ǃHūbaib ge ra ǁgaiǁgaihe—Elobmîsa tae-e ra mî?

“Khoen ge ǂgui xūna ra dī hîna saora xūna nî ǃaromana. Kai ǃādi ge ǁgammi xa nî dâuhe. Noxoba da hōǃâ tsâ tama hâ ǀgam-i. ǃAoroxa tsî ǂoaxa ǀnanub. ǂGui ǃkhaigu ge ǂau hâ ǁgam-e ūhâ tide. Miliundi hain tsî xamanin tsîn ge nî ǁōǂoa. Nē xūn ge nî ama ī. Kurus ǂans khoen dī hâ ôaǃnâs ge ra ǁgau nē xūn nî ī ǃkhaisa, ǂhanugu ga ǃhūbaiba xu gu ra hō xūna gu ra sîsenū ǀgauba dawa tama io.”—ǃHoas hîna ge António Guterres, United Nations di secretary-general danab xa a māhes, Intergovernmental Panel on Climate Change ǃnurib hîna ge Aprili 4, 2022ǁî kurib ai māhes xa.

“Kurus ǂansa ūhâ khoen ge ra mî saora kurigu ǃnâ i 423 parku hîna Amerikab ǃnâ hâga ǁkhōǁkhōsa mâsib ǃnâ nî mâihesa ǀgami xa. ǁGai xūn hîna nî īn ge Elobmîs ǃnâ xoahe hâ tsūkeǃgâgu khami ra ǀō: ǀaeǂkhubib tsî ǁgammi dâus, ǃhūbaib di kai ǃnaredi tsunis, hurib ǁgam-e ǀgapi tsî kaise ǀgaisa ǀgami.”—“Flooding Chaos in Yellowstone, a Sign of Crises to Come,” The New York Times ǂhôa ǂkhinib, Junib 15, 2022.

ǃHūbaib ǀkha ra ī ǃgomsina ǃgâi i nî? ǁNās ga ama o, ham-e nî ǃgâiǃgâi? Kō re Elobmîs tae-e ra mîsa.

ǃHūbaib ǀkha ra ī ǃgomsin ge ǀnai ge kēbohe

Elobmîs ge ra mî Elob ge ‘ǁnān hîa ǃhūbaiba ra hîkākāna nî hîkākā.’ (ǂHaiǂhais 11:18) Nē xoas ge ǃnona xūna ra ǁkhāǁkhā da:

1. 1. Khoen ra dī xūn ge ǃhūbaiba nî ǁgaiǁgai.

2. 2. ǃHūbaib ge ǀamose ǁgaiǁgaihe tide.

3. 3. Elob ge ǃhūbaib ǀkha ra ī ǃgomsina nî ǀam kai. Khoen ge ǁnāsa dī tide.

ǃHūbaib ge hānîǁaeb ǃnâ ǃgâi mâsiba nî ūhâ

‘ǃHūbaib ge ǀamos kōse ra hâhâ,’ dis ge Elobmîsa ra mî. (Aoǁnâ-aob 1:4) Ûitsama xūn ge hoaǁae ǃhūbaib ai nî hâ ǀgara.

•  “ǂHanu-ai khoen ge ǃhūba ǀumi tsî ǀamose ǁîb ǃnâ nî ǁan.”—Psalmdi 37:29.

ǃHūbaib ǀkha ge ī ǁgai xūn hoan ge nî dī-ūnuhe.

•  “ǃGaroǃhūb tsî ǂnâsa ǃhūb ge nî dâ, ǀgopaǃhūb ge ǃgâiaǂgao tsî nî ǁhare, lelib khami.”—Jesajab 35:1.