ǀHaohâb ǃûi-aogu ǀnammi tsî ǀkhomxaǂgaosib tsîna ǃhobasen rana ra ǁgau ǀgaub

1. Tae-e a īǁkhā khoe-i tsū ǁoreba dī hâs khaoǃgâ?

ǃKHARUGO ǁkhāǁkhāǃâs ǃnâ da ge go mû matib ge apostel Pauluba, Korintes ǃnâ ge tsū ǁoreba dī khoeba hui ǀgausa. Tsū ǁoreba ge dī khoeb ge ge ǃhobasen tama hâ i tsî ǀhaohâba xu nî ūǂûihe ge īs ge. Xawe sida dana xoas ra ǁgau khami, ǀnîn hîna ge tsū ǁoreba a dīn ge ǃhobasensa ǃoa a ǂgaeǂguihe ǁkhā. (Rom. 2:4) Mati gu ǀhaohâb ǃûi-aoga hui nî ǁkhā în ǃhobasen?

2-3. Tae-e da nî dī ǃgâsa-i tsū ǁoreba dī hâsa da ga ǁnâu o tsî tae-i ǃaroma?

² ǀHaohâb ǃûi-aogu ga ǀū o khoe-i tsū ǁoreba dī hâsa, o gu ge ǁî-e a hui ǁoa. Tae-e da nî dī ǂan da ga o khoe-i ǀhaohâba xu a uǂnui nî ǁkhā tsū ǁore-e dī hâsa da ga ǂan o? Tsū ǁore-e dī hâ khoe-e da ge nî ǂkhâǃnâ î-i ǀhaohâb ǃûi-aoga ǃoa ī, huib ǃaroma.—Jes. 1:18; ǃNǃkh. 20:28; 1Pet. 5:2.

³ Tsū ǁoreba dī hâ khoe-i ga ǀhaohâb ǃûi-aogu ǀkha ǃhoa ǂgao tama i, o da tae-e nî dī? Aitsama da ge ǀhaohâb ǃûi-aoga ǃoa nî ī, î-i nē khoe-e ǂhâbasa huiba hō ǁkhā. ǁNāsa da ga dī, o da ge ra ǁgau sida ǃgâsa-e da a ǀnamsa. Tsî da ge a ǂan ǀhaohâb ǃûi-aogu ǁî-e hui ǁkhāsa. Nē khoe î ga ǀkharaǀkhara-e dī tama ī, o i ge Jehovab ǀkha i ūhâ ǀhōsagusisa ǂoaǃnâ ǁkhā. Tsî î ge Jehovab ǀapeǂhumis ǀonsa ǁgaiǁgai ǁkhā. ǃGom î ga xawe da ge ǀhaohâb ǃûi-aoga ǃoa nî ī, Jehovab tsî sida ǃgâsa-e da a ǀnam amaga.—Psa. 27:14.

TSŪ ǁORENA DĪ HÂNA GU ǀHAOHÂB ǃÛI-AOGA RA HUI ǀGAUB

4. ǀHaohâb ǃûi-aoga tae-e ra sīǃnâ ǂgao ǀgaisa ǁore dī hâ khoe-i ǀkha gu ga ǀhao o?

⁴ Khoe-i ga ǀhaohâb ǃnâ ǀgaisa ǁore-e dī o gu ge ǀhaohâb ǃûi-aoga ǁîgu ǁaegu ǃnona ǃgâsaga ra ǁhûi komitesa ra kuruǂûi ga.a Î gu ǁnā khoe-i ǀkha ǀhao nē khoegu ge nî ǃgamǃgamsen xa. Khoe-e gu ǃhobasens ǀkha ra hui ǂgaosa gu a ǂan xawe gu ge khoe-e ǁgari tama î-i ǀkharaǀkhara-e dī. (Deu. 30:19) ǀHaohâb ǃûi-aogu ge a ǂan tsū ǁore-e ge dī khoen hoan Gao-aob Davidi khami ǃhobasen tidesa. (2Sam. 12:13) ǀNîn hîna ra tsūdīn ge Jehovab di ǁnamasa ūǃoa tama. (Gen. 4:​6-8) Xawe ǀhaohâb ǃûi-aogu ra sīǃnâ ǂgao i ge khoe-e huisa î-i ǃhobasen. Tae-e ǁîga ra daoǁgau tsū ǁore-e dī hâ khoe-i ǀkha gu ga ǀhao o?

5. ǀHaohâb ǃûi-aoga mâ ǂâiǀgauba nî ūhâ tsūdī-ao i ǀkha gu ga ǀhao o? (2 Timoteub 2:​24-26) (Ai-īsiba mû re.)

⁵ ǀHaohâb ǃûi-aogu ge tsūdī hâ khoe-e ǀō-aisa kā hâ gū-i ase ra mû. (Luk. 15:​4, 6) ǀHaohâb ǃûi-aogu ga nē khoe-i ǀkha ǀhao, o gu ge ǃgâi ǀgaub ǃnâ ǃhoa, hâ-ū nî tsî ǂâi tama dîn ǀguina dî tsî gu ǃereamde nî hōsa. Xawe gu ge 2 Timoteub 2:​24-26 ǃnâ hâ xoas di ǀgauga nî ǁgauǂui. (Khomai re.) ǀHaohâb ǃûi-aogu ge tsamtsiǃnâ, tsaura tsî ǃgâi ǀgauba nî ūhâ nē khoe-i di ǂâiǀgauba gu ra ǀkharaǀkhara ǂgao amaga.

6. ǀHaohâb ǃûi-aoga mati ǁîgu ǂgaoga aiǂhomî ǁkhā ǁore-ao i ǀkha gu nî ǀhaos aiǃâ? (Romeǁîn 2:4)

⁶ ǀHaohâb ǃûi-aogu ge ǁîgu di ǂgaoga ra aiǂhommi. ǁÎgu ge ra dītsâ Jehovaba ǁgaesa ǁore-ao-e gu ra hâ-ū ǀgaub ǃnâ. Paulub di mîde ǂâis ǃnâ ūhâse “Elob ge ǁîb di ǃgâisib ǃnâ ǃhobasens ǃoa satsa ǂgaeǂguisa ra ǂâibasen.” (Khomai re Romeǁîn 2:4 sa.) ǀHaohâb ǃûi-aogu ge a gū ǃûi-ao tsî gu ge Xrîstub di daoǁgausa nî sao tsî ǁîba nî ǁgae ǀhaohâba gu ra hâ-ū ǀgaub ǃnâ. (Jes. 11:​3, 4; Mat. 18:​18-20) ǀHaohâb ǃûi-aogu khoe-i ǀkha nî ǀhaos aiǃâ gu ge Jehovaba ǃoa ra ǀgore i gu nē khoe-e hui ǁkhā ǃhobasensa. ǁÎgu ge xoadi tsî ǀapeǂhomis ǂkhanin tsîna ra ôaǃnâ tsî Jehovaba ǃoa ra ǀgore îb hui gu mati gu nē khoe-e nî ǁnâuǃāsa. ǁÎgu ge nî kō tae-e gu nē khoe-i xa nî ǂansa hîna go ǀnîsi ǁî-i go ǂâi tsî dī xū-e dīsa go ǃaromahe.—ǂKhm. 20:5.

7-8. Mati gu ǀhaohâb ǃûi-aoga Jehovab di ǃnūǃnâxasiba a ǁgae ǁkhā tsū ǁore-e dī hâ khoe-i ǀkha gu ga ǀhao o?

⁷ ǀHaohâb ǃûi-aogu ge Jehovab di ǃnūǃnâxasiba ra ǁgae. Tsî gu ge ǂâis ǃnâ ra ūhâ Jehovab mati ǃkharuge ǁaeb ǃnâ ǀgaisa ǁoreba dī hâ khoena a hâ-ū ǀgausa. Aiǁgause, Jehovab ge Kainni ǀkha ge ǃnūǃnâxa i tsî ǁîba ge mîba tae-i ǁîb ǀkha nî īsa ǀkharaǀkharasen tamab ga io. Xaweb nî ǀkhaehesa ǁnâuǀnammi ga ra o. (Gen. 4:​6, 7) Jehovab ge kēbo-aob Natanna ge sî îb Davida ǁnama, Natanni ge aiǁgausa ge sîsenū Davida ge huisa îb ǃhobasen. (2Sam. 12:​1-7) Tsî Jehovab ge “ǃnākorobe” ǁîb kēbo-aoga Israelǁaes ge ǁîba ǁnâuǀnamoǃnâ “tsēsa xu nētsēs kōse” gere sî. (Jer. 7:​24, 25) ǁÎb ge ge ǃâu tama hâ i în khoena aibe ǃhobasen xaweb ge ǁîn noxopa ra ǁore hîna gere ǀkhomanî în ǃhobasen.

⁸ ǀHaohâb ǃûi-aogu ge Jehovab aiǁgausa ra sao-ai ǀgaisa ǁorena ge dīna gu ra hui ǂgao amaga. ǁÎgu ge 2 Timoteub 4:2 ra mî khami ǃnūǃnâxasib ǀkha khoe-e ra hâ-ū. ǁNā-amaga gu ge ǀhaohâb ǃûi-aoga ǃnomsa tsî nî ǃnūǃnâxa nē ǁore-ao-e gu ra hui ǂgao amaga î-i ǂhanu xū-e dī. ǀHaohâb ǃûi-aogu ga ǁaixa tamas ka io ǀara, o i ge khoe-e ǁîgu ǀapemāsa ǃgâ tama i tsî ǃhobasen tide.

9-10. ǀHaohâb ǃûi-aoga mati ǁore-ao-e a hui ǁkhā î-i ǁî-i go dī xū-e mûǃâ?

⁹ ǀHaohâb ǃûi-aogu ge ra ǂanǂûi ǂgao tae-i ge ǃaromasa î-i nē khoe-e tsū ǁore-e dī. Aiǁgause tae-e Jehovab ǀkha i ūhâ ǀhosagusisa ge ǂkhabuǂkhabu? Elobmîsa i go ôaǃnâ ǀû tamas ka io aoǁnâ sîsenni ǃnâ ǂoa ǀû? ǁÎ-e Jehovab kōse hoaǁae ge ǀgore ǀû? ǁÎ-e ge mā-am î-i ǃgâi tama turaga ǂgaeǂgui nî? Ham-i ǀkha i ra hâǀhao tsî mati i ǁkhoaxa ǁaeba ra ǁhûi? Mati i nē mîǁguiga ǁî-i ǂâiǀgaub tsî turaga ge tsâǀkhā? ǁNâuǃā i ra ǁî-i ǁGûb Jehovab mati ǁî-i go dī xū-i xa ra tsâǀkhāhesa?

¹⁰ ǀHaohâb ǃûi-aogu ge ǃgâi ǀgaub ǃnâ dîna nî dî xawe gu ge tā ǂhâbasa tama dîna nî dî. Nē ǀgaub ǃnâ gu ge ǀhaohâb ǃûi-aoga ǁî-e ra hui, î-i Jehovab ǀkha i ūhâ ǀhōsagusisa ge ǂkhabuǂkhabu kai tsî ǁore kai nî go xū-i xa ǂâi. (ǂKhm. 20:5) ǁNās xōǀkhā gu ge aiǁgaude a sîsenū ǁkhā i gu ǁore-ao-e hui ǁî-i ǁoreba mûǃāsa, Natanni ge Davida hui ǀgaub khami. ǀNîsi i ge khoe-e ǂguro ǀhaos ǃnâ ǁî-i go dī xū-i xa ǁgaise nî tsâ tsî i ge ǀnîsi ǃhobasens tsîna a hî ǁkhā.

11. Jesuba ǁore-aona mati gere hâ-ū?

¹¹ ǀHaohâb ǃûi-aogu ge Jesuba ra ǁgae. Jesub ge Pauluba ge hui sao ra gā-ai dîsa dîbis ǃnâ-ū: “Saulutse, Saulutse tae-i ǃaromats ta ǃgôaǃgon te?” Nē dîs ǀkhab ge Jesuba Sauluba ge hui îb mûǂan ǁîb ra dī xū-i tsūsa. (ǃNǃkh. 9:​3-6) Tsî tarekhoes Isabels xab ge Jesuba ge mî, “tita ge ǁîsa ǃhobasens nî ǁaeba ge mā hâ i.”—J.ǂHa. 2:​20, 21.

12-13. Mati gu ǀhaohâb ǃûi-aoga tsūdī hâ khoe-e ǁaeba a mā ǁkhā î-i ǃhobasen? (Ai-īsiba mû re.)

¹² ǀHaohâb ǃûi-aogu ge Jesuba nî ǁgae tsî tā nî mîǁgui ǁoreba go dī khoe-i ǃhobasen tidesa. ǀNîn ge ǂguro ǀhaos ǃnâ a ǃhobasen ǁkhā. Xawen ge nauna ǁaeroba ǂhâhâ. ǁNā-amaga gu ge ǀhaohâb ǃûi-aoga a mîǁgui ǁkhā i gu ǁore-ao i ǀkha ǀguis xa ǃnāsa ǃnāde ǀhao. ǀNîsi i ge ǂguro ǀhaos khaoǃgâ Xristeǁî-e tsūdī i go xū-i xa ǀgaisase a ǂâi tsoatsoa ǁkhā. Tsî i ge ǃgamǃgamsenxasiba ǁgau. Tsî Jehovaba a ǂgan ǁkhā î-i ǁîb ǁoreb ǃaroma ǀûba bi. (Psa. 32:5; 38:18) ǁNās ǀkha i ge ǁore-ao-e ǀkhara ǂâiǀgauba a ūhâ ǁkhā, ǂguro ǀhaos tawa i go ūhâ îb xa.

¹³ ǁOre-ao-e ǃhobasensa ǃoa huis ǃaroma gu ge ǀhaohâb ǃûi-aoga ǁore-ao-e ǀkhom tsî ǃgâise nî hâ-ū. ǁÎgu ge ra ǀgore îb Jehovaba ǁîgu ǁgūtsâde ǀkhae tsî nē Xristeǁî-e hui î-i ǃhobasen.—2Tim. 2:​25, 26.

14. Ham-e koasa anu hâ khoe-i ga ǃhobasen o tsî tae-i ǃaroma da ti ra mî?

¹⁴ ǁOre-ao i ga ǃhobasen, o da ge kaise a ǂkhî. (Luk. 15:​7, 10) Ham-e koasa anu hâ? ǂÂi-oa re Paulub ge ǁore-aon xa tae-e mîsa: “Elob ǁnāti ī mâǃoa-ao-i di ǂgaoba amab ǃnâ dabaǃkhuni ǁkhā xui-ao.” (2Tim. 2:25) Nē khoe-i ga ǁî-i ǂūb tsî ǂâiǀgauba dawa, o i ge koasa khoe-i xare-e ǃoa ī tama xawe Jehovaba ǃoa ra ī hîna ǁnā Xristeǁî-e ra huiba î-i ǁnā ǀkharaǀkharana dī. Paulub ge ra ǁguiǃā ǃgâi xūn hîna ra īna khoe-i ga ǃhobasen toa ǁaeb ai. ǁNā khoe-i ge ǃnāsa ǀgaub ǃnā amaba ra ǂan tsî ǁî-i ǁnâuǃāba ra hō-oa tsî ǁGâuab di ǃnuide xu ra ǂgōsen.—2Tim. 2:26.

15. ǀHaohâb ǃûi-aoga mati ǃhobasen hâ khoe-e aiǃgû tsî a hui ǁkhā?

¹⁵ Khoe-i ga ǃhobasen o gu ge ǀhaohâb ǃûi-aoga sari nî tsî nî hui nî î-i, ǁî-i ǂgomsa ǀgaiǀgai tsî ǁGâuab di ǃâitsâna xu ǂgōsen tsî ǂhanu xū-e dī. (Heb. 12:​12, 13) Ama as ge ǀhaohâb ǃûi-aogu ge khoe-i go ūǂûibahe ǃaromasa naun ǀkha ǀgoragu tide. Xawe ǀhaohâba tae-i xa nî ǂanǂanhe?

“HOARAGA XRISTESI ǀHÛHÂSIB AIǃÂ ǁÎ-I ǁOREBA ǂHAIǂHAI”

16. ‘Hoa ǀhaohâb’ xab Pauluba 1 Timoteub 5:20 ǃnâ ra ǃhoa, ob ham-e ǃoa ra ǁnaeǁgau?

¹⁶ Khomai re 1 Timoteub 5:20 sa. Paulub ge ǁnā mîde ǁîb ǀkha gere ǃoaba ǀhaohâb ǃûi-aob Timoteuba ge mîba. ǁNān hîna ra ‘ǁoren’ ǃaromab nî dī xū-i xa. Tae-eb ge ǂâibasen? ǁÎb ge ‘hoa ǀhaohâb’ xa ge ǂâibasen tama hâ i xawe ǁnān hîna ǀnai ǁoreba a ǂanan xa gere ǃhao. Nēn ge mûn ge tamas ka io ǁore-ao i xan ge mîbahena ǃkhōǂgā hâ. ǀHaohâb ǃûi-aogu ge ǁîna nî mîba nē ǁhōb go sîsenǂamhesa tsî i ǁore-ao-e a huihesa.

17. ǀNîn ga ǀnîsi tsū ǁore i xa ǂan tamas ka io hānîǁaeb ǃnâ ǁnâu, o i tae-e nî dīhe tsî tae-i ǃaroma?

¹⁷ ǀNî ǁaegu ain ge ǀnîna ǀnai a ǂan khoe-i ǀgaisa ǁoreba dī hâsa tamas ka io nî ǁnâu. ǁNāti ī mâsib ǃnâs ge nēsa ‘hoa ǀhaohâba’ ǃkhōǂgā hâ. ǁNā-amaga i ge ǀhaohâb ǃûi-ao-e nî ǂanǂan ǃgâsa i go ǁgau-oahesa. Tae-i ǃaroma? Î-i nēsa “hoana ǃkhâikhoms ase ība” în tā ǁore.

18. ǂKham ǀgôa-i 18 kurigu xa a ǂkham-i ga ǀgaisa ǁore-e dī, o gu ǀhaohâb ǃûi-aoga tae-e nî dī? (Ai-īsiba mû re.)

¹⁸ ǀHaohâb ǃûi-aoga tae-e nî dī 18 kurigu xa ǂkham ǀgôa-i ga ǀhaohâb ǃnâ ǀgaisa ǁoreba dī o? ǀGam ǀhaohâb ǃûi-aokha ge ǁnā ǀgôa-i di Xristeǁî ǁgûn ǀkha nî ǀhao.b ǀHaohâb ǃûi-aogu ge nî ǂanǂûi ǂgao ǁgûn ǀnai tae-e dī hâsa ǁîn di ǀgôa-e ǃhobasensa ǃoa huis ǃaroma. ǀGôa-i ga ǁgau o ǁî-i ǁgûna i ra ǃgâ tsî ǂâiǀgauba ǀkharaǀkhara, o gu ge ǀhaohâb ǃûi-aoga mîǁgui ǁkhā ǁhōba ǁnāba ǀgui ǁnāxusa. ǀHaohâb ǃûi-aogu ge a ǂan Jehovab ǁgûna ǃereamsa māhâsa în ǁîn ǀgôana ǀnamxaǃnâ ǀgaub ǃnâ hui. (Deu. 6:​6, 7; ǂKhm. 6:20; 22:6; Efe. 6:​2-4) ǁNāpaxu gu ge ǀhaohâb ǃûi-aoga ǁaeba xu ǁaeb ǀkha ǁgûn ǀkha nî kō ǀgôa-i ǂhâbasa huiba ra hōsa. ǀHaohâb ǃûi-aoga tae-e nî dī ǁāǁnâsa ǂkham ǀgôa-i ga ǀkharaǀkharana dī ǂgao tama io? ǁNāti i ga ī, o gu ge ǃnona ǀhaohâb ǃûi-aogu tsî ǁnā ǀgôa-i Xristeǁî ǁgûn tamas ka io ǁî-e ra kōǃgâ khoe-i tsîna nî ǀhao.

JEHOVAB GE “TSÂBAǁHAOS TSÎ ǀKHOMXASIB XA ǀOA H”

19. ǀHaohâb ǃûi-aoga mati Jehovaba ra ǁgae tsūdī-ao-i ǀkha gu ga ǀhao o?

¹⁹ Jehovab ge ra ǂhâba i gu nē komites ai ra ǃoaba ǃgâsaga ǀhaohâba ǃanuse ūhâ. (1Kor. 5:7) Xawe gu ge ra dītsâ nē khoe-e ǃhobasens kōse sī-ūsa. ǁNā khoe-e gu ra hui khami gu ge ra ǃâubasen ǀkharaǀkharana i nî dīsa. Tae-i ǃaroma? ǁÎgu ge Jehovaba ra ǁgae ǂgao, “tsâbaǁhaos tsî ǀkhomxasib xa ǀoa” hâba. (Jak. 5:11) ǃGaoǃgâ re matib ge Apostel Johaneba ǁîb di ǃgâsana ǀnamxaǃnâse a hā-ū ǀgausa. “Ti ǂkhari ǀgôarodo, nēna ta ge sado ra xoaba, ǁore du tidese; tsî i ga khoe-e ǁore, o da ge khoeb hîa ǁGûb tawa ra ǂnoaba daba ūhâ; ǁîb ge Jesub Xristub, ǂhanu-aiba.”—1Jhn. 2:1.

20. Tae-e da ǀuniga ǁkhāǁkhāǃâs ǃnâ nî ǃhoaǃgao?

²⁰ Tsûtsûsase i ge Xristeǁî-e ǀnî ǁaegu ai ǃhobasensa ǂgao tama hâ. ǁNāti i ga ī, o i ge ǀhaohâba xū nî ūǂûihe. ǀHaohâb ǃûi-aoga tae-e ra dī nēs ga io? Nēsa da ge ǀuniga ǁkhāǁkhāǃâs ǃnâ nî ǃhoaǃgao.