ǁKHĀǁKHĀǃÂS 8
ǂKhîba ôa tsî surixasiba ǃkhamǃoa
“A da ǁnâi ǂkhîb dina sauruǃgon, tsî ǂnubikhâigus ǃoa hân tsîna.”—ROM. 14:19.
113ǁÎ ǁNAETSANAS ǂKhîba ūhâs
ǃKHŌǀHAOSa
1. Surixasiba mati Joseb omarisa ge tsâǀkhā?
JAKOB ge ǁîb ǀgôagu haoga ge ǀnam i xaweb ge 17 kurixa Joseba ǃnāsase ge ǀnam i. Joseb ǃgâga mati nēs xa gere tsâ? ǁÎgu ge ǁîba ge suri tsoatsoa tsîgu ge nēs xa ǃaroma-e hâse ge ǃhui bi tsoatsoa. Joseb ge xū-e ge dī tama hâ i ǁîb ǃgâsagu nî ǃhuiba bi-e. Xawe gu ge Joseba ǃgādī-es ǃaroma ǁamaxū tsî ǁîgu ǁgûba ge mîba ǁîb ǀnamǀnamsa ǀgôab ǃgarob ǀguru-i xa ge ǃgamhe di. Surixasib ge ge ǃaroma i gu omaris ǂkhîba ūbe tsî ǁîgu ǁgûb ǂgaoba khôa.—Gen. 37:3, 4, 27-34.
2. Galateǁîn 5:19-21 ǃoagub surixasiba tae-i ǃaroma ǁnātikōse a ǁkhōǁkhōsa?
2 Surixasibb ge ǁōb ǁkharagu di ǀgui hîna ‘ǁgans di sîsengu’ Elob gaosiba ǀumi tidegu di ǀguiba. (Khomai re Galateǁîn 5:19-21.) Surixasib ge ǁgai ǀgaugu hîna sada ǃnâ a ǃhanasagu xa ra ǃaroma-e.
3. Tae-e da nē ǁkhāǁkhāǃâs ǃnâ nî ǃhoaǃgao?
3 Joseb ǃgâsagu aiǁgausa xu da ge a mû ǁkhā matib surixasiba ǀhōsaguside khôa tsî omaridi ūhâ ǂkhîba a ūbe ǁkhā ǀgausa. Joseb ǃgâsagu ge dī xūna da dī tide xawe da ge ǀoasa kurusa ūhâ tama hâ tsî tsū ǂgaogu tsîna ūhâ. (Jer. 17:9) Nēs ǃaroma da ge ǁaen ai surixa ǂgaoba a omkhâi ǁkhā. Hā re i da Elobmîs aiǁgaudi hîna surixasib ga sida ǂgaogu ǃnâ tsoatsoa o, o nēsa mûǂans ǀkha nî hui da ga ǃhoaǃgao. Tsî da ge surixasib tsâsiga ǃkhamǃoa tsî ǂkhîba ôas tsîna ǃoa nî kō.
TAE-E SURIXASIBA A ǃAROMA ǁKHĀ?
4. Filisteǁîna tae-i ǃaroma Isaki di ǃkhūsisa ge ǂhaba hâ i?
4 ǂGui ǃkhūsisa ūhâs. Isaki ge kaise ge ǃkhū hâ i tsîn ge Filisteǁîna Isaki ǃkhūsisa ge ǂhaba hâ i. (Gen. 26:12-14) ǁÎn ge Isaki ge ǁîb xamanina ǁgam-e gere mā xū tsaudi tsîna ǃhūb ǀkha ge ǂgan-am. (Gen. 26:15, 16, 27) Filisteǁîn khamin ge ǀnî khoena nētsē ǂgui ǃkhūsisa ǁîn xa ūhâ khoen xūna ra ǂhaba. ǁÎn ge ǁîn xūn ǀguina ǂhaba tama hâ xawe nē khoen ǁnā xūna nî ūhâs tsîna ǂgao tama hâ.
5. ǀGapipristerga tae-i ǃaroma Jesub ǃoa-ai surixa gagaba ge omkhâi?
5 ǂGui khoen ga ǀgui khoe-e ǃgôaǃgâsiba a ǁgau os. Jodeǁî ǀgapipristergu ge Jesuba gere suri ǂgui khoen ǁîba gere ǃgôaǃgâ amaga. (Mat. 7:28, 29) Jesub ge ge Elob di ǂnûǁkhaeba-ao i tsî amaba gere ǁkhāǁkhā. Xawe gu ge nē ǀgapipristerga ǂhumiba Jesub xa gere ǃhoa ǁîb ǀonsa ǀuriǀuris ǃaroma. (Mrk. 15:10; Jhn. 11:47, 48; 12:12, 13, 19) Tae-e da nē aiǁgausa xu a ǁkhāǁkhāsen ǁkhā? ǃGâsan hîna ǀhaohâb ǃgâsan xa ǁîn ǃgâi ǀgaugu amsi a ǀnam-en ǃoa-ai surixa gagaba omkhâisa da ge ra ǂgōsen ǂgao. Tsî ǁîn ǃgâi ǀgauga ra ǁgae ǂgao.—1Kor. 11:1; 3Jhn 11.
6. Diotrefeba surixasiba mati ge ǁgau?
6 Khoe-i ga ǀhaohâb ǃnâ aiǂhanuga hō, os. ǃKharu ge ǁaeb ǃnâb ge Diotrefeba ǁnān hîna ǀhaohâb ǃnâ aiǂhanuga ūhâna gere suri. ǁÎb ge gere “ǂguro ǂgao” ǀhaohâb ǁanin ǃnâ tsî nēs ǃaroma ama tama xūna apostel Johaneb tsî nau ǃgâsagu xa gere ǃhoa. (3Jhn. 9, 10) Diotrefeb ge dī xū-i khami i xū-e da dī tide xawe da ge sada ǂhaba hâ aiǂhanu-e ga hō ǃgâsa-e a suri tsoatsoa ǁkhā. Nē khoe-i xa da nē aiǂhanuba ǃgâise a dī ǁkhā dida ga ǂâi o.
Sada ǂgaob ge ǃhūb khami i tsî sada ǃgâi ǀgauga îsa hairodi khami. Xawe surixasib ge ǃgāxa ǀgâb khami ī.Surixasib ge ǃgâi ǀgauga a ǁgâiǁgâi ǁkhā aiǁgause ǀnammi, tsâbaǁhaoxasib tsî ǃgâixasib tsîna (7ǁÎ xoaǀgorasa mû re)
7. Tae sîsenǂûibab surixasiba sada ai a ūhâ ǁkhā?
7 Surixasib ge ǃgāxa ǀgâ-i khami a ī. Surixa gagab ga sada ǂgaogu ǃnâ ǃnomaǃkhō tsoatsoa o, os ge nēsa ǃhomǂuisa supu tide. Surixasib ge ǀnîhâ ǀgaugu xa ra ǃaroma-e aiǁgause dauxasib, ǀgapiǂâixasib, tsî ǁîǃgôasenxasib tsîn xa. Surixasib ge sao ra ǃgâi ǀgauga a ǃgam ǁkhā ǀnammi, tsâbaǁhaoxasib tsî ǃgâixasib tsîna. Suribxasib sada ǃnâ ra tsoatsoa ǃkhaisa da ga hōǃâ o, o da ge nē tsâsiba nî ǃhomǂui. Mati da surixasiba a ǃkhamǃoa ǁkhā?
TSÂMTSÎǃNÂSIB TSÎ ǂÂUXASIB TSÎNA OMKHÂI RE
Mati da ǃgāxa ǀgâ-i khami i surixasiba a ǃkhamǃoa ǁkhā? Elob di ǃanu gagab di ǀgaib ǀkha da ge surixasiba a ǃhomǂui ǁkhā tsî ǃgamǃgamsenxasib tsî ǂâuxasib tsîn ǀkha nēsa a ǃkhōǃkhuni ǁkhā (8-9ǁÎ xoaǀgora ra mû re)
8. Tae-e nî hui da surixasiba ǃkhamǃoas ǃnâ?
8 Surixasiba da ge a ǃkhamǃoa ǁkhā tsâmtsîǃnâsib tsî ǂâuxasib tsîna omkhâis ǃnâ. Nē ǃgâi ǀgauga da ga sada ǃnâ ūhâ o, o da ge surixasiba soa-e mā tide. Tsâmtsîǃnâsib ge nî hui da i da tā sada xa ǀgui ǃnāsase ǂâi. Tsâmtsîǃnâ khoe-i ge nau khoen xa i ǃnâsa xūna nî ūhâs tsâsiba hō tama hâ. (Gal. 6:3, 4) ǂÂuxasiba ūhâ khoen ge ūn hâ xūn ǀkha a ǂkhî tsî nau khoen ǀkha ǀgōpeǀnōsen tama hâ. (1Tim. 6:7, 8) Tsâmtsîǃnâsib tsî ǂâuxasiba ūhâ khoe-i ga nau khoen ǃgâi xūna ra hō ǃkhaisa mû o, o i ge ǁîn ǀkha a ǂkhî.
9. Galateǁîn 5:16; Filipeǁîn 2:3, 4 ǃoagub ǃanu gagaba tae-e dīs ǀkha nî hui da?
9 Elob ǃanu gagaba da ge ǂhâ hâ ǃgâi tama ǀgaugu surixasib di ga da ga ǃkhamǃoa ǂgao tsî tsâmtsîǃnâsib tsî ǂâuxasib tsîna omkhâi ǂgao o. (Khomai re Galateǁîn 5:16; Filipeǁîn 2:3, 4.) Jehovab ǃanu gagab ge nî hui da sada ǃgam tsâsigu tsî tanisen ǀgaugu tsîna ôaǃnâsa. Elob ǃanu gagab huib ǀkha da ge sada ǃgâi tama ǀgauga ǃgâigu ǀkha a ǃkhōǃkhuni ǁkhā. (Psa. 26:2; 51:10) Moseb tsî Paulub tsîkha aiǁgaude ǃoa kō re hîna surixasib gagaba ge ǃkhamǃoa kha.
ǂKham Israelǁî khoeb ge Moseb tsî Josuab tsîkha ǃoa ra ǃkhoeǀkhî tsî ǁîkha kēbo-aon khami gere tanisen ǀgam khoekha xa ge ha mîba. Josuab ge Moseba ge mîba îb ǁnā khoekha ǁnama xaweb ge Moseba nēsa ge ǂkhā. Tsîb ge Josuaba ge mîba ǁîb a ǂkhî ǃkhaisa Jehovab nē ǀgam khoekha ǁîb ǃanu gagaba ge a mā ǃkhaisa. (10ǁî xoaǀgorasa mû re)
10. Mâ mâsiba Moseba ga ǃâitsâ hâ? (Tsoatsoas ai hâ ai-īsiba mû re.)
10 Moseb ge Elob khoena kōǃgâs aiǂhanuba ge ūhâ i xaweb ge ge surixa tama hâ i nē aiǂhanub ǃaroma. Aiǁgause, ǀgui ǃnās aib ge Jehovaba ǃanu gagaba Moseba xu ū tsî Israelǁî aogu hîna ge tents ǀgūse mâ i ga ge mā. Tsî ǁaero i khaoǃgâb ge Moseba ge mû ǀhaos dawa ge hâ tama hâ i ǀgam Israelǁî aokha tsîn ge ǃanu gagaba hō tsî kēbo-aokha ase a tanisen tsoatsoasa. Matib ge tanisen Josuab ge mîba bi o îb ǁnā khoega ǂkha? Moseb ge nē ǀgam khoega Jehovaba xu gere hō aiǂhanuba ge suri tama hâ i. Xaweb ge ǁîgu ǀkha ge ǂkhî i. (Num. 11:24-29) Tae-e da Moseba xu a ǁkhāǁkhāsen ǁkhā?
Xristeǁî ǀhaohâb ǃûi-aoga mati Moseb tsâmtsiǃnâsiba a ǁgae ǁkhā? (11-12ǁÎ xoaǀgora ra mû re)c
11. ǀHaohâb ǃûi-aoga mati Moseb aiǁgausa a ǁgae ǁkhā?
11 ǀHaohâb ǃûi-aots ga io, ots ge ǃgâsa-e sadu a ǀnam aiǂhanuba ǁkhāǁkhā kai-e i i ǁî-e ǀhaohâba kōǃgâ ǁkhā? Aiǁgause du ge ǃKhē xu ǂgō-omma mâ wekheb hoaba dīs xa a ǃgâibahe. Xawe du ga tsâmtsîǃnâ o Moseb khami o du ge ǁaixa tide. ǀNîhâ ǃgâsa-e nēsa ǁkhāǁkhāsa du ga ǂgan-e o i i ǁî-i tsîna ǁaeb da ī khami nēsa ǃgâise dī ǁkhā. Xawe du ge ǃgâiǃgâibasensa nî ūhâ nau ǃgâsana ǁkhāǁkhās ǃnâ.
12. Matin ǂgui Xristeǁîna nētsē ǂâuxasib tsî tsâmtsiǃnâsib tsîna ra ǁgau?
12 Kaira ǃgâsagu ra ǃkharu ǃnâ ǃgomsib xa ǂâi re. ǂGui kurina gu ge ǀhaohâb ǃûi-aogu mûǂam-aogu ase gere ǂgaeǂgui. Xawe gu ge 80 kurixa gu ra o māsenxase ǁîgu di ǁgaumâide ra māǁnâ. ǃNarimâ ra mûǂam-aogu ge 70 kurixa gu ra o ǁîgu tsîna ǁîgu ǁgaumâide māsenxase mâǁnâ tsî ǀasa ǁgaumâide ra ǃkhōǃoa. Tsî ǃkharu go kurigu ǃnân ge ǃhūbaib ǂhabase ǂgui betels omaris ǁanina ǀasa ǁgaumâide ra hō. Nē ǃgâsan ge ǁnān hîna nēsisa ǁnîn ge ūhâ i ǁgaumâide ūhâ ǃgâsana suri tama hâ.
13. Tae ǃaromab ge Pauluba nē 12 apostel ga suri ǁkhā i?
13 Apostel Paulub ge ǃgâi ǂâuxasib tsî tsâmtsiǃnâsib tsîna ge ǁgau khoen di ǀguiba. Paulub ge surixasiba ǁîb ǃnâ tsoatsoasa ge mā-am tama hâ i. ǁÎb ge aoǁnâ sîsenni ǃnâ gere sîsen xawe ge xoa: “Tita ge apostelgu hoagu xa ǂkharita, tita apostelse ǂgaihesa anu tama ta.” (1Kor. 15:9, 10) Nē 12 apostel gu ge Jesub ge ǃhūbaib ai hâ i o, o ǁîb ǀkha ge hâ i xaweb ge Pauluba Jesub ǁōb tsî khâis tsîn khaoǃgâ ǀgui ge Xristeǁî kai. ǁÎb ge ‘ǀūben di aposteli’ ase ge ǁhûi-e xaweb ge Pauluba ge 12 apostelgu di ǀguib ase ge ǁhûi-e tama hâ i. (Rom. 11:13; ǃNǃkh. 1:21-26) Nē 12 apostelgu hîna Jesub ǀkha ǀgū ǀhōsagusisa ge ūhâ i ga suris xab ge Pauluba ūb ge hā i aiǂhanugu ǀkha ge ǂkhî i.
14. ǂÂuxasib tsî tsâmtsiǃnâsib tsîna da ga ūhâ o, o da tae-e nî dī?
14 ǂÂuxasib tsî tsâmtsiǃnâsib tsîna da ga ūhâ o, o da ge Paulub khami nau ǃgâsan Jehovab xa mā-e hâ aiǂhanuga suri tide. (ǃNǃkh. 21:20-26) ǁÎb ge ǁgaumâisa aoga ge ǁhûi i gu Xristeǁî ǀhaohâb ǃnâ ǂgaeǂguisa ū. ǀOasa kurusa gu ūhâ tama hâ xawe gu ge Jehovab xa ‘khoen mādi’ ase ge mā-e. (Efe. 4:8, 11) Nē ǁgaumâisa aoga da ga ǃgôaǃgâ tsî ǁîgu daoǁgaude sao o, o da ge Jehovab ǀgūse hâ tsî ǂkhîba Xristeǁî ǀhaohâgu ǃnâ ra ǀama.
“A DA ǁNÂI ǂKHÎB DINA SAURUǃGON”
15. Tae-e da nî dī?
15 Suriguba da ga sada ǁaegu ūhâ o, o da ge ǂkhîba ūhâ tide. Surixasiba xu da ge ra ǂgōsen ǂgao tsî nau ǃgâsan ǃnâ surixasiba nî ǃaroma xūn tsîna xu. Nē ǂhâǂhâsa xūna da ge ra dī ǂgao Jehovaba da ga ǁnâuǀnam tsî “ǂkhîb dina sauruǃgon, tsî ǂnubikhâigus ǃoa hân tsîna” o. (Rom. 14:19) Tae-e da a dī ǁkhā nau ǃgâsana huis ǃnâ în surixasiba ǃkhamǃoa tsî mati da ǂkhîba a omkhâi ǁkhā?
16. Mati da nau ǃgâsana a hui ǁkhā în surixasiba ǃkhamǃoa?
16 Sada tanisen ǀgaub tsî dīxūn ge nau khoen ai kai sîsenǂuiba a ūhâ ǁkhā. ǃHūbaib ge ǂhaba hâ sada xūn hîna da ūhân ǀkha da nî “kaikaisen” ǃkhaisa. (1Jhn. 2:16) Xawe nē ǀgaub ge surixasiba ra ǁgau. Surixasib gagasa nau khoen ǃnâ khâikhâisa da ge nî ǂgōsen sada ūhâ xūn tsî ǁama ǂgao da ra xūn tsîn xa hoaǁae ǃhoasa xu ǂgōsens ǃnâ-ū. ǀNî ǀgaub hîna da surixasib gagasa xu a ǁkhaubasen ǁkhāb ge sada ǀhaohâb ǃnâ ūhâ aiǂhanugu xa ǀnōsa ǂâiǀgauba ūhâsa. Kaise da ga sada aiǂhanugu ai ǂâisa ǂnûi o, o da ge surixasiba a omkhâi tsoatsoa ǁkhā. Xawe da ga nau ǃgâsan ǃnâ ǃgâiǃgâibasensa ūhâ tsî ǁîn da dī ǃgâi xūna mû tsîn ǁîn ǃgao goa nî o, o da ge ǀguiǃnâxasib tsî ǂkhîb tsîna ra omkhâi.
17. Joseb ǃgâsaga tae-e ge dī hō tsî tae-i ǃaroma?
17 Surixasib ǃoa-ai da ūhâ ǃkhamsa da ge a dan ǁkhā. Joseb ǃgâsagu aiǁgaus xa ǁkhawa ǂâi re. ǂGui kurin ǃkharu hâse gu Joseba ǃgâi tamase hâ-ū hâ hîna gu ge Egipteb ǃnâ ge ǀhao-ū bi. ǁÎb a ham ǃkhaisab nî mîba gus aiǃâb ge Joseba aibe gere mû ǂgao ǁîb ǃgâsagu ge ǀkharaǀkharasensa. ǂÛǀhaos hîna gu ge ūhâ is tawab ge Benjaminna ǃnāsa ǁaeba gere mā nau ǃgâsagu ǁîb digu xa îb ǁîgu tanisen ǀgauba mû ǁkhā. (Gen. 43:33, 34) Xawe gu ge ǁîb ǃgâsaga Benjaminna ge suri tama hâ i. Tsî ama ǂhansensiba ǁîgu ǃgâsab tsî ǁîgu ǁgûb Jakob tsîn ǃoa-ai gere ǁgau. (Gen. 44:30-34) Joseb ǃgâsagu ge surixa gagaba ǃaruǀî ūhâ tama hâ i amagab ge omaris ǃnâ ǂkhîba ge hā-i. (Gen. 45:4, 15) ǁKhā ǀgaub ǃnâ da ge sada tsîna ǂkhîba omaridi tsî ǀhaohâb ǃnâ a hā-ū ǁkhā surixasiba xu da ga ǂgōsen o.
18. Jakobub 3:17, 18 ǃoagu i tae-e nî i ǂkhîba aiǃgû kais ǀkha da ga hui o?
18 Jehovab ge ǂhaba hâ i da surixasiba ǃkhamǃoa tsî ǂkhîba omkhâi. ǃGarise da ge nî sîsen nē ǀgam xūna ǃkhambas ǃaroma. Nē ǁkhāǁkhāǃâs ǃnâ da go mû khami da ge surixasiba a omkhâi ǁkhā. (Jak. 4:5) Tsî da ge surixasiba ra aiǃgû kai ǃhūbaib ǃnâ ûi hâ. Xawe da ga ǂâuxasib, tsâmtsiǃnâsib tsî ǃgôaǃgâsib tsîna omkhâi o, o da ge surixasiba ǃkhai-e mā tide. Tsî da ge nî hui ǂkhîba omkhâis ǀkha hîna ‘ǃgâi ǂûgu’ ǀgauba ra aiǃgû kaiba.—Khomai re Jakobub 3:17, 18.
130ǁÎ ǁNAETSANAS ǀÛbaǀnamxa re
a Jehovab di ǀapeǂhomis ge ǂkhîba ūhâ. Xawe nē ǂkhîb ge a tsâǀkhā-e ǁkhā surixasiba da ga sada ǃnâ omkhâi o. Nē ǁkhāǁkhāǃâs ǃnâ da ge nî ǃhoaǃgao surixasib tae-i xa ra ǃaroma-esa. Tsî da ge mati da nē ǀgauba ǃkhamǃoa tsî ǂkhîba nî ôas tsîna nî ǃhoaǃgao.
b ǁGUIǃĀHE RA MÎS: Elobmîs ǃnâ i ra ǁguiǃāhe khamib ge surixasiba nau khoen ūhâ xūna ūhâs ǀguinsa ǂhaba kai da tide. Xawe ǁnā khoen a sīǃnâ ǁkhā xūna ǁîna xus tsîna a ūbe kai da ǁkhā.
c AI-ĪSIBA ǁGUIǃĀS: ǀHaohâb ǃûi-aogu di ǀhaos tawab ge kaira ǃgâsab hîna ǃKhē xu ǂgō-omma ǀhaohâb ǃnâ hoaǁae ra dība ra ǂgan-e îb ǀnî hâ ǂkham ǃgâsaba ǁkhāǁkhā îb ǁîba ǁnā aiǂhanuba mā-e ǁkhā. Kaira ǃgâsab ǁîb aiǂhanuba kaise a ǀnam xaweb ge māsenxase ǀhaohâb ǃûi-aogu di ǁgui-aisa ra sao tsî ǂkham ǃgâsaba ǃgâi daoǁgaudi tsî koas tsîna ra mā.