1924​—⁠ǀGuikaidisi kurigu ǃkharu hâse

ǂHÔAǂGARES ǃNÂ-ŪN GE GERE AOǁNÂ

Betels ǃnâ ge hâ i ǃgâsagu ge kurib xa ǃnāsa ǁaeba ǃgarise ge sîsen WBBR radio stasisa Staten Islandi, Amerikab ǃnâ omsa. ǂGuro gu ge haide ǁaraǁnâ tsî kai omsa sîsen-aona ge omba tsî ǀnîhâ oms tsîna ge om sîsen-ūhe ra xūn ǃaroma. Nē sîsenan ge toa o gu ge ǃgâsaga “ǂhôaǂgare stasis ai ra sîsen-ūhe xūna ge ǀhaoǀhao tsoatsoa.” ǀNî ǃgomsiron ge noxopa ge hâ i.

Kaise i ge ge ǃgom i nē stasis ǃaroma antenaba mâisa. Nē antenab ge 91 meterga gaxu tsî ǀgam ǃnaokha 61 meterga gaxukha ǁaegu ga mâihe hâ. ǂGuro ǃnās ai gu ge ge dīhō tama hâ i. Jehovab huib ǃnâ ǂgomǃgâ tsî gu ge ǁnāsa ge dīho. Calvin Prosseri ǁnāpa gere sîsenni ge ra mî: “Nē antenaba ge ga ǂguro ǃnāsa ǃamkuse mâihō hâ, o ge ge aitsama ga koasen hâ.” Nē ǃgâsagu ge koasa Jehovaba ge mā xawe gu ge ǀnîhâ ǃgomsina ge hōǃâ.

ǂHôaǂgare stasis oms ge ge ǀasa i tsî i ge ge supu tama hâ i ǂhâ gu ge hâ i xūna ǁamasa. Nē ǃgâsagu ge khoe-i ge kuru xū-e ǀgūse ge hō, ǁîgu a sîsenū ǁkhā-e. Mikrofona ǁamas xa gu ge ǀnai hâ telefona xu gere sîsen-ū. ǀGui ǃoe gu ge Februarib ǃnâ ǃgâsaga ge mîǁgui î gu ūgu hâ xūn hoana ǃâitsâ. ǂHôaǂui gu nî program-e gu ge ge ǂhâ hâ i, o gu ge ǃgâsaga Gaosib amde ge ǁnae. ǀGui ǃgâsab Ernest Lowe ti ǀon hâb ge ǁnātsē ge ī xū-e ra ǁguiǃā. ǁNae gu ra hîna gu ge ǀgoraǃgâ-aob Rutherfordib xa ge bel-e, hîna ge ǁnâuba ǁnae gu rasa ǁîb radiosi Brooklyns ǃnâ, 25 kilometerga ǁîga xu.

“ǁNā ǂkhupipa ǀû” tib ge ǃgâsab Rutherforda ge mî. “ǂGui ǀhôan khami go ge ra ǀō.” Nē ǃgâsagu ge kaise tao tsî ǃhaese programa ge ǀari, xawe gu ge nēsisa ge ǂan i radios ra sîsensa tsî gu ǁîgu programgu ǀkha a tsoatsoa ǁkhāsa.

ǃGâsab Rutherfordi ge ge mî nē ǂhôaǂgares ge nî sîsen-ūhe “î-i Jesu Xristub ge mā sîsen-e dīhe.” ǁÎb ge ge mî nē ǂhôaǂgares ge “khoenas nî hui ga ge tsoatsoahe în Elobmîsa ǁnâuǃā, nē da ûiǃnâ hâ ǂhâǂhâsa ǁaeb ǃnâ.”

ǁNā ǂhôaǂuis ge ǃgâise ge ǀam. Nē ǂhôaǂgares ge 33 kuriga ge sîsen-ūhe îs Jehovab ǀapeǂhumis ǀapeǁguiba ǂhôaǂui.

ǁKHOAǂGAOSE ǂGOMDI ǂGAEǂGUI-AOGU ǃOAGU GERE ǃHOA

Julib 1924 i ge Elobmîs ǁkhāǁkhāsen aona ǀkharib kai ǀhaos ǃaroma Kolumbus, Ohios ǃnâ ge ǀhao. Elobmîs ǁkhāǁkhāsen aon ge ǃhūbaib ǂhawaseba xu gere hā tsîn ge ǃhoade saora gowagu ǃnâ gere ǁnâu: Arabiki, ǀawaǃaogowab, Fransi, Duits, Grikegowab, Hungarianni, Italianni, Lithuaniani, Polishi, Russianni, Skandinaviab gowagu tsî Ukrainianni. Khoen ge ǀnî ǃhoade ǂhôaǂgares ǃnâ ge ǃgâ ǁkhā i tsî gu ge ǃgâsaga Ohio State Journal ǂkhaniba ge ǂgan î gu ǀkharib kai ǀhaos xa tsēs hoasa xoa.

Donertax, 24 Juli i ge 5 000 xa ǃnāsa ǃgâsana ǁnā ǃās ǃnâ ge aoǁnâ. ǁAubexan ge 30 000 ǂkhanide ge māǂui tsî ǂgui Elobmîs ǁkhāǁkhāde ge tsoatsoa. Nēs ge ge “ǁkhoaxa tsē i ǀkharib kai ǀhaos” disa.

Fraitax, 25 Julib ge ǃGâsab Rutherforda ǀgui ǃhoas ǃnâ ǁkhoaǂgaose ǂgomdi ǂgaeǂgui-aogu ra dī xūn xa ge ǃhoa. ǁÎb ge ge mî: “ǂGīǂgōsi ǂgaeǂgui-aogu, ǂgomdi ǂgaeǂgui-aogu tsî ǁamaxu-aogu tsîn ge khoena Elob Gaosib xa ǁkhāǁkhāsensa xu ra ǁkhae.” ǁÎb ge ge mî, “ǁnā khoegu ge ǂhanu tama hâ isa, ǁîgu ge League of Nationsa gere ǂkhâǃnâ amaga. Tsî gere mîsa Elob di ǀgaub ǂgaeǂguis dib ǂhanu tama hâ ti.” Elobmîs ǁkhāǁkhā-aon ge ǁkhoaǂgaosiba ge ǂhâhâ i nē haisi-amsa aoǁnâsa.

Ega i ge ǃKhē xuǂgō-omma ge mî: “Nē ǀkharib kai ǀhaos Kolumbus ǃnâ ge hâ is ge ǃgâsan di ǂgomsa a ǂkhâǃnâsa . . . ǁÎna i ge ǁkhoaǂgaosiba ge mâ în aoǁnâ ǁgâiǀahen ga xawe.” Leo Clausi ǁnā ǀkharib kai ǀhaosa ge hâ ǃnâb ge ra mî: “ǁNās khaoǃgâ da ge gere mûǂui, nē haisi-amsa sida ǂkharis ǃnâ aoǁnâsa.”

Oktoberi ǃnân ge Elobmîs ǁkhāǁkhāsen aona ǂkhaniroba ge māǂui tsoatsoa, ǃgâsab Rutherfordi haisi-amsa ge ǃkhōǂgā hâ îba. Frank Johnsonni ǂkhariǃās Oklahomas, Amerikab ǃnâ ra hâb ge nē ǂkhanina 20 haigu ǃnâ ge ǀgoraǂui toa. Mûheb ra ǃkhaisi mâ tsî ǃâus ge ge ǃnorasa tama hâ i. Nē haisi-ams xa gere ǁaiǁaihe khoegu xab gere ôahe amaga. ǃGâsab Johnsoni ge ge mîǁgui îb ǀgūse mâ kerkheb ǃnâ sâusen. Khoe-i kerkheb ǃnâ ǀkhai ǃkhaisab ge mû ob ge ǂkhaniroga pastori Elobmîs ǃnâ ǂgā tsî mâ ǂnû ǃkhais hoas ai ge ǁgui. Nēn hoanab ge ǃkhaese ge dī. ǁAeb ge ǃgau hâ i amagab ge noxopa ǀgam kerkhekha ge sari tsî ǁkhā xū-e ge dī.

Franki ge ǃgâsagu xab nî ǀhao-ūhe ǃkhaisa ǃoa ge oa. Petrol stasis ǃgâbǀkhāb aib ge ge sâusen, ǁîba ra ôa khoegu xab tā nî mûhe ga. Nē khoeb ge mûbi tamase ge ǃnariǃkharu. ǁÎgu ge ǃkharus khaoǃgân ge ǀnî hâba gere aoǁnâ ǃgâsana hā ge ǃaobi.

ǀGui ǃgâsab ge ra mî: “ǃĀsa xub ra ǂoa khamib ge ǁnā ǃnona kerkhega ge ǃnariǃkharu. Mâ kerkheb hoab ǃauga i ge ǁaubexa 50 khoena ge mâ i. ǀNîn ge nē ǂkhaniroba ge ǃkhō hâ i tsîn ge ǀnîna ǁîn pastora gere ǁgau. ǁAeb aiǃâ da ge ǁnā ǃāsa xu ge ǂoa ǃgomsin nî tsoatsoas aiǃâ. Jehovaba da ge ra gangan hui dab ge ǃkhais ǃaroma, î da nē haisi-amsa ǃkhōhe tamase ǀgoraǂui.”

ǁKHOASE NAU ǃHŪGU ǃNÂ AOǁNÂS

Nau ǃhūgu ǃnân ge Elobmîs ǁkhāǁkhāsen-aon tsîna ǁkhoase gere aoǁnâ. Fransǃhūb noordes ǃnâb ge Josef Kreta, Polanda xu gere hā ǃhūsaben mains ǃnâ gere sîsena gere aoǁnâba. ǁÎb ge ǃhoasa ga mā hâ “Resurrection of the Dead Soon” ti hâsa. ǃGâsan ge ǁkhauǂuide ǁnā ǃās khoena mā, ob ge pastora khoena ge ǃkhâikhom în tā sī hâǃnâ. ǁÎb ǃkhâikhoms ge hui tama ge hâ i. ǁNāpa i ge 5 000 xa ǃnāsa khoena nē ǃhoasa ge hâǃnâ, pastori tsîna ǃkhōǂgā hâse. ǃGâsab Kreti ge pastora ge ǁkhau îb ǁîb ǂgomsa ǁkhauba xaweb ge ge ǂhā. ǃHoas khaoǃgâb ge ǃgâsab Kretta ūb ge hâ i ǂkhanin hoana khoena ge mâ, Elobmîsan ge amabes ǃnâ gere ǂan ǂgao amaga.—Amo. 8:11.

Claude Brownni ge Ghanaba ǃoa ge ī îb ǂgâiǂhôasa sī aoǁnâ. ǂGui khoen ge amaba ge ǁnâu ǁîb ge ǂgui ǃhoade mâ tsî ǂkhanina ǂgui khoen tawa ǁnāxu amaga. John Blanksonni ge aptekersisa (soǀôan ǂansa) gere ǁkhāǁklhāsen tsî ǃgâsab Brownni ǃhoadi ǀguisa ge hâǃnâ. ǃHaeseb ge ge mûǂân amabab ge hō ǃkhaisa. “Amab ge kaise gere ǂkhî kaite tsî ta ge ǁkhāǁkhāsen ta gere skoli tawa ǂgui khoen ǀkha gere ǃhoa” tib ge ra mî.

Johnni ge ge ǁkhāǁkhāsen Elobmîs ǃnonaǀguirasib xa xū-e ǁkhāǁkhā tamasa. ǀGuitsēb ge kerkheba ge sari tsî pastora nēs xa ge dî. Pastori ge ǁaixa tsî ge ǃaubi: “Sats ge Xristeǁî tamatsa, sats ge ǁgâuab ti, ī nēpa xu.”

Johnni ge omsib ge oasi, o sîǂkhanisa pastora ǃoa ge xoa tsî ǁîba ge ǁkhau i-kha khoen âiǃâ ǃnonaǀguirasib xa ǃhoa. Pastori ge Johnna ge mîba îb ǁîn di skoli danab di bērosaǃoa ī tsîb ge ge dîhe amabes ǃnâb ge nē sîǂkhanisa pastora ǃoa a xoasa.

“Îo, tita ge ge xoa” tib ge Johna ge ǃeream.

ǁGauǃnâ-aob ge Johnna ge ǂgaoǀkhā îb ǀûbaba ra ǂgan sîǂkhanisa pastora ǃoa xoa. Tsîb ge Johnna ge xoa:

“ǃGôahesatse ti ǁgauǃnâ-aob ge go ǂgante î ta xoa tsî ǀûbaba ǂgan tsî ta ge aiǂhomisa xoa tsî ǀûbaba ǂgansa, ǂhumi ǁkhāǁkhātets ra ǁkhāǁkhā tits ga ǂanǃgâ o.”

ǁGauǃnâ-aob ge buru tsî ge dî te, “Blankson ǁnāti-i xū-ets ta xoa ǂgao?”

“Îo, ǃgôahesatse ǁnās ǀguisa ta ge ǂhauǃnâse a xoa ǁkhā.”

“Skola xuts ge nî ǃkhaehe.” Nē skoli ǃnâts ge a hâ ǀgara ǁoa aiǃgû tsîts ga nēti ī xū-e ǂhanub di ǂkhâǃnâsa ra hō ǂgomsa ǃoa mî o.

“Xawe ǃgôahesatse. . . ǁkhāǁkhādats ka o tsî i ga ǁnâuǃā tama da hâ xū-e hâ o, mā-amsa da a, î da dîna dî?”

“Îo, mā-amsats ge a.”

“ǁGauǃnâ-aotse nēti ī ge go hā. Khoeb ge Elobmîs xa goro ǁkhāǁkhā tsî ta ge dîsa go dîbi. Dîsab ga ǃereamte ǁoa o ta tae-i ǃaroma ǀûbaba ra ǂgan sîǂkhanisa nî xoaba bi?”

Blanksonni ge skoli ǃnâ ge hâ ǀgara. ǀÛbaba ra ǂgan sîǂkhanisa xoa tamase.

HĀNÎǁAEBA ǃOA MÛǂUIS

ǁNā kurib ǃnâ ge ī sîsen-e ǃkhōǀhao tsîb ge ǃKhē xū ǂgō-omma ge mî: “Davidi ǁkhāb khami da ge a mî ǁkhā, ‘sats ge ǀgaiba ge mā te torob ǃoa.’ (Psa. 18:39) Kurib ge kaise ge ǂkhâǃnâxa i mû da ge ge matib Jehovaba ǁîb sîsen-e dī hâsa. ǁÎb ǂgomǂgomsa ǃoaba-aon ge ǃgâiaǂgaoxase gere aoǁnâ.”

Kurib ra ǀam khamin ge ǃgâsana ǀapena ge dī ǀnî hâ ǂhôaǂgaresa ūhâsa. ǁNā ǂhôaǂgaresa ge Amerikab ǃnâ ge omhe Chicacos ǃnâ. ǁNā ǂhôaǂgares ge Elobmîs ti ge ǂansa-i, ǁîs ǃnâ-ūn ge Elobmîs xa gere aoǁnâ amaga. Nē ǃnāsan ge ǀgaisa xūna gere sîsen-ū, în khoena Gaosib hais-amsa ǃnūse ǁnâu aiǁgause Kanadab Noorders ǃnâs tsîna.

Jehovab ge 1925 ǃgâsaga ge hui î gu ǂHaiǂhais 12ǁî danaǃâs ǃnâ hâ ǀasa ǁkhāǁkhāsa ǁnâuǃā. ǁNā ǀasa ǁnâuǃā ǀgaub xan ge ǀnîna Jehovaba ge ǃoaba ǀû. Xawe ǂguin ge ge ǂkhî i, ǀhommi ǃnâ ge ī xūna ǃamkuse ǁnâuǃā tsî mûsa nēs mati Elob khoen ǃhūbaib ai hâna ra tsâǀkhā ǀgausa.