Jehovab tsî Jesub aiǁgausa ǁgae

1-2. Jehovaba ǀnamsa taen hoana ǃkhōǂgā hâ tsî Jesuba mati ge ǁgau ǁîb Jehovaba ǁîb ǂâis hoas ǀkha ǀnam ǃkhaisa?

“ǃKHŪB sa Elobats ge nî ǀnam sa ǂgaob hoab ǀkha, sa ǀoms hoas ǀkha, sa ǀgaib hoab ǀkha tsî sa ǁnâuǃāb hoab ǀkha.” (Luk. 10:27) Jesub ge ge ǃgāsa kai nē i ge ǂhâǂhâsa i ǃkhaisa Moseb ǂhanub ǃnāga. ǃGaoǃgâ re Jehovaba da ūba hâ ǀnammi ge ǂgaoba xu hâ turagu, tsâsigu tsî tsâǀgaub tsîna ǃkhōǂgā hâ. Jehovaba da ge ūda hâ xūn hoan tsî sida ǁkhāsib hoab ǀkha nî ǀnam. Nēs ge sida tsâsigu, ǀgaib tsî turagu tsîn hoana ǃkhōǂga hâ tsî mati da ra ǂâiǀgaub tsîna. Ama as ge tātsē da Jehovab ǂâiǀgauba ǀoasase ǁnâuǃā tidesa. Xawe da ge ‘Xristub ǂâisa’ a ǁnâuǃā ǁkhā. ǁÎb Îbab ge ǃamkuse a ǂan tsî ǁîb ra ǂâi khami ǂâi tsî ǁîba ǀoasase ra ǁgae.—1Kor. 2:16.

² Jesub ge Jehovaba ǁîb ǂâis hoas ǀkha ge ǀnam-i. Jesub ge ge ǂan-i tae-eb ra ǂgaoǀkhāhesa Jehovab xa dīb nîse. Tsîb ge ge mîǁgui hâ i îb nēsa dī, ǂan-i ge ī xawe ǃgommab nî tsâsa ǂhanu xū-e dīs ǃaroma. Jesub ge ǁîb Îba ra ǂkhîǂkhî xū-i ai ǂâisa a ǂnûi amagab ge ge mā-am tama hâ i, î-i ǀnî hâ xū-e ǁîb ûib ǃnâ ǂhâǂhâsa.

3. Apostel Petruba tae-e Jesuba xu ge ǁkhāǁkhāsen tsî tae-eb ge Xristeǁîna ǂkhâǃnâ dīsa? (1 Petrub 4:1)

³ Petrub tsî nau apostelgu ge ǀō-aisa aiǂhanuba ge ūhâ i, Jesub ǀkha hâ tsî ǁîba xu ǁkhāǁkhāsensa. Petrub ge ǁîb di ǂguro sîǂkhanisa xoa, ob ge Xristeǁîna ge mîba în ǁkhā ǂâis ǀkha ǁâtanisen Xristub ǁkhāb khami. a (Khomai re 1 Petrub 4:1 sa.) Petrub ge torob ǃnâ ra sîsenūhe mîs xa gere ǃhoa “ǁâtanisen” tib ge mî o. Xristeǁîn ga ǁkhāǁkhāsen o în Jesub gere ǂâi khami ǂâi, on ge ǂhân hâ xuna nî ūhâ în tsū xū-e dīs di turuba ǃkhamǃoa.—2Kor. 10:​3-5; Efe. 6:12.

4. Nē ǁkhāǁkhāǃâsa mati nî hui da î da Petrub ǀapemāsa sao?

⁴ Jesub ǂâiǀgauba da ge nî ǁkhāǁkhāsen tsî nî mû mati da ǁnā ǂâiǀgauba ǁgae ǁkhāsa. ǁÎb aiǁgausa xu da ge nî ǁkhāǁkhāsen, (1) î da Jehovab ǂâiǀgauba ǁgae hui da nî ba î da ǀguiǂâixa, (2) ǃgamǃgamsenxa tsî (3) ǃnāsa ǁnâuǃāba ūhâ î da Jehovab ai ǂgomaiǂnûi ǀgores ǃnâ-ū.

JEHOVAB ǂÂIǀGAUBA ǁGAE

5. ǀGui ǃnaeǃkhais aib ge Petruba mati Jehovab ǂâiǀgauba ǁgae tama hâ i?

⁵ ǀGui ǃnaeǃkhais xa ǂâi re, Petrub ge Jehovab ǂâiǀgauba ǁgae tama hâ îba. Jesub ge ǁîb apostelga ge mîba Jerusalemsa ǃoab nî ī ūhe ǃkhaisa tsîb ǂgomdi ǂgaeǂgui-aogu xa ǃkhōsis ǃnâ ūhe, tsâ tsî nî ǁō ǃkhaisa. (Mat. 16:21) Petrub ge ge ǂan-i Jesub a mîmâisa Mesia ǃkhaisa, Elob khoena nî oreba. ǁNā-amaga i ge ǀnîsi Petruba ge ǃgomba i, ǂgomsa Jehovab nî mā-am ǃkhaisa îb Jesuba ǃgamhe. (Mat. 16:16) ǁNā-amagab ge Petruba Jesuba ǃoa ge mî: “Ab Eloba ǀkhomxa tsi, îs nēsa tā sats ǀkha ī.” (Mat. 16:22) Jesub tsî Petrub tsîn ge nē-i xa ge hō gu tama hâ i. Petrub ǂâiǀgaub ge Jehovab dib ǀkha ǀgui tama hâ i ǃkhais ǃaroma.

6. Jesuba mati ge ǁgau Jehovab ra ǂâi khamib ra ǂâisa?

⁶ Jesub ge ǁîb ǁGûb ra ǂâiǀgauba ge ǂan-i tsîb ge ǀoasase ǁîb ǁgûb ra ǂâiǀgauba gere ǁgae. Ob ge Jesuba Petrub ǃoa dabasen tsî ge mî: “Bēxū te, Satantse! Sats ge ti aiǃâ ǃnôa-aiǃnaose ī. Sats ge khoesi ǂâiǀgauba xu ra ǃhoa, xawe Eloba xus ose.” (Mat. 16:23) Petrub ge tsūse ge ǂâibasen tama hâ i xaweb ge Jesuba ǁîb ǀapemāsa ge ūǃoa tama hâ i. Tae-e da ra ǁkhāǁkhāsen? Jehovab ǂâibasen tama ge īs ge îb Jesub ûiba sâuhe. Nē ǃnaeǃkhais tawab ge Petruba ǀō-aisa xū-e ge ǁkhāǁkhāsen, Elob ǂâiǀgauba ǁgaesa.

7. Petruba mati ge ǁgau ǁîb ǂâiǀgaubab ra dawa ǂgao ǃkhaisa îb Jehovab khami ǂâi? (Ais-ǀkhāb ai hâ ai-īsiba mû re.)

⁷ Egab ge Petruba ge ǁgau ǁkhāǁkhāsen ǂgaob rasa Jehovab ra ǂâi khami ǂâisa. Jehovab ǁae ge īb ge îb nau ǃhaodi khoena ǁîb khoen ase ūǃoa. Jehovab ge Petruba ge daoǁgau îb Korneliuba aoǁnâba. Korneliub ge ǂguro Jodeǁî tama ge hâ îba Xristeǁî kai ge ba. Jodeǁîn ge Jodeǁî taman ǀkha ge hâ ǀhao tama hâ i. ǁNā-amagab ge Petruba ǁîb ǂâiǀgauba ga tawa hâ, îb nēsi Jodeǁî taman tsîna aoǁnâba. Petrub ge mûǂan o Jehovab ge mati Jodeǁî taman xa gere ǂâisa ob ge ǁîb ǂâiǀgauba ge tawa. ǁNā-amagab ge sî-eb ge o,‘ǃhaese ge ī’. (ǃNǃkh. 10:​28, 29) Korneliub tsî ǁîb omaris tsînab ge ge aoǁnâba tsîn ge ge ǁāǁnâhe.—ǃNǃkh. 10:​21-23, 34, 35, 44-48.

8. Mati da a ǁgau ǁkhā sida ǂâiǀgaub Jehovab dib ǀkhā ǀguisa? (1 Petrub 3:8)

⁸ Kurina ǃkharu tsîb ge Petruba Xristeǁîna ge ǂkhâǃnâ în “ǀguiǂâixa.” (Khomai re 1 Petrub 3:8 sa.) Jehovaba da ga ǁgae, o da ge a ǀguiǂâixa ǁkhā sida ǃgâsan ǀkha, Elobmîs ǃnâ da ra ǁkhaǁkhāsen khami. Aiǁgause, Jesub ge ǁîb saosabena ge mîba în Elob Gaosiba ǂgurose ǁîn ûib ǃnâ mâi. (Mat. 6:33) ǁNās xa ǃaromahe hâse î ge ǀhaohâb ǃnâ ǃgâsa-e a mîǁgui ǁkhā, î-i aimâba-ao kai tamas ka io ǀnî hâ ǀgaub ǃnâ Jehovaba ǀoasase ǃoaba. Supu ûiba ǁhûibasens xa ǁî-e mîbas xa da ge ǃgâi ǀgaub ǃnâ ǁî-i ra sīǃnâ ǂgao tamas ka io mîǁgui xū-i xa ǃhoa tsî nî hui-i.

ǃGAMǃGAMSENXA

9-10. Jesuba mati ge ǁgau ǁîb kaise a ǃgamǃgamsenxa ǃkhaisa?

⁹ ǃGamheb nî ǃuis aiǃâb ge Jesuba, Petrub tsî nau apostelgu tsîna ǂhâǂhâsa xū-e ge ǁkhāǁkhā ǃgamǃgamsenxasib xa. ǁAeroba ǃkharu tsîb ge Jesuba Petrub tsî Johaneb tsîkha ge sî, ikha xūna sī aiǂhomi ǀuniga ǂûs ǃaroma Jesub ǀkha ǁōb nîs aiǃâ. ǀGui xū-i hîna kha ge ǂhomi î ge xapas tsî handugu tsîna, î-i sari-aon ǂâina ǁāhe ǁkhā ǂûǀhaos aiǃâ. Xawe ham-e ǁnātikose nî ǃgamǃgamsenxa tsî nau khoen ǂaide nî ǁā?

¹⁰ Jesub ge nēti ī sîsen-e dīsa ge îganǀgē tama hâ i. ǁGaub ge ge ǃgamǃgamsenxab a ǃkhaisa. Apostelgu ge kaise ge buru hâ i, mû gu ge o Jesub ǃgā-i ra dī sîsen-e ra dī ǃkhaisa. Jesub ge ǁîb di ǂam saraba ǁhû tsî handuba ǁîb khamanâb ai ge ǃgae, ǁgamm-e xapas ǃnâ ǁhō tsî ǁîgu ǂaide ge ǁā tsoatsoa. (Jhn. 13:​4, 5) Jesub ge hoa 12 apostelgu di ǂaide ge ǁā. Nēs ge ǀnîsi gāxu ǁaeba ge ū, Judab Iskariob ǁîba ge ǀapexub ǂâidi tsînab ge ge ǁā. Jesub ge ǃgamǃgamsenxase nē sîsenni hoa-e ge dī. ǃNūǃnâxasib ǀkhab ge Jesuba ge ǁguiǃā: “ǁNâuǃā go ra tare-e ta goro dī ǃkhaisa? Sago ge tita ‘ǁKhāǁkhā-aotse’ tsî ‘ǃKhūtse’ ti ra ǂgai tsîs ge ǁnāsa a ǂhanu, ǁî ta a amaga. Tita, sago di ǃKhū tsî ǁKhāǁkhā-aota go sago di ǂaide ǁās ǁkhās khami go ge sago tsîna ǂaide nî ǁābagu.”—Jhn. 13:​12-14.

11. Petruba mati ge ǁgau ǃgamǃgamsenxasibab ge ǁkhāǁkhāsen ǃkhaisa? (1 Petrub 5:5) (Ai-īsiba mû re.)

¹¹ Petrub ge Jesub ǃgamǃgamsenxasiba xu ge ǁkhāǁkhāsen. Jesub ge ǀhomma ǃoa oas khaoǃgâb ge Petruba buruxa sîsen-e ge dī. ǃNaesa xu ge ǃhora-i khoebab ge ge ǂgauǂgau. (ǃNǃkh. 1:​8, 9; 3:​2, 6-8) Kai ǂnubis khoen ge nē buruxa dīsa ge mû tsî ǁîb ǂnamipe ge mā. (ǃNǃkh. 3:11) Xaweb ge Petruba khoen xa ge ǂanǃgâhe ǂgao tama hâ i, ǁnātib ge kaikaihe xawes tsîn hoan ǃnâ. ǃGamǃgamsenxab ge ge ī tsîb ge ǁnā kai ǂnubis khoena ge mîba în Jehovab tsî Jesub tsîna koa. Sao ra mîdi ǀkha: “Israelǁîdo, tarexa du nē go ī ǃkhais xa nēti burugâ hâ? Sikhom di ǀgaib tamas ka io elosiba xu khom go ǁîba ǂuruǂuru, ti du ra ǂâi?” (ǃNǃkh. 3:​12-16) Egab ge Petruba Xristeǁîna ǃoa ge xoa ǃgamǃgamsenxasib xa. ǂHunumâseb ge sîsenū mîs nē xoas ǃnâ hâs ge sara-e anasa ǃoa ra ǁnaeǁgau. Nēs ge ra ǂâiǂâiǃnâ da Jesub ge mati handuba ǁîb gamanab ai ǃgae tsî apostelgu ǂaide gere ǁāsa.—Khomai re 1 Petrub 5:5 sa.

12. Mati da Petrub khami aiǃgû tsî ǃgamǃgamsenxasiba a ǁgau ǁkhā?

¹² Petruba ǁgae ǁkhā tsî da ge ǃgamǃgamsenxasiba a ǁkhāǁkhāsen ǁkhā. ǂÂis ǃnâ ūhâ ǃgamǃgamsenxasib ge mî da ra xūn ǀguina ǃkhōǂgā tama hâ. Petrub ge sîsenū mîs ǃgamǃgamsenxasiba ǃoa ra ǁnaeǁgaus ge, nau khoen tsî sida xas tsîna da ra ǂâiǀgauba ǃkhōǂgā hâ. Nau khoena ǃoa da ge ra ǃgâidī Jehovab tsî khoena da a ǀnam amaga, khoen xa da ra koahe ǂgao amagas ose. Ama ǃgamǃgamsenxasiba da ūhâsa da ge ra ǁgau, Jehovaba da ga ǂkhîb ǀkha ǃoaba o. Tsî da ga sida ǃgâsana xūna dība o khoen xa da ga mûhe tama īs hoan ǃnâ.—Mat. 6:​1-4.

“ǃGĀSASE” ǂÂI

13. “ǃGāsase” ǂâisa tae-e ǃkhōǂgā hâ?

¹³ “ǃGāsase” ǂâisa tae-e ǃkhōǂgā hâ? (1Pet. 4:7) ǃGāsase da ga ǂâi o da ge Jehovab xūna ra mû ǀgaub xa nî ǂâi, mîǁguiga da ga dī o. Xristeǁî-i ǃgāsase ra ǂâi i ge ǁî-i ǁkhāsib hoab ǃnā ra dītsâ, î-i ǃgâi mîǁguiga dī Jehovab ǂâiǀgauba ra ǁgauga. ǂÂihō da ge nî Jehovab ǀkha da ūhâ ǀhōsagusis hoa xūn ǂam-ai a ǂhâǂhâsa ǃkhaisa. Nēti ī Xristeǁî-i tsîn ge ǁî-i xa ǃnāsase ǂâisa xus tsîna nî ǂgōsen tsî ra ǁnâuǃā hoa xūna i ǂan tama hâ ǃkhaisa. ǃGāsase da ga ǂâi, o da ge Jehovab ai nî ǂgomaiǂnûi ǀgores ǃnâ-ū tsî ǁîb daoǁgausa nî ǂgan.b

14. Petruba ǀgui ǃnaeǃkhais ai mati Jehovab ai ge ǂgomǃgâ tama hâ i?

¹⁴ ǁŌb nî ǃuis aiǃgâb ge Jesuba ǁîb ǁkhāǁkhāsabega ge ǃkhâikhom tsî ge mî: Nē tsuxub ǃnâ go ge sago hoago nî bēxū te ti. Ob ge Petruba ge ǃeream: “Hoa khoen ga ǁnāxūǃgâ tsi, xawe ta ge tita tātsēs tsîna ǀūxū tsi tide!” ǁNā ǃui-ab ge Jesuba ǁîb ǁkhāǁkhāsabega ge mîba, î gu ‘ǂkhaikari hâ tsî ǀgore.’ (Mat. 26:​31, 33, 41) Petrub ge nē mîde ge sao tama hâ i. Nē mîdeb ga sao hâ, ob ge ǀnîsi ēga ǁkhoaǂgaose ga mî hâ ǁîb a Jesub di ǁkhāǁkhāsabe ti. Petrub ge ega Jesuba ge ǀūxū tsîb ge ge ǃhausen.—Mat. 26:​69-75.

15. Jesuba mati ǃgāsase gere ǂâi ǁîb di ǀuniga ǃuis ai khoeb ase?

¹⁵ Jesub ge ǀoasase Jehovab ai ge ǂgomaiǂnûi. ǀOasa kurusab ge ūhâ i xaweb ge ǁōb nî ǃuis aiǃâ gere ǀgore. ǁNās ge ge hui bi îb ǁkhoaǂgaosiba hō tsî Jehovab gere ǂhâba xū-e dī. (Mat. 26:​39, 42, 44; Jhn. 18:​4, 5) Petrub ge tātsē ge ǀuru tama hâ i Jesub ge ǂguiǃnāde ǀgore hâ îsa ǁîb di ǀuniga ǃuis ai.

16. Petruba mati ge ǁgau ǃgāsase ǂâisab ge ǁkhāǁkhāsensa? (1 Petrub 4:7)

¹⁶ ǁAeb ra ī khamib ge Petruba ge ǁkhāǁkhāsen îb Jehovab ai ǂgomaiǂnûi ǀgores ǃnâ-ū. Jesub ge khâisab hō toa hâs khaoǃgâ Petrub tsî ǀnî hâ apostelgu tsîna ǂgomǃgâsiba ge mā, ǁîb ǁîga ǃanu gagaba nî mā ǃkhaisa î gu ǃgâiǂhôasa aoǁnâ ǁkhā. Xaweb ge Jesuba ǁîga ge mîba î gu Jerusalems ǃnâ hâ, ǁnās nî īs kōse. (Luk. 24:49; ǃNǃkh. 1:​4, 5) Petruba tae-e ge dī ǃâub hâ ǁaeba? Petrub tsî nau ǁkhāǁkhāsaben ge “ǀguiǃnâxase ǀgore gu” nî ga gere ǀhao. (ǃNǃkh. 1:​13, 14) Egab ge Petruba ǁîb di ǂguro sîǂkhanis ǃnâ Xristeǁîna ge ǂkhâǃnâ în ǃgāsase ǂâi tsî Jehovab ai ǂgomaiǂnûi ǀgores ǃnâ-ū. (Khomai re 1 Petrub 4:7 sa.) Petrub ge Jehovab ai ǂgomaiǂnûisa ge ǁkhāǁkhāsen tsîb ge ǁnās ǃnâ-ū ǃgâsana ge ǂkhâǃnâ ǁkhā i.—Gal. 2:9.

17. Sida ǁkhāsigu ǂam-ai da aiǃgû tsî tae-e nî dī? (Ai-īsiba mû re.)

¹⁷ ǃGāsase da ga ǂâi, o da ge ǂguiǃnāde Jehovaba ǃoa nî ǀgore. Mûǂan da ge ra Jehovab ai da ǀgores ǃnâ-ū huiba nî ǂgansa, ǀnî ǁaega i ga supu tama îs hoan ǃnâ. ǁNā-amaga ǃgōsase ǂhâǂhâsa mîǁguiga da ga dī, o da ge Jehovaba ǃoa daoǁgaus ǃaroma nî ǀgore. ǂGomǃgâ hâse ǁîb a ǂansa tae-i sida ǃaroma a ǃgâisa.

18. Mati da sida ǂâiǀgauba dawa ǁkhā î da Jehovab ǂâiǀgauba ǁgae?

¹⁸ ǃGôaǃgâ da ge ra Jehovab ge ǁîb ǀgauga da nî ǁgaese kuru da ǃkhais ǃaroma. (Gen. 1:26) Ama as ge Jehovaba da ge ǀoasase a ǁgae ǁoa. (Jes. 55:9) Xawe da ge Petrub khami sida tsîna Jehovab khami ǂâisa ra ǁkhāǁkhāsen ǂgao, ǃgamǃgamsenxa tsî ǃgāsase ǂâisa.