ǃGamǃgamsenxa re xūna du ga ǁnâuǃā tama io

1. Jehovaba mâ ǁkhāsiba ge māda tsî tae-i ǃaroma?

JEHOVAB ge buruxa ǀgaugu ǃnâ ge kuru da ǁîb ge ǂâis ǁkhāsib, ǀasa xūna ǁkhāǁkhāsens tsî ǁkhāǁkhāsen da ge xūna ǁnâuǃā tsî sîsenūs ǁkhāsib ǀkha ge kuru da. Tae-i ǃaromab ge nē ǀgaub ǃnâ kuru da? Jehovab ge ra ǂhâba î da ǁîb di “ǂansa . . hōbasen” tsî gā-ai mîǁguiga dī ǁîba da ra ǃoabase.—ǂKhm. 2:​1-5; Rom. 12:1.

2. (a) Mâ ǃnubusiga da ūhâ? (Job 37:​23, 24) (Ai-īsiba mû re.) (b) Tae-i ǃaroma i a ǃgâi ǁnâuǃāsa hoa xūna ǂans ǂhâbasa tamasa?

² Jehovab ge ǂgui xūna ǁkhāǁkhāsens ǁkhāsib ǀkha ge kuru da xawe da ge noxopa ǂguina a ǀū. (Khomai re Job 37:​23, 24 sa.) Jobi di aiǁgausa ǃgaoǃgâ re. Jehovab ge Joba ǂgui dîde ge dî tsîs ge nēsa Joba ge hui îb ǁnâuǃā ǂgui xūnab noxopa ǀūsa. ǁNā ǃnaeǃkhais ge Joba ge hui îb ǃgamǃgamsen tsî ǁîb ǂâiǀgauba dawa. (Job. 42:​3-6) Kaise i ge a ǃgâi mûǂansa hoa xūna da ǂan tamasa. Nēti ī ǃgamǃgamsenxasib ge nî hui da, î da ǂgomǃgâ Jehovab ǂan da nî xūna nî ǂhaiǂhaisa î da gā-ai mîǁguiga dī ǁkhā.—ǂKhm. 2:6.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǁkhāǁkhāǃâs ǃnâ da ge ǀnî xūn ǀū da ana nî ǃhoaǃgao tsî ǁnās xa ra ǃaromahe ǃgomsigu tsîna. Noxopa da ge nî ǁkhāǁkhāsen tae-i ǃaroma i a ǃgâisa ǀnî xūna ǀūsa. ǁKhāǁkhāsen da nî xūn ge ǂgomǃgâsiba Jehovab ǃnâ nî māda, ǁîb “dīǀoaǀoasa ǂansa” ūhâba hîna tae-e da nî ǂansa ra mîba daba.—Job. 37:16.

SADA GE A ǀŪ ǀAMS MÂǁAE NÎ HĀSA

4. Mateub 24:36 ǃoagu da tae-e a ǀū?

⁴ Khomai re Mateub 24:36 sa. ǀAms mâǁae nî hāsa da ge a ǀū. Jesub tsîn ge ǃhūbaib aib ge hâ io ‘tsēs tamas ka io ira’ ge ǀū i.a Egab ge Jesuba ǁîb apostelga ge mîba Jehovab ǀguib ra mîǁguisa mâǁae-i tae-e nî īsa, ‘ǁîb di ǁkhāsib ǀkhab ǁaegu tamas ka io kamaga ra ǂnûiǂgā’ amaga. (ǃNǃkh. 1:​6, 7) Jehovab ge ge mîǁgui ǀams mâǁae nî hāsa xawe da ge sada a ǀū ǁnās mâǁae nî īsa.

5. ǀAms mâǁae nî hāsa ǀūsa mati a tsâǀkhā da ǁkhā?

⁵ Jesub ge mîs ǃoagu da ge ǀū matikō gaxuse da nî ǃâusa ǀams nî hās kōse. Gāxuse da ga Jehovab tsēsa ǃâuo da ge ǃnūǃnâxasiba ǁgau ǀû tamas ka io a ǂkhabuǂâi tsoatsoa ǁkhā. ǀNî ǁaega da ge omaris ǁanin tamas ka io da ga nau khoen xa mâǃoaheo a ǃgombahe ǁkhā mâǀgaisa. (2Pet. 3:​3, 4) ǀNîsi da ge a ǂâi ǁkhā ǀams mâ tsē nî hāsa da ga ǂano da ǃnūǃnâxasiba ūhâ tsî ǁgâiǀāhe da gao supuse nî mâǀgaisa.

6. Tae-i ǃaroma i a ǃgâi mâǁaes ǀamsa nî hāsa ǀūsa?

⁶ Jehovab mâǁaes ǀamsa nî hāsa mîba da tama hâs ge ǃēsa ra mā da, î da ǁgau ǀnam bi tsî da ra ǂgomǃgâ bi ǃkhais ǃaroma da ra ǃoaba bisa. Jehovaba da ge ǀamosib kōse ra ǃoaba ǂgao ǀams nî hās kōse ǀguis ose. Jehovab di ‘tsēs’ mâǁae nî hās ai ǂâisa ǂnûis xa da ge nî dītsâ î da ǁnā tsēs khaoǃgâ nî ī ǃgai xūn xas tsîna ǂâiǃgâ. Nēs ge nî hui da î da Jehovaba ǃoa ǀgū, ǁîb ai ǂgomaiǂnûi tsî ǁkhā da an hoana dītsâ tsî ǁîba ǂkhîǂkhî.—2Pet. 3:​11, 12.

7. Tae-e da a ǂan?

⁷ Kaise î ge a ǂhâǂhâsa î da ǂan da a xūna ǂâiǃgâ, ǁnās ge ǀuniga tsēdi ge 1914 a tsoatsoasa. Elobmîs ǃnâb ge Jehovaba kēbode ge mā da ǁgau ra te 1914 î ge ǀuniga tsēde a tsoatsoasa. Jehovab ge ǂgui xūna ge mîba da ǁgau ra na ǃhūbaib mati nî īsa ǁnā tsēdi khaoǃgâ. Nē kēbodi ge dīǀoaǀoahes ge ǂgomǃgâsiba ra mā da, ‘ǃKhūb di kaitsēs . . a ǀgūsa.’ (Sef. 1:14) Sida ge a ǂan Jehovab sîsen-e mā da hâsa ǁnās ge “ǃGâiǂhôas Gaosib disa” aoǁnâsa. (Mat. 24:14) Nē ǃgâiǂhôasa da ge ǁaubexa 240 ǃhūgu ǃnâ ra aoǁnâ 1 000 xa a ǃnāsa gowagu ǃnâ. ǂHâbasa tama i ge hâ sada ‘tsēs tamas ka io ira’ ǂansa î da ôasase aoǁnâ sîsen-e dī.

ǀŪ DA GE A JEHOVAB TAE-E NÎ DĪSA

8. “Elob . . sîsenna” tae-e ǃoa ra ǁnaeǁgau? (Aoǁnâ-aob 11:5)

⁸ Hoaǁae da ge “Elob . . sîsenna” ǀū. (Khomai re Aoǁnâ-aob 11:5 sa.) ǁNā mîs ge Jehovab ra ī ǁkhā kai xū-e ǃoa ra ǁnaeǁgau tamas ka io ǁîb da mā-am xū-i, î-i ǁîb ǂâisa dīǀoaǀoahe. Sada ge a ǀū Jehovab tae-i ǃaroma ra mā-amsa î-i xū-e ī tsî matib nî hui dasa. (Psa. 37:5) ǀNî dīgu Jehovab di ga da ge a ǀū ǀgôa-i mati ǁgûs ǁhās ǃnâ ra kai ǀgausa da ǀūs ǁkhās khami. Kurus ǂansa ūhâ khoen tsîn ge ǁnâuǃā ǁoa, ǀgôa-i mati ǁgûs ǁhās ǃnâ ra kai ǀgausa.

9. Jehovab mati nî hui dasa da ǀū ǃkhais ǃaroma da mati nî tsâ tsoatsoa?

⁹ ǀŪ da nîs ga io Jehovab mati nî hui da sao da ge a îganǀgē ǁkhā mîǁguiga dīsa. ǀNîsi da ge ǃkho-aoasen ǁkhā aoǁnâ sîsenni ǃnâ ǃnāsase dīsa. Aiǁgause ǀgui ǃgupu ûiba ūhâs tamas ka io ǂhâsib hâba sī aoǁnâsa. Sida mîǁguiga da ga sīǃnâ tama io da ge ǀnîsi a ǂâi ǁkhā Jehovab sida ǀkha a ǂkhîoǃnâ ti. Tamas ka io da ge aoǁnâ sîsenni ǃnâ ǃnāsase a dī ǁkhā xawe da ge Elobmîsa da ra ǁkhāǁkhā khoe-e ūhâ tama hâ tamas ka io da ge ǀapeǂhumis ǃnâ ǀō-aisa xūn ai ra sîsen xawe ǂgui ǃgomsina ra hōǃâ. Nēn xa ǃaromhe hâse da ge a tsâ ǁkhā Jehovab hui da tama hâsa.

10. Mâ ǂhâǂhâsa ǀgauga da a omkhâi ǁkhā, Jehovab tae-e nî dī ǃkhaisa da a ǀū xui-ao?

¹⁰ Jehovab mati nî hui da ǃkhaisa ǀūs ge ra hui da î da ǃgâi ǀgauga omkhâi, aiǁgause ǃgamǃgamsenxasiba. Mûǂan da ge ra Jehovab ǂâidi tsî ǀgaub sada din xa a ǀgapisa. (Jes. 55:​8, 9) ǁKhāǁkhāsen da ge ge Jehovab ai ǂgomǃgâsa tsîb ǁîba hoa xūna nî kōǃgâsa. ǃGâi ǀamǂoasa da ga aoǁnâ sîsenni tamas ka io ǀapeǂhumis sîsengu ǃnâ hō, o da ge Jehovaba ǁîb anu hâ ǂkhaisiba nî mā. (Psa. 127:1; 1Kor. 3:7) Mâsigu ga ǂâi da ra khami ī tama ī xawe da ge ǂâis ǃnâ nî ūhâ Jehovab hoa xūna ra mûsa. (Jes. 26:12) ǁKhā da ana da ge dī tsî ra ǂgomǃgâ Jehovab nî hui dasa. ǂGomǃgâ da ge ra Jehovab ǂhâ da hâ daoǁgausa nî mā dasa. Buruxa ǀgaub ǃnâb ga nēsa dī tama i xawe ǃkharuge ǁaeb khami.—ǃNǃkh. 16:​6-10.

11. Mâ ǂhâǂhâsa xūna da a ǂan?

¹¹ ǂAn da ge a Jehovab ge hoaǁae ǀnamxaǃnâ, ǂhanu-ai tsî gā-ai. Jehovab ge sida kaise a ǀnam ǁîb tsî sida ǃgâsana da ra dība xūn ǃaroma. ǂAn da ge a Jehovab hoaǁae ǁîb ǃoagu a ǂgomǂgomsana ra mādawa-amsa.—Heb. 11:6.

ǁARI NÎ Ī-E DA GE ǀŪ

12. Tae-e da Jakobub 4:​13, 14 sa xu ra ǁkhāǁkhāsen?

¹² Khomai re Jakobub 4:​13, 14 sa. Sida ûib ǀkha i ǁari tae-e nî īsa da ge a ǀū. Nē ǃhūbaib ǃnâ da ge “ǁaeb tsî mâsib” tsîn xa ra hāǂam-e ǃâubasen tama da hâse. (Aoǁn. 9:11) ǁNā-amaga da ge a ǀū ǀape da hâ xūn nî ǃgâiǃgâsa. Tamas ka io da nî ûitsamasa î da sida ǀapede dīǀoaǀoa.

13. Hānîǁaeb ǃnâ i tae-e nî ī ǃkhaisa da ǀūsa, mati ǀnî ǁaegu ai ra tsâ kai da?

¹³ ǃGomba da ǁkhā i ge a mâǀgaisa tae-i hānîǁaeb ǃnâ nî ī ǃkhaisa da ǀū xui-ao. Tae-i ǃaroma? Kaise da ga ī nî xūn xa ǂâiǂhâsen, o da ge ū da hâ ǂkhîba nî ǂoaǃnâ. Sida ûib ge ǃâubasen tama da hâ ǀgaub ǃnâ a dawa ǁkhā. Tamas ka ion ge ǁgai xūna ǃâubasen tama da hâse īǁkhā. Tsîs ge nēsa a ǂâiǂhâsen kai da ǁkhā. Tamas ka ion ga xūna ǃâubasen da hâ khami ī tama io da ge a tsûaǂgao ǁkhā.—ǂKhm. 13:12.

14. Ama ǂkhîba tae-i ai a ǃgaoǃagosa? (Ai-īsiba mû re.)

¹⁴ Tae-i ǀgui-i ga sida ûib ǃnâ ī xawe da ge a ǁgau ǁkhā Jehovaba da ǀnam bi da a ǃkhais ǃaroma ra ǃoabasa. Elobmîs ǃnaeǃkhaidi ge ra ǁgau tae-e da nî ǃâubasensa, Jehovab ǃgomsina xu nî ǁkhauba dasa. Tsîb ǁîba tae-i sida ûib ǀkha hānîǁaeb ǃnâ nî īsa mîǁgui tama hâsa. Jehovab ge a ǂan ǃgâiaǂgao da rasa hānîǁaeb ǃnâ i sida ǀkha tae-e nî īsa da a ǀū xawe. Kaise da ge nî ǂkhî ǁîb daoǁgausa da ga sida ûib ǃnâ sao tsî ǁîba ga a ǁnâuǀnamo. (Jer. 10:23) Mîǁguiga da ga dī ǁaeb ai da ga Jehovaba ǃoa kō, o da ge ǀnî mîdi ǃnâ ra mî: “ǃKhūb di ǂâis ka tsî da nî ûis ka, o da ge nē-i tsî nau-i tsîna nî dī.”—Jak. 4:15.

15. Tae-e da a ǂan hānîǁaeb xa?

¹⁵ Tsēs hoas tae-e ǃkhōǂgā hâsa da ge a ǀū xawe da ge a ǂan Jehovab ǀamo ûiba mîmâiba da hâsa ǃhūbaib tamas ka io ǀhommi ǃnâ. Jehovab ge ǂhumi tama tsî i ge xū-i xare-e ǁîba ǁkhae tide îb ǁîb mîmâidi haode dīǀoaǀoa. (Tit. 1:2) ǁÎb ǀguib ge “ǀnai tsoatsoas ai ǀams xa ge ǂanǂan.” Elobmîs ǃnâb ge Jehovaba mîmâi xūn hoan ge ge ī tsî ī ge hānîǁaeb ǃnâ nî ī xūn tsîna nî dīǀoaǀoahe. (Jes. 46:10) ǂGomǃgâsiba da ge ūhâ xū-i xare i Jehovaba ǁkhae tidesa sida ǀnamsa. (Rom. 8:​35-39) ǁÎb ge gā-aisib, ǁkhaeǂgaos tsî ǀgaib tsîna nî mā da î da mati ǀgui i ga ī xawe mâǀgai. ǂGomǃgâsiba da ge ūhâ Jehovab hui da tsî nî ǀkhaedasa.—Jer. 17:​7, 8.

ǀOASASE DA GE A ǁNÂUǃĀ ǁOA JEHOVAB MATIKŌSE A ǂAN DASA

16. Jehovaba tae-e sadu xa ǂan tsîs nēsa mati ra tsâ kai du? (Psalmdi 139:​1-6)

¹⁶ Khomai re Psalmdi 139:​1-6 sa. Sida Kuru-aob ge hoa xūna sada xa a ǂan, ǁîb ge ǂan tae-i ǃaroma da nēti tsâ tsî ra ǂâiǀgausa. Jehovab ge taena da ra mîsa a ǂan tsî tae-i sida ǂgaogu ǃnâ hâsa. ǁÎb ge dī da ra xūn hoana ǂan tsî tae-i ǃaroma da ǁnāsa ra dīsa. Gao-aob Davidi ge ge mî Jehovab hoaǁae a ǂhumisasa hui das ǃaroma. Kaise i ge a buruxa ǂansa Hoaǀgaixa Elob ǀhommi tsî ǃhūbaib tsîna ge kurub sada ǀkha ǁae hâsa. Davidi ge ge mî: “Nē ǂans ge kaise buruxaba te ǀgapiba te a tsî ta sīǃnâ ǁoa.”—Psa. 139:6.

17. Tae-i ǃaroma i ǃgomba da Jehovab ǃgâise ǂan dasa ūǃoasa?

¹⁷ ǀNîsi da ge sada khaoǃhūb, ǃhaos tamas ka io kai ǃnâ da ge ǂgoms xa ǃaromahe hâse Jehovab sida ǃnâ ǃgâiǃgâibasensa ūhâsa ǂgoms xa a ǃgombahe ǁkhā. ǃKharuge ǁaeb ǃnâ da ge dī dīsān ge a ǃaroma ǁkhā î da tsâ Jehovab tātsē sada ǂan ǂgao tama hâsa tsî sida xu a ǃnūsa. Davidi tsîn ge ǁkhā tsâsiga ǀnî ǁaegu ai ge ūhâ i. (Psa. 38:​18, 21) Tamas ka io khoe-i ǁî-i ûiba ra ǀkharaǀkhara i tsî Jehovab ǂâis ǃoagu ra ûi ǂgao i ge ǀnîsi a dîsen ǁkhā, Elob ga ǁnâuǃā te o tae-i ǃaromab da ǂgaoǀkhāte î da ǃgâibate a ǀgauga ǁnāxu?

18. Tae-i ǃaroma i a ǂhâǂhâsa ūǃoasa Jehovab sida ǂansens xa ǃnāsase a ǂan dasa? (Ai-īsiba mû re.)

¹⁸ Ūǃoa da ge nî Jehovab sida ǃgâise a ǂansa sada a ǂansens xa tsîb sada mû tama hâ ǃgâina sada ǃnâ ra mûsa. ǁÎb ge sida dīsana ra mû xaweb ge a ǂan mâǃoa khoe kai ǂgao tarasa tsîb ge kaise a ǀnam da. (Rom. 7:15) Mûǂan da gao Jehovab mâǃoa khoe da asa ra mûsa os ge ǁnāsa ǀgaiba nî mā da î da ǁîba ǂgomǂgomsase, ǂkhîb ǀkha ǃoaba.

19. Tae-e da Jehovab xa a ǂan?

¹⁹ ǂAn da ge a Jehovab ge ǀnam tsî nēs ge a ama. (1Jhn. 4:8) ǂAn da ge a ǁîb da mîba da xūn dī da nîn tamas ka io dī da tiden ǀnamdab a amaga hâsa. Tsîb ǃgâi ûiba da nî ūhâsa ra ǂhâbasa. Jehovab ge ra ǂhâba î da ǀamose ûi. ǁÎb ge xoremarib ǁguibas ǃnâ-ū nēsa ge īǁkhā kai. Jesub ge ǁō ǃkhais ǃaroma da ge noxopa ǂgomǃgâsiba ūhâ dīsa da ga xawe da Jehovaba noxopa ǃoaba ǁkhā ǃkhaisa ǁîba ra ǂkhîǂkhî ǀgaub ǃnâ. (Rom. 7:​24, 25) Sada ge ǂan ‘Elob sada ǂgaob ǂans xa a kaisa.’ (1Jhn. 3:​19, 20) Jehovab ge hoa xūna sada xa ra mû tsî ǂgomǃgâsiba ūhâ ǁîb ǂâisa da nî dī hōsa.

20. Tae-e nî hui da î da tā ǁnātikōse ǀū da an xa ǂâiǂhansen?

²⁰ Jehovab ge mâ xū-i hoa-i ǂan ǁkhā da a-e ra mîba da. ǁNā-amaga î ge ǀū da an xa ǂâiǂhansensa ǂhâbasa tama. Xawe da ge ǂhâǂhâsa an ai ǂâisa nî ǂnûi. Nēsa dīs ǃnâ-ū da ge ra ǁgau ǃgamǃgamsenxa da asa tsî da Jehovab ǃnâ ra ǂgomaiǂnûisa ǁîb ‘ǀoasa ǂansa ūhâba.’ (Job. 36:4) Nēsi da hoa xūna ǁnâuǃā tama hâ xawe da ge a ǂan Jehovab aiǃgû tsî ǀasa xūna nî ǁkhāǁkhā da ǀgarasa. Mûǂui da ge ra aiǃgû tsî sida ǀHomsi ǁGûb xa ǀasa xūna ǁkhāǁkhāsensa.—Aoǁn. 3:11.