Tae-i ǃaroma du ǃgôaǃgâsiba nî ǁgau?

1. Jesub ge ǂgauǂgau Samariaǁîba mati ǃgôaǃgâsiba ge ǁgau?

DISI khoegu hîna ǃgomsib ǃnâ ge hâ i gu. ǁÎgu ge ǃomamaxasib ǀaeba ge ūhâ i tsî ǃâubasen-e ge ūhâ tama hâ i. Xawe gu ge Jesub ǃgâi ǁkhāǁkhā-aoba ǀgui tsē ǃnūseba xu ge mû. ǁÎgu ge ge ǁnâu Jesub hoaraga ǀaena ra ǂgauǂgausa tsî ge ǂgom ǁîgu tsînab a ǂgauǂgau ǁkhāsa. Tsîgu ge ge ǂgaibi: “Jesu, ǁkhāǁkhā-aotse, ǀkhomxa ge re” nē disi khoegu ge ge ǂgauǂgau-e. Hoagu ge Jesub di tsamtsiǃnâsiba gere ǃgôaǃgâ. Xawe ǀguib ge nē tsamtsiǃnâsiba ǃgôaǃgâs ǀguisa ge hî tama hâ i tsî mîdi ǃnâ-ū Jesuba ge mîba mati kōseb nēsa ra ǃgôaǃgâsab. ǁNā ǂgauǂgau-e ge Samariaǁîb ge ge ǁgari-e Eloba koasa “kai dommi ǀkha.”​—Lukab 17:12-19.

2-3. (a) Tae-i ǃaroma i a ǃgom ǃgôaǃgâsiba ǁgausa? (b) Tae-e da nē ǁkhāǁkhāǃâs ǃnâ nî ǃhoaǃgao?

² Samariaǁîb khami da ge khoexaǃnâ khoena mîdi ǃnâ-ū ǃgâiba ra ǁgau ǂgao. Xawe da ge ǁaen ai a ǀuru ǁkhā nēsa mîdi tamas ka io dīb ǃnâ-ū ǁgausa.

³ Nē ǁkhāǁkhāǃâs ǃnâ du ge nî ǁkhāǁkhāsen tae-i ǃaroma i a ǂhâǂhâsasa sadu ǃgôaǃgâsiba mîdi tsî dīb ǃnâ-ū ǁgausa. Elobmîs ǁaeb khoen ǃgôaǃgâsiba ge ǁgaun tsî ǃgôaǃgâsiba ge ǁgau tama hâ în aiǁgaude xu da ge nî ǁkhāǁkhāsen. Tsî da ge ǀgaugu hîna da ǃgôaǃgâsiba a ǁgau ǁkhā gu ǃoas tsîna nî kō.

TAE-I ǃAROMA DA ǃGÔAǃGÂSIBA NÎ ǁGAU?

4-5. Tae-i ǃaroma du ǃgôaǃgâsiba nî ǁgau?

⁴ Jehovab ge aiǁgausa ge mā da ǃgôaǃgâsiba ǁgaus ǃnâ. ǀGui ǀgaub nēsab ra dīs ge ǁnān hîna ǁîba ra ǂkhî kaina ǀkhaesa. (2Sam. 22:21; Psa. 13:6; Mat. 10:40, 41) Tsî xoadi ge ra ǂkhâǃnâ “î du Elob di ǁgaeǁgae-ao ǀnamǀnamsa ǀgôan axase.” (Efe. 5:1) ǂAm ǃaromas hîna du ǃgôaǃgâsiba ra ǁgau ǂgaos ge î du Jehovab aiǁgausa ǁgae ǁkhā.

⁵ ǀNî hâ ǃaromas hîna du ǃgôaǃgâsiba nau khoena ra ǁgaubasa ǃoa kō re. ǃGôaǃgâsib ge ǃgâi ǂû-i khami-i ǀgoragu du ga o, o i ge a ǁkhoaxa. ǃGôaǃgâhe da rasa da ge ra hōǃâ tsî da ge a ǂkhî. Sadu ǃgôaǃgâxasiba du ga ǁgau o, o du ge nau khoena ra ǂkhîǂkhî. ǃGôaǃgâsiba du ra ǁgau khoe-i ge ra ǂanǃgâ sadu ǁî-i xa du go mā-e huib tamas ka io xū-e ra ǃgôaǃgâsa. Nēs xa ǃaroma-e hâses ge sadu tsî ǁnā khoe-i ǁaegu hâ ǀhōsagusisa ra ǀgaiǀgai-e.

6. ǃGôaǃgâsib mîdi tsî ǃhuniǀuriba xu a kurusa apeldi tsîna mâ ǀgaub ǃnâ a ǀgui?

⁶ Sadu ra ǁgau ǃgôaǃgâsib ge ra ǃgôaǃgâhe. Elobmîs ge ra mî: “Mîs, ǁaeb ai ga ǃhoahes ge ǃhuniǀuri-apeldi, ǀhaiǀurixapan ǃnâ hâdi khami ī.” (ǂKhm. 25:11) ǂÂi re matikōse di ǃhuniǀuriba xu a kurusa apeldi hîna ǀhaiǀurixapas ǃnâ ǂoade a îxasa. Tsî matikōse i nî ǂoaǂamsa. Mati du nî tsâ nēti-i xū-e du ga mā-e o? ǃGôaǃgâsib mîdi hîna du nau khoena ǃoa ra mādi tsîn ge kaise nî ǀō-aisa. Nēs xa ǂâi re: ǃHuniǀuriba xu a kurusa apels ge ǀamosib kōse nî hâhâ. ǁNās ǁkhās khami di ge sadu ǃgôaǃgâxasib mîdi tsîna ǁnān hîna ra ǃkhōǃoan xa nî sâubasen-e tsî ǁîn ûib hoaba nî ǃgôaǃgâhe.

ǃGÔAǃGÂSIBAN GE RA ǁGAU

7. Davib tsî nau xoa-aogu psalmdigu tsîna mati Psalmdi 27:4 ǃnâ i ra mûhe khami ǃgôaǃgâsiba gere ǁgau?

⁷ ǂGuin hîna ge Eloba ǃkharu ge ǁaeb ǃnâ gere ǃoaban ge ǃgôaǃgâsiba ge ǁgau. ǀGuib ân ge Daviba. (Khomai re Psalmdi 27:4.) ǁÎb ge ama ǃoabasa gere ǃgôaǃgâ tsî ǁîb tsâsiga tanisen ǀgaub ǃnâ gere ǁgau. ǁÎb ge ǂgui xūna tempeli omhes ǃgao ge mā. Asafi surib ge ǃgôaǃgâsiba ǁgaus ǃnâ Psalmdi tamas ka io koas amde ge xoa. ǀGui ams ǃnân ge Eloba ra koa tsî ǁîn ǃgôaǃgâsiba Jehovab “buruxa dīn” ǃoa-ai ra ǁgau. (Psa. 75:1) Davib tsî Asafi di surib ge gere ǁgau ǂgao matikōsen Jehovaba xūn ge hō ǀkhaega gere ǃgôaǃgâsa. ǀGaun xa du a ǂâi ǁkhā nē psalmdi xoa-aoga du a ǁgae ǁkhāna?

8-9. Apostel Pauluba mati ǃgôaǃgâsiba ǁîb ǃgâsana gere ǁgau tsî nēsa tae-e ge ǃaroma?

⁸ Apostel Paulub ge ǁîb ǃgâsagu tsî ǃgâsadi tsîna ǃgôaǃgâsiba ǁîn xab gere ǃhoa ǀgaub ǃnâ ge ǁgau. ǁÎb ge Eloba ǁîb ǀgoredi ǃnâ hoaǁae ǁîn ǃaroma gere gangan. ǁÎb ge ǁîb ǃgôaǃgâsib tsîna xoab gere ǁaeb ai gere ǁgau. ǂGuro 15 xoaǀgoradi Romeǁîn 16 ǃnâb ge Pauluba 27 ǃnāde ǁîb ǃgâsan ǀonde ge ǂgai. Paulub ge ǃgō-aisase Prisilas tsî Akwilab tsîna ‘ǁîra ǃaora ra ge mâibabi’ ǃkhais ǃgao ge ǂâi tsî Febesa “ǂguina gere hui” khoeb ase ge ǂgai Pauluba ǃkhōǂgā hâse. ǁÎb ge ǁnā ǀnamxaǃnâ ǃgâsan hîna ge ǃgarise gere sîsenna ge koa.​—Rom. 16:1-15.

⁹ Paulub ge ge ǂan i ǁîb ǃgâsan ge ǀoasa kurusa ūhâ tama hâ isa tsî ǁnās ǀkha ǁîb sîǂkhanis Romeǁîna ǃoab ge xoas ǀuniga mîdi ǃnâ ǁîn ǃgâi ǀgaugu ǃgao ge koa nî. ǂÂi re nē ǃgâsan ge mati ǂkhâǃnâsase gere tsâ ǀgauba Paulub mîdi ge ǃgarise ǀhaohâba ǃoa a khomaihe o. ǁNās xa ǃaromahe hâse i ge ǁîn ǀhōsagusis Paulub ǀkhan ge ūhâ isa ge ǀgai. ǁAeba xu ǁaeb ǀkha du sadu ǀhaohâb ǃgâsana ǁîn ra mî tamas ka io dī ǃgâi xūn ǃgao ra koa?

10. Tae-e du a ǁkhāǁkhāsen ǁkhā Jesub ge ǃgôaǃgâsiba ǁîb saoǃgonsabena gere ǁgau ǀgaub ǃnâ?

¹⁰ ǂKhariro Asiab ǃgâsan ǃoa-aib ge Jesuba ǃgôaǃgâsiba ǁîn sîsengu ǃaroma gere ǁgau. ǁÎb haisi-amsab ge Tiatirasa ǃoa nēti ge tsoatsoa: “Sa sîsenga ta ge a ǂan, tsî sa ǀnammi tsî ǃoabas tsî ǂgoms tsî taniǀnamxasib tsîna, tsî sa sîsengu di ǀunigagu ǂgurogu xa a ǂgui ǃkhaisa.” (J.ǂHa. 2:19) Jesub ge ǁîn ǂgui ǁaxasigu ǀguiga ge mî tama hâ i xawe ǁîn ǃgâi ǀgaugu hîna ge nē sîsen-e a ǂkhâǃnâ gu xas tsîna ge koa nî. Paulub ge Tiatiras ǃnâ hâ ǃgâsana gere ǁnama xaweb ge ǁîb haisi-ams tsoatsoas tsî ǀunis tsîn ǃnâ ǁîna gere ǂkhâǃnâ. (J.ǂHa. 2:25-28) ǂÂi re Jesub mâ ǀgaiba ūhâsa ǀhaohâb di danab ase. ǁÎb ge sida gangan tide sîsenni hîna da ra dī-i ǃgao. Xaweb ge hoaǁae ra ǁgūtsâ ǃgôaǃgâsiba ǁgausa. ǁÎb ge ǂoaǂamsa aiǁgausa ǀhaohâb ǃûi-aoga ra mā.

ǁÎN GE ǀORO ǃGÔAǃGÂSIBA GERE ǁGAU

11. Hebreǁîn 12:16 tawa i ra ǁgau-e khamib ge Esauba mâ tanisen ǀgauba ūhâ i ǂhâǂhâsa xūn ǃoa-ai?

¹¹ ǀNî Elobmîs ǁaeb khoen ge ǀoro ǃgôaǃgâsiba ge ūhâ i. Aiǁgause Esaub ge Eloǃaoǃgâxa ǁgûra xa a kaikaihe xaweb ge ǂhâǂhâsa xūn ǃoa-ai ǃgôaǃgâsiba ge ǁgau tama hâ i. (Khomai re Hebreǁîn 12:16.) ǁÎb di ganganoǃnâsiba mati ge ǁgau-e? Esaub ge ǁîb di ǂguro ǃnaesabesisa ǁîb di ǂkham ǃgâsab ai ǃores sō-i ǂamai ge ǁamaxū. (Gen. 25:30-34) ǁAeb ǃkharu hâseb ge Esauba nēs xa gere ǃhausen. Xaweb ge ūb ge hâ i xūna ǃgôaǃgâsiba ge ǁgau tama hâ i tsî ǁaixas ǃaromasa ge ūhâ tama hâ i ǁîb di ga hâ ǀkhaebab ge hō tama hâ io.

12-13. Israelǁîna mati ǃgôaoǃnâsiba ge ǁgau tsî nēsa mâ sîsenǂuiga ge ūhâ i?

¹² Israelǁaes ge ǂgui ǃaromade ge ūhâ i ǃgôaǃgâsiba ǁgausa. ǁÎn ge ǃgāsisa xū ge orehe Jehovab ge Egipteǁîn ǃoa-ai a ǃkhams khaoǃgâ. Tsîb ge Eloba hoaraga Egipteǁî ǃkham-aoga ǂāxahurib ǃnâ ge hîgaga ǁîna sâus ǃaroma. Israelǁîn ge nēsa kaise ge ǃgôaǃgâ tsî Jehovaba koas amsa ge ǁnaeba. Xawen ge ǃgôaǃgâsiba hoaǁae ǁgau?

¹³ Israelǁaes ge ǀasa ǃgomsigan ge hōǃâ tsoatsoa o, o Jehovab ge dība nî ǃgâi dīgu hoaga ge ǀuru. ǁÎn ǃgôaoǃnâsiban ge ge ǁgau tsoatsoa. (Psa. 106:7) Mâ ǀgaub ǃnâ? “Ob ge ǀhaohâb Israeli ôan dib hoaba Moseb tsî Aronni tsîkha ǃoagu gere ǀara” amaba da ga mî o, on ge ǁîna Jehovab ǃoa-ai gere ǀara. (Eks. 16:2, 8) ǁÎb ge ǁîb khoen ge ǁgau ǃgôaoǃnâsib ǀkha ge ǂkhîǂâixa tama hâ i. ǁÎb ge ega ge mî hoaraga Israelǁaes ǃgarob ǃnâ nî ǁōǂoasa tsîkha Josuab tsî Kaleb tsîkha ǀguikha nî ûiǃgausa. (Num. 14:22-24; 26:65) Hā re i da kō mati du nē ǁgai aiǁgaude xu nî ǂgōsen tsî ǃgâi aiǁgaude nî sao ǀgausa.

ǃGÔAǃGÂSIBA NĒTSĒ ǁGAU RE

14-15. (a) ǃGame hâ khoena mati ǃgôaǃgâsiba nî ǁgau? (b) Matin ǁgûna ǁîn ǀgôana ǃgôaǃgâsiba ǁgausa nî ǁkhāǁkhā?

¹⁴ Omaris ǃnâ. Hoaraga omaris khoen ge hoan ga ǃgôaǃgâsiba ǁgau o, o nēsa xu ra ǀama. ǃGame hâ khoen ga ǃgôaǃgâsiba ǁgaugu o, ob ge ǁîn ǃgameba ra ǀgaiǀgai-e. Tsî supuses tsîna ra ǀûbagu. Aob hîna ǁîb tarasa ra ǃgôaǃgâb ge ǁîs da mî tsî dī ǃgâi xūn ǀguina mû tama hâ xawe “khâi tsî ǃgâiǃōse ra ǃkhōǀkhā si.” (ǂKhm. 31:10, 28) Taras ases ge ǁîs aoba ra ǂan kai tae-es ǁîb xa ra ǃgôaǃgâsa.

¹⁵ ǁGûdo mati du sadu ǀgôana ǃgôaǃgâsiba ǁgausa nî ǁkhāǁkhā? ǂÂis ǃnâ ūhâ re sadu ǀgôan ge sadu ra mî tsî dī xūna nî sao. ǁNā-amaga ǃgâi aiǁgausa ǁgau re gangan di sadu ǀgôana ǃoa mîs ǃnâ-u ǃgâi xū-en ga dī o. Tsî sadu ǀgôana hui re gangan di mîsa khoe-i ga ǃgâi xū-e dība nî o. Sadu ǀgôana hui re in mûǂan ǃgôaǃgâsib ǂgaoba xu ra hāsa tsî di ǁîn mîde ǂgui xūna a dī ǁkhāsa. Aiǁgause ǂkhamkhoes hîna Clary di ǀon hâs ge ge mî: “32 kurigu ǀkhas ge di ǁgûsa ǃnona ǀgôan ǀkha ge xū-e kaikais nîse. 32 Kurixa ta ge o, o ta ge gere ǂâi matikōses ge nēsa ǃgombasi isa. Tsî ta ge ǁnā-amaga ge mîba si matikōse ta sidas ge ǃgomgu tsî augu ǃnâ a kaikai ǃkhaisa ra ǃgôaǃgâsa. ǁÎs ge ra mî di mîdes kaise ra ǃgôaǃgâsa tsî ǁaeba xū ǁaeb ǀkha nē mîdi xa ra ǂâi tsî nēs xa ra ǂkhî kai-e sa.”

16. Aiǁgau-e mā re khoe-e ǃgôaǃgâsiba ǁgaus mati ǁnā khoe-e a ǂkhâǃnâ ǁkhā ǀgausa.

¹⁶ ǀHaohâb ǃnâ. ǃGôaǃgâsiba du ga sadu ǃgâsana ǁgau o, o du ge ǁîna ra ǂkhâǃnâ. Aiǁgause 28 kurixa Jorgeb hîna a ǀhaohâb ǃûi-aob ge ge ǀaesen. Tsî nēs ǃaroma ǀhaode ge hâǃnâ ǁoa i. Oaǀkhīb ge xaweb ge noxoba ǀhaodi tawa ǃâna ge mā ǁoa i. Jorgeb ge ra mî: “Xū-e ta ge ge dīho tama hâ i ǀhaohâba kōǃgâsa tsî ta ge kaise huiose gere tsâ. Xawe ǀgui ǀhaos khaoǃgâb ge ǀgui ǃgâsaba ge mîba te: ‘Kaise ta ge ra gangan du ǂgao ti omarisa du ǃgâi aiǁgausa ra ǁgau ǃkhais ǃaroma. ǂGom du ge tide matikōse da ge sadu di ǃhoade ǃkharu ge kurigu ǃnâ a ǃgôaǃgâsa. ǁÎdi ge ge hui da gagasise ǀgais ǃnâ.’ Nē mîdi ge kaise ge tsâǀkhā te î ta ā tsoatsoa. ǁÎb mîdi ge ǂhanu ǁaeb ai ge ǀkhī.”

17. Koloseǁîn 3:15 ǃnâ i a xoasa khami da mati Jehovaba ǁîb māǀnamxasib ǃaroma ǃgôaǃgâsiba a ǁgau ǁkhā?

¹⁷ Sada di māǀnamxa Elob ǃoa-ai. Jehovab ge ǂgui gagasi ǂûna ra māda. Aiǁgause sada di ǀhaodi, ǂkhanin tsî internets ǂhaweb ǃnâ-ū da ge ǃgâi daoǁgaude ra mā-e. ǃHoa-e ǁnâu, khomai ǃâ-e khomai tamas ka io broadcastingsa kō tsî du ge mûǂan ‘nēs ge ǂhanu ǁaeb ai ǀgui go ǂoaxa di’? Mati du sadu ǃgôaǃgâsiba Jehovaba a ǁgau ǁkhā? (Khomai re Koloseǁîn 3:15.) ǀGui ǀgaub ge ǀgores ǃnâ-ū ganganbisa nē ǃgâi xūn ǃaroma.​—Jak. 1:17.

18. Mâ ǀgaub ǃnâ da ǃgôaǃgâsiba sada di ǀhû-omgu ǃoa-ai a ǁgau ǁkhā?

¹⁸ Sada ǃoabas ǃkhaiga ǃanuse ūhâs ǃnâ-ūs tsîna da ge Jehovaba ǃgôaǃgâsiba a ǁgau ǁkhā. Hoaǁae da ge ǀhaohâga ǃanu tsî ra kōǃgâ tsî ǁnān hîna ǀōb xūn ǀkha ra sîsen an ge nî ǂanbasen în tā nē xūna khôa kai. Sada ǀhaohâga da ga hoaǁae ǃanu o, os ge nēsa nî hui in ǀoro dī-ūnu sîsenga hâ. Nēs ǀkha da ge marina ǃgâi ǀgaub ǃnâ a sîsen-ū ǁkhā ǀhû-omga ǃhūbaib ǂhawase oms tsî dī-ūnus ǃaroma.

19. Tae-e du ǃnarimâ ra mûǂam-aob tsî ǁîb taras tsîra aiǁgausa xu ǁkhāǁkhāsen?

¹⁹ Tsî ǁnān hîna ǀgaisase ra sîsenba dan. ǃGôaǃgâsiba da ga ǁgau o, os ge nēsa khoen ǁîn ǃgomsina ra mû ǀgauba ra ǀkharaǀkhara. ǀGui ǃnarimâra mûǂam-aob tsî ǁîb taras tsîn di aiǁgaus xa ǂâi re. ǀGui tsē ra ge kaise ǃkhai tsēs ai aoǁnâ sîsenni khaoǃgâ ǁîra ra hâ ǃkhaisa ǃoa tsau hâse ge oa. Kaise i ge ge ǃkhai i tsîs ge kaikhoesa ǁîs ǃkhaib saran ǀkha ge ǁom. ǁGoagas ge ǁîs khaikhoeba ge mîba ǁîs nē ǃnarimâ sîsenni ǀkha a aiǃgû ǁoa ti. ǁAe i khaoǃgâ ǁnā tsēs ai ra ge sîǂkhanisa ǁnâub berosa xu ge ǃkhōǃoa tsî nēs ge ǃgâsasa ǃoa ge xoasa i. Nē sîǂkhanis ge ǃgâsasa gere gangan ǁîs di aoǁnâ sîsenni tsî mâǀgaibesis ǃaroma. ǁÎn ge gere ǂanǃgâ mâ wekheb hoaba ǃnarimâs supu tama hâ ǃkhaisa. ǁÎs kaikhoeb ge ra mî: “Nē mîdi ge ǁîsa kaise ge tsâǀkhā tsîs ge ǁkhawa nē ǃnarimâs sîsena ǀam kais xa ge ǃhoa tama hâ i. ǁÎs ge tita gere ǂkhâǃnâ nē sîsenni ǀkha ta gere ǀû ǂgao o.” Nē khoe-aogu ra ge 40 kuriga ǃnarimâ sîsen-e ge dī.

20. Tae-e du tsēkorebe nî dītsâ tsî tae-i ǃaroma?

²⁰ A da tsēs hoasa ǃgôaǃgâsiba sada mîdi tsî dīgu ǃnâ ǁgau re. Sadu di ǃgâi tanisen ǀgaub tsî mîdi ge nau khoen ǃoa-ai kai sîsenǂuiba a ūhâ ǁkhā în noxoba ǀgui tsēsa ûi ǃkharu ǁkhā. Tsî sadu di ǃgôaǃgâsib mîdi ge ǃgâi ǀhōsagusisa a omkhâi ǁkhā ǀamosib kōse nî hâhâ de. ǂHâǂhâsase da ge sada di māǀnamxa, ǃgôaǃgâxa ǁGûb Jehovab aiǁgausa nî ǁgae.