ǀAexase du ǀnamgu re

1. Mâ ǃgāsa mîmāsab Jesuba ǁîb ǁkhāǁkhāsabega ge mā? (Tsoatsoas ai hâ ai-īsiba mû re)

ǁŌB NÎ ǃgoes aiǃâb ge Jesuba ǁîb di ǁkhāǁkhāsabega mîmāsa ge mā. ǁÎb ge ǁîga ge mîba: ‘Tita ge sago ǀnam is ǁkhās khami go ge nî ǀnamgu.’ ǁÎb ge ǀaro tsî ge mî: “Nēs tawan ge hoana nî mûǂan, ti ǁkhāǁkhāsabe go asa, ǀnamma go ga sago ǃnâ ūhâo.”—Jhn. 13:34, 35.

2. Tae-i ǃaroma i a ǂhâǂhâsa ǀnamma da nî ūhâbagu ǃkhaisa?

² Jesub ge ge mî ǁîb ǁkhāǁkhāsaben nî ǂanǂûihe ǃkhaisa nau khoenan ga ǁîb ǁîna ǀnam khami ǀnam o. Nēs ge ǃkharu ge ǁaeb ǃnâ ge ama i tsî nētsēs tsîna a ama. Nēs ǃaroma i ge a ǂhâǂhâsa ǃgomsin hîna da ūhân hoan ǃnâ da ǀnamma nî ǁgaugu ǃkhaisa.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Khoesi ǃnubusigu ge ra ǃgom kaiba da ǀnamma ǁgaugusa. Xawe da ge noxoba ǃgarise nî ǁgūtsâ Xristuba ǁgaesa. Nē ǁkhāǁkhāǃâs ǃnâ da ge nî ǃhoaǃgao ǀnammi mati ǂkhîba ūhâs, ǃhaoǀgoras tsî ǃhaokhoe ǃkhōǃoaxasib tsîn ǀkha nî hui dasa. Nē xūna da ra ǃhoaǃgao hîna dîsen re: Tae-e da ǃgâsan hîna ǃgomǁaegu ǃnâs tsîna ǀnamma gere ǁgaugun di aiǁgaude xu a ǁkhāǁkhāsen ǁkhā.

ǂKHÎB KURU-AO KAI RE

4. Mateub 5:23, 24 ǃoagu da tae-i ǃaroma sada ǀkha ǁaixa hâ ǃgâsa i ǀkha nî ǂkhîbagu?

⁴ Jesub ge ǂkhîba sada ǃgâsa-i hîna tsūdi da hâ i ǀkha kurus ǂhâǂhâsasib xa ge ǃhoa. (Khomai re Mateub 5:23, 24.) ǁÎb ge ge mî Jehovab ǀkha da ga ǃgâi ǀhōsagusisa ūhâ ǂgao o, o da sada ǃgâsan ǀkhas tsîna ǃgâi ǀhōsagusisa nî ūhâsa. Jehovab ge a ǂkhî ǃgarise da ga sîsen o ǂkhîba sada ǁaegu ūhâs ǃaroma. ǁÎb ge ge mî sada ǃoabasab ūǃoa tide ǃkhaisa ǁaixa tsî da ga ǂkhîbagu ǂgao tama io.—1Jhn. 4:20.

5. Tae-e ǀgui ǃgâsaba ge ǃgomba kai ǂkhîba kurusa?

⁵ Kaise i ge a ǃgom ǁkhā ǂkhîba kurusa. Tae-i ǃaroma? Marki ǀkha ge ī xū-i xa ǂâi re.b ǁÎb ge kaise ge ǁaixa ǃgâsab ge ǁîba mîǁgaiǁgai tsî ǀhaohâb ǃgâsana ǁîb xa ǃgâi tama xūna a mîba o. Marka nēsa mati ge sîsenǂam? “Nēs ge kaise ge ǁaixa kaide” tib ge ra mî. ǁAe-i khaoǃgâb ge Marka ǃgâi tamase dīb ge xū-i xa ge tsâ tsî nēs ǃaroma ǀûbaba ǃgâsab ai gere ǂgān ǂkhîba kurus ǃaroma. Xaweb ge nau ǃgâsaba nēsa ge ūǃoa ǂgao tama hâ i. Marki ge ǁae-i khaoǃgâ ge ǂâi tsoatsoa, tae-i ǃaroma da tita ǀgui ta ǂkhîba kurusa nî dītsâ? !Narimâra mûǂamaob ge ǁîba ge ǂkhâǃnâ îb tā nēsa dīs ǃnâ ǀûsen. Marka tae-e nē ǁnamas xa ge dī?

6. (a) Marka mati ǂkhîba ôasa gere dītsâ? (b) Marka mati Koloseǁîn 3:13, 14 ǃnâ hâ daoǁgausa ge sîsenū?

⁶ Marki ge nē mâsiba ǃoa kō tsî ge mûǂan ǁîb tsîn ǀnî ǁaega nau ǃgâsan xab a ǂoaǂamsa ti ra ǂâi ǃkhaisa. ǁÎb ge ge mûǂan ǁîb tanisen ǀgaubab nî dawasa. (Kol. 3:8, 9, 12) ǁÎb ge tsâmtsîǃnâsib ǀkha nau ǃgâsaba ǀgū tsî ǀûbaba ge ǂgān ǁîb tanisen ǀgaub ǃaroma. Marki ge sîǂkhanis tsîna ǃgâsaba ǃoa ge xoa tsî ge mîba bi ǁîb kaise ǃhausen hâ ǃkhaisa tsî ge ǂgan bi ikha ǁkhawa ǀhosagu kai. Marki ge nau ǃgâsab nî ǃgâibahe tib gere ǂâi ǀkhaexun tsîna gere mābi. Xaweb ge ǃgâsaba noxoba ǁîb ǀkha ge ǁaixa hâ i. Nēn hoan ǃnâb ge Marka Jesub daoǁgausa sao tsî ǁîb ǃgâsaba ǀûba tsî ǀnamma ǁgaubis ǀkha ge aiǃgû. (Khomai re Koloseǁîn 3:13, 14.) Nau khoen ga ǂkhîba kuru ǂgao tama i xawe da ge ǁîna da ga Jesub khoena a ǀnam ǀgaub ai a ǀnam o, o ǁîna ǀûba, ǀnamma ǁgau tsî ǁîn ǀkha ǂkhîba kurusa nî ǀgoreba.—Mat. 18:21, 22; Gal. 6:9.

7. (a) Jesuba tae-e ge ǂkhâǃnâ da dīsa? (b) ǀGui ǃgâsasa mâ mâsib ǃnâ ge hâ i?

⁷ Jesub ge ra ǂkhâǃnâ da i da khoena sada ra hâ-ūhe ǂgao ǀgaub ǃnâ hâ-ū. ǁÎb ge ge mî i da tā ǁnān hîna sada a ǀnaman ǀguina ǀnam. (Luk 6:31-33) Xawe i ga ǀhaohâb ǃnâ hâ ǃgâsa-e sada xu hâbe tamas ka io dawede ǂgao tama ios? Laras ge nē mâsib ǃnâ ge hâ i. ǁÎs ge ra ǁguiǃā: “ǃGâsas ge gere ǂgōsen ǃhoa-ū te sa xawe ta ge tae-i ǃaromas asa ge ǀū-i. Nēs ge kaise gere ǂhani te tsî ta ge ǀhaode ǃoas tsîna ī ǂgao tama gere i.” ǂGuros ge Larasa gere ǂâi: ‘Tita ge tsū xū-e dī tama hâ di. Tsî nau ǃgâsan ǀhaohâb ǃnâ hân tsîn ge ra ǂâi nē ǃgâsas ǃgâi tamase ra tanisen di.’

8. Larasa tae-e ge dī ǂkhîba kurus ǃaroma tsî tae-e da ǁîs aiǁgausa xu a ǁkhāǁkhāsen ǁkhā?

⁸ Laras ge xū-e ge dī ǂkhîba kurus ǃaroma. ǁÎs ge Jehovaba ǃoa ǀgore tsî ǃgâsas ǀkha ǃhoasa ge mîmâi. ǁÎra ge ǃgomsib xa ǃhoa tsî ǁnāpaxū ge ǂkhîbagu. Hoa xūn ge ǃgâise gere mûsen. Laras ge ra mî: “Xawes ge ǃgâsasa ǁkhawa ǁkhā tanisen ǀgauba ti ǃoa-ai ge ūhâ tsoatsoa. Nēs ge ge ǂkhabuǂâi kai te.” Tsoatsoas ǃnâs ge Larasa gere ǂâi ǁîs nau ǃgâsas ga ǁîs tanisen ǀgauba a dawa o, o ǀgui nî ǂkhî ti. Laras ge ge mûǂan ǁîs nē ǃgâsasa ‘ǀûba’ tsî ǀnamma ǁgaus ǀkha ǀgui nî aiǃgû ǃkhaisa. (Efe. 4:32–5:2) Laras ge ge mûǂan ama Xristeǁî ǀnammi ‘hoana ra ǃgū-ai, hoana ra ǂgom, hoana ra ǃâubasen, hoana ra taniǀnam’ ǃkhaisa. (1Kor. 13:5, 7) Laras ge nē ǃgomsib xa ge tsûadana ǀû. Egas ge nau ǃgâsasa ǁîs tanisen ǀgauba ge dawa. Sada ǃgâsan ǀkha hoaǁae ǂkhîba ūhâsa da ga ǃkhamba o, o da ge a ǂgom ǁkhā “Elob ǀnammi tsî ǂkhîb tsîkha dib ge sadu ǀkha nîra hâ.”—2Kor. 13:11.

TĀ ǃHAOǀGORAXA RE

9. ǃNaeǃkhaidi 10:34, 35 ǃoagu da tae-i ǃaroma ǃhaoǀgorasa ūhâ tide?

⁹ Jehovab ge ǃhaoǀgoraxa tama hâ. (Khomai re ǃNaeǃkhaidi 10:34, 35.) ǃHaoǀgoraxa tama da ga io, o da ge ǁîb ǀgôada a ǃkhaisa ra ǁgau. Sada ǀgūkhoena sada khami ǀnam di hâ mîmāsa da ge ra ǁnâuǀnam tsî da ge sada di gagasi omaris ǃnâ ǂkhîba ra ūhâ ǀgara.—Rom. 12:9, 10; Jak. 2:8, 9.

10-11. Matis ge ǀgui ǃgâsasa ǁîs ti ǃgâi tama ǂâiǀgauga ǃkhamǃoa?

¹⁰ Xawe ǃhaoǀgorasa ūhâ tama is ge supu tama hâ. Aiǁgause Rut di ǀon hâ ǃgâsas ǀkha i ge tae-e isa kō re. ǂKhams ge io, os ge ǁîsa ǀnî hâ ǃhūb khoe-i ǀkha ge ǁnâusagu. Nēsa mati ǁîsa ge tsâǀkhā? Ruts ge ra ǂanǃgâ: “ǁNā ǃhūb xūn hoana ta ge ge ǃhuisa i. Tita ge ge ǂâi hâ i ǁnā ǃhūb khoen hoan ǁgai tanisen ǀgauga ūhâ di ǃgâsan tsîna ǃkhōǂgā hâse.” Rutsa nē tsâsiba mati ge sîsenǂam?

¹¹ Ruts ge ge mûǂan ǁîs ǃgâi tama tanisen ǀgaugas nî ǃkhamǃoa ǃkhaisa. ǁÎs ge Yearbooks ǃnâ ǁnā ǃhūb ǃgâsan gere ǃkharuǃnâ xūn xa gere khomai. ǁÎs ge ra mî: “Dītsâ ta ge gere ǁnā ǃhūb khoen xa ǃgâi ǂâide ūhâsa. Tsî ta ge ge mûǂan ǁnā ǃhūb ǃgâsan ǁkhoaǂgaosiba Jehovaba ǃoabas ǃnâ ūhâsa. ǁÎn tsîn a sada di ǃhūbaib ǂhawase hâ ǃgâsan ǃâ ǃkhaisa ta ge ge mûǂan.” ǁAeb ǀkhas ge Rutsa ge mûǂan ǁîs ǀnamma nî ǁgau ǃkhaisa. ǁÎs ge ra ǁguiǃā: “ǁNā ǃhūb ǃgâsan ǀkha ta ga ǀhao o, o ta ge ra dītsâ ǁîn ǀkha ǀhōsagusisa kurusa. ǃHoa-u nî tsî ta ge ǁîna ǃgâise ra ǂan.” Nēsa mati ge ǀamǂoa? Ruts ge ra mî: “ǁAe-i khaoǃgâgu ge ti ǃgâi tama ǂâiǀgauga ge bē.”

12. Sara di ǀon hâ ǃgâsasa mâ ǃgomsiba gere hōǃâ?

¹² ǀNîn ge a ǃhaoǀgoraxa ǁkhā ǀūn a hîna. Saras ge ge ǂâi hâ i ǁîs ǃhaoǀgoraxa tama hâ ti. ǁÎs ge ǃkharagagu ǃhaodi khoena ǁîn mari ǁhōgu, ûiǀgaub tsî tae-en da dīs ai ge ǀgoraǃgâ tama hâ i. Xawes ge ra ǂanǃgâ: “Mûǂan ta ge ge ǃhaoǀgorasa da ūhâsa.” Mâ ǀgaub ǃnâ? Saras ge ǀgapi ǁkhāǁkhāsa ūhâ omarisa xu ra ǂoaxa tsî ǀgapi ǁkhāǁkhāsa ūhâ khoen ǀkha ǀgui ge ǀhōsagu i. ǀGuiǁaes ge ǁîs di ǀhōba ge mîba: “Tita ge ǀgapi ǁkhāǁkhāsa ūhâ ǃgâsan ǀkha ǀgui ra ǀhōgu. Tsî ǁnān hîna ǀgapi ǁkhāǁkhāsa ūhâ tama hâna xu ra ǂgōsen.” Amase i ge a ǃgāsa Saras ǁîs tanisensa nî ǀkharaǀkharasa. Mati?

13. Saras di ǀkharaǀkharasensa xu da tae-e a ǁkhāǁkhāsen ǁkhā?

¹³ !Narimâra mûǂamaob ge Sarasa ge hui ǁîs tanisen ǀgauba sîsenǂams ǀkha. ǁÎs ge ra mî: “ǁÎb ge ti ǂgomǂgomsa ǃoabas, ǂkhâǃnâ ra ǃereamdi tsî Xoadi xa ta ūhâ ǂans tsîn ǃaroma ge koa te. Tsîb ge ge ǁguiǃāba te sada gagasi ǀgaugu ra omkhâihe khami da ge ǃgâi Xristeǁî ǀgauga ra hō, ǃgamǃgamsenxasîb, ǃgâixasib tsî ǀkhomxaǂgaosîb tsîna.” Saras ge !narimâra mûǂam-aob ǁnamasa ǂgaoba ǃoa ge ūbasen. ǁÎs ge ra mî: “ǃGâixasib tsî ǀnammi tsîna ūhâs ge a ǂhâǂhâsa di.” Nēs xa ǃaroma-e hâses ge ǁîs ǃgâsana ǀnî mûs ǀkha ge mû tsoatsoa. ǁÎs ge ra ǁguiǃā: “ǁNâuǃā ta ge ra ma ǀgaugu ǃaromab Jehovaba ǁîna a ǀnam ǃkhaisa.” O sada xas? Tatsē da ge nau khoen xa da a ǀhapi di ǂâi ǂgao tama hâ. Sada ‘ǃgâsan’ hoana da ga ǀnamma ūhâba o, o da ge ǃhaoǀgorasa ūhâ tide.—1Pet. 2:17.

ǃHAOKHOE ǃKHŌǃOAXA RE

14. Hebreǁîn 13:16 ǃoagub Jehovaba mati ra tsâ ǃhaokhoe ǃkhōǃoaxa da ga o?

¹⁴ Jehovab ge ǃhaokhoe ǃkhōǃoaxasiba ra ǃgôaǃgâ. (Khomai re Hebreǁîn 13:16.) ǁÎb ge nēsa sada ǃoabas ǃâ-i ase ra mû ǂhâsib ǃnâ hâ khoena da ga hui o. (Jak. 1:27; 2:14-17) Elobmîs xoadi ge ra ǂkhâǃnâ da î da ‘ǃhaokhoe ǃkhōǃoaxa.’ (Rom. 12:13) Ama ǀnammi, tsâbaǁhaoxasib tsî ǀhōsagusis tsîna da ge ra ǁgau ǃhaokhoe ǃkhōǃoaxa da ga o. Jehovab ge ra ǂkhî khoen ǀkha da ga ǂû ǁae, ā ǀhao tamas ka io ǁkhoaxa ǁaeba a ūhâ o. (1Pet. 4:8-10) Xawe da ge ǃgomsina a hōǃâ ǁkhā hîna ǃhaokhoe ǃkhōǃoaxasiba a ǃgom kai ǁkhāna.

15-16. (a) ǀNî ǃgâsana ǃhaokhoe ǃkhōǃoaxasiba ǁgausa xu tae-i ǃaroma ra ǂgae-oasen? (b) Tae-e Editsa ge hui is ǃhaokhoe ǃkhōǃoaxasiba ǁgau tsoatsoa?

¹⁵ Sada mâsib xa ǃaroma-e hâse da ge ǃhaokhoe ǃkhōǃoaxasiba ǁgausa xu a ǃkhō-oasen ǁkhā. Edit di ǀon hâ ǃoa taras aiǁgausa ǃoa kō re. ǀHûǀguitimî-ao kais nîs aiǃâs ge ǁîsa khoen ǀkha hâǁaes xa ge ǃgâibahe tama hâ i. Edits ge nau khoen ǃgâi ûiǀgauga ǁîs xa ūhâ ti gere tsâ.

¹⁶ ǀHûǀguitimî-ao kais ges khaoǃgâs ge Editsa ǁîs ǂâiǀgauba ge ǀkharaǀkhara. ǁÎs ge ǃhaokhoe ǃkhōǃoaxasiba ǁgausa ǃoa gere ǁgūtsâ. ǁÎs ge ra mî: “Sida ǀasa Gaosib ǀHû-ommi gere omhe o, ob ge ǀhaohâb ǃûi-aoba ǃgamme hâ khoe-aogura hîna nēba hā nî huira xa ge mîba te. ǁÎb ge ǁîra ta ǀgam wekhekha hâǃkhai-e a mā ǁkhā ǃkhaisa ge ǂgān te. Tita ge Jehovab ge Sarefats ǃoa tarasa a ǀkhae ǀgauba ge ǂâiho.” (1Gao. 17:12-16) Edits ge nē ǁkhauǂûisa ge ūǃoa. ǁÎsa ge ǀkhaehe? ǁÎs ge ra ǁguiǃā: “ǀGam wekhekha ge ge ǀgam ǁkhâ kai. Nē ǁaeb ǃnâ da ge ǀgū ǀhōsagusisa ge omkhâi.” Edits ge ǀgū ǀhōsan tsîna ǀhaohâb ǃnâ ge hō. ǁÎs ge nēsi a aimâba-ao tsî ǁnān hînas aoǁnâ sîsenni ǃnâ ra sîsen-ūna ǁîs omsa ǃoa ǁkhaus xa a ǃgâibahe. ǁÎs ge ra mî: “Mās ge kaise ra ǂkhî kai te. Tsî amab ge tita ǃnāsa ǀkhaega ra ǃkhōǃoa kai.”—Heb. 13:1, 2.

17. Lukab tsî ǁîb kaikhoes tsîra tae-e ge mûǂan?

¹⁷ ǀNai da ge ǃhaokhoe ǃkhōǃoaxasiba ra ǁgau, xawe nēsa da mati a ǃgâiǃgâi ǁkhā? Aiǁgause, Lukab tsî ǁîb kaikhoes tsîra ge a ǃhaokhoe ǃkhōǃoaxa. ǁÎra omsa ǃoa ra ge ǁîra ǁgûn, ǀoakhoen, ǀgū ǀhōsan tsî !narimâra mûǂamaob tsî ǁîb taras tsîna ǁkhaus xa a ǃgâibahe. Xaweb ge Lukaba ra mî, “mûǂan am ge ge sim ǀgū khoen ǀguinam gere ǁkhausa.” Lukab tsî ǁîb kaikhoes tsîna tae-e ge dī i ra ǃnāsa khoena ǃhaokhoe ǃkhōǃoaxasiba ǁgau?

18. Lukab tsî ǁîb di kaikhoes tsîna mati ǁîra di ǃhaokhoe ǃkhōǃoaxasiba ge sîsenǂam?

¹⁸ Lukab tsî ǁîb kaikhoes tsîra ge ǁîra mûǂûiba ge ǀkharaǀkhara Jesub mîdi xa ra ge ǂâiǃgâ tsoatsao o: “Sado ǀnam hân ǀguina du ga ǀnamo, mâ amǃnâ-e du ǁnâi ūhâ?” (Mat. 5:45-47) Mûǂan ra ge ge ǁîra Jehovab hîna hoa khoen ǃoa-ai māǀnamxab di aiǁgausa nî ǁgaesa. Nēs ǃaroma ra ge ǃgâsan hîna ra a ǁkhau ǁkhān xa ge ǂâi tsoatsoa hîna ra noxoba ge ǁkhau tsâ tama hâ îna. Lukab ge ra mî: “Hoa da ge nē ǁaegu xa a ǃgâibahe. Hoa da ge omkhâihe tsî ǂkhâǃnâhe hâse ra tsâ.”

19. Mati da a ǁgau ǁkhā Jesub ǁkhāǁkhāsabe da a ǃkhaisa tsî tae-e dīsa da nî mîmâi?

¹⁹ Mû da ge go ǂkhîba kurus, ǃhaoǀgorasa ūhâ tama is tsî ǃhaokhoe ǃkhōǃoaxasiba ūhâs ǀkhab ǀaexa ǀnamma mati ra hui dasa. ǃGâi tama ǂâiǀgaun hîna da ūhâna da ge nî sîsenǂam tsî sada ǃgâsana ǂgaoba xu nî ǀnam. Nēsa da ga dī o, o da ge ǂkhîba ūhâ tsî Jesub ǁkhāǁkhāsabe da a ǃkhaisa nî ǁgau.—Jhn. 13:17, 35.