Elobmîsats ra ǁkhāǁkhā khoena hui re în Jehovaba ǃoaba

1-2. (a) Tae-i ǃaroma i ǀnî khoen Elobmîsa da ra ǁkhāǁkhāna ra îganǀgē amaba ūǃoasa? (b) Nē ǁkhāǁkhāǃâs ǃnâ da tae-e nî ǃhoaǃgao?

JEHOVABATS nî ǃoaba tsoatsoas aiǃâts ge ǂâiǂhansen kai tsi gere xūna ūhâ i? ǀNîsits ge gere ǃao sa sîsen ǁare-aon, ǀhōsan tamas ka io omaris khoen sa ǃoagu nî dawasensa. Tamas ka iots ge ǀnîsi gere ǂâi Jehovab daoǁgaude ǁnâuǀnams kaise nî ǃgomsa. ǁNātits ga tsâ ots ge a ǂan ǀnî khoen Elobmîsats ra ǁkhāǁkhān tae-i ǃaroma a ǃgombahesa Jehovaba ǃoabas di mîǁguiba dīsa.

² Jesub ge ge ǂan-i nēti ī xūn khoena Jehovaba ǃoabasa xu a ǁkhae ǁkhāsa. (Mat. 13:​20-22) Xaweb ge ǁîba gere saona gere hui ǀgara. Nēsa dīs ǃaromab ge ǁîb ǁkhāǁkhāsabega ge hui î gu ǁnâuǃā, (1) tae-i ǃaroma i ǁîga a ǃgombasa î gu Jehovaba ǃoabasa ǁhûi. (2) Tsîb ge ǁîga ge hui î gu Jehovaba ǃnāsase ǀnam. (3) ǁÎgab ge ge hui î gu Jehovaba ǁîgu ûib ǃnâ ǂgurose mâi (4) tsîb ge ge ǁkhāǁkhā gu tae-e gu a dī ǁkhāsa mâǃoahe gu gao. Mati da Jesub ge ǁîb ǁkhāǁkhāsabega a mîba xū-e a sîsenū ǁkhā? ǀAmosib kōse ǃgâiaǂgao re ti ǀon hâ ǂkhanisa da ge ra sîsenū î da Elobmîsa da ra ǁkhāǁkhā khoena hui în amaba ǃkhōǀgara.

KHOE-E HUI Î-I ELOBA ǃOABASA RA ǃGOM KAI XŪNA ǂANǂÛI

3. Tae-e Nikodemuba gere ǁkhae îb Jesub di ǁkhāǁkhāsabe kai?

³ Nikodemub ge ge ǂhâǂhâsa ǂgaeǂgui-ao i Jodeǁîn tiba xaweb ge Jesuba saosa gere ǃgomǃgom ǃgomsiga gere hōǃâ. Jesub ǁaubexa ǃnani ǁkhâga aoǁnâ hâs khaoǃgâ ǀguib ge Nikodemuba ge mûǂan Jesub ge Elob xa sîhe hâ īsa. (Jhn. 3:​1, 2) Nikodemub ge ǃuia ǀgui Jesub ǀkha gere ǃhoa. Tae-i ǃaroma? ǁÎb ge gere ǃao Jodeǁîn ǁîb xa tae-e ra ǂâisa Jesub ǃnâb ra ǂgomsan ga ǂanǂûio. (Jhn. 7:13; 12:42) ǀNîsib ge gere ǂâi ǁîb ǀgaib tsî ǀnî ǃkhusib ǁîb tibab nî ǂoaǃnâsa Jesub di ǁkhāǁkhāsabe kaib gao.a

4. Jesuba mati Nikodemuba ge hui îb ǁnâuǃā Elob tae-e ǁîba xu ra ǂgaoǀkhāsa?

⁴ Nikodemub ge Elob ge Israelǁîna mā ǂhanuba ǃamkuse ge ǂan-i. Xaweb ge huiba ge ǂhâ hâ i îb ǁnâuǃā Jehovab tae-e ǁîba xu ra ǂgaoǀkhāsa. Jesuba mati ǁîba ge hui? Jesub ge māsenxase ǁîb ǁaeba ge sîsenu îb Nikodemub ǀkha ǃuia ǃhoa. Tsîb ge ǃgāsase Nikodemuba ge mîba tae-eb nî dīsa ǁkhāǁkhāsabe kai ǂgaob gao. ǁÎb ǁorena ǀû, ǁāǁnâ kaisen tsîb ge Elob ôab ǃnâ nî ǂgom.—Jhn. 3:​5, 14-21.

5. Mati da Elobmîsa da ra ǁkhāǁkhā khoe-e a hui ǁkhā î-i mûǂan tae-i ra ǁkhae isa Jehovaba ǃoabasa xu?

⁵ Elobmîsa da ra ǁkhāǁkhā khoe-i ga ǁkhāǁkhāsen i ra xūna ǃgâise ǃkhō xawe da ge ǁî-e nî hui în mûǂan tae-i ǁîna ra ǁkhaesa în Jehovaba ǃoaba. Sîsenni tamas ka io omaris ǁgâib ge khoe-e a ǁkhae ǁkhā î-i tā gagasise aiǃgû. Elobmîsa da ra ǁkhāǁkhā khoe-e da ge ǁaeba nî ūhâba, ǀnîsi du ge ǁî-e ǁkhau ǁkhā î-i oms ai sari tsî sadu ǀkha ǂûǀhao. ǁNās ǀkha da ge ǁî-e a hui ǁkhā î-i ǃgomsigu hîna i ūhâ-e sida ǀkha ǀgoragusa. ǁÎ-e da ge nî ǂkhâǃnâ î-i tā sida i ra ǂkhîǂkhî ǂgao amaga ǀkharaǀkharana dī xawe ǁgau Jehovaban a ǀnamsa.

6. Mati da Elobmîsa da ra ǁkhāǁkhā khoe-e hui ǁkhā î-i ǁkhāǁkhāsen i ra xūna ǁî-i ûib ǃnâ sîsenǂui? (1 Korinteǁîn 16:13)

⁶ Elobmîsa da ra ǁkhāǁkhā khoe-i ga Jehovab ǁî-e nî huis ǂgomǃgâsiba ūhâ î-i Elobmîs daoǁgaudi ǃoagu ûi, o i ge ǁkhoaǂgaosiba nî omkhâi ǁkhāǁkhāsen i ra xūna ûiǂûisa. (Khomai re 1 Korinteǁîn 16:13 sa.) Elobmîsa ra ǁkhāǁkhā khoe-i ge ǁgauǃnâ-ao-i ǀkha a ǀgopeǀnōhe ǁkhā. ǂÂi-oa re skola du gere ǂgâo mâ ǁgâuǃnâ-ao-i xa du ge ǃgâibahe i? ǀNîsi du ge ǃnūǃnâxase sadu ǂgomǃgâsib tsî dī ǁkhā du a xūn ǀkha ge hui du ǁgâuǃnâ-ao-i xa ge ǃgâibahe i. ǁKhā ǀgaub ǃnâ i ge Elobmîs ǁkhāǁkhā-ao-e Elob ra ǂgaoǀkhā xūn ǀguina ǁkhāǁkhā tama. Xawe ǁkhāǁkhā i ra khoe-e ra hui î-i ǂgomǃgâsiba ūhâ Jehovab huib ǀkha i ǁî-i ûib ǃnâ ǂhâbasa ǀkharaǀkharana a dī ǁkhāsa. Nēsa da mati a dī ǁkhā?

KHOE-E HUI RE JEHOVABA I ŪBA HÂ ǀNAMMA ǀGAIǀGAISA

7. Jesuba ǃgâ-aona mati ge hui în Jehovaban ūba hâ ǀnamma ǀgaiǀgai?

⁷ Jesub ge ge ǂan i khoe-i ga Eloba ǀnam, o i ǁkhāǁkhāsen i ra ǀgaub ǃnâ nî ûiǂgaosa. ǃNāsa ǁaebab ge ǁîb ǁkhāǁkhāsabe ga gere ǁkhāǁkhā i gu ǁîb ǀhomsi ǁGûba gu ūba hâ ǀnamma ǀgaiǀgai. Aiǁgauseb ge Jehovaba ǁgûb hîna ǁîb ǀgôana ǃgâi xūna ra māb ǀkha ge ǀgopeǀnō. (Mat. 7:​9-11) ǀNî khoen ge ǀnîsi ǀnamma ra ǁgau nî ǁgû-e ūhâ tama. Mûnan-ai re matin gere tsâsa Jesub ge ǀnamma ra ǁgau dadasab aiǁgausa māo hîna ge ǁgai xūna gere dī ǀgôaba ǃgâise a ǁkhoreǁhareba. Jesub ge khoena ge hui în mû Jehovab khoena kaise a ǀnamsa tsî ra hui ǂgaosa.—Luk. 15:​20-24.

8. Mati du Elobmîsa du ra ǁkhāǁkhā khoe-e hui ǁkhā î-i Jehovaba i ūba hâ ǀnamma ǀgaiǀgai?

⁸ Sadu tsîn ge Elobmîsa du ra ǁkhāǁkhā khoe-e a hui ǁkhā î-i ǃgam ǀnamma Jehovaba omkhâiba ǁîb ǃgâi ǀgaugu xa ǁkhāǁkhā nîs ǃnâ-ū. Mâ Elobmîs ǁkhāǁkhās hoas ǃnâ khoe-e hui re î-i ǁnâuǃā ǁkhāǁkhāsen da ra xūn ra ǁgausa Jehovab a ǀnam da ǃkhaisa. Xoremarib xa du ga ǃhoao ǁkhāǁkhā du ra khoe-e hui re î-i ǁnâuǃā, Jehovab ge nēsa hoa khoenab a ǀnam amaga ǀgui dī tama hâ isa xawe ǁî-i tsînab a ǀnam amaga. (Rom. 5:8; 1Jhn. 4:10) ǁKhāǁkhā da ra khoe-i ga ǁnâuǃā Jehovab ǁî-e kaise a ǀnamsa, os ge ǁnāsa ǁî-e a hui ǁkhā î-i Jehovaba ǃnāsase ǀnam.—Gal. 2:20.

9. Tae-e Michaela ge hui îb ǁîb ûib ǃnâ ǀkharaǀkharana dī tsî Jehovaba ǃoaba tsoatsoa?

⁹ Michael ti ǀon hâ ǃgâsab Indonesiab ǃnâ ra hâb di aiǁgausa ǃgaoǃgâ re. ǁÎb ge amab ǂnamipe ge kaikaihe xaweb ge ǁāǁnâhe tama ge hâ i. ǁÎb ge 18 kurixab ge o ǀnî hâ ǃhūba ǃoa ge ī îb lori ǃnari-aob ase sîsen. Egab ge ge ǃgamme tsîb ge ǁîb omarisa ǁnāxu tsî ǀnî hâ ǃhūb ǃnâ sī gere sîsen. ǁÎb ǀkhai ǁaeb ǃnâ ra ge ǁîb ǀgôas tsî taras tsîna Elobmîsa ge ǁkhāǁkhāsen tsoatsoa. Tsî ǀkharaǀkharana ǁîra ûib ǃnâ ge dī tsoatsoa. ǁÎb mamas ǁōb khaoǃgâb ge Michaela ge mîǁgui îb omsa ǃoa oa tsî dadasaba sī kōǃgâ tsîb ge Elobmîs ǁkhāǁkhās tsîna ge ūǃoa. ǀAmosib kōse ǃgâiaǂgao re ti ǀon hâ ǂkhanis di 27ǁî ǁkhāǁkhāǃâs di “ǃGamse ôaǃnâ re” ti hâ ǃâbab ra ǃhoaǃgao hînab ge Michaela kaise ge tsâǀkhāhe. Michaeli ge ge ā ǂâiǃgâb ge o, Jehovab ge matikōse a tsâǀkhāhesa ǁîb ôab ǃgoma ra tsâ ǀgausab ge mûo. Jehovab tsî Jesub a ǀnambisab ge ǁnâuǃā ob ge ǁnāsa kaise gere ǃgôaǃgâ tsîb ge ǁîb ûib ǃnâ ǀkharaǀkaharana dī tsî ge ǁāǁnâhe.

KHOE-E HUI RE Î-I ELOBA ǂGUROSE MÂI

10. Jesuba tae-e ge dī îb ǁîb ǁkhāǁkhāsabega hui i gu ǀkharaǀkharana dī tsî Jehovaba ǃnāsase ǃoaba? (Lukab 5:​5-11) (Ai-īsiba mû re.)

¹⁰ ǀNîn Jesub gere aoǁnâban ge ge ǂan i Jesub ge Mesia-i ǃkhaisa. Xawen ge noxopa huiba ge ǂhâ hâ i în ǁnâuǃā Jehovaba ǃoabas ǃaroman ǃgâiǂhôasa aoǁnâs ôasasiba ǂhâ hâ isa. Petrub tsî Andreab tsîkha ge ǀnai ge ǁkhāǁkhāsabe i Jesub ge ǁkhau khao îkha ǁîba ǀoasase sao-ai. (Mat. 4:​18, 19) Jakobub tsî Johaneb tsîkha ǀkha kha ge ǃgâise ǁauǃkhō sîsenni ǃnâ gere dī. (Mrk. 1:​16-20) Petrub tsî Andreab tsîkha ge mîǁguio îkha ‘ǁîkha di ǀûide’ ǁnāxu okha ge ǀnîsi ǀapeǁguina ge dī ǁîkha omaride ǂûmasa Jesuba gu ra sao hîna. Tae-e ǁîkha ge hui î gu aoǁnâ sîsenne ǂgurose mâi mari-e kurus xa? Jesub ge dī buruxa sîsengu ge ǁîgu ǂgomǃgâsiba ge ǀgaiǀgai Jehovab nî kōǃgâgusa.—Khomai re Lukab 5:​5-11 sa.

11. Tae-e da ǁkhāǁkhā da ra khoe-e a mîba ǁkhā î-i ǁî-i ǂgomsa ǀgaiǀgaihe?

¹¹ Jesub khami da ge nētsē buruxa dīga dīǁoa xawe da ge Jehovaba ǂgurose ǁîn ûib ǃnâ ge mâin aiǁgaude ǀgoragu ǁkhā. Aiǁgause ǂâi-oa i du ra Jehovab ge mati hui dusa ǀhaode du ge hâǃnâ tsoatsoao? ǀNîsi du ge sadu ǀhonkhoeb ǀkha ǀhao tsî ge ǁguiǃā tae-i ǃaroma du gaxu irga sîsen ǁoasa ǀhaode du ra hâǃnâ ǂgao amaga. ǁKhāǁkhā du ra khoe-e ǁguiǃāba re mati i ge sadu ǂgomsa ǀgaiǀgaihesa mû du geo matib ge Jehovaba a hui dusa ǁîba du ge ǂgurose sadu ûib ǃnâ mâio.

12. (a) Tae-i ǃaroma da ǃkharagagu ǃgâsana Elobmîsa da ra ǁkhāǁkhā khoena ǃoa ūsao ǁkhā? (b) Mati da vidioga sîsenū tsî ǁkhāǁkhā da ra khoe-e a hui ǁkhā î-i Jehovaba ǂgurose ǁî-i ûib ǃnâ mâi? Aiǁgau-e mā re.

¹² Nau ǃgâsan tsîn ga matin ge ǁîn ûiga dawa tsî Jehovaba ǂgurose ǁîn ûib ǃnâ mâi ǀgausa ǁkhāǁkhā du ra khoena mîba, o i ge ǃgâiba nēsa xu a ǀama ǁkhā. ǁNā-amaga da ge ǃkharagagu khaoǃhūga ūhâ ǃgâsana nî ǁkhau, în Elobmîs ǁkhāǁkhāsa da ga sī khoena māo sao. ǁÎna ǂgan re în ǁguiǃā matin ge amab ǃnâ ǂgâxasa. Tsî tae-en ge dīsa în Jehovab ǃoabasa ǂgurose ǁîn ûib ǃnâ mâi. ǁNās khaoǃgâ ǀAmosib kōse ǃgâiaǂgao re ti hâ ǂkhanis ǃnâ hâ vidiogu hîna “ǃGamse ôaǃnâ re” tamas ka io “Ôaǃnâ” ti hâ ǃâb ǃnâ hâga kō. Aiǁgause du ga 37ǁî ǁkhāǁkhāǃâsa ǃhoaǃgao, o du ge Jehovah sal ons behoeftes voorsien ti hâ vidiob ǃnâ ra ǂoaxa daoǁgaude a ǃhoaǃgao ǁkhā.

KHOE-E HUI RE Î-I MÂǃOAHESA DAN

13. Jesuba mati ǁîb ǁkhāǁkhāsabega ge aiǂhumi mâǃoahes ǃaroma?

¹³ Jesub ge ǃnākorobe ǁîb ǁkhāǁkhāsabega gere mîba nau khoen xa gu nî mâǃoahesa, ǀaokhoen tsîna ǃkhōǂgā hâse. (Mat. 5:11; 10:​22, 36) ǁŌb nîs aiǃâb ge Jesuba ǁîb di ǁkhāǁkhāsabega ge mîba Jehovaba gu ra ǃoaba ǃkhais ǃaroma gu ǃgamhe ǁkhā ǃkhaisa. (Mat. 24:9; Jhn. 15:20; 16:2) ǁÎgab ge ge ǀkhoma î gu aoǁnâ sîsenni ǃnâ ǃûisen. Aiǁgauseb ge ǁîga ge mîba î gu ǁîgu ǂgoms ǃoagu ra ǃhoa khoen ǀkha tā ǂkhaba î gu aiǃgû tsî aoǁnâ ǁkhā.

14. Mati da ǁkhāǁkhā da ra khoe-e a hui ǁkhā î-i ǁgâiǀāb ǃaroma aiǂhumisen? (2 Timoteub 3:12)

¹⁴ ǁKhāǁkhā da ra khoena da ge ǁgâiǀāb ǃaroma a aiǂhumi ǁkhā tsî ǁîna a ǁguiǃāba ǁkhā tae-en a ǃâubasen ǁkhāsa ǁîn di sîsenǁare-aon, ǀhōsan tsî ǀaokhoena xu. (Khomai re 2 Timoteub 3:12 sa.) ǀNî sîsenǁare-ao-i ge Elob daob ǃnâ i ra ǃgû amaga ǁîna a ǃhō ǁkhā. Naun ǁîn ǀaokhoen tsîna ǃkhōǂgā hâsen ge ǁîn Elobmîsa xu ra ǁkhāǁkhāsen xūna ǃkhō-am tide. Kaise i ge nî ǃgâi ǃhae ǁaeb ǃnâ ǁîn ǀkha ǁgâiǀāb xa ǃhoasa. Nē ǀgaub ǃnâ i ge ǁkhāǁkhā du ra khoe-e buru tide nē xūn ga īo tsî i ge nî ǂan tae-e i mî tamas ka io nî dīsa mâǃoahen gao.

15. Tae-e Elobmîsa da ra ǁkhāǁkhā khoe-e a hui ǁkhā î-i ǀaokhoen ǁgâiǀāba tanihō ǁkhā?

¹⁵ Elobmîsa du ra ǁkhāǁkhā khoe-i ga ǀaokhoen xa mâǃoaheo, ǁî-e hui re î-i ǂâi tae-i ǃaroma i ǁî-i ǀaokhoe-e ǁaixa hâsa, Jehovab ǃoaba-aon ǀkhan Elomîsa ra ǁkhāǁkhāsen amaga. ǁÎ-i ǀaokhoen ge ǀnîsi ra ǂâi Jehovab ǃoaba-aon ǂhumiba ra ǁkhāǁkhā ti. Tamas ka ion ge ra ǂâi Jehovab ǃoaba-aon a ǁgai khoesa. Jesub tsîn ge ǃgomsina gere hōǃâ ǁîb di ǀaokhoena xu. (Mrk. 3:21; Jhn. 7:5) Elobmîsa du ra ǁkhāǁkhā khoe-e ǁkhāǁkhā re î-i ǃnūǃnâxa tsî ǃgâi ǀgaub ǃnâ ǁî-i ǀaokhoen tsî naun ǀkha ǃhoa.

16. Mati da Elobmîsa da ra ǁkhāǁkhā khoe-e hui ǁkhā î-i ǃgâi ǀgaub ǃnâ ǁî-i ǂgomsa ǁguiǃā?

¹⁶ ǀAokhoen ga ǃgâiǃgâibasensa ǁgauo, i ge Elobmîsa du ra ǁkhāǁkhā khoe-e gā-aisiba nî ǁgau hoa xūna i ga ǀgui ǁaeb ai ǁguiǃā tama io. ǁNāsa i ga dīo i ge ǀaokhoe-e ǁnâu i ra xūn xa ǂguibahe tsî sao ra ǃnās ai ǁî-i ǂgoms xa ǃhoaǂgao tide. ǁNā-amaga ǁkhāǁkhā du ra khoe-e hui re ǁî-i ǂgoms xa ǀguiǃgupu ǀgaub ǃnâ ǃhoasa, î-i ǀaokhoe-e sao ra ǃnās ai noxopa ǃgâ ǁkhā. (Kol. 4:6) ǀNîsi î ge ǁî-i ǀaokhoe-e a ǁkhau ǁkhā î-i jw.org sa sari. Nē ǀgaub ǃnâ i ge khoe-e ǁî-i ǁaeb ai Jehovab ǃoaba-aon xa ǁkhāǁkhāsen ǁkhā.

17. Mati da ǁkhāǁkhā da ra khoe-e a hui ǁkhā î-i nau khoen Jehovab ǃoaba-aon xa ra mî xūna ǃeream ǁkhā? (Ai-īsiba mû re.)

¹⁷ ǀNîsi du ge jw.orgs ai saogu ra ǃâgu ǃnâ “Hoaǁae ra dîhe dîdi” ti hâ ǃâba a sîsenū ǁkhā. Tsî sadu Elobmîsa ra ǁkhāǁkhā khoe-e a hui ǁkhā î-i ǀaokhoen tamas ka io sîsenǁare-aon ǀnîsi a dî ǁkhā dîdi ǃaroma aiǂhumisen. (2Tim. 2:​24, 25) ǀAmosib kōse ǃgâiaǂgao re ti ǀon hâ ǂkhanis ǃnâ, mâ ǁkhaǁkhāǃâs hoas ǀams ai “ǁKhāǁkhāsen du go xūna ǂâiǃgâs” ti hâ ǃâba sîsenū re. Elobmîsa du ra ǁkhāǁkhā khoe-e ǂkhâǃnâ re mati i khoe-e nî ǁguiǃābasa tae-e i nēsi ra ǂgomsa. Tā îganǀgē re ǁî-e ǂhâbasa huiba māsa î-i ǁî-i ǃereamsa ǃgâiǃgâi. ǁNati ī ǁgamǀhaodi ge ǁî-e nî hui ǁî-i ǂgomsa ǂgomǃgâsib ǀkha ǁkhaubasa.

18. Mati du Elobmîsa du ra ǁkhaǁkhā khoe-e ǂkhâǃnâ ǁkhā î-i aoǁnâ tsoatsoa? (Mateub 10:27)

¹⁸ Jesub ge ǁîb ǁkhāǁkhāsabega ra mîmā î gu hoa khoena aoǁnâba. (Khomai re Mateub 10:27 sa.) Elobmîsa da ra ǁkhāǁkhā khoe-i ga ǀhaohâb ǀkha aoǁnâ tsoatsoa, o î ge Jehovab huiba hōǃâ tsî ǁîb ǃnâ ǃnāsase nî ǂgomǃgâ. Mati du Elobmîsa du ra ǁkhāǁkhā khoe-e hui ǁkhā î-i nē mîǁguiba sīǃnâ? Aoǁnâs ǁaxasib ga sadu ǀhaohâb ǃnâ ǂanǂanheo, Elobmîsa du ra ǁkhāǁkhā khoe-e ǂkhâǃnâ re î-i ǂâi mati i a aoǁnâ tsoatsoa ǁkhāsa. ǁÎna ǁguiǃāba re tae-i ǃaroman ge ǂguina supubahe īsa nēti ī ǁaxasigu ǃnâ aoǁnâ tsoatsoasa. ǀNî hâ mîǁguib ǁî-i dī ǁkhāb ge wekheb ǁaegu hâ ǀhaos dawa ǃhoasa māsa. Nē mîǁguiga sīǃnâsa i ra dītsâ ǁaeb ǃnâ i ge nî ǁkhāǁkhāsen mati-i ǁî-i ǂgomsa ǃgâise a ǁguiǃā ǁkhāsa.

KHOE-E ǁGAU RE ELOBA I RA ǂKHÎǂKHÎ ǂGOASA DU RA ǂGOMSA

19. Jesuba mati ǁîb ǁkhāǁkhāsabega ge ǁgau ǁîgu ǃnâb ǂgomǃgâsiba ūhâsa tsî mati da ǁîba ǁgae ǁkhā?

¹⁹ ǀHomma ǃoab nî īs aiǃâb ge Jesuba ǁîb ǁkhāǁkhāsabega ge mîba ǀguitsē gu ǁkhapa ǁîb ǀkha ǀguipa nî hâsa. ǁÎgu ge ge ǁnâuǃā tama hâ i, Jesub ge ǁîgu ǀhomma ǃoa nî ī ǁaeba ǃoa gere ǁnaeǁgausa. ǁÎb ǁkhāǁkhāsabegu ge hoa xūna ǁnâuǃā tama hâ i xaweb ge Jesuba ǂgomǃgâsiba ge ūhâ i ǁîgu ge Jehovaba gere ǂkhîǂkhî ǂgaosa. (Jhn. 14:​1-5, 8) Jesub ge ge ǂan i ǁîb ǁkhāǁkhāsabegu ge ǁaeba ǂhâ hâ isa î gu ǀnî xūna ǁnâuǃā aiǁgause ǀhommi ǃnâ gu sī nî hâsa. (Jhn. 16:12) Jesub khami da ge Elobmîsa da ra ǁkhāǁkhā khoena nî ǁgau ǂgomǃgâsiba da ūhâsa Jehovaban ra ǂkhîǂkhî ǂgaosa.

20. Malawib ǃnâ hâ ǃgâsasa mati Elobmîsas ra ǁkhāǁkhā khoes ǃnâs ǂgomǃgâsiba ūhâsa ge ǁgau?

²⁰ ǂGomǃgâsiba da ge nî ūhâ Elobmîsa da ra ǁkhāǁkhā khoe-i ǂhanu xū-e ra dī ǂgaosa. Chifundo ti ǀon hâ ǃgâsas Malawib ǃnâ ra hâs di aiǁgausa ǃgaoǃgâ re. Katolik kerkheb ǂkhamkhoes Alinafes ti ǀon hâs ǀkhas ge Elobmîs ǁkhāǁkhāsa ǀAmosib kōse ǃgâiaǂgao re ti hâ ǂkhanis ǃnâ ge tsoatsoa. Chifundos ge Elobmîsas ra ǁkhāǁkhā khoesa 14ǁÎ ǁkhāǁkhāǃâs ǀams ai ge dî, tae-es ra ǂâisa ai-īsiga ǃoabas ǃnâ sîsenūs xa. Alinafes ge ǁaixa tsî ge mî, “ǁnāb ge ti mîǁguiba tita ge ǂhâba ta gara o ai-īsiga sîsenū ǁkhā.” ǁNās khaoǃgâs ge Chifundosa gere ǂâi Alinafes Elobmîs ǁkhāǁkhāsa nî ǀûsa. Xawes ge Chifundosa, Alinafesa ǃnūǃnâxase Elobmîs ǁkhāǁkhāsa ge mâ ǀguitsēs nî ǁnâuǃās ǃâubasensa ūhâse. ǀOro ǁkhâga ǃkharu tsîs ge Chifundosa Alinafesa 34ǁî ǁkhāǁkhāǃâs ǃnâ hâ dîsa ge dî: “Sadu Elobmîs ǁkhāǁkhās tsî ama Elob Jehovab xa ǂansa, mati nēsis kōse go hui du?” Chifundos ge ge mî matis ge Alinafesa ǃereamsa, “ǁîs ge ǂgui ǃgâi xūna ge mî ǀgui ǃgâi xu-i hîna ge mâǂoa i ge Jehovab ǃoaba-aon Elobmîs ǂkhā hâ xūna dī tamasa.” ǁNās khaoǃgâs ge Alinafesa ai-īsiga sîsenūsa ge ǀû tsî ge ǁāǁnâhe.

21. Elobmîsa da ra ǁkhāǁkhā khoe-e da mati a hui ǁkhā î-i Jehovaba ǃoabasa mîǁgui?

²¹ Jehovab ra ‘ǂguiǂgui’ xawe da ge sida tsîna ǃâ-e ūhâ Elobmîsa da ra ǁkhāǁkhā khoena huisa în aiǃgû amab ǃnâ. (1Kor. 3:7) Elob ra ǂgaoǀkhā xūn xa da ge ǁî-e ǃnāsa-e ra ǁkhāǁkhā ǁî-e da ge ra hui î-i Jehovaba ǃgam ǀnamma ūhâba. ǁÎ-e da ge ra ǂkhâǃnâ î-i Jehovaba ǂgurose mâi tsî ǀnamma ǁgau. Tsî da ge ǁî-e ra ǁkhāǁkhā mati-i Jehovab ai nî ǂgomaiǂnûisa ǃgomsiga i ga hōǃâo. Elobmîsa da ra ǁkhāǁkhā khoena da ga ǁgauo ǁîn Jehovaba ra ǂkhîǂkhî ǂgaosa da ra ǂgomsa, o da ge ǁî-e ra hui î-i ǁkhoaǂgaosiba ūhâ Jehovaba ǃoabasa ǁhûisa.