ǂGomǂgomsa ǀhomǃgāna ǁgae

1-2. (a) Mâ ǀgaugu ǃnâ da ǀhomǃgāna xu ra ǀkhara? (b) Mâ ǀgaugu ǃnâ da ǀhomǃgān ǀkha a ǀgui?

JEHOVAB khoen ase da ge ǀnamxaǃnâ khoen omaris ǃâ, ǁîba ra ǃoabana. Nēs ge sida ǃgâsan ǃhūbaib ǂhabase hân tsî ǂgui ǀhomǃgān tsîna ǃkhōǂgā hâ. (Dan. 7:​9, 10) ǀHomǃgān xa da ga ǂâi, o da ge matin sada xu ra ǀkhara ǀgaub xa ǃnāsa ǁaeba ra ǂâi. Aiǁgause, ǀhomǃgān ge khoen aiǃâ ge kuruhe. (Job. 38:​4, 7) ǁÎn ge ǃnāsase ǀgaisa, ǃanu tsî a ǂhanu-ai sida xa, ǀoasa kurusa da ūhâ tama amaga.—Luk. 9:26.

² ǀHomǃgāna xu da ǂgui ǀgaugu ǃnâ ra ǀkhara xawe da ge ǁîn ǀkha ǀgui ǀgauga ūhâ. Aiǁgause, ǀhomǃgān khami da ge Jehovab di îsa ǀgauga a ǁgae ǁkhā. ǀHomǃgān khami da ge aitsama ǁhûibasens ǁkhāsiba ūhâ. ǁÎn khami da ge sida ǀon ti, ǃkharagagu ǀgaugu tsî ǃkharagagu ǁgaumâidi tsîna Jehovab ǃoabas ǃnâ ūhâ. Tsî ǀhomǃgān khami da ge sida tsîna Kuru-aoba ǃoabas ǂhâsiba ūhâ.—1Pet. 1:12.

3. Tae-e da ǂgomǂgomsa ǀhomǃgāna xu a ǁkhāǁkhāsen ǁkhā?

³ ǀHomǃgān ǀkha da ǀgui ǀgauga ūhâ, amaga da ge ǁîn di ǀgaugu xa ǂkhâǃnâ-e tsî ǂgui ǂhâǂhâsa xūna ǁîna xu a ǁkhāǁkhāsen ǁkhā. Nē ǁkhāǁkhāǃâs ǃnâ da ge nî ǃhoaǃgao mati da ǂgomǂgomsa ǀhomǃgān di ǃgamǃgamsenxasib, khoenan ūba hâ ǀnammi, ǁîn taniǀnamxasib tsî ǃgari sîsenni ǀhaohâga ǃanuse ūhâs ǃaroman ra dīn tsîna a ǁgae ǁkhā ǀgausa.

ǀHOMǃGĀN GE ǃGAMǃGAMSENXA

4. (a) ǀHomǃgāna mati ǃgamǃgamsenxasiba ra ǁgau? (b) Tae-i ǃaroman ǀhomǃgāna ǃgamǃgamsenxa? (Psalmdi 89:7)

⁴ ǂGomǂgomsa ǀhomǃgān ge a ǃgamǃgamsenxa. Kai ǂansa ūhâ, ǀgaisa tsîn a gā-ai xawen ge Jehovab daoǁgaude ra ǁnâuǀnam. (Psa. 103:20) Jehovab xan māhe hâ ǁgaumâiden ga dī, on ge koasen tsî ǁîn ǀgaiba sîsenū tama în mûmûsen. ǃGâiaǂgaoxasen ge Jehovab ra ǂgan xūn hoana ra dī, naun ga ǁîn ǀonde ǀū xawe.a (Gen. 32:​24, 29; 2Gao. 19:35) ǁÎn ge Jehovab nî māhe ǃgôasiba ūǃoasa ra ǂkhā. Tae-i ǃaroman ǀhomǃgāna ǁnātikōse a ǃgamǃgamsenxa? ǁÎn Jehovaba ǀnam tsî ǃgamǃgôasiba ǁîba ūba hâ amaga.—Khomai re Psalmdi 89:7 sa.

5. Matib ge ǀhomǃgāba ǃgamǃgamsenxasiba ǁgau apostel Johanebab gere mî-unubao? (Ai-īsiba mû re.)

⁵ ǀHomǃgān a ǃgamǃgamsenxa ǃkhaisa ra ǁgau ǃnaeǃkhais xa ǂâiǃgâ re. ǀOnsa da a ǀū ǀhomǃgāb ge 96ǁî kuri buruxa xūna apostel Johaneba ge ǁgau. (J.ǂHa. 1:1) Johaneba tae-e ge dī nē buruxa xūnab ge mûo? ǀHomǃgābab ge gere ǀgoreǀî ǂgao. Xaweb ge ǂgomǂgomsa ǀhomǃgāba ǁkhaebi tsî ge mî: “Tā tita ǀgoreǀî! Tita tsîn sats tsî sa ǂgomsaben hoan, . . . khami, . . . i xuige. Eloba ǀgoreǀî re!” (J.ǂHa. 19:10) ǁNā ǀgomǃgāb ge kaise ge ǃgamǃgamsenxa i ǁîb ge ge koahe ǂgao tama hâ i. Tsîb ge Johaneba ge mîba îb Jehova Eloba ǃoaba. ǁKhā ǁaeb aib ge ǀhomǃgāba ge ǃgôaǁnâ tama hâ i. ǀHomǃgāb ge Jehovaba gaxuse ǃoaba tsî ǀgaisa i xaweb ge Johaneba ǁîb horesa ǃoaba-aob ase ge ǁnaeǁgau. ǀHomǃgāb ge Johaneba mî-unuba xaweb ge nēsa ǁgai ǀgaub ǃnâ ge dī tama hâ i tsî ǃgâi ǀgaub ǃnâ ge ǃhoa. ǀNîsib ge ge ǁnâuǃā Johaneb ge ǁîba gere ǀgoreǀî ǂgao ǃkhaisa mûb ge buruxa xūn ǃaroma.

6. Mati da ǀhomǃgān di ǃgamǃgamsenxasiba a ǁgae ǁkhā?

⁶ Mati da ǀhomǃgān ǃgamǃgamsenxasiba ǁgae ǁkhā? ǀHomǃgān khami da ge sida tsîna dī da ra xūn tamas ka io ǀō-aisa ǁkhāsigu ǃaroma koasen tamase ǃgarise ra sîsen ǂgao. (1Kor. 4:7) ǁNās xōǀkhā da ge tā nau khoen xa da ǀgapi ti nî ǂâi, Jehovaba da gaxuse ǃoaba hâ tamas ka io da ǁîn ūhâ tama ǁgaumâide ūhâ amaga. Jehovab ǃoabas ǃnâ da ǃnāsase ra dī khami da ge sida ǃgâsana ǃnaga nî hâba. (Luk. 9:48) ǀHomǃgān khami da ge nauna nî sîsenba ǂgao. Nauna da ge sida ǁîn xa ǃnāsase a ǂhâǂhâsa ti ǂâi kai ǂgao tama.

7. Mati da ǃgamǃgamsenxasiba a ǁgau ǁkhā khoe-e da ga mî-unuba tamas ka io ǁnamao?

⁷ Sida tsîn ge ǃgamǃgamsenxasiba a ǁgau ǁkhā, sida ǀgôa-i tamas ka io ǃgâsa-e da ga mî-unubao. ǀNî ǁaegu ai da ge khoe-e ǀgaisase a ǁnama ǁkhā. Johaneba ge mî-unuba ǀhomǃgāb khami da ge sida tsîna ǀgaisa ǁnamasa khoe-e a mā ǁlkhā, ǁî-e ǂkhabuǂâi kai tamase. Naun xa da a ǂhâǂhâsa ti da ga ǂâi tama io, i ge nî hui da î da ǁnamasa Elobmîsa xu ǃgôasib tsî ǀnamma ra ǁgau ǀgaub ǃnâ mā.—Kol. 4:6.

ǀHOMǃGĀN GE KHOENA A ǀNAM

8. (a) Lukab 15:10 ǃoagun mati ǀhomǃgāna khoena ǀnamma ra ǁgau? (b) ǀHomǃgāna mati aoǁnâ sîsenni ǃnâ ra hui da? (Tsoatsoas ai hâ ai-īsiba mû re.)

⁸ ǀHomǃgān ge khoen ǀkha ra ī xūn ǃnâ ǃgâiǃgâibasensa ūhâ. ǁÎn ge khoen ǂhâǂhâsa tama ti ǂâi tama xawen ge khoena a ǀnam. ǁÎn ge ra ǃgâiaǂgao tsū ǁorena dī hâ khoe-i ga ǃhōbasen tamas ka io i ga Jehovaba ǃoaba ǀû hâ khoe-e oaǀkhīo. ǁÎn tsîn ge ra ǃgâiaǂgao khoe-i ga Jehovab xa ǁkhāǁkhāsen tsî ǀkharaǀkharana dī tsî ǁîba ǃoabasa ǁhûio. (Khomai re Lukab 15:10 sa.) ǀHomǃgān tsîn ge aoǁnâ sîsenni ǃnâ ra hui da. (J.ǂHa. 14:6) Khoenan aoǁnâba tama xawen ge Jehovab xa ra ǁkhāǁkhāsen ǂgao khoe-e ǃoa a daoǁgauda ǁkhā. Mî ǁoa da ge a ǀhomǃgā i ge khoe-e ǃoa a daoǁgau da ǃkhaisa, Jehovab ge ǃkharaga ǀgaugu tsîna a sîsenū ǁkhā. Aiǁgause, ǃanu gagabab ge ra sîsenū ǁîb xa ra ǁkhāǁkhāsen ǂgao khoena ǃoa daoǁgauda sa. (ǃNǃkh. 16:​6, 7) Xaweb ge noxopa ǁîb ǀhomǃgāna ra sîsenū sida aoǁnâ sîsenni ǃnâ huisa. ǁNā-amaga da ga ǃgâiǂhôasa aoǁnâ, o da ge ǂgomǃgâsiba ūhâ ǀhomǃgān nî hui da ǃkhaisa.—“ǁÎn ǀgoredi ge ge ǃereamhe” ti hâ boksisa khomai re.

9. Mati da ǀhomǃgān khoena ūba hâ ǀnamma a ǁgae ǁkhā?

⁹ Mati da ǀhomǃgāna ǁgae tsî khoena ǀnamma ǁgau ǁkhā? Khoe-i ga Jehovaba ǃoa oaǀkhīo da ge sida tsîna ǀhomǃgān khami ra ǃgâiaǂgao. Sida ǃgâsan ǀnam nî da a ǃkhaisa nî ǂansa da ge ra ǁapoǁapo tsî ra ǃgâiaǂgoa ǁîn ga ǁkhaba Jehovaba ǃoabao. (Luk. 15:​4-7; 2Kor. 2:​6-8) ǀHomǃgān tsîna da ge a ǁgae ǁkhā, ǁkhā da a-i hoa-e aoǁnâ sîsenni ǃnâ dīs ǃnâ-ū. (Aoǁn. 11:6) ǀHomǃgān aoǁnâ sîsenni ǃnâ ra ǂkhâǃnâ da khami da ge ǀgauga nî ôa, î da sida tsîna ǃgâsana aoǁnâ sîsenni ǃnâ ǂkhâǃnâ. Aiǁgause da ge ǀasase aoǁnâ tsoatsoa hâ ǃgâsa i ǀkha aoǁnâ sîsenni ǃnâ a ǂoa ǁkhā. Kaira tamas ka io ǀaesen hâ ǃgâsana da ge a hui ǁkhā în aoǁnâ sîsenni ǃnâ ǂoa.

10. Tae-e da Saras aiǁgausa xu ǁkhāǁkhāsen ǁkhā?

¹⁰ Tae-e da dī ǁkhā sida mâsib xa ǃaromahe hâse da ga ǁkhā da a-e aoǁnâ sîsenni ǃnâ dī ǁoao? Indiab ǃnâ ra hâ ǃgâsas Sara ti ǀon hâs aiǁgausa ǃoa kō re. Sarasb ge 20 kurigas a aimâba-aos khaoǃgâ ge ǀaesen tsî ǁîs kharoba xu ge ǂoa ǁoa i. Kaises ge gere ǂâiǂhansen. Saras ge ǁîs ǃgâiaǂgaoba ge hō-oa ǁkhā-i, ǁîs ǃgâsan ǀhaohâb ǃnâ ge hâ-în tsî ǃgâi Elobmîs khomaisa ūhâs ǃnâ-ū. ǀAsa ǀgaugas ge gere ôa îs aoǁnâ sîsen-e dī ǁkhā. ǁÎs kharob ǃnâ ǂnû tsîs ge sîǂkhanidi tsîna ge xoa ǁoa i ǁnā-amagas ge telefonni ǃnâ-ū ǀgui khoena gere aoǁnâba. ǀNais ge ǀhao ūhâ i khoenas ge gere ǁkhami tsîs ge ǁîna gere dî, ǃgâiǃgâibasensa Elobmîs ǁkhāǁkhāsens ǃnâ ūhâ khoenan ǂan tamasa. Tae-e sao rase ge ī? ǁKhâga ǃkharu tsîs ge Sarasa 70 Elobmîs ǁkhāǁkhāde ge ūhâ i. ǁNā khoen hoanas ge ge ǁkhāǁkhā ǁoa i, nēsin ge ǃnāsana sida ǀhaode ra hâǃnâ. ǀHomǃgān ge kaise ra ǃgâiaǂgao Saras khami ī ǃgâsan hîna ǁkhān an hoana aoǁnâ sîsenni ǃnâ ra dītsân ǀkha sîsenǀhaosa.

ǀHOMǃGĀN GE TANIǀNAMXASIBA RA ǁGAU

11. Matin ge ǂgomǂgomsa ǀhomǃgāna mâǂoa ra taniǀnamxasiba ǁgau?

¹¹ ǂGomǂgomsa ǀhomǃgān ge ǃgâi aiǁgaus taniǀnamxasib disa ra ǁgau. ǁÎn ge khoesi ǀgoras tsî eloxorasasib tsîna ǂgui kuriga mâǀgai hâ. ǁÎn ge ǁGâuab tsî ǁîb ǀkha ǀguiba gere ǃoaba ǂgui ǀhomǃgān ge Elob ǃoa-ai khâikhâisen tsî ǁîba ǁnâuǀnam ǀû ǀgausa ge mû. (Gen. 3:1; 6:​1, 2; Jud. 6) Elobmîs ge ǀgui ǂgomǂgomsa ǀhomǃgāb hîna ge eloxorasa ǀhomǃgāb ǀkha ǂgui tsēde gere ǃkhammi xa ra mî. (Dan. 10:13) Adammi tsî Eva hâra ǁaeba xu i ge ǀhomǃgāna ge mû ǀoro khoen ge Jehovaba ǃoabasa a ǁhûi ǃkhaisa. ǁNās ǂam-ain ge nē ǂgomǂgomsa ǀhomǃgāna aiǃgû tsî Jehovaba ǃgâiaǂgaob tsî ôasasib ǀkha ra ǃoaba. ǁÎn ge a ǂan ǂhanu ǁaeb aib Eloba hoa ǂhanuoǃnâsiba nî ūbēsa.

12. Tae-e nî hui da î da mâǀgai?

¹² Mati da ǀhomǃgān taniǀnamxasiba a ǁgae ǁkhā? ǀHomǃgān khami da ge sida tsîna ǂhanuoǃnâ xūna ra mû tamas ka io ra ǁgâiǀāhe. Xawe da ge ǁîn khami a ǂan ǂhanu ǁaeb aib Eloba hoa eloxoresasiba nî ūbēsa. ǁNā-amaga a da ǂgomǂgomsa ǀhomǃgān khami “ǃgâina dīsa tā tsau.” (Gal. 6:9) Elob ge ra mîmâi hui dab nîsa î da mâǀgai. (1Kor. 10:13) Jehovaba da ge ǁîb di ǃanu gagaba a ǂgan ǁkhā, îb hui da ǃnūǃnâxasib tsî taniǀnamxasib tsîna ūhâsa. (Gal. 5:22; Kol. 1:11) Mâǃoahe du gao du tae-e nî dī? Jehovab ai ǀoasase ǂgomaiǂnûi tsî tā ǃao. Jehovab ge hoaǁae ǂkhâǃnâ tsî nî ǀgaiǀgai du.—Heb. 13:6.

ǀHOMǃGĀN GE ǀHAOHÂBA ǃANUSE RA ŪHÂ

13. Mâ ǀō-aisa ǁgaumâisan ǀhomǃgāna ūhâ ǀuniga tsēdi ǃnâ? (Mateub 13:​47-49)

¹³ ǀUniga tsēdi ǃnâb ge Jehovaba ǀhomǃgāna ǀō-aisa ǁgaumâisa mā hâ. (Khomai re Mateub 13:​47-49 sa.) ǂGui khoen ǃhūbaib ǂhabase hân ge ǃgâiǂhôas ǃnâ ǃgâiǃgâibasensa ūhâ tsîn ge ǀnîna ǀkharaǀkharana ǁîn di ûib ǃnâ ra dī, în Jehovab ǂgaoǀkhādi ǃoagu ûi tsî ǁîba ǂhâbab ra ǀgaub ǃnâ ǃoaba xawen ge nauna ǁnāsa dī tama. ǀHomǃgān ge ǁgaumâihe hâ în “ǂkhaba khoena ǂhanu-ain ǁaeguba” xu ūǂûi. Nēs ge ra ǂâibasen ǁîn ǁgaumâihe hâsa în ǀhaohâba ǃanuse ūhâ. Nēs ge ǂâibasen tama sida ǀkha ra ǃoaba ǀûn ǁkhapa oaǀkhī tide tsî i ǀhaohâgu ǃnâ ǃgomsina hâ tidesa. Xawe da ge ǂgomǃgâsiba ūhâ ǁkhā ǀhomǃgān ǃgarise ra sîsensa în ǀhaohâba ǃanuse ūhâ.

14-15. Mati da ǀhomǃgāna ǁgae tsî a ǁgau ǁkhā ǀhaohâba ǃanuse ūhâs turaba da ūhâ ǃkhaisa? (Ai-īsiga mû re.)

¹⁴ Mati da ǀhomǃgān ǀhaohâba ǃanuse ūhâs xa ra tsâ ǀgauba a ǁgae ǁkhā? ǃGarise sîsen tsî da ge sida ǀhōsagusis Jehovab ǀkha da ūhâsa nî ǁkhauba. Nēsa da ge ra dī ǁîba ǀnam ǀhōsana ǁhûi tsî ǁîba nî tsûtsû xūna xu ǂgōsens ǃnâ-ū. Nē ǀgaub ǃnâ da ge ra hui î da ǀhaohâba ǃanuse ūhâ. (Psa. 101:3) Sida di ǃgâsana da ge a hui ǁkhā în ǂgomǂgomsase Jehovab ǃoagu hâ. Aiǁgause, tae-e da nî dī ǃgâsa i tsū ǁoreba dī hâ ǃkhaisa da ga ǁnâuo? Sida di ǃgâsa-e da ǀnam amaga da ge ǁî-e nî mîba î-i ǀhaohâb ǃûi-aogu ǀkha ǃhoa. ǁÎ-i ga ǁnāsa dī ǂgao tama i, o da ge ǀhaohâb ǃûi-aoga nî mîba. Jehovab ǀkha i ūhâ ǀhōsagusisa ge ǁgaiǁgai ǃgâsa i ǃkhaese huiba nî hō ǃkhaisa da ge ra ǂhâba.—Jak. 5:​14, 15.

¹⁵ Tsûaǂgaoxase i ge ǀgaisa ǁoreba ge dīna ǀhaohâba xu ge ūǂuihe. Nēs ga īo da ge ǁîn ǀkha “ǁaeǁaesen [hâ ǀhao] tide.”c (1Kor. 5:​9-13) Nē ǂnûiǂgās ge ra hui ǀhaohâga ǃanuse ūhâs ǀkha. ǁNās ǀkha da ga ūǂuihe ran ǀkha hâ tama io da ge ra ǁgau ǁîna da ra tsâbasa. Jehovaba ǁnâuǀnam tsî da ga ǁîn ǀkha hâ ǀhao tama io, i ge ǁîna a mûǂan kai ǁkhā Jehovab ǃoan nî oaǀkhīsa. ǁNāsan ga dīo da ge ra ǃgâiaǂgao, Jehovab tsî ǀhomǃgān tsîn ǀkha.—Luk. 15:7.

16. Mâ ǀgaugu ǃnâ da dītsâ tsî ǀhomǃgāna a ǁgae ǁkhā?

¹⁶ Kai aiǂhanub ge Jehovab ra mā-am dasa, î da ǀhomǃgān xa ǁkhāǁkhāsen tsî ǁîn ǀkha ǀguipa sîsenǀhao. Hā re î da ǁîn ǃgâi ǀgauga ǁgae: Nēs ge ǁîn ǃgamǃgamsenxasib, khoenan ūba hâ ǀnammi, taniǀnamxasib tsî ǀhaohâban gagasise ǃanuse ra ūhâ ǀgaub tsîna. ǂGomǂgomsa ǀhomǃgāna da ga ǁgae, o da ge sida tsîna ǃâ-e nî ūhâ Jehovab omaris ǃnâ ǀamosib kōse ǃoabasa.