Jakob ǀuniga mîde xu da a ǁkhāǁkhāsen ǁkhā xūn—ǂGuro ǃâb

1-2. Jakoba ǁōb nîs aiǃâ tae-e ge dī tsî tae-i ǃaroma? (Tsoatsoas ai hâ ai-īsiba mû re.)

JAKOB ge ǁîb kairasis ǃnâ ǁîb omaris hoas ǀkha Kanaanǃhūba xu Egipteba ǃoa ge doe. ǁNāpab ge Jehovaba 17 kuriga noxopa ǂgomǂgomsase ge ǃoaba. (Gen. 47:28) Jakob ge kaise ge ǂkhî ǁîb ôab Josefab ge mûo, ǁōb ge tib ge ǂâi hâ i amaga. Nēsib ge Jakoba ǁîb ôagu hoagu ǀkha ge hâ-i. Jakob ge ǀgūǁaeb nî ǁōsa ge hōǃâ. ǁNā-amagab ge ǁîb di ǀgôagu hoaga ge ǂgaiǀhao ǂhâǂhâsa xū-eb gere mîba gu ǂgao amaga.—Gen. 49:28.

² ǁNā tsēdi ǃnâb ge oms danaba ǁōb nîs aiǃâ omaris khoena ǀhaoǀhao tsî ǁîna daoǁgaude gere mā. (Jes. 38:1) ǁNā ǀhaos aib ge ǀnîsis tsîna nî mîǁgui ham-i nî omaris di dana kaisa ǁîb ǁōb khaoǃgâ.

3. Tae-e da Genesis 49:​1, 2 sa xu ra ǁkhāǁkhāsen?

³ Khomai re Genesis 49:​1, 2 sa. Xawe nē ǀhaos ge ge ǀkhara ī Jakob ge hānîǁaeb ǃnâ nî ī xūn xa gere ǃhoa. Jehovab huib ǀkhab ge Jakoba ǁîb di ôaga ge mîba tae-i ǁîgu tsî ǁîgu omaridi ǀkha nî īsa hānîǁaeb ǃnâ. ǁNā-amaga di ge Jakob mîdi ǁîb ôagu ǃoagub ge mîde kēbodi ase ra ǁnaeǁgauhe.

4. Jakoba tae-e ge mî tsî tae-e da ǁîb mîde xu ra ǁkhāǁkhāsen? (Boksis “Jakob omaris” ti hâsa mû re.)

⁴ Nē ǁkhāǁkhāǃâs ǃnâ da ge tae-eb ge Jakoba ǁîb di haka ǀgôaga mîbas xa nî ǃhoaǃgao: Rubenni, Simeonni, Levib tsî Judab. Sao ra ǁkhāǁkhāǃâs ǃnâ da ge Jakob ge ǁîb nau ǁkhaisa ǀgôaga mîba xūna nî ǃhoaǃgao. Jakob ge ge mî tae-i ǁîb ôagu tsî ǁîgu omaridi ǀkha nî īsa tsî ǁîgu omaride nî Israelǁî kaisa. ǃKharuge ǁaeb ǃnâ i tae-e Israelǁaes ǀkha nî īsa da ga ôaǃnâo, da ge nî mû Jakob ge mî mîdi ge ama kaisa. ǁÎb di mîde ôaǃnâs ǃnâ-ū da ge ǂhâǂhâsa xūna nî ǁkhāǁkhāsen hui da nî na î da sida ǀhomsi ǁGûba ǂkhîǂkhî.

RUBENNI

5. Rubenna dadasaba xu tae-e gere ǃâubasen?

⁵ Jakob ge ǂgurose Rubenni ǀkha ge ǃhoa tsî ge mî: ‘Sats ge ti ǂguroǃnaesatsa.’ (Gen. 49:3) Rubenni ge gere ǃâubasen îb ǃnāsa xūna ǀumi ǁîb di ǃgâsagu xa, ǁîb ge ǂguro ǀgôa i amaga. ǁÎb ge ǀnîsi gere ǃâubasen îb omaris di dana kai ǁîb dadasab ǁōb khaoǃgâ. Tsî i nē aiǂhanuba ǁîb di surib ǃnâ nî hâhâsa.

6. Tae-i ǃaromab ge Rubenna ǂguro ǃnaesabeb ǀumisa ǃkhōǃoa tama hâ i? (Genesis 49:​3, 4)

⁶ Xaweb ge Rubenna ǂguro ǀgôab nî ǃkhōǃoa ǀumisa ge hō tama hâ i. (1Kro. 5:1) Tae-i ǃaroma? Raxels ge ǁōs khaoǃgâb ge Rubenna, Bilhas Raxels ǃgās ǀkha ge ǁgoe. Raxels ge Bilhasa taras ase Jakoba ge mā. (Gen. 35:​19, 22) Rubenna tae-i ǃaroma Bilhas ǀkha ge ǁgoe? ǁÎb ge Raxels, Leas ǃgâs di ǀgôa ge ība. Rubenni ge Bilhas ǀkha ge ǁgoe îb Jakoba ǁîsa īǁkhāsib ga hâo ǃhui tsî Leasa ǀnam. Tamas ka iob ge Rubenna Bilhas di îxasib xa ge ǃgâibahe i. Tsîb ge ǁîb di ǁgoe-ugus turaba ge ǃkhō-oa ǁoa i. Rubenni ge dī xū-i ge Jehovab tsî ǁîb ǁgûb tsîna ge ǂkhîoǃnâ kai.—Khomai re Genesis 49:​3, 4 sa.

7. Tae-e Rubenni tsî ǁîb di surib ǀkha ge ī? (Boksis “Jakob ǀuniga mîdi” ti hâsa mû re.)

⁷ Jakob ge Rubenna ge mîba: “Xawets ge naugu xa ǃnāsa tide.” Nē mîdi ge ge dīǀoaǀoahe. Elobmîs ge mî tama hâ Rubenni di oms ge gao-ao, prister tamas ka io kēbo-ao kaisa. Xaweb ge Jakoba ǀumisa ge mā tsî Rubenni surib ge ge Israelǁaes di surib di ǃâ kai. (Jos. 12:6) Rubenni ge ǃgâi ǀgauga ge ǁgau tsî ǁkhawa ge ǀai tama hâ i.—Gen. 37:​20-22; 42:37.

8. Rubenni di aiǁgausa xu da tae-e ra ǁkhāǁkhāsen?

⁸ Tae-e da nēsa xu ra ǁkhāǁkhāsen? Dītsâ tsî da ge ǁgai turagu ǃoagu nî ǃkham tsî nî mîǁgui î da ǀaib ǃnâ tā māǁnâsen. ǃÂitsâhe da ga ǁoreba dīsao da ge nî ǂâiǃgâ, sida mîǁguib mati Jehovab, sida omaris tsî nau khoen tsîna a tsâǀkhā ǁkhā ǀgausa. ǂÂis ǃnâs tsîna da ge nî ūhâ, “tsorots ra-ets ge nî ǃgao.” (Gal. 6:7) Xawe Rubenni ǀkha ge ī xū-i ge Jehovab di ǀkhomxaǂgaosib xa ra hōhōǃnâ da. Dī da ge dīsān xa da ge ǀnîsi ǃgomsiga a hōǃâ ǁkhā xawe da ga ǃhobasen tsî ǂhanu xūna dī ob ge Jehovaba ǀûba tsî nî ǀkhae da.

SIMEONNI TSÎ LEVIB

9. Jakoba tae-i ǃaroma ge ǂkhî tama hâ i Simeonni tsî Levib tsîkha ǀkha? (Genesis 49:​5-7)

⁹ Khomai re Genesis 49:​5-7 sa. Sao raseb ge Jakoba Simeonni tsî Levib tsîkha ǀkha ge ǃhoa. Jakob ge ǁîkha ǃoa a mî mîdi ge ra ǁgau, ǁîb ge ǁîkha ǀkha ǂkhî tama hâ īsa. Kurina ǃkharu tsî i Kanaanǁî khoeb Sexemma, Dinas Jakob di ǀgôasa ge ǀgaiǃkhō. ǁNâuǃāxase gu ge Jakob di ǀgôaga kaise ge ǁgaixa ǁîgu di ǃgâsas ǀkha ge ī xū-i ǃaroma. Tsî gu ge ǁîgu di ǁaiba ge ǃkhō-oa tama hâ i. ǁÎkha ge Sexemmi tsî ǁîb khoen tsîna ge ǂhumiba aore khoegu ga ǃgao-e ob ǂkhîba nî hâsa, ǁîn tsî Jakob di omaris ǁaegu. Nē khoegu ge mîǁgui tsî ge ǃgaohe. ǁÎgu noxopa tsûb ǃnâ hâ hîna kha ge Simeonni tsî Levib tsîkha “mâb hoab âkha gôab âba ū tsî ǁkhoaǂgaoxase ǃās ǃnâ sī tsî aoregu hoaga ge ǃgam.”—Gen. 34:​25-29.

10. Jakob ge Simeonni tsî Levib xa mî kēbode mati ge dīǀoaǀoahe? (Boksis “Jakob ǀuniga mîdi” ti hâsa mû re.)

¹⁰ Jakob ge kaise ge ǁaixa hâ i ǁîb ǀgam ǀgôakha ge ǂgui khoena ǃgam ǃkhais ǃaroma. ǁÎb ge ge kēbo ǁîkha ǀumis ǃkharagagu ǃâdi ǃnâ nî ǀgorahesa. ǁNā kēbos ge 200 kurigu khaoǃgâ ge dīǀoaǀoahe Israelǁaes ge mîmâisa ǃhūb ǃnâ ǂgâo. Simeonni ǃhaos ge ǀnî ǃāde ge ǀumi Judab ǀkharib ǃnâ. (Jos. 19:1) Israelǁîn di ǃhūb ǃnân ge Leviǁîna 48 ǃāde ge ǀumi.—Jos. 21:41.

11. Simeonni tsî Levib ǃhaode mâ ǃgâi xūna ge dī?

¹¹ Simeonni tsî Levib tsîkha surib ge ǁîn aboxan ge dī xūna ge dī tama hâ i. ǂGui Leviǁîn ge Jehovaba ǂgomǂgomsase gere ǃoaba. Moseb ge Sinaiǃhommi tawa Jehovaba xu ǂhanuba gere ǃkhōǃoa ǁaeb ain ge ǂgui Israelǁîna tsâuba ǃoabas ǃnâ ge ǁhao tsoatsoa. Leviǁîn ge ama tama eloba ǃoabas ǃnâ ge ǁhao tama hâ i. Xawen ge ega Moseba ge hui în ǁnān tsâuba gere ǃoabana hîkākā. (Eks. 32:​26-29) Jehovab ge Levib ǃhaosa xu khoega ge ǁhûi, î gu pristergu ase Israels ǃnâ ǃoaba. (Eks. 40:​12-15; Num. 3:​11, 12) Ega î ge Simeonni ǃhaosa, Judab ǃhaosa ge hui în Kanaan ǁîn ǃoagu ǃkham mîmâisa ǃhūb ǃnâ ge hâ i ǀkharigu ǃaroma.—ǂHǂh. 1:​3, 17.

12. Simeonni tsî Levib aiǁgaude xu da tae-e a ǁkhāǁkhāsen ǁkhā?

¹² Tae-e da nēsa xu ra ǁkhāǁkhāsen? Sida ǁaiba da ge nî ǃkhō-oa. Sadu tamas ka io sadu ǀnamsabe i ga ǃgâi tamase hâ ūhe, o î ge tsū tama hâ ǁaixasa. (Psa. 4:4) ǂÂis ǃnâ da ge nî ūhâ Jehovab sida ǀkha ǂkhî tidesa, tsûtsû da go khoe-e mîǃoa tamas ka io da ga ǁî-e dīǃoao. (Jak. 1:20) Jehovaba ra ǃoaba tamas ka io ǁîba ǃoaba tama khoe-i ga tsûtsû da xawe da ge Jehovaba ra ǂkhîǂkhî ǀgaub ǃnâ nî tanisen. ǁNās ge nî hui da î da nau khoena nî tsûtsû xūna mîs tamas ka io dīsa xu ǂgōsen. (Rom. 12:​17, 19; 1Pet. 3:9) Sadu ǁgûn ga Jehovaba ra ǂkhîoǃnâ kai xūna dī xawe ǂâis ǃnâ ūhâ re, ǁîn ǁgai aiǁgaude ǁgaes ge ǂhâbasa tama hâ. Jehovaba ǂkhîǂkhîs a ǃgom ti tā ǂâi re. Jehovab ge nî hui du ǂhanu xū-e dīsa tsîb ge nî mādawa-am du ǁnāsa dīs ǃaroma.

JUDAB

13. ǁÎb ǁgûb mîdeb ge ǁnâu ob ge Judaba ǀnîsi tae-i ǃaroma gere ǂâiǂhânsen?

¹³ Jakob ge ǁîb ǀgôab Judab ǀkha sao rase ge ǃhoa. Jubab ge ǀnîsi gere ǂâiǂhansen Jakob ge ǁîb ǃgâsagu ǃoa a mî mîdeb ge ǁnâu toas khaoǃgâ. ǁÎb tsîn ge ǂgui xūna dīsā hâ i amaga. Simeonni tsî Levib tsîn ge Sexems ǃās khoegu hoaga a ǃgam toas khaoǃgâb ge Judaba ǁîb nau ǃgâsagu ǀkha ǃās ǃnâ ǂgâ tsî khoen xūn hoana ge ū. (Gen. 34:27) Judab ge ǁîb ǃgâgu ǀkha Josefa, ǃgāb ase ǁamaxu tsî ǁîgu dadasaba ge gāxaǃnâ. (Gen. 37:​31-33) Ega ǁîb ǀgôab ǁōb khaoǃgâb ge Judaba, ǁîb ôab taras ǀkha ge ǁgoe ǀai-aos a ti ǂâi tsî.—Gen. 38:​15-18.

14. Mâ ǃgâi xūnab ge Judaba dī? (Genesis 49:​8, 9)

¹⁴ Xaweb ge Jakoba Judaba koa tsî ge mîmâi ǃgâi xūn ǁîb tsî ǁîb omaris ǀkha nî īsa. (Khomai re Genesis 49:​8, 9 sa.) ǁÎb kaira dadasab tsî ǁîb ǂkham ǃgâsab Benjaminni tsînab ra tsâbasab ge ge ǁgau.—Gen. 44:​18, 30-34.

15. Mâ ǀgaugu ǃnâb ge Judaba ǀkhaehe?

¹⁵ Jakob ge ge kēbo Judab ǁîb ǃgâgu ǁaegu nî ǂgaeǂgui ǃkhaisa. Xawe î ge 200 kuriga ge ǃkharu ǁnā kēbos nî dīǀoaǀoahes aiǃâ. Israelǁîn ge Egipteba xu ǃgaroǃhūb ǃnâ-ū mîmâisa ǃhūb ǃnâ ǂgâo i ge Judab ǃhaosa ǂgurose nau ǃhaodi ǀkha ge ī. (Num. 10:14) ǂGui kurina ǃkharu tsîb ge Jehovaba Judaba ge ǁgaumâi îb ǂgurose sī ǃkham Kanaanǁîn ǃoagu tsî mîmâisa ǃhūba dan. (ǂHǂh. 1:​1, 2) Davidi ge ge ǂguro gao-i Judab ǃhaosa xu gere hā gaogu ǃnâ. Xawe ǀkhara ǀgaugu tsîn ge hâ Judab xa hâ kēbos ge dīǀoaǀoahe ǀgaub xa.

16. Matis ge Genesis 49:10 ǃnâ ra hōhe kēbosa dīǀoaǀoahe? (Boksis “Jakob ǀuniga mîdi” ti hâsa mû re.)

¹⁶ Jakob ge ge mî khoesi ǂgaeǂgui-aob Judab suriba xu nî hāsa tsî ǀamose nî ǂgaeǂguisa. (Khomai re Genesis 49:10 sa.) ǁNā ǂgaeǂgui-aob ge Jesub Xristuba, Jakob ge Silo ti a ǂgaiba. ǀHomǃgāb ge Jesub xa ge mî: “ǃKhūb Elob ge ǁîb îb Davidi di gaosisa nî mā bi.” (Luk. 1:​32, 33) Jesub tsîn ge “Judab ǃhaos di Xammi” ti ra ǂgaihe.—J.ǂHa. 5:5.

17. Mati da Jehovaba ǁgae ǁkhā nauna da ra mû ǀgaub ǃnâ?

¹⁷ Tae-e da nēsa xu ra ǁkhāǁkhāsen? Jehovab ge Judaba ge ǀkhae ǀnî dīsānab ge dī xawe. Judab ǃgâgu ge gere ǂhâ tae-i ǃgâi ǀgaugab ge Jehovaba ǁîb ǃnâ mûsa. Tae-i ǀgui-i ga ī xaweb ge Jehovaba ǃgâi xū-e Judab ǃnâ ge mû tsî ǁîba ge ǀkhae. Mati da Jehovab aiǁgausa a ǁgae ǁkhā? ǃGâsa i ga ǀasa ǁgaumâisa hō, o da ge ǁnâuǃā tide ǁî-i go tae-i ǃaroma ǁnā ǁgaumâisa māhesa ǁî-i di dīsān ai da ga ǂâisa ǂnûio. Xawe da ge ǂâis ǃnâ nî ūhâ Jehovab ǁnā ǃgâsa-i di ǃgâi ǀgaugu ǀkha a ǂkhîsa. Jehovab ge ǃgâi-e ǁîb ǃoaba-aon ǃnâ ra mû. Hā î da sida tsîna ǁkhā xū-e dī.

18. Tae-i ǃaroma da ǃnūǃnâxasiba nî ūhâ?

¹⁸ ǀNî hâ xū-i Judab aiǁgausa xu da ra ǁkhāǁkhāsen î ge ǃnūǃnâxasiba. Jehovab ge hoaǁae ǁîb mîmâide ra dīǀoaǀoa xaweb ge sida ra ǃâubasen ǀgaub tamas ka io ǁaeb ai ǁnāsa dī tama hâ. Elob ǂgaeǂgui-aon ge ǂguro Judab suriba xu ge hā tama hâ i. Xawen ge ǂgomǂgomsase ǁnān Jehovab gere ǁgâumâina gere ǂkhâǃnâ. Aiǁgause Moseb Leviǁîb, Josuab Efraimǁîb tamas ka io gao-aob Sauli Benjamini ǃhaos dib. Sida tsîn ge Jehovab nētsē ra ǁgaumâi-aoga nî ǂkhâǃnâ.—Heb. 6:12.

19. Tae-e da go Jehovab xa ǁkhāǁkhāsen Jakob mîde ǃhoaǃgaosa xu?

¹⁹ Tae-e da Jakob di mîdi ǁîb di haka ǀgôaga ǃoab ge mîde xu ra ǁkhāǁlkhāsen? ǃGāsase i ge ra ǁgau, Elob “khoen ra ǀgoraǃgâ khami . . ǀgoraǃgâ” tamasa. (1Sam. 16:7) Jehovab ge kaise ǃnūǃnâxa tsî a ǀûbaǀnamxa. Jehovab ge ǂkhî tama hâ ǁgai xūna da ga dīo xawes tsînab ge ǃâubasen tama hâ î da ǀoasa kurusa ūhâ. ǃKharuge ǁaeb ǃnâ ge tsū xūna dī khoen tsînab ge a ǀkhae ǁkhā, ǃhōbasen tsîn ga ǃgâi xūna a dīo. Sao ra ǁkhāǁkhāǃâs ǃnâ da ge nî ǃhoaǃgao Jakob ge tae-e ǁîb nau ǁkhaisa ǀgôaga a mîbasa.