Jehovab ǀûbasa ūǃoa

1-2. Jehovab sida ǁorena ra ǀûbasa da ga mûǂano da mati ra tsâ? (Tsoatsoas ai hâ ai-īsiba kō re.)

GAO-AOB Davidi ge ge ǂan i mati i ra tsâsa dīts ge ǁoren xa ǀhapitsâsensa. (Psa. 40:12; 51:3) ǁÎb ge kaise tsū ǁorena ǁîb ûib ǃnâ ge dī. Xaweb ge ge ǃhobasen tsîb ge Jehovaba ǁîba ge ǀûba. (2Sam. 12:13) Davidi ge kaise ge ǃgâiaǂgao mûǂan nî geo, Jehovab ge ǁîba a ǀûbasa.—Psa. 32:1.

² Sida tsîn ge a ǃgâiaǂgao ǁkhā mûǂan da gao Jehovab ǀkhomxa da tsî sida ǁoren tsîna ra ǀûbasa. Kaise i ge ra ǁkhaeǂgao da ǂansa tsū ǁore-e da ga dī tsî da ga ǃhausen ob Jehovaba nî ǀûba dasa. ǁNās ǀkha da ge ǁîba ǃoa ǀgore, ǀhaohâb ǃûi-aogu ǀkha ǃhoa tsî ǁkhā da an hoana nî dītsâ î da tā ǁkhā ǁorena dī. (ǂKhm. 28:13; ǃNǃkh. 26:20; 1Jhn. 1:9) Kaise da ge ra ǃgâiaǂgao Jehovab sida ǁorena ra ǀûbasa tsîb ǁkhapa ǁnā ǁoren ǃaroma ǁkharada tidesa.—Ese. 33:16.

3-4. ǀGui ǃgâsasa mati ge tsâ ǁāǁnâs khaoǃgâ tsî tae-e da nē ǁkhāǁkhāǃâs ǃnâ nî ǃhoaǃgao?

³ ǀNî ǁaegu ai da ge amase a îganǀgē ǁkhā Jehovab ǀûba da hâsa. Jennifer ti ǀon hâ khoes aiǁgausa ǃgaoǃgâ re amab ǃnâ ge kaikaihesa. ǁÎs ǂkhamsis ǃnâs ge ǁgai xūna ge dī tsoatsoa tsî ǁîs ǁgûra xu gere sâu. Xawes ge kuriga ǃkharu tsî ǀkharaǀkharana ǁîs ûib ǃnâ dī, Jehovab ǃoa māǁnâsen tsî ge ǁāǁnâ kaisen. ǁÎs ge ra mî: “Tita ge ǃkharuge ǁaeb ǃnâ ǁgauoǃnâ ûiba gere ûi tsî mari-e kurus ai ǀgui ǂâisa ge ǂnûi hâ i. ǂan ta ge ge i Elobmîs ra mîsa Xristub ǁguibas ǃnâ-ū ǀguib Jehovaba sida ǁorena a ǀûba ǁkhāsa. ǃHobasen tsî ta ge Jehovab ai ǀûbaba a ǂgan xawe ta ge ge ǂgom tama hâ i ama ǀûba teb ge sa.”

⁴ ǀNî ǁaegu ai du ge ǀnîsi ra tsâ Jehovab noxopa ǁaixa ū du hâsa ǀkharuge ǁaeb ǃnâ du ge dī dīsān ǃaroma. Xawe ǂâi-oa re Davidi ge mati Jehovab ǀkhomxasib xa gere tsâ ǀgausa. ǁÎb ge ǂgomǃgâsiba ge ūhâ i Jehovab ge ǀûbabisa. ǁÎb a ǀkhomxaǃnâ Elo amaga. Jehovab ge sada tsîn ti nî tsâ ǃkhaisa ra ǂhâba. Nē ǁkhāǁkhāǃâs ǃnâ da ge nî ǃhoaǃgao tae-i ǃaroma i a ǂhâǂhâsasa Jehovab ǀûbasa ūǃoasa tsî tae i nî huisa ǁnāsa dīsa.

JEHOVAB ǀÛBASA ŪǃOA

5. ǁGâuaba tae-e da nî dīsa ra ǂhâba? Aiǁgau-e mā re.

⁵ Jehovab amase a ǀnam da tsî ge ǀûba dasa da ga ǂgom, o da ge ǁGâuab ǂhumiba ǃgâ tide. ǂÂis ǃnâ da ge nî ūhâ ǁGâuab ge ǁkhāb a i hoa-e nî dītsâ î da Jehovaba ǃoaba ǀû. Aiǁgause, ǁGâuab ge ra dītsâ î da ǂgom Jehovab sida ǁorena ǀûba tama hâsa. Korintes khoeb xa ǂâi re, ǀai tsî ge ǀhaohâba xu a ūǂuiheba. (1Kor. 5:​1, 5, 13) Aob ge ǃhobasen ob ge ǁGâuaba gere ǂhâba în ǁnān ǀhaohâb ǃnâ hâna tā ǁnā aoba ǀûba tsî ǀhaohâb ǃnâ ǁkhoreǁhare. Tsîb ga ǀhaohâba nē khoeba ǀûba tama ī, ob ge ǁîba ga tsâ hâ Jehovab ǁîba tātsē ǀûba tidesa. Tsîb ge Jehovaba nēs xa ǃaroma-e hâse ga ǃoaba ǀû hâ. ǁGâuab ge dawa tama hâ tsîb ge ǁkhā ǀgauba nētsē ra sîsenū. Xawe da ge ǁGâuab “ǀapede” a ǂan.—2Kor. 2:​5-11.

6. Mati da dī da ge ǁoreb ǀhapitsâsensa xu a ǃnora kaisen ǁkhā?

⁶ Jehovab ǀûba da hâsa da ga ūǃoa, o da ge ǀhapitsâsensa xu ra ǃnora kaisen. ǁOre da ga, o da ge khoeda ase ra ǀhapitsâsen. (Psa. 51:17) Nēs ge kaise a ǃgâi sida ǃgâiǂâis ra hui da amaga î da dīsā da go xū-e ǃgâiǃgâi tamas ka io ǀkharaǀkharana dī. (2Kor. 7:​10, 11) Xawe da ga aiǃgû ǀgara tsî ga tsâ Jehovab ǀûba da tama hâsa, os ge nēsa a ǃaroma ǁkhā î da ǁîba ǃoaba ǀû. Jehovab ǀûba da hâsa da ga ūǃoa, o da ge ǁnā ǀhapitsâsens di tsâsiga nî ǁnāxu. Nēs nî hui da xui-ao î da aiǃgû tsî Jehovaba ǃoaba ǂgomǃgâsiba ūhâse, ǁîb sida ǀkha a ǂkhîsa tsî da ge ǃgâiaǂgaob tsîna nî hōǃâ. Tsî Jehovab ge ǁnāsa ra ǂhâbaba da. (Kol. 1:​10, 11; 2Tim. 1:3) Xawe tae-e da a dī ǁkhā î da ǂgomǃgâsiba ūhâ Jehovab ra ǀûba dasa?

TAE-E A HUI DA ǁKHĀ JEHOVAB ǀÛBASA ŪǃOASA?

7-8. Jehovaba mati Moseb aiǃâ ge mâi-aiǃâsen tsî nēsa mâ ǂgomǃgâsiba ra mā da? (Eksodus 34:​6, 7)

⁷ Jehovab ge ǁîb xa tae-e a mîs xa ǂâiǃgâ re. Aiǁgause, ǃgaoǃgâ tae-eb ge Jehovaba Sinaiǃhommi ai Moseba a mîbasa.a (Khomai re Eksodus 34:​6, 7 sa.) Jehovab ge ǂgui îxa ǀgauga ūhâ. Xaweb ge ge ǁhûi Moseba mîbasa ǁîb a “ǀkhomxasib tsî ǀhommi” di Elosa. ǁNāti i Eloba ǁîn ǁorena xu ra ǃhobasen khoena ǀûba tide? Tātsēs tsîna. Jehovab ge tātsēs tsîna ǁnāti ī ǁgai ǀgaub ǃnâ tanîsen tide.

⁸ ǂGomǃgâsiba ta ge a ūhâ ǁkhā Jehovab ga mî ǁîb a ǀkhomxasib Elo, ob ǂhumi tama hâsa. (Psa. 31:5) ǁNās ǀkha da ge ǁîb ra mî xū-i hoa-e a ǂgom ǁkhā. ǃKharuge ǁaeb ǃnâ du ge dī ǁoren xa du ga noxopa ǀhapitsâseno, sao rase dîsen re: ‘Tita ra ǂgom Jehovab amase ǀkhomxaǃnâ tsî a khoexaǃnâsa tsîb tātsē ǃhobasen hâ khoe-e ǀûba tidesa? Nēsa du ga ǂgom, o du ge ǂgomǃgâsiba a ūhâ ǁkhā ǁîb sats tsîna nî ǀûbasa.’

9. Sida ǁorena ǀûbahesa tae-e ra ǂâibasen? (Psalmdi 32:5)

⁹ Jehovab ǁîb ǀûbaǀnamxasib xa Elobmîs ǃnâ tae-e ra ǁkhāǁkhā das xa ǂâiǃgâ re. Elobmîs xoa-aob Davidi ge Jehovab ǀûbaǀnamxasib xa ǁguiǃā ǀgauba ǃgaoǃgâ re. (Khomai re Psalmdi 32:5 sa.) Davidi ge ge mî: “Tsîts ge ti ǂkhawab tsî ti ǁoreba ge ǀûbate.” Hebreǁî mîs ǀûba ti hâs ge ra ǂâibasen xū-e “ūkhâi,” “ūbē” tamas ka io “tanîbēsa.” Jehovab ge Davida ǀûba ob ge gere tsâ Jehovab ge ǃgom xū-e ǁîb di ǁgarade xu a ūbē khami. Jehovab xab ge hoase ǀûbahesab ge mûǂan ob ge kaise ge ǂkhî i. (Psa. 32:​2-4) Sada tsîn ge ǁkhā ǂkhîba hōǃâ ǁkhā. Ama ǃhobasen da ga, o da ge ǀhapitsâsens di tsâsiga tani tide.

10-11. ‘ǀÛbaǀnamxa’ ti hâ mîde tae-e Jehovab xa ra ǁkhāǁkhā da? (Psalmdi 86:5)

¹⁰ Khomai re Psalmdi 86:5 sa. Davidi ge ra mî Jehovab a “ǀûbaǀnamsa.” Nēs ge ra ǂâibasen Jehovab dīsā da gao, ǃhaese ǁaixa tama hâsa. Hoaǁaeb ge ǃhobasen ǂgao rana ra ǀûba ǂgao. Tae-i ǃaromab ǁnāti ī? Xoas ge sao rase ra ǁguiǃā: “Tsîts ge ǃnāǂamsa hâhâ ra ǀnamma ǁnān satsa ra ǂgaiǀîna ūba hâ.” ǃKharugo ǁkhāǁkhāǃâs ǃnâ da ge go ǁkhāǁkhāsen, Jehovab ra mîmâisa ǁîba ǀnamnab ǂgomǂgomsa ǀnamma nî ǁgausa. ǁÎb ǂgomǂgomsa ǀnammi ǃaromab ge ǃhobasen ran hoana nî ǀûba. (Jes. 55:7) Elob ǀûbaǀnamxasiba ūǃoas xa du ga ǃgombahe o du ge a dîsen ǁkhā: ‘ǂGom i ta ra Jehovab a ǀûbaǀnamxasa tsîb ǃhobasen ran hoana nî ǀkhomxasa? ǁNāsa ta ga ǂgom, o ta ge ǂgomǃgâsiba ūhâ ǀûbateb nîsa ǀkhommi tsî ǀûbab tsîna ta ga ǂgano.’

¹¹ Elobmîs ge ra mî Jehovab ra ǁnâuǃāsa mâǃnôa khoeda asa. Tsî da ǀoasa kurusa ūhâ tamasa, ǁnās ge ra ǁkhaeǂgao da. (Psa. 139:​1, 2) Nēs ge ǀnî Psalmdi Davidi ge xoadi ǃnâ ǃgāsase ra ǂoaxa. Tsî a hui da ǁkhā î da Jehovab ǀûbaǀnamxasiba ūǃoa.

JEHOVAB RA ǂÂIHŌ XŪNA TĀ ǀURU

12-13. Jehovaba tae-e ra ǂâihō tsî matib ra hâ ū da? (Psalmdi 103:14)

¹² Khomai re Psalmdi 103:14 sa. Davidi ge ǀgui ǃaromasa ra mā tae-i ǃaromab Jehovaba ǃhobasen rana ra ǀûbasa. ǁÎb ge ra mî Jehovab ge ‘tsaras ǀguisa da īsa’ ǂâis ǃnâ ūhâ. ǁNās ge ra ǂâibasen ǁîb ge hoaǁae ǂâis ǃnâ ūhâ ǀoasa kurusa da ūhâ tama hâsa. Hā re î da ǃnāsase ǂâi nēs tae-e ra ǂâibasensa.

¹³ Davidi ge ra mî Jehovab “mâ kuruǃnôada asa a ǂan” ǃkhaisa. Jehovab ge Adamma “ǃhūb di tsaraba xu” ge kuru. ǁNā-amagab ge a ǂan khoen mati īsa tsî tae-en ǂhâ hâsa. Aiǁgausen ge ǂûs, ǁoms tsî ǀoms tsîna ǂhâhâ. ǀOasa kurusa ūhâ khoen tsîn ge nē xūna ǂhâhâ. (Gen. 2:7) Adammi tsî Eva hâra ge ǁore ob ge khoesiba ge tsara kai. Tsara da a amaga da ge ǀoasa kurusa ūhâ tama hâ. Jehovab ge nēsa ǃamkuse a ǂan. Xawe Davidi ge ge mî Jehovab ra ǂâihō “tsara” da asa, ob ge gere ǂâibasen Jehovab a ǂansa ǁore-ao da asa. ǁNās ǀkhab ge ra ǀkhomxaǃnâ da. Davidi di mîdi ge ra ǂâibasen Jehovab ge ra ǀnâuǃā ǁore-e da a dī ǁkhāsa. Xawe da ga ǃhobasen, ob ge ra ǂkhaǃnâhe ǀkhomxa tsî ǀûba dasa.—Psa. 78:​38, 39.

14. (a) Davida tae-e ra mî Jehovab ra ǀûba da ǀgaub xa? (Psalmdi 103:12) (b) Tae-e da Jehovab ge Davida ǀûba ǀgauba xu ra ǁkhāǁkhāsen? (Boksis “Jehovab mati ǀûba tsî ra ǀuru” ti hâsa mû re.)

¹⁴ Tae-i tsîna nî hui da î da ǂgomǃgâsiba ūhâ Jehovab ge ǀûba dasa? (Khomai re Psalmdi 103:12 sa.) Davidi ge ra mî Jehovab ga sida ǁorena ūbē, ob “aiǂoas huriǂoasa xu ǃnūs” khamib sida ǁorena ra ūbēsa. Sores ǂgâs tsî sores ǂoas tsîn ge tātsē ǀhao tide. Nēsa tae-e Jehovab ge ǀûba ǁoren xa ra ǁkhāǁkhā da? ǀGui ǂkhinis ge nē xoas xa ǁguiǃā tsî ra mî: “Elob sida ǁorena ǃnūse sida xu ra ūbēsa.” Nēs ge tātsē ī tama hâ i khami i ge a mûsen ǁkhā. ǁNās ǀkha da ge ǂgomǃgâsiba a ūhâ ǁkhā ǁîb nēs xa ǂâi tidesa tamas ka io hōhōǃnâ da tidesa. ǂÂis ǀguisa dī re hâmhâm xū-i tamas ka io ǂû-i tsîn ge ǀnî ǁaegu ai ǃkharuge xūn xa ra ǂâi kai da. Xawe Jehovab ga ǀûba o i ge xū-i go ī tama hâ i khami ra mûsen. ǁÎb ge nē-e tātsēs tsîna ǂâi-oa tide.—Ese. 18:​21, 22; ǃNǃkh. 3:19.

15. Tae-e da nî dī ǃkharuge ǁaeb ǃnâ da ge dīsā ǁoren xa da ga noxopa a ǀhapitsâseno?

¹⁵ Davidi mîdi Psalmdi 103 ǃnâ hâde mati a hui da ǁkhā î da Jehovab ǀûbaǀnamxasiba ūǃoa? ǃKharuge ǁaeb ǃnâ da ge dī ǁoren xa da ga ǀhapitsâseno da ge sao ra xūn xa a ǂâiǃgâ ǁkhā: ‘ǂÂi re Jehovab mati ra tsâsa. ǁÎb ge ra ǂâihō sadu ǀoasa kurusa ūhâ tamasa. Jehovab ge ǃhobasen ran hoana ra ǀûba. ǁNāsa du ge dī hâ. ǂÂi-oa re Jehovab ge mîǁguisa ǁîb sadu ge dī tsî ǀûba du ǁorena ǂâi-oa tidesa. ǁNā-amagab ge ǂgari-am du tamas ka io ǁhara du tide ǁnā ǁoren ǃaroma.’ Jehovab ge ǃkharuge ǁaeb ǃnâ da ge dīsa ǁoren ai ǂâisa ǂnûi tama hâ. Tsî da ge sida tsîna ǁnāsa dī tide. (Psa. 130:3) Jehovab ge amase a ǀûba dasa da ga ǂgomǃgâ, o da ge ǀhapitsâsen tide tsî ǁîba ǂkhîb ǀkha nî ǃoaba ǀgara.

16. Aiǁgau-e mā re ǁgau rasa mâtikōse i a ǁkhōǁkhōsasa Jehovab ge ǀûba ǁoren xa ǂâiǀgarasa. (Ai-īsiba mû re.)

¹⁶ Sao ra aiǁgausa ǃgaoǃgâ re. Autosa ra ǃnari khoe-i ge ǁaeba xu ǁaeb ǀkha autos ǃnâ hâ spils ǃnâ a kō ǁkhā ī-i mû tae-i ǁîb ǃgâbi ra īsa. Xawe i ge a ǁkhōǁkhōsa ǁkhā ǁî-i ga hoaǁae nēsa ga ra dīo. ǃNorasase ǃnaris ǃaromab ge daob ai nî kō ǁnās ǁkhās khami i ge a ǃgâi ǀnî ǁaega dīsā da ge xūn xa ǂâisa. ǁNāsa dīs ge nî hui da î da tā ǁkhapa ǁnā dīsāna dī. Jehovab ge ǀûba da dīsān xa da ga ǂâiǀgara, o da ge sida ǂkhîba a ǂoaǃnâ ǁkhā. Tsîs ge nēsa a ǃaroma ǁkhā î da Jehovaba ǃoaba ǀû. ǁNā-amaga a da aiǃgû tsî Jehovaba ǃoabas ai ǂâisa ǂnûi. Tsî ǁnā ǁaeb ǃkharuge xūn “ǂâihōhe” tideba ǃoa mûǂui.—Jes. 65:17; ǂKhm. 4:25.

SADU ǂGAOB ǃNÂ ǂGOMǃGÂSIBA ŪHÂ

17. Tae-i ǃaroma da ǂgomǃgâsiba sida ǂgaob ǃnâ nî omkhai Jehovab a ǀnam da tsîb nî ǀûba dasa?

¹⁷ Sada ǂgaob ǃnâ da ge ǂgomǃgâsiba nî omkhai Jehovab a ǀnam da tsîb ge ǀûba dasa. (1Jhn. 3:19) Tae-i ǃaroma? ǁGâuab ǀû tide amaga ǂgomǃgâ kai dasa Jehovab xa da ǀnamhe tama tsî ǀûbahesa anu tama hâsa. ǁGâuab di mîǁguib ge noxopa a ǀgui. ǁÎb ge ra ǂhâba î da Jehovaba ǃoaba ǀû. ǀAms ra ǀgū khamib ge ǃgarise nî dītsâ ǁnāsa dīsa. ǃNubu ǁaerobab ūhâsab a ǂan xui-ao. (J.ǂHa. 12:12) Xawe da ge ǁGâuaba ǃkhamǃoa tsî Jehovaba ǂgomǂgomsa se nî ǃoaba ǀgara.

18. Tae-e nî hui du ǂgomǃgâsiba ǂgaob ǃnâ omkhâisa Jehovab a ǀnam du tsî nî ǀûba dusa?

¹⁸ ǃKharugo ǁkhāǁkhāǃâs ge go ǁgau tae-e du nî dīsa î du ǂgomǃgâsiba ūhâ Jehovab a ǀnam dusa. Nē ǁkhāǁkhāǃâs ge go ǁkhāǁkhā du mati du ǂgomǃgâsiba nî ūhâsa Jehovab ǀûba dusa. Aiǁgause, Jehovab ge tae-e ǁîb xa a mîsa tā ǀuru. Elobmîs tae-e Jehovab ǀûbaǀnamxasib xa ra mîsa ǂâiǃgâ re. Ta ǀuru Jehovab a ǂansa ǀoasa kurusa du ūhâ tama hâsa tsîb nî ǀhomxa dusa. Tsî ǂâis ǃnâ ūhâ Jehovab ge ǀûbab gao, hoase ra ǀûba. ǁNās ǀkha da ge Davidi ge Jehovab ǀkhomxaǃnâsib ǃnâ ūhâ i ǂgomǃgâsib tsîna nî ūhâ. Tsî ǁnās ǀkha a mî ǁkhā, “gangan Jehova ti ǁorena du ra ǀûba te ǃkhais ǃgao.”—Psa. 32:5.