Khomai-aon Dîdi

Galateǁîn 5:22, 23 dawa ra ǂgaihe ǀgaugu ǀguiga a ‘gagab di ǂû’?

Nē xoaǀgora ra ge khoese Xristeǁî ǀgauga ra ǂgai. “Xawe Gagab di ǂûb ge: ǀNammi, ǃgâiaǂgaob, ǂkhîb, ǃnūǃnâxasib, khoexasib, ǃgâixasib, ǂgoms, tsamtsiǃnâsib tsî ǀgausib tsîna.” Xawe da ge tā nî ǂâi ǁnā ǀgaugu ǀguigab Elob gagaba nî hui da ūhâsa di.

Aisi hâ xoadi ǃnâb ge Pauluba tae-e a xoasa ǃoa kō re: “Tsî ǂhaisa gu ge a ǁgans di sîsenga, ǁîgu ge: ǃGamekhôas, ǀaib, ǀurixasib, ǂūǁoasib, ǁgôatsuiǁgoaǃoabas, ǃgaidīb, ǃhuigub, ǂnoagub, tauxasib, ǁaib, sunuxasib, ǁîǁâsens, ǀgorasens, surib, ǃgams, ǃkhariǃkhōb, ōb tsî ǀnîn nēti īna.” (Gal. 5:19-21) Paulub ge ǀnîn nēti īn, di hâ mîdi ǀkha ge ǀam. Nēs ge ra ǁgau ǁîb ge noxoba ǀnî “ǁgans di sîsenga” ǂgai tama hâ i ǃkhaisa Koloseǁîn 3:5 ǃnâ hân khami. ǁKhā ǀgaub aib ge khoese ǃgâi ǀgaugab ge ǂgai toas khaoǃgâ ge mî: “Nēti īn ǃoagub ge ǂhanuba hâ tama hâ.” Nēs ge ra ǁgau Paulub ge hoa ǃgâi ǀgaugu hîna ǃanu gagaba ūhâsa ra hui da ga ǂgai khâi tama hâ isa.

Nēsa da ge ra ǁnâuǃā gagab di ǂûga da ga ǃnâb di ǂûgu hînab ge Pauluba Efeseǁîn di ǀhaohâba ǃoa a xoagu ǃoa a kō o: ‘ǃNâb di ǂûb ge ǃgâisib hoab, tsî ǂhanu-aisib hoab, tsî amab hoab ǃnâ hâ.’ (Efe. 5:8, 9) “ǃGâisib,” ǂhanu-aisib tsî amab ge ‘ǃnâb di gagab di ǂûga’ xawe gu ge ‘gagab di ǂûgu’ di ǃâs tsîna ī.

Nēs ǃaromab ge Pauluba Timoteuba ǃoa ge mî “sauruǃgon ǂhanu-aisib, eloǃaoǃgâxasib, ǂgoms, ǀnammi, taniǀnamxasib tsî tsauraǃnâsib tsîna.” (1Tim. 6:11) ǃNonan hîna nēba ra ǂgai-en (ǂgoms, ǀnammi, taniǀnamxasib) tsîn ǀguin ge a ‘gagab di ǂûgu’ di ǃâ. Xaweb ge Timoteuba ǂhanu-aisib, eloǃaoǃgâxasib tsî taniǀnamxasib tsîna ge ǂhâ hâ i.—ǀGopeǀnō re Koloseǁîn 3:12; 2 Petrub 1:5-7.

Galateǁîn 5:22, 23 ge hoa ǀgaugu hînan Xristeǁîna nî ūhâse ī ga ǂgai tama hâ. Elob gagab ge a hui da ǁkhā i da saora khoese ‘gagab di ǂûga’ ûiǂui. Xawe ǀnî ǀgaugu ge hâ hîna da Xristeǁîn ase da ra kai khami nî ûiǂuiga, “tsî du nî anaga ǀasa khoeb Elob ǃoa kuruhe hâba ama ǂhanu-aisib tsî ǃanusib ǃnâ.”—Efe. 4:24.