Jehovab ǀgorede ra ǃeream ǀgaub

1-2. Tae-e da ǀnî ǁaegu ai ǀgores xa a ǂâi ǁkhā?

DÎSEN tsâ î du hâ, Jehovab amabes ǃnâ sadu ǀgorede ra ǃereamsa? ǁNāti î ga ī, o du ge ǀguri hâ tama hâ. ǂGui ǃgâsan ge ge mî ǁîn tsîn ǁnāsa ra dîsensa, ǃgōsase ǃgomsînan ga hōǃâ o. ǃGomsiga da ga ǃkharuǃnâ, o da ge sida tsîna Jehovab sida ǀgorede ra ǃereamsa a dîsen ǁkhā.

² Hā re î da ǃhoaǃgao, tae-i ǃaroma da ǂgomǃgâsiba ūhâ ǁkhāsa. Jehovab ǁîb di ǃoaba-aon ǀgorede ra ǃereamsa. (1Jhn. 5:15) Saora dîde da ge nî ǃhoaǃgao: Tae-i ǃaroma i ǀnî ǁaegu ai Jehovab sida ǀgorede ǃeream tama hâ khami ra mûsen? Jehovaba mâǀgaugu ǃnâ nētsē sida ǀgorede ra ǃeream?

JEHOVAB GE SIDA ǀGOREDE ǃÂUBASEN DA RA ǀGAUB ǃNÂ ǃEREAM TIDE

3. Jehovaba tae-i ǃaroma da ǁîb ǃoa nî ǀgoresa ra ǂhâba?

³ Xoadi ge ra ǂâiǂâiǃnâ da, Jehovab kaise a ǀnamdasa. Tsî da sida ǁîba a ǀō-aisabasa. (Hag. 2:7; 1Jhn. 4:10) Nēs xa ǃaromahe hâseb ge ra ǁkhauǂui da, î da ǀgores ǃnâ-ū ǁîb ai huiba ǂgan. (1Pet. 5:6, 7) ǁÎb ge ra huida ǂgao, î da ǁîb ǀgūse hâ.

4. Mati da a ǂan Jehovab ǁîb ǃoaba-aon di ǀgorede ra ǃereamsa? (Ai-īsiba mû re.)

⁴ Elobmîs ǃnâ da ge ra khomai matib ge Jehvaba ǁîb ǃoaba-aon di ǀgorede gere ǁnâu-am ǀgausa. ǀNî aiǁgaus xa du a ǂâi ǁkhā? Gao-aob Davib ge a ǀgui aiǁgau. ǁÎb ge ǁîb ûib ǃnâ, ǂgui ǁkhōǁkhōsa xūna gere hōǃâ. Tsî ǂgui khākhoen tsîna ge ūhâ i xaweb ge hoaǁae ǀgores ǃnâ-ū Jehovab ai huiba gere ǂgan. ǀGui ǃnâs aib ge saorase Jehovaba ge ǀkhoma: ‘Jehova ǁnâu re ti ǀgoresa; ti ǀkhomabasensa ǁnâu re. Sa ǂgomǂgomsasib ǃnâ ǁnâu-am te re; sa ǂhanu-aisib ǃoa.’ (Psa. 143:1) Jehovab ge Davib di ǀgoresa ge ǃeream. (1Sam. 19:10, 18-20; 2Sam. 5:17-25) Davib ge ǂgomǃgâsib ǀkha ge mî: “ǃKhūb ge ǁîba ra ǂgaiǀîn hoana ǀgūse hâba.” Sida tsîn ge ǁkhā ǂgomǃgâsiba a ūhâ ǁkhā.—Psa. 145:18.

5. ǃKharuge ǁaeb ǃnâ Jehovaba gere ǃoaba khoen di ǀgorede ǁîn gere ǃâubasen ǀgaub ǃnâ ge ǃereamhe? Aiǁgau-e mā re. (Ai-īsiba mû re.)

⁵ Jehovab ge sida ǀgorede ǃâubasen da ra ǀgaub ai ǀnîsi ǃeream tide. ǁNā î ge apostel Paulub ǀkha ge ī. ǁÎb ge Eloba ge ǂgan, îb “tsûsa sorosi ǃgomsiba” ūbe. Paulub ge ǃnona ǃnāde nē ǃgomsiba ge ǀgoreba. Jehovaba ǁîb di ǀgorede ge ǁnâu-am? Îo. Xawe î ge Paulub gere ǃâubasen ǀgaub xa ge ǀkhara i. Jehovaba ge ǃgomsiba ūbes xa ǁîba ǂhâbab hâ ǀgaiba ge mā, îb ǂgomǂgomsase ǃoaba ǀkhara ǁkhā.—2Kor. 12:7-10.

6. Tae-i ǃaroma i ǀnî ǁaega Jehovab sida ǀgorede ǃeream tama hâ khami a mûsen ǁkhā?

⁶ Sida tsîn ge ǀnî ǁaegu ai ǃâubasen tama da hâ ǀgaub ai ǃereamsa a hō ǁkhā. ǂGomǃgâ ǁkhā da ge a Jehovab a ǂansa, tae-i sida ǃaroma a ǃgâisa. ǁÎb tsîn ge ‘sada ra ǂgan tsî ǂâi xūn hoan ǃgâ-ai a dība da ǁkha.’ (Efe. 3:20) ǁNā-amaga î ge sida di ǀgorede, ǃâubasen tama da hâ ǁaeb tsî ǀgaub ai a ǃeream-e ǁkhā.

7. Tae-i ǃaroma i a ǂhâbasa ǀgore da ra ǀgauba ǀnî ǁaegu ai dawasa? Aiǁgau-e mā re.

⁷ Jehovab di ǂâisa da ǃnāsase ra mûǃā khami da ge ǀgoreba da ra xūna nî dawa. Martin Poetzingeri di aiǁgaus xa ǂâi re. ǃGamme toa tsî ǁaeroba ǃkharu hâseb ge ǃgâsaba Nazi ǃkhōsis ǃnâ ge ǂganamǂgāhe. ǂGuroseb ge Jehovaba ge ǂgan îb ǃkhōsisa xu ǃnoraǃnorahe. Îb tarasa sī kōǃâ tsî aoǁnâ sîseni ǀkha ǁkhawa tsoatsoa. Xawe 2 wekhega ǃkharu tsî î ge ge mûsen Jehovab ǃnora kaibi tidesa. ǁNāpaxub ge ge ǀgore tsoatsoa: “Jehova toxoba dī ta nî xū-e ǁgaute re.” Nau ǃgâsan hîna ge ǁîb ǀkha ǃkhōsis ǃnâ hâ în gere ǃkharu ǃnâ xūn xab ge ge ǂâi tsoatsoa. ǂGui gu ge ǁîgu taradi tsî ǀgôan tsîn xa gere ǂâiǂhansen. ǃGâsab Poetzingeri ge ǁnāpaxu ge ǀgore: “Jehova kai gangans ǀasa ǁgaumâis ǃaroma. Hui te re î ta ti ǃgâsana ǂkhâǃnâ tsî ǀgaiǀgai.” ǁÎb ge saora 9 kuriga ǁnāsa ǃkhōsis ǃnâ gere dī.

8. ǀGore da ga o, mâ ǂhâǂhâsa xūna da ǂâis ǃnâ nî ūhâ?

⁸ ǂÂis ǃnâ da ge nî ūhâ, Jehovab ge ǂâibasensa ūhâ ǁîb di ǁaeb aib nî dīǀoaǀoasa. ǁNā ǂâibasens ge hoaragase tsî ǀamosib kōse nēstē tsûba ra ǃaroma xūna ūbesa. Nēn ge tsūkēǃgâgu, ǀaegu tsî ǁōb tsîna ǃkhōǂgā hâ. Jehovab ge ǁîb di Gaosib ǃnâ-ū ǁnā ǂâibasensa nî dīǀoaǀoa. (Dan. 2:44; J.ǂHa. 21:3, 4) Xawe ǁnā ǁaeb nî hās kōseb ge Jehovaba ǁGâuaba mā-am hâ îb ǃhūbaiba ǂgaeǂgui.b (Jhn. 12:31; J.ǂHa. 12:9) Jehovab ga nēsi ǃgomsina ga ǃgâiǃgâi, o î ge ǁGâuab ǂgaeǂguis a ǃgâi khami nî mûsen. Amas as ge Jehovab ǀnî mîmâide nî dīǀoaǀoasa da ǃâu hâsa. Xawe î ge nēsa ǂâibasen tama hâ ǁîb huib ose nî ǁnāxu dasa. Hā re î da ǀnî ǀgauga ǃhoaǃgao, Jehovab ra huida ǀgaub xa.

JEHOVAB SIDA ǀGOREDE NĒTSE RA ǃEREAM ǀGAUGU

9. Jehovaba mati a hui da ǁkhā î da ǃgâi mîǁguiba dī ǁkhā? ǁGuiǃā re.

⁹ ǁÎb ge gā-aisiba ra māda. Jehovab ge ra mîmâi, ǂhâbasa gā-aisibab nî mādasa î da ǃgâi mîǁguiga dī. Elosi gā-aisiba da ge ǂhâhâ, mîǁguiga da ga dī o hîna sida ûiga ǀamosib kōse nî tsâǀkhā ga. Aiǁgause, ǃgamme tamas ka io da ga ǃgamme tamase hâsa ga ǁhûi o. (Jak. 1:5) ǃGamme tama ǃgâsas Maria ti ǀon hâs di aiǁgausa ǃgaoǃgâ re.c ǁÎs ge ǀgui ǃgâsab ǀkhas nî ǀhaos aiǃâ, aimâba-aose gere ǃoaba. ǁÎs ge ra mî: “Sîm ǀhōsagusis gere kai khami î ge tsâsigu tsîna gere kai. Mîǁguiba ta nî dīsa ta ge ge ǂan i. Nēs xa ta ge kaise gāxuse ge ǀgore. Jehovab di daoǁgausa ta ge ge ǂhâhâ i xawe ta ge ge ǂan i, Jehovab nē mîǁguiba dībate tidesa.” ǁÎs ge ra tsâ Jehovab ge ǁîsa gā-aisiba mās di ǀgoresa a ǃereamsa. Mâǀgaub ǃnâ? Sida ǂkhanin ǃnâs ôaǃnâs ra dī khamis ge ǁîsa, khomai ǃâde ge hō hîna ǁnā dîdi di ǃereamdi ǀkha ge huina. ǁÎs ǂgomǂgomsa ǁgûs di ǀapemādi tsînas ge ge ūǃoa. ǁNā ǀapemādi ge Mariasa ge hui, îs ǁîs di tsâsiga ôaǃnâ. ǀAms ais ge gā-ai mîǁguiba ge dī ǁkhā i.

10. Filipeǁîn 4:13 ǃoagu Jehovaba tae-e ǁîb ǃoaba-aona nî dība? Aiǁgausa mā re. (Ai-īsiba mû re.)

¹⁰ ǀGaibab ge ra māda î da mâǀgai. Apostel Paulubab ge dība khamib ge Jehovab sida tsîna ǂhâba da hâ ǀgaiba a māda ǁkhā. Î da ǃgomsîgu ǃnâ mâǀgai. (Khomai re Filipeǁîn 4:13 sa.) Kō re Jehovab ge mati Benjamen ti ǀon hâ ǃgâsaba a hui ǀgausa, îb ǃgomsigu ǃnâ mâǀgai. ǁÎb ǂkhamsisa xub ge Benjameni tsî ǁîb omaris tsîna ǃkhūsabese Afrikab ǃnâ gere hâ. Benjameni ge ra mî: “ǁAeb hoaba ta ge Jehovaba ǃoa gere ǀgore. Tsî ta ge ǁîba gere ǂgan îb ǀgaiba māte, î ta ǁîb mûǁae a ǃgâi xū-e dī ǁkhā. Jehovab ge ti ǀgorede ge ǃeream, ǂkhîba mātes ǃnâ-ū. Tsî ǁkhoaǂgaosib tsîna î ta aiǃgû tsî aoǁnâ ǀgara. Tsîb ge ǀapeǂhomisa xus tsîna ǂkhanina ge māte î ta gagasise ǀgaisase hâ ǁkhā.” Aiǃgû tsîb ge ra ǁguiǃā: “ǂGomǂgomsa ǃoaba-aon ǀkha ge ī xūna khomais tsî matib ge Jehovaba, ǁîna a hui ǀgaub tsîn ge tita ge ǀgaiǀgai î ta ǂgomǂgomsase Jehovaba ǃoa hâ ǀgara.”

11-12. Jehovaba mati gagasi omaris ǃnâ-ū sida ǀgorede a ǃeream ǁkhā? (Ai-īsiba mû re.)

¹¹ Sida gagasi omarisab ge ra sîsenū. ǃGam-eb nî ǃuis aiǃâb ge Jesuba ǀgaisase gere ǀgore. ǁÎb ge Jehovaba gere ǀkhoma în khoena tā ǂâi ǁîbab gere ǃkhāǃkhāsa. Jehovab ge ǁnāsa ge dī tama hâ i xawe ǁîb di ǀhommsi ǃgâsagu di ǀguiba ge sî, îb Jesuba ǀgaiǀgai. (Luk. 22:42, 43) Jehovab tsîn ge sida a hui ǁkhā, ǃgâsana sîs ǃnâ-ū în selfoni ai tamas ka io omdi ai sari da în ǂkhâǃnâda. Hoada ge ǀgauga ôa ǁkhā î da sida ǃgâsana ‘ǃgâi mîs’ ǀkha hui ǁkhā.—ǂKhm. 12:25.

¹² Miriam ti ǀon hâ ǃgâsas di aiǁgaus xa ǂâi re. ǁÎs aob ǀoro wekhega ǃkharu tsî ǁō toa hâs khaoǃgâs ge Miriamsa ǀguri oms ai ge hâ i. ǁÎs ge gā hâse tsî tsûaǂgao hâse gere tsâ. ǁÎs ge kaise gere ā tsîs ge khoe-e ge ǂhâ i ǃhoa-ū ǁkhās a-e. ǁÎs ge ra mî: “Tita ge ǀgaiba ge ūhâ tama hâ i, khoe-e belsa. ǁNā-amaga ta ge Jehovaba ǃoa ge ǀgore. Tsî ā rase ta ra ǀgore hînab ge ti selfona ge ǂau tsoatsoa. ǀNî ǀhaohâb ǃûi-aob ge ge bel, ǁîb ge ge ti ǀgū ǀhōsa-i.” Miriams ge ǁnā ǀhaohâb ǃûi-aob tsî ǁîb taras tsîn xa ge ǁkhaeǂgaohe. ǁÎs ge ǂgomǃgâsiba ūhâ Jehovab ge ǁnā ǃgâsaba a ǂkhâǃnâsa îb ǁîsa bel.

13. Aiǁgausa mā re, matib Jehovaba ǁîba ǃoaba tama khoena a sîsenū ǁkhāsa îb ǁîb khoen di ǀgorede ǃeream.

¹³ ǁÎb ge ǁîba ǃoaba tama hâ khoena a sîsenū ǁkhā. (ǂKhm. 21:1) ǀNî ǁaegu aib ge Jehovaba ǁîba ǃoaba tama hâ khoen ǃnâ-ū ǁîb ǃoaba-aon di ǀgorede ra ǃeream. Îb ǁîna hui ǁkhā. Aiǁgause, ǁîb ge Gao-aob Artaxerxesa ge ǂkhâǃnâ, îb Nehemiaba mā-am Jerusalemsa om oas ǀkha sī hui. (Neh. 2:3-6) Nētsēs tsînab ge Jehovaba ǁîba ǃoaba tama hâ khoena a sîsenū ǁkhā, în ǂhâsib ǃnâ da ga hâ o hui da ǁkhā.

14. Soo Hings di aiǁgausa xu du tae-e ra ǃgôaǃgâ? (Ai-īsiba mû re.)

¹⁴ Soo Hing ti ǀon hâ ǃgâsas ge ra mî, ǁîs ra tsâsa Jehovab ge doktori ǃnâ-ū ǁîsa huisa. ǁÎs ǀgôab ge ǂkhûs di ǀaeba ūhâ. ǁÎb ge ǁkhōǁkhōsa audos tsūkēǃgâb ǃnâ ge hâ i. ǁÎs tsî ǁîs aob tsîn ge ǁîra sîsen-e ge ǁnāxū î ra ǁîba kōǃgâ ǁkhā. ǁNās xa ǃaromahe hâse ra ge marisi ǃgomsirona gere hōǃâ. Soo Hings ge ra mî, ǁîs noxobas a mâǀgai ǁoa khami gere tsâsa. Jehovaba ǃoas ge ge ǀgore, ǁîb ai huiba ra ǂganse. Dokteri ge ge mîǁgui, ǀgaubab nî ôasa îb ǁîs tsî omaris tsîna hui ǁkhā. Nēs ge ge īǁkha kai î ra ǂhanuba xu huiba hō. ǁÎra ge ǃgai hâǃkhais tsîna ge hō. Soo Hings ge ra mî: “Sîm ge Jehovab di ǃomma nē mâsib ǃnâ ge mû. ǁÎb ge amabes ǃnâ ‘ǀgorede ra ǁnâu-am.’”—Psa. 65:2.

JEHOVAB ǃEREAMDE ÔA TSÎ ŪǃOAS ǃAROMA ǂGOMSA DA GE ǂHÂHÂ

15. Tae-e ǀgui ǃgâsasa ge hui îs mûǂan Jehovab ǁîs ǀgorede ra ǃeream ǀgauba?

¹⁵ Sida ǀgoredi ge ǀnî ǁaegu ai ǂoaǂamsa ǀgaugu ǃnâ ǃereamhe tama hâ. Xawe ǃereamdi ge ǂhâ da hâ xūna ǃkhōǂgā hâ, î da sida ǀhomsi ǁGûba ǃoa ǂgomǂgomsase hâ ǁkhā. ǁNā-amaga Jehovab sida ǀgorede ra ǃeream ǀgauba ǃgaoǃgâ re. Yoko ti ǀon hâ ǃgâsas ge Jehovab ǁîs ǀgorede ǃeream tama hâ khami gere tsâ. Xawes ge Jehovabas gere ǂgan xūna ge xoaǁnâ tsoatsoa. ǁAeba ǃkharu tsîs ge xoaǁnâs gere xūna ge kōǃgâ. ǁNāpas ge ge mû Jehovab ge ǁîs ǂgui ǀgorede a ǃereamsa, ǀnîn hînas ge ǀurun tsîna. ǁAeba xu ǁaeb ǀkha da ge mâ tsî Jehovab sida ǀgorede ra ǃeream ǀgaub xa nî ǂâiǃgâ.—Psa. 66:19, 20.

16. Mati da ǂgomsa a ǁgau ǁkhā ǀgores tawa i ga hā o? (Hebreǁîn 11:6)

¹⁶ Jehovaba ǃoa ǀgores ǃnâ-ū ǀgui da ge ǂgomsa ǁgau tama hâ. Xawe ǁîb sida ǀgorede ra ǃeream ǀgaub hoaba ūǃoas ǃnâ-ū. (Khomai re Hebreǁîn 11:6 sa.) Mike tsî ǁîb taras Chrissies di aiǁgausa kō re. ǁÎra ge mîǁguiba ge dī îra Betels tawa ǃoaba. Mike ge ra mî: “Sîm ge ǀguiba ǂgui ǃnāde Betels ǃgao ge xoaǂgāsen. Tsîm ge nēs xa ǂgui ǃnāde Jehovaba ǃoa gere ǀgore. Xawem ge ge ǁkhauhe tama hâ i.” Mike tsî Chrissies tsîn ge ǂgomǃgâsiba ge ūhâ i Jehovab ǂhâbab hâ ǀgaub ǃnâ ǁîra nî sîsenūsa. ǁÎra ge ǂhâsib hâba aimâba-aose gere ǃoaba tsî om sîsengu ǃnâs tsîna gere ǁhao. Nētsē ra ge ǃnarimâra sîsenni ǃnâ hâ. “Jehovab ge hoaǁae sîm di ǀgorede ǃâubasen tamam ge hâ i ǀgaub ǃnâ ge ǃeream tama hâ i” tib ge Mike ra mî. “Xaweb ge sîm ǀgorede gere ǃeream, sîm gere ǃâubasen ǀgauba xu ǂoaǂamsa ǀgauba ǃnâ.”

17-18. Psalmdi 86:6, 7 ǃoagu da mâ ǂgomǃgâsiba a ūhâ ǁkhā?

¹⁷ Khomai re Psalmdi 86:6, 7 sa. Davib ge ǂgomǃgâsiba ge ūhâ i Jehovab ge ǁîb ǀgorede ǁnâu tsî gere ǃereamsa. Sadu tsîn ge ǁkhā ǂgomǃgâsiba a ūhâ ǁkhā. Nē ǁkhāǁkhāǃâs ǃnâ go ǃhoaǃgaohe aiǁgaudi ge ra ǁgau da, Jehovab gā-aisiba a māda ǁkhāsa. Tsî ǀgaib tsîna î da mâǀgai ǁkhā. ǁÎb ge sida gagasi omaris tamas ka io ǁnān hîna ǁîba ǃoaba tama hâna a sîsenū ǁkhā, în ǀnî ǀgaugu ǃnâ hui da.

¹⁸ Jehovab ga sida ǀgorede ǃâubasen da ra ǀgaub ǃnâ ǃeream tama i. Xawe da ge a ǂan ǁîb ǁîde ra ǃereamsa. ǁÎb ge ǂhâ da hâ xū-e, ǂhâ da hâ ǁaeb ai nî māda. ǁNā-amaga aiǃgû tsî ǂgomǃgâsiba ūhâse ǀgore re, Jehovab nēsis tsî hānîǁaeb ǃnâs tsîna ‘ûitsaman hoana ǂhâban hân ǀkha nî ǁâǁâsa.’—Psa. 145:16.