ǂnīsa tsî ǁnās ǀkha ra ǃgâiaǂgao ǁîgu xa ǃhoasa. ǁKhā ǀgaub ǃnâ da ge sada tsîna sada ǀhomsi ǁGûb ǃnâ kaise a ǂnīsa tsî ra ǂhâba în nau khoen tsîna ǁîba ǂan. Sada ǂgaogu ǃnâ da ge Gao-aob Davib khami ra tsâ, hîna ge xoaba: ‘ǃKhūb ǃnâ ta nî koasen.’ (Psa. 34:2) Xawe da ga Jehovab xa ǃhoasa tao os? Mati da ǁkhoaǂgaosiba nî omkhâi? ǁKhoaǂgaosiba da ge ra omkhâi Jehovab ǁîb xa da ga ǃhoa o ra ǂkhî ǀgaus xa da ga ǂâi o. Tsî nau khoen matikōse nî ǀamasa Jehovab xa ǁkhāǁkhāsensa xu. Jehovab ge ǂhâ da hâ ǁkhoaǂgaosiba nî mā da. ǁÎb ge ǃkharu ge ǁaeb ǃnâ ge ûi hâ i ǃgâsana ge hui în ǁkhoaǂgaosiba ūhâ tsîb ge sada tsîna a hui ǁkhā.—1Tes. 2:2.

14. Tae-i ǃaroma i a ǂhâǂhâsa ǁkhāǁkhāsabedīsa?

¹⁴ Jehovab ge ǀgora-e ūhâ tama hâ, ǁnā-amagab ge kaise ra ǃgâiaǂgao ǀnamma da ga ǁgaugu o, ǃkharagagu khaoǃhūga da ūhâ xawe. (ǃNǃkh. 10:34, 35) ǀGui ǀgaub khoena da ǀnamma a ǁgau ǁkhāb ge ǁîna da ga ǃgâiǂhôasa aoǁnâba o. (Mat. 28:19, 20) Nē sîsen-e tae-e a dīǀoaǀoa ǁkhā? ǁNān hîna nēsi sada ra ǃgân ge ǁîn ûiba a ǃgâiǃgâi ǁkhā tsî hānîǁaeb ǃnâ ǀamo ûiba nî ǃkhōǃoa.—1Tim. 4:16.

SADA ǁGÛBA ǀNAM TSÎ ǃGÂIAǂGAO RE

15-16. Mâ ǃaromade da ūhâ ǃgâiaǂgaoba ǁkhā da a de?

¹⁵ Jehovab ge a ǀnamxaǃnâ ǁGû tsî ǁnās ǀkha ra ǂhâba îs ǁîb omarisa ǂkhîba ūhâ. (Jes. 65:14) ǂGui ǃaromade da ge ūhâ nēsi ǃgâiaǂgaosa ǃgomsina da ga hōǃâ xawe. Aiǁgause da ge ǂgomǃgâsiba ūhâ sada ǀhomsi ǁGûb a ǀnam da ǃkhaisa. Elobmîs xa da ge ǃnāsase a ǂan. (Jer. 15:16) Tsî da ge a ǀō-aisa omaris di ǃâ hîna Jehovaba ǀnam, ǁîb ǁgaraga ǀnam tsî ǁîn ǁaegus tsîna a ǀnamguna.—Psa. 106:4, 5.

¹⁶ Hoaǁae da ge a ǃgâiaǂgao ǁkhā, ǂan da a amaga ûib hānîǁaeb ǃnâ nî ǃgâi ǃkhaisa. ǂAn da ge a ǀgūǁaeb Jehovaba Eloxoresasiba ūbe tsî ǁîb Gaosib ǃnâ-ū hoa ǃhūbaiba nî paradai kaisa. Tsî da ge ǂoaǂamsa ǃâubasensa ūhâ ǁnān hîna ge ǁōn khâisa nî hō tsî sada ǀkha ǁkhawa nî hâsa. (Jhn. 5:28, 29) Nēs ge kaise a ǀō-aisa. Tsî ǂhâǂhâsa as ge, ǂgomǃgâsiba da ge ūhâ hoa khoen hîna ǀhommi ǃnâs tsî ǃhūbaib ais tsîna hân ge sada ǀnamxaǃnâ ǁGûba ǁîb anu hâ ǃgôaǃgâsiba nî mā.