• ǁNāǂams ǀapas ǀkhaba xu!
    ǃKhē xu ǂgō-ommi (ǁKhāǁkhāǃâs)—2020 | Aprili

    • 14. Joeli 2:28, 29 ǃnâ hâ kēbosa mâ ǁae ge dīǀoaǀoahe?

      14 Joeli ge ǃgâiǂhôa-e ūhâ. ǃHūb ge ǁkhawa nî ǂûtani. (Joe. 2:23-26) Tsî hānîǁaeb ǃnâ-i ge gagasi ǂû-e ǃnāǂamsase nî hō-e. “Tita ti Gagab xa ǁgans hoas ai nîra ǁhōǂui ǃkhaisa, on ge sadu ôagu tsî sadu ôadi tsîna nîra kēbo . . . Ā, ǃgāgu on ǂama tsî ǃgādi on ǂama ta ge tita ǁnā tsēdi ǃnâ ti Gagaba nîra ǁhōǂui.” (Joe. 2:28, 29) Elob gagab ǁhōǂuis ge Israelǁaes ge Babilonǁîn ǃkhōsisa xu a ǃnora tsî ǁîn ǁanǃkhaisa ǃoa a oa ǁaeb ǃnâ ge ī tama hâ i. Xawes ge nēsa ǁaeba ge ū tsî pinkstertsēs 33ǁî kurib ǃnâ ge ī. Mati da nēsa a ǂan?

      15. ǃNaeǃkhaidi 2:16, 17 ǃoagub Petruba tae ǀkharaǀkharana Joeli 2:28 ǃnâ hâ mîdi ai ge dī tsî nēsa tae-e ra ǁgau?

      15 Elob gagab xa ǂkhâǃnâhe hâseb ge Petruba Joeli 2:28, 29 ǃnâ hâ mîdi xa kaise ǂoaǂamsa xū-i hîna ge pinkstertsēs ai ī i ase ra ǁnaeǁgau. Khoeseǁî khama ǁnā ǁgoa i ge ǀō-aisa xū-e ge ī. ǃAnu gagab ge ǁnāba ge hâ-i khoen ai ge ǁhōǂui-e tsîn ge ǃkharagagu gowagu ǃnâ ‘Elob di kai dīgu’ xa gere ǃhoa. (ǃNǃkh. 2:11) Joeli di kēbos xab gere ǃhoa o, ob ge Petruba ǀnîhâ ǀgaub ǃnâ ǀgui nē ǂâisa ge mî. Tae ǀkharaǀkharanab dī hâsa da ra mû? (Khomai re ǃNaeǃkhaidi 2:16, 17.) “ǁNās khaoǃgâ” di hâ mîdi ǀkha tsoatsoas xab ge Petruba: “Tsî i ge ǀuni tsēdi ǃnâ” di hâ mîdi hîna Jodeǁîn ǀkha gere ī xūn ǀams ǃoa ra ǁnaeǁgause ge mî​—Elob ǃanu gagab ge “ǁgans hoas ai” nî ra ǁhōǂuihe. Nēs ge ra ǁgau ǁaeb ge Joeli kēbos nî dīǀoaǀoahes aiǃâ ǃkharusa.

      16. Elob ǃanu gagaba mâ sîsenǂuiba aoǁnâ sîsenni ai ge ūhâ i ǃkharu ge ǁaeb tsî nētsēs tsîn ǃnâ?

      16 Elob ge ǁîb di ǃanu gagaba ǃkharu ge ǁaeb Xristeǁîn ai ǁhōǂuis khaoǃgân ge aoǁnâ sîsenni ǀkha ge tsoatsoa hîna ǂhanu ǁaeb ai hoaraga ǃhūbaiba nî ǀoaba. Apostel Paulub ge ǁîb sîǂkhanisa Koloseǁîna ǃoa 61ǁî kurib ǃnâ xoa-o, ob ge ǃgâiǂhôas hîna ra aoǁnâhes xa ǁguiǃā tsî ge mî nēs “kurusaben ǀhommi ǃnaga hân hoana” ra aoǁnâbahe di. (Kol. 1:23) Paulub tsēdi ǃnân ge ‘kurusaben hoana’ ǃhūbaiba ǃoa gere ǁnaeǁgau. Jehovab ǀgaisa ǃanu gagab huib ǀkhab ge aoǁnâ sîsenna sada tsēdi ǃnâs tsîna ra dīhe​—“ǃhūbaib di ǀams kōse.”​—ǃNǃkh. 13:47; “Ti ǃanu gagaba da ge nî ǁhōǂui” di hâ boksisa mû re.