ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
JANUARIB 1-7
ELOBMISA XU HÂ ǂÛǂÛSA MÎDI | MATEUB 1-3
“Gaosib ǀhommi dib ǀgūse hā hâ xuige”
(Mateub 3:1, 2) Tsî ǁnā tsēdi ǃnâb ge Johaneb ǁĀǁnâ-aoba ge ǀkhī, tsî Judeab ǃgaroǃhūb ǃnâ aoǁnâ, 2 tsî ge mî: ǃHobasen du re, gaosib ǀhommi dib ǀgūse hā hâ xuige.
nwtsty study note on Mat. 3:1
aoǁnâs: Nē Grikegowab mîs ge ra ǂâibasen “xū-e khoena ǂanǂansa.” Nē ǂanǂans ge sao rase nî dīhe. ǀHûhâsib ǃnân ge hoaraga khoena nî aoǁnâbahe, ǀnîn ǀguin ose.
nwtsty study notes on Mat. 3:2
Gaosib: Nē Grikegowab mîs ba·si·leiʹa ti hâs ge ǂgaeǂgui i, ǂgaeǂguihe ra ǃās tsî khoen hîna gao-aob ǂgaeǂguis ǃnaga hân ǃoas tsîna ra ǁnaeǁgau. Nē Grikegowab mîs ge 162 ǃnāde ǀAsa testamens ǃnâ ra hō-e tsî 55 ǃnādi tsîna Mateub ǃnâ ra hō-e. Tsî ǃnāsase ǀhomsi Gaosiba ǃoa ra ǁnaeǁgau. Mateub ge ǁnâ mîsa kaise ǂgui ǃnāde ra sîsen-ū tsîs ge nē mîsa ǃgâiǂhôas Gaosib dis ti a ǂansa.
Gaosib ǀhommi dib: Nē mîs ge 30 ǃnāde ǃgâiǂhôas Mateub dis ǃnâ ra hōhe. Markub tsî Lukab di ǃgâiǂhôas ǃnâ i ge “Elob di Gaosib” di hâ mîsa ra sîsen-ūhe, ǂâibasen rase “Elob di Gaosib” ǀhommi ǃnâ hâsa tsî ǁnāpaxū ra ǂgaeǂguisa.—Mat. 21:43; Mrk. 1:15; Luk. 4:43; Dan. 2:44; 2Tim. 4:18.
ǀgūse hā hâ xuige: Nēs ge ra ǂâibasen ǀhomsi Gaosib di ǂgaeǂgui-aob nî ǂhaisa.
(Mateub 3:4) Tsîb ge nē Johaneba ǃnaiǀûn ǀkha dīhe hâ saraba ge ūhâ i, tsî khōǃgaesenna kamanab ai gere ǃgaesen, tsî ǁîb ǂûn ge ǂhomn tsî danib tsîna ge i.
nwtsty mediab
Johaneb ǁĀǁnâ-aob di mûsen ǀgaub
Johaneb gere ana sarab ge ǃnaib di ǀûn ǀkha ge kurusa i tsî ǁîb kamanab ge khō bans ǀkha ge ǃgaesa i, ǂkhari xūnab nî ǂgāǃnâ ga. Eliab tsîn ge ǁnāti i saraba gere ana. (2Gao. 1:8) ǁNā saran ge ǃnāsase ǀgâsa khoen xa gere anahe. Tsaura saran ge ǃkhū hâ khoen xa gere anahe. (Mat. 11:7-9) Johaneb ge ǃnaesa xu Nasaretǁî i amagab ge ǁîb ǀûna ge ǂkhom tama hâ i. ǁÎb mûsen ǀgaub ge gere ǁgau ǁîb ǀgui ǃgupu ûiba ra ûisa tsî Elob ǂâisa ra dīsa.
ǂHomn [ǁkharin, ǃaedan]
Elobmîs ra ǁgau khamis ge mîs “ǂhomn” di hâsa ǂgui ǃnâgu ǂhomga ǃoa ra ǁnaeǁgau. ǁÎgu ge ǃnāsa ǁaeba ǀguiba ra hâ. Jerusalems ǃnâ ge dīhe ôaǃnâs ǃoagu i ge nē ǂhomga 75 persenti protein-e ūhâ. ǂÛs ǃaroma gu ge nētsē danas, ǀnūgu, ǁgawokha tsî kamanab tsîna ra ūbēhe. Tsî ǃgau ra ǃâb ge sâi-e tamas ka io orase a ǂû-e ǁkhā. Nē ǁkharigu [ǃaedan] ge ǁau-i khami ra ǁkhoa tsî sorosa ǀgaiǀgais ǃaromas tsîna a ǃgâi.
ǃGarob dani-i
(1) Mûnan-ai re dani-i sâuhe hâ ǃkhaiba ǃgarob ǃnâ tsî (2) hais dani-i xa ǀoa hâsa. Johaneb gere ǂû dani-i ge Apis mellifera syriacas ǃgarob ǃhabus xa gere kuruhe. Nē ǃhabus ge ǀgamsa tsî ǂnâsa ǃkhaib ǃnâ ra hâ Judiab ǃgaro ǃhūb ǃnâ. Israeli ǃnâ ge Jesub aiǃâ ûi hâ i khoen ge ǁnā dani-e xabab ǃnâ gere ǀhaoǀhao. Jordani ǃāb ǃnâ i ge (Tel Rehov di ǂansa ǃkhaib tawa) ǁnā xabana ge a hō-e. Nē dani-e gere kuru ǃhabugu ge Turkiba xu ǁnā ǀkharib tawa ge sī-ūhe.
Gagasi xūna ǀō-aisase ôaǃnâs
(Mateub 1:3) Tsî Judab ge Peresi tsî Serab tsîkha Tamars tawa ge hō, tsî Peresi ge Hesronna ge hō, tsî Hesronni ge Aramma ge hō;
nwtsty study note on Mat. 1:3
Tamars: Mesiab di surib Mateub xoa hâb ǃnâ i ge goro khoedi xa ra ǃhoa-e. Haga khoedi ge ge hâ i. Xawe i ge Raxabs tsî Ruts tsîna ge Israelǁî tama hâ i (5ǁî ǁaraǃās) ǃoagu. Tsî i ge Batsebas “Uriab taras” tsî Marias tsîna ge Israelǁî i (6ǁî ǁaraǃās) tsî (16ǁî ǁaraǃās) ǃoagu. Nē taradi ge nē surib ǃnâ ǀō-aisa xū-i ǃaroma ǃkhōǂgāsa. Jesub di kai ǁgûdi ase.
(Mateub 3:11) Tita ge ǁgam-i ǀkha ra ǁāǁnâ du ǃhobasensa ǃoa, xawe ti khaoǃgâ nîra hāb ge ti ǃgâ-ai a ǀgaisa, ǁîb ǁharora ta nî taniǃgon bisa ta anu tamaba, ǁîb ge ǃAnu Gagab tsî ǀaes tsîra ǀkha nîra ǁāǁnâ du.
nwtsty study note on Mat. 3:11
ǁāǁnâs: tamas ka io “ǂhomǂga”. ǁNā Grikegowab mîs ba·ptiʹzo ti hâs ge “ǂhomǂgā; aoǂgā” ti ra ǂâibasen. ǀNî hâ Elobmîs ǁnaeǁgaudi ge ǁāǁnâs ge ǀoasa ǂhomǂgāsa ǃkhoǂgā hâ ti ra mî. Jordanǃāb ǃnâ Salims tawa i ge “ǁgamxa” i ǃkhais ǃaromab ge Johaneba khoena ǁnāpa gere ǁāǁnâ. (Jhn. 3:23) Filipub ge Etopiab di ǁuiǃkhōmâi-aoba gere ǁāǁnâ o, o ga ge “hoakha ǁgammi ǃnâ ge ǁgôa.” (ǃNǃkh. 8:38) Nē mîs ge Grike Septuaginti ǃnâ 2Gao. 5:14 ǃnâ ra sîsen-ūhe, ǁnāpab ge Naamanna “ǁgôa tsî hû ǃnāde Jordanǃāb ǃnâ ge du.”
Elobmîs khomai ǃâs
(Mateub 1:1-17) Nēs ge ǂkhanis Jesub Xristub ǃhoas dīsa, Davib ôab , Abrahammi ôab. 2 Abrahammi ge Isaka ge hō, tsi Isaki ge Jakoba ge hō, tsî Jakob ge Judab tsî ǁîb ǃgâsagu tsîga ge hō. 3 Tsî Judab ge Peresi tsî Serab tsîkha ge hō, tsî Hersonni ge Aramma ge hō, 4 tsî Arammi ge Aminadaba ge hō, tsî Aminadab ge Nasonna ge ho, tsî Nasonni ge Salmonna ge hō, 5 tsî Salmonni ge Boaba Raxas ǃnâ ge hō, tsî Boab ge Obeda Ruts ǃnâ ge hō, tsî Obedi ge Isaiba ge hō, 6 tsi Isaib ge gao-aob Daviba ge hō. Tsî gao-aob Davib ge Salomonna Uriab di taras ǃnâ ge hō, 7 tsî Salomonni ge Rehabeamma ge hō, tsî Rehabeammi ge Abiaba ge hī, tsî Abiba ge Asaba ge hō, 8 tsî Asab ge Josafata ge hō. 9 Tsî Usiab ge Jotamma ge hō, tsî Jotammi ge Axasa ge hō, tsî Axasi ge Hiskiaba ge hō, 10 tsî Hiskiab ge Manaseba ge hō, tsî Manaseb ge Amonna ge hō, tsî Amonni ge Josiaba ge hō,11 tsî Josiab ge Jexoniab tsî ǁîb di ǃgâsagu tsîga ge hō, Babilons ǃoa ǃgû-ūhes ǁaeb ai.12 Tsî Babilons ǃoa ǃgû-ūhes khaoǃgâb ge Jexoniaba Salatiela ge hō, tsî Salatieli ge Serubabela ge hō,13 tsî Serubabeli ge Abiuba ge hō, tsî Abiub ge Eljakimma ge hō, tsî Eljakimmi ge Asora ge hō,14 tsî Asori ge Sadoka ge hō, tsî Sadoki ge Aximma ge hō, tsî Aximmi ge Eliuba ge hō,15 tsî Eliub ge Eleasara ge hō, tsî Eleasari ge Matanna ge hō, tsî Matanni ge Jakoba ge hō,16 tsî Jakob ge Joseb, Marias aoba ge hō, ǁîsa xub ge Jesub, Xristub ti ra ǂgaiheba ǃnaesa.17 O di ge ǃhaoǃnādi hoade Abrahamma xu Davib kōse hakaǀa ǃhaoǃnāde, tsî Daviba xu Babilons ǃoa ǃgû-ūhes kōse hakaǀa ǃhaoǃnāde, tsî Babilons ǃoa ǃgû-ūhesa xu Xristub kōse hakaǀa ǃhaoǃnāde.
JANUARIB 8-14
ELOBMÎSA XU HÂ ǂÛǂÛSA MÎDI | MATEUB 4-5
“Jesub di ǃhommi aoǁnâsa xu tae-e da a ǁkhāǁkhāsen ǁkhā”
(Mateub 5:3) ǃGâiǃōn ge hâ gagas ǃnâ ǀgâsana, ǁîn dib a gaosib ǀhommi diba amaga.
nwtsty study notes on Mat 5:3
ǃGâiǃō: Nē mîs ge khoe-i ga ǃgâi ǁaeba ūhâ o, o i ra ǃgâiaǂgao ti ǂâibasen tama hâ. Xawe i khoe-i Elob xa ra ǀkhaehe o, o i ra hōǃâ tsâsib xa ra ǃhoa. Nē mîs ge Elob tsî Jesub tsîna ǃoa i ga ǁnaeǁgauhe o, os tsîna ra sîsen-ūhe.—1Tim. 1:11; 6:15.
gagas ǃnâ ǀgâsana: Nē Grikegowab ǁgâiǂuisens ge ǁnān hîna a ‘ǀgâsan’ (ǀkhoma-aon) tsî ǂhâsiba ūhân tsî ra ǂanǃgâna ǃoa ra ǁnaeǁgau. ǁNā mîs ge ǁnaeǁgaus ase “ǀgâsa” Lasaruba ǃoa gere sîsen-ūhe Luk. 16:20, 22 ra khomai khami. Nē Grikegowab mîs ǀnî ǂnûiǃkhuni-aon ra sîsen-ūs ge ǁnān hîna gagasise a ǀgâsan tsî ra ǂanǃgâna ǁîn di ‘gagasi ǀgâsasib’ tsî Elosi ǂhâsiba ǃoa ra ǁnaeǁgau.
(Mateub 5:7) ǃGâiǃōn ge hâ ǀkhomxaǃnâna ǁîn nîra ǀkhomxaǃnâhe amaga.
nwtsty study note on Mat. 5:7
ǀkhomxaǃnâna: Elobmîs ǃnâ ra sîsen-ūhe mî ra “ǀkhomxaǃnâ” tsî “ǀkhomxa” ti hâ ra ge ǀûbab ai ǀgui ǃgaoǃgaosa tama hâ. Nēs ge ǃnāsase ǀkhomxaǂgaosib hîna khoe-e ra ǁgariba î-i ǂhâsib ǃnâ hâ khoe-e hui ǁkhā.
(Mateub 5:9) ǃGâiǃōn ge hâ ǂkhîxaǃnâna ǁîn Elob ôan ti nîra ǂgaihe amaga.
nwtsty study note on Mat. 5:9
ǂkhîxaǃnâna: ǁNān hîna ǂkhîba ūhân ǀguin ose xawe ǁnān hîna ǂkhîb a ǀkhai tawa ǂkhîba ra hauna.
w07-E 12/1 17
Sadu ǀgôana ǁkhāǁkhā în ǂkhîxaǃnâ
Xristeǁî ǁgûn ge ǁîn ǀgôana nî ǁkhāǁkhā în “ǂkhîba ôa” tsî “ǁîba sauruǃgon.” (1 Petrub 3:11) ǁNā ǂkhîb hîna da ra hōb ǂkhîxaǃnâ da ga ob ge ǂgomǃgâoǃnâsib, ǁaib tsî ǀaokhoe ǃkhōǃoaoǃnâsib tsîna ra ǃkham dan.
Gagasi xūna ǀō-aisase ôaǃnâs
(Mateub 4:9) Tsîb ge ǁîb ǃoa ge mî: “Nēn hoana ta nî mā tsi, ǁnāǁgoe tsîts ga tita ǀgoreǀîo.”
nwtsty study note on Mat. 4:9
ǁnāǁgoe tsîts ga tita ǀgoreǀîo: Grikegowab mîs “ǀgoreǀî” ti hâs ge xū-e disa ra ǁgau. Tsî ǁaerob di dib ǃoa ra ǁnaeǁgau. “Tita ǀgoreǀîo” tib ge ǁGâuaba Jesub ǃoa a mî o, ob ge ge ǂâibasen tama hâ i îb ǁîba ǀûs ose ǃoaba bi, xaweb ge ge mî ǀgui ǃnās ǀguisa ǃoaba te re ti.
(Mateub 4:23) Tsîb ge Jesuba Galileab hoaragaba ge ǃgûǃnâǃganu, tsî ǁîn di sinagogegu ǃnâ gere ǁkhāǁkhā tsî ǃgâiǂhôas gaosib disa gere aoǁnâ, tsî mâ ǀaesenai-i tsî mâ tsû-ai-i hoa-i tsîna ǁaes ǃnâ gere ǂuruǂuru.
nwtsty study note on Mat. 4:23
ǁkhāǁkhās tsî aoǁnâs: ǁKhāǁkhās ge aoǁnâsa xu ra ǀkhara. ǁKhāǁkhās ǃnâb ge ǁgauǃnâ-aoba daoǁgau, mîǃā, ǂgomǃgâhe ǁkhā mîde mî tsî amab tsîna ra ǁgau.
Elobmîs khomai ǃâs
(Mateub 5:31-48) ǁKhāti ge mîhe: “Taras âba ga ǁnāxūb hoab ge ǀgoraǂkhanisa nî mā si.” 32 Xawe ta tita ra mîba du: Taras âba ga ǁnāxūb hoab, ǀaiba xu i ga ī tama io, ǁnāb ge ǁîsa go ǃgamekhôa kai, tsî ǁnāxūhe hâsa ga ǃgameb hoab ge ǁkhāti ra ǃgamekhôa. 33 ǁKhawa du ge ǁnâu kaigu ǃoa ge mîhesa: “ǂKhabasets ge nū tide, î nūs âtsa ǃKhūba ǃkhōǀgaipeba.” 34 Xawe ta ra mîba du, hoaragase du nū tidesa, ǀhommi ǃnâs kara o, ǁîb a Elob di tron amaga;35 tsî ǃhūbaib ais karao, ǁîb di ǂaiǃnaob a amaga; tsî Jerusalems tawas kara o, ǁîs a kai gao-aob di ǃā amaga;36 î danas âts tawa ǁkhāti tā nū; ǀgui ǀû-ets a ǃuriǃuri tsî ǂnūǂnū ǁoa amaga.37 Os ge mîs âdo: Ā, ā, hî-î, hî-î ti nî ī, nēn ǂamai hân ǂkhababa xu hâ xui-ao. 38 ǁNâu du ge: “Mûs ama mûsa, ǁgûb ama ǁgûb” ti ge mîhesa. 39 Xawe ta tita ra mîba du, ǂkhababa tā mâǃoa; amǀkhāb xōb ai ga ǁapu tsi-e, naub tsîna unuba. 40 Tsî khoe-i ga ǂhanub aiǃâ ūsī tsi ǂgao, sa anaxūsa nî ūǀhana tsise, ǁnâi ǁkhāti anaǂamxūba mā i. 41 Tsî ǀgui mailsats nî ǁnūse ga ǁgūǀkhā tsi-e, ǀgam mailra ǃgû-ū. 42 ǂGan tsi ra-e mā, î sa tawa ra ǀkhupi ǂgao-e tā ǀgî. 43 ǁNâu du ge: “Sa ǀgūkhoebats ge nî ǀnam tsî sa khākhoebats ge nî ǁkhan” ti ge mîhesa. 44 Xawe ta ra mîba du, sadu khākhoena ǀnam, î ǀâxare du rana ǀkhae, î ǁkhan du rana ǃgâidība, î ǁguiǂam tsî ra ǃgôaǃgon duna ǀgoreba. 45 Î du ǀhommi ǃnâ hâ ǁgûb ôan ase ī, ǁîb soresa ǃgâin tsî ǂkhaban tsîn ǂama ra ǁhai kaiba, tsî ǂhanu-ain tsî ǂhanuoǃnân tsîn ǂama ra ǀapi kaiba. 46 Sado ǀnam hân ǀguina du ga ǀnamo, mâ amǃnâ-e du ǁnâi ūhâ? ǁNāsan kha mariǃkhōǃoa-aona ǁkhāti dī tama hâ? 47 Tsî sadu ǃgâsan ǀguina du ga tawedeo, mâ xū-e du kha naun ǂamai ra dī? ǀŪbena kha ǁnās ǁkhās ase dī taman hâ? 48 ǀOa hâse ǁnâi ī du re, sadu îb ǀhommi ǃnâ hâb ǀoa hâse īs ǁkhās xase.
JANUARIB 15-21
ELOBMÎSA XU HÂ ǂÛǂÛSA MÎDI | MATEUB 6-7
“ǂGurosa ǁnâi Elob di” Gaosiba ôa
(Mateub 6:10) Sa gaosiba ab hā re, sa ǂâisa as ī, ǀhommi ǃnâs ra īs ǁkhās khami ǁnāti ǃhūbaib on ai.
ǀGores di aiǂhanub
12 Tae-e sada ǀgoredi ǃnâ nî ǂhâǂhâsase ī? Jehovab tsî ǁîb ǂâis tsîna dīsa. ǁÎba da ge ǂgaob ǃgamsiba xu nî gangan dība dab ra xūn amsi. (1 Kroniks 29:10-13) ǁNāsa da ge a ǂan Jesub ge ǃhūbaib ai hâ i o, ob ge ǁîb ǁkhāǁkhāsabega ge ǁkhāǁkhā mati gu nî ǀgore ǃkhaisa. (Khomai re Mateub 6:9-13.) ǁÎb ge ǁîga ge mîba î gu ǂgurose ǀgore is Elob ǀonsa khaihe, tamas ka io ǃanuse ūhâ-e. ǁNāpaxūb ge Jesuba ge a ǁgau î da Elob Gaosiba ǀgoreba îb hā tsî is Jehovab ǂâisa hoaraga ǃhūbaib ai dīhe. ǁNā ǂhâǂhâsa xūna ǂgurose mîs khaoǃgâb ge Jesuba ge mî khoexaǃnâ ǂhâsigu tsîna da a ǀgoreba ǁkhā di. Jehovab di ǂâisa ta ga sada ǀgore di ǃnâ ǂgurose mâi o, o da ge ra ǁgau tae-i sida a ǂhâǂhâsaba ǃkhaisa.
(Mateub 6:24) Khoe-i xare-i ge ǀgam ǀhonkhoekha a sîsenba ǁoa; ǀguiba i ge nî ǁkhan, tsî nauba i ge nî ǀnam, tsî ǀguib ai i ge nî ǂgāmâisen, tsî nauba i ge nî ǃharaxū. Elob tsî ǃkhūsib tsîkha du a sîsenba ǁoa.
nwtsty study note on Mat. 6:24
ǃgāb: Nē Grikegowab mîs ge khoe-i hîna nau khoe-e ra sîsenba i xa ra ǃhoa. Nēbab ge Jesuba gere ǁgau Xristeǁî-i ge Eloba nē ǀkhāb ai ǃoaba tsî nauǀkhāb ai ǁkhawa ǃkhūsiba a ǀgoreǀî ǁoa.
(Mateub 6:33) ǂGurosa ǁnâi Elob di gaosib tsî ǁîb di ǂhanu-aisib tsîkha ôa, o du ge nēn hoana nî ǁguiribahe.
nwtsty study note on Mat. 6:33
ôa ǀkhara: Grikegowab mîs ra ǁgaus ge “ôa ǀkharas” ra ǁaeb hoaba xū-e dīs ǀkha a ǀguisa. Jesub di saosaben ge Gaosiba ǁaerob ǀgaiba ôa tsî ǁnāpaxū ǁkhawa ǀnî hâ xūna ôa tama hâ. Xawen ge ǁîna Gaosiba ǂgurose ǁîn ûib ǃnâ ra mâi.
gaosib: ǂGurokam ǁaeb Grike manuscript gu ge “Elob Gaosib” ti ra mî.
ǁîb: Mat. 6:32 ǃnâ hâ ǁgâiǂuisens “ǀhomsi Îb” ti hâs ge Eloba ǃoa ra ǁnaeǁgau.
ǂhanu-aisib: ǁNān hîna Elob di ǂhanu-aisiba ra ôan ge māsenxase ǁîb ǂâisa ra dī. Tsî ǁîb di ǂgaoǀkhāde tsūn tsî ǃgâin ǁaegu hâde mûǂan tsî ra ǁnâuǀnam. Nē ǁkhāǁkhādi ge Farisegu di ǁkhāǁkhādi ǀkha ǀgui tama hâ, hîna ǁîgu di ǂhanu-aisiba gere ôa ga.—Mat. 5:20.
w16-E.07 12 ¶18
Gaosiba ôa, xūn ose
18 Khomai re Mateub 6:33. Xristub di saosaben ge hoaǁae Gaosiba ǂgurose ǁîn ûib ǃna nî mâi. ǁNāsa da ga ra dī o, o da ge Jesub ge mî khami naun “hoana nî ǁguiribahe.” Tae-i ǃaromab ge ǁnāsa mî? ǃKharu go xoas ǃnâb ge Jesuba ge mîǃā: “ǀHomsi Îb sadu dib ge a ǂan, nēn hoana du ǂhâba hâ ǃkhaisa,” nēbab ge ûib di ǂhâsiga gere ǂâibasen. Jehovab ge sada nî ǂgans aiǃgâ a ǂan tae-e da ǂhâ hâsa. (Fil. 4:19) ǁÎb ge a ǂan mâ sara i ǂgurose nî ǀoro ǃkhaisa. Jehovab ge a ǂan mâ ǂûna da ǂhâ hâ ǃkhaisa. Tsî mâ hâ ǃkhais nî ǃgâiba dasa sida omaridi ǃgao. Jehovab ge amabes ǃnâ ǂhâ da hâ xūna nî mā da.
Gagasi xūna ǀō-aisase ôaǃnâs
(Mateub 7:12) Hoan ǁnâi, khoen nî sado dī-ū, ti du ga ǂgaon, ǁîna sadu ona ǁnās ǁkhās xase dī-ū; nēs ǃnân ǂhanub tsî kēbo-aogu tsîna hâ xuige.
w14-E 5/15 14-15 ¶14-16
Aoǁnâ sîsenni ǃnâ khoena sadu nî sîsen-ūhe khami sîsen-ū re
14 ǂÂi re ǀnîsits ge khoe-i xa go ǁkhamihe, xawets ge ǁnā ra ǃhoa khoe-i di domma a ǀū. Nē khoe-ets ge a ǀū, xawe i ge ǂgui dîna ra dî tsi mâ ǂûn xats a ǃgâibahe ǃkhaisa. Ham-i go ǁkhami tsi tsî tae-e i ra ǂhâba ǃkhaisats ge ra dîsen. ǃGôasiba ǁgaus ǃnâ-ūts ge ǀnîsi noxoba a ǁkham ǃkharu ǁkhā, xawets ge ǀnîsi ǁkhawa nē khoe-i ǀkha ra ǃhoa ǀû ǂgao. Xawe ǁkhawa ǂâi re nē go ǁkhami khoe-i ge ra mîba tsi ham-i asa tsî i ǁî-e ǂûn ǃkhais ǃnâ ra sîsensa. Tsî sadu sorode a hui ǁkhā ǃgāsasiba ra mā ǂûn xa. Nēs ge nî ǂgae da nē khoe-e ǃgâsa. Nēn hoan ǃnâ da ge khoen ǀkha ǃoa ra ǃhoa ǂgao xawe noxoba ǁnâuǃāxase ǁîn ǀkha ra ǃhoa ǂgao. Mati da khoen ǃoagu khoexaǃnâ ǀgaub ǃnâ aoǁnâ sîsenni ǃnâ ra ǃhoa ǂgao?
15 ǀNî ǃādi ǃnâ da ge aoǁnâ sîsenni ǃnâ khoena nî ǂanǂan tae-i ǃgao da go sarisa? Ama as ge khoen a ǀū ǃgâiǂhôasa da ra aoǁnâsa. Xawe da ga sada ǃamku ǀgaub ǃnâ mâi-aiǃâsen tama ga ra io tsî khoena dî tsoatsoas ǀguisa ga ra di o. Aiǁgause sao ra dîsa dîs ǀkha: “ǁKhāsiba du ga ūhâ o, ǃgomsiga ūbēs dība mā ǃgomsiga du ga ūbē hâ?” Nē dîs di ǃaromas ge, î da ǂan khoe-i tae-e ra ǂâisa nē dîs xa tsî da ge ǁnās khaoǃgâ Elobmîsa ǃoa ra ǁnaeǁgau. ‘Xawe i ge khoe-e ǀnîsi a ǂâi ǁkhā mâ khoe-e ti omsi hā tsî dîna ra dî te? ǁÎ-i dîs di ǃaromasa a tae?’ ǁNās ǀkha a ǂhâǂhâsas ge khoe-e khoexaǃnâ ǀgaub ǃnâ ǃhoa-ūsa. (Fil. 2:3, 4) Nēsa da mati dī ǁkhā?
16 ǀNî ǃnarimara mûǂam-aob ge ǃgâi ǀgauba ge hō khoena ǃhoa-ūs ǀkha. Khoe-e tawede toa tsî Amaba ǂan ǂgao du ra ti hâ ǂhaweba ra mā tsî ra mî: “Nē ǂhawega da ge khoena nētsē sadu ǂharis ǃnâ ra mā. Nē ǂhaweb ge khoen ra dîsen 6 dîde ūhâ.” Nē ǃgâsab ra mîs ge khoenats ga sa saris di ǃaromasa ga ra mîba o, on ge kaise ǃgâi ǀgaub ǃnâ ra ǃkhōǃoa tsi. Nēs ǀkhats ge ǃgâi ǁkhoaxa ǁgamǀhaosa a omkhâi ǁkhā. ǂHaweba khoe-e mā toa tsîb ge ra dî “Ne dîdi xa ǂâi tsâ î du hâ?” Khoe-i ga dîsa ga ra ǁhûi toa o, ob ge ǂhaweba ǁkhowa-am tsî Elobmîsa xu nē dîsa ra ǃhoaǃgao. Xaweb ge ǀnî ǁaega aitsama dî-e ra ǁhûi tsî ǁgamǀhaosa tsoatsoas ǀguisa ra dī. ǂGui ǃnâgu ǀgaugu ge hâ ǁgamǀhaosa tsoatsoas diga. ǀNî ǂharidi ǃnân ge khoena ǃgâise ǂangusa ra ǃâubasen ǁîn ǀkhats nî ǃhoa tsoatsoas aiǃgâ. Nēs di ǂâibasens ge hoaǁae da ge sida ǂharis ǃnâ ra hâ khoen di ǀgaub ǃoagu ǁîn ǀkha nî ǃhoa.
(Mateub 7:28, 29) Tsî i ge ge ǃnae, Jesub ge nē mîde mîtoao, os ge ǂnubisa ge ǃhuri ǁîb di ǁkhāǁkhās ǂama. 29 ǁKhāǁkhās âb ge ǀgaiba ge ūhâ i, tsî xoaǂansabegu dis khami ī tama ge hâ i amaga.
nwtsty study note on Mat. 7:28, 29
ǃhuri: Nē Grikegowab mîs ge ra ǂâibasen “khoe-i hîna nau î ra mî xū-i xa ra buru i.” Tsî nēs ra ǁgaus ge ǁîb gere ǁkhāǁkhā xūn ge khoena a tsâǀkhā ǃkhaisa.
ǁîb di ǁkhāǁkhās: Nē ǁgâiǂuisens ge Jesub di ǁkhāǁkhā ǀgaub, ǁkhāǁkhāb gere xūn tsî ǃhommi aoǁnâs aib gere sîsen-ū aiǁgaude ǃoas tsîna ra ǁnaeǁgau.
xoaǂansabegu dis khami ī tama: Xoaǂansabegu ge ǁîgu di ǁkhāǁkhāsa ǁîgu ǂans ai gere ǃgaoǃgao xaweb ge Jesuba Jehovab di ǂnûǁkhaeba-aob ase gere ǃhoa. ǁÎb ǁkhāǁkhāsab ge Elobmîsa ai gere ǃgaoǃgao.—Jhn. 7:16.
Elobmîs khomai ǃâs
(Mateub 6:1-18) ǂAnbasen re, î du sadu ausa tā khoen aiǃâ mā, ǁîn xa du nî mûhese; ǁnāti du ga dīo, o du kom sadu Îb ǀhommi ǃnâ hâb tawa amǃnâ-e ūhâ tamao. 2 Ausats ga māo, tā sa aiǃâ xâi kai re, hînaxaǃnân ta dī khami sinagogegu ǃnâ tsî daogu ai, khoen xan nî ǃgôahese. Amase ta ra mîba du, amǃnâs ânan ūbē hâ ǃkhaisa. 3 Tsîts ga satsa ausa māo, ab sa ǁareǀkhāb ǃomma ǀū, sa amǀkhāb ǃommi ra dīna. 4 Îs aude mās âtsa ǂganǃgâsib ǃnâ ī, ob ge sa Îb ǂganǃgâsib ǃnâ ra mûba ǂhaisasib ǃnâ nî dīdawa-amba tsi. 5 Tsî ǀgorets kao, ots hînaxaǃnân ra ī khami ī tide, sinagogegu ǃnâ tsî daogu ǁhôadi ai ra ǀgorena, khoen xan nî mûhese. Amase ta ra mîba du, amǃnâs ânan ūbē hâ ǃkhaisa. 6 Sats ga ǁnâi ǀgoreo, ǃnā-oms ǃnâ ǂgâ, î dao-amsa ǂganam, î ǂganǃgâsib ǃnâ hâ ǁGûba ǃoa ǀgore, ob ge ǂganǃgâsib ǃnâ ra mû ǁGûba ǂhaisasib ǃnâ nî dīdawa-amba tsi. 7 Tsî ǀgore du kao, tā ǀhomaxase ǀgore ǀūben xase, ǁîn di ǂgui mîden dīb ǃnâ nî ǁnâu-amhe tin ǂâi hâ xui-ao. 8 Tā ǁnâi ǁîn khami ī. Sadu Îb kom ǂhâba du hâna a ǂan, sadu nî ǂgans aiǃâo. 9 Nēti ǁnâi ǀgore du re: Sida Îtse ǀhommi ǃnâ hâtse, sa ǀonsa as khaihe re! 10 Sa gaosiba ab hā re, sa ǂâisa as ī, ǀhommi ǃnâs ra īs ǁkhās khami ǁnāti ǃhūbaib on ai, 11 nētsē sida tsēkorobe pereba mā da, 12 î sida ǀhapina ǀûba da, sida ǀhapixabena da ra ǁkhāti ǀûba khami. 13 Î tā ǃâitsâb ǃnâ ǂgaeǂgui da, î ǂkhababa xu ore da. Gaosib tsî ǀgaib tsî ǂkhaisib tsîgu a sa ǀamosib ǃnâ xuige. Amen. 14 Khoena du ga ǁîn di dāsāde ǀûbao, ob ge sadu ǀhomsi Îba sadu dide ǁkhāti nî ǀûba du. 15 Tsî khoena du ga ǁîn di dāsāde ǀûba tama io, ob ge sadu Îba sadu dāsāde ǁkhāti ǀûba du tide. 16 Tsî ǂûtama du ga hâo, o du sadu aide ǀkhuruǀkhuru tide, hînaxaǃnân ase; ǁîn ge aidi âna ī tama di hâ khami ra dī, ǂûtamahâs ǀkhan khoen xa nî mûhese. Amase ta ra mîba du, ǁîn amǃnâsan ūbē hâ ǃkhaisa. 17 Sats ga ǁnâi ǂûtamahâo, danas âtsa ǀnau, î ais âtsa ǁā, 18 khoen aiǃâts ǂûtamahâs ǀkha ǁgausen tidese, îts sa Îb ǂganǃgâsib ǃnâ hâb aiǃâ ǁgausen, ob ge sa Îb ǂganǃgâsib ǃnâ ra mûba ǂhaisasib ǃnâ nî dīdawa-amba tsi.
JANUARIB 22-28
ELOBMÎSA XU HÂ ǂÛǂÛSA MÎDI | MATEUB 8-9
“Jesub ge khoena a ǀnam”
(Mateub 8:1-3) Tsî ǃhomma xub ge ǁgôaxa ǃnubais ge kai ǂnubisa ge sao bi. 2 Tsî mû, ǃomamaxab ge hā ǀgoreǀî bi tsî ge mî: ǃKhūtse, ǂgaots ka ots ge a ǂgauǂgau te ǁkhā. 3 Ob ge Jesuba ǃomma ǀhōǂui, tsî tsâǀkhā bi, tsî ge mî: ǂGao ta ra, xuige ǂgau! Ob ge ǁnātimîsi ǃomamasis âba xu ge ǂgau.
nwtsty study note on Mat. 8:3
tsâǀkhā bi: Moseb di ǂhanub ǃnâb ge ǃomamaxa ǁōsa ūhâ khoena ǀguri gere hâ kaihe, în tā nau khoena ǁnā ǁōs ǀkha ǂhī. (Lev. 13:45, 46; Num. 5:1-4) Xawe gu ge Jode ǁkhākhāsabega ǀnî hâ ǂhanuga ge ǀaro. Aiǁgause ǃomamaxa ǁōsa ūhâ khoena xuts ge 1.8 meter-e (6 ǂaide) gere hâ kai-e. Xawe ǂoaxa tsēs ain ge 45 meter-e nî hâbē ǁnā khoena xu. ǁNāti i ǂhanugu ge ǃomamaxa ǁōsa ūhâ khoen ǃaroma ge ǃgâi tama hâ i. Priestergu tsî ǃomamaxa ǁōsa ūhâ khoena ge ǀuidi ǀkha gere ǂôan ge gere ǃkhō-amhe. Xawe Jesub ge ǃomamaxan ǃgom mâsib xa kaise ǃgamse gere tsâǀkhāhe. ǁÎb ge Jodeǁîgu ǂâi tide xū-e ge dī, ǁnā ǃomamaxaba tsâǀkhās ǃnâ-ū. ǁNāsab ge ge dī, nē khoebab ga mîs ǀkha ǀgui ǂgauǂgau hâ xawe.—Mat. 8:5-12.
ǂGao ta ra: Jesub ge ǁnā khoeb ǂgansa ge a ǂanǃgâ tsî ge hui bi. Nēsab ge dīs ǀguisa dī tama xawe ge ǂgaoba xu ge dī.
(Mateub 9:9-13) Tsî Jesub ge ǁnāpa xu ǃgû, ob ge khoeb mariǃkhōǃoa-ommi ǃnâ ǂnôab, Mateub ti ra ǂgaiheba mû, tsî ǁîb ǃoa ge mî: Sao te re! Ob ge khâi tsî ǁîba ge sao. 10 Tsî i ge ge ī, Mateub oms ǃnâb tāb tawa ǂnôa hîa, mû, o gu ge ǂgui mariǃkhōǃoa-aogu tsî ǁore-aogu tsîga ge ǂnûǀhao, Jesub tsî ǁîb ǁkhāǁkhāsabegu tsîgu ǀkha. 11 Tsî Farisegu ge mû, o gu ge ǁîb ǁkhāǁkhāsabegu ǃoa ge mî: Tarexab kha ǁkhāǁkhā-aob âgo mariǃkhōǃoa-aogu tsî ǁore-aogu tsîgu ǀkha ra ǂû? 12 Ob ge Jesuba, ǁnâub geo, ǁîgu ǃoa ge mî: ǂUrun ge ǂgauǂgau-aoba ǂhâba tama hâ, xawe ǀaesen hân ge ǂhâba bi hâ. 13 ǃGû, î go ǁkhāǁkhāsen, tare-i asa: ǀKhomxaǂgaosiba ta ra ǂgao, tsî ǁguibas ǀguisa tama, ti mîsa. ǂHanu-aina ta nî ǂgaise ta ge hā tama hâ, xawe ǁore-aona ta ǃhobasens ǃoa nî ǂgaise ta ge ge hā.
nwtsty study notes on Mat. 9:10
tāb [tafels]: ‘Tawa ǂnûs’ ge ra ǁgau khoe-i di ǀgū ǀhōsats a ǃkhaisa. Jesub di ǁaeb ǃnân ge Jodeǁîna, Jodeǁîn taman ǀkha ge ǂûǁae tama hâ i.
mariǃkhōǃoa-aogu: ǂGui Jodeǁîn ge Romeǁîn ǂgaeǂgui-aoga marina gere ǃkhōǃoaba. ǁNā-amagan ge ǂguin nē sîsen-e gere dīna ge ǃhui-e hâ i. ǁÎn ge ǀgapi ǁgui-aisa marisi ǂgan tsî Romeǁîn ǂhanuba gere sîsenba ǃkhais ǃgao. Mariǃkhōǃoa-aon ge ge ǁae-ūhe tama hâ i nau Jodeǁîn xa. ǁÎn ge ǁore-aon tsîn ǀai-aon ase ge ǃgôahe hâ i.—Mat. 11:19; 21:32.
(Mateub 9:35-38) Tsîb ge Jesuba kaiǃādi tsî ǃādi hoade ǃgûǃnâ, tsî gere ǁkhāǁkhā ǁîn di sinagogegu ǃnâ, tsî ǃgâiǂhôas gaosib disa gere aoǁnâ, tsî hoa ǀaesengu tsî tsû-ain tsîna gere ǂuruǂuru ǁaes ǃnâ. 36 Tsî ǂnubideb ge mû, ob ge ǁîna ge ǀkhom, tsau hâ tsî ǁnāxūhe hâ gūn, ǃûi-ao-i ose hân khamin ge ī i amaga. 37 Ob ge ǁîb di ǁkhāǁkhāsabegu ǃoa ge mî: ǃGaos ge a kai, xawe sîsenaogu ge a ǀoro. 38 ǁNā-amaga ǃKhūb ǃgaos diba ǂgan, îb sîsenaoga sîǂui ǁîb di ǃgaos ǃoa.
nwtsty study note on Mat. 9:36
ǀkhom: Grikegowab mîs splag·khniʹzo·mais ge “ǃnāxūn” ǀkha ra ǃkhōǀhaohe, tsî (splagʹkhna) di hâ mîs ge ǂgaob ǃnâ ǃgamse hâ tsâsib ǃoa ra ǁnaeǁgau. Nē mîs ge kaise ǀgaisa Grikegowab ǁgâiǂuisensa.
Gagasi xūna ǀō-aisase ôaǃnâs
(Mateub 8:8-10) Ob ge kaidisigu danakhoeba ǃeream tsî ge mî: Anu tama ta hâ, ti oms ǃnâts nî ǂgâ ǃkhaisa; îts ǀgui mîs ǀguisa mî, ob ge ti ǃgāba nî ǂgau. 9 Tita on ge a khoe, ǂamkhoegu ǀgaib ǃnâ mâ ta, tsî ta ge toro-aoga ti ǃnaga ūhâ. Tsî nēb ǃoa ta ga: ǃGû ti mî, ob ge ra ǃgû, tsî naub ǃoa: Hā, ob ge ra hā tsî ǃgāb ǃoa: Dī nēsa, ob ge ra dī. 10 Tsî Jesub ge ǁnâu, ob ge buru tsî sao bi ran ǃoa ge mî: Amase ta ra mîba du, tātsē ta Israelǁîn ǃnâ ǁnāti ī ǂgom-e hō tama hâ.
w02-E 8/15 13 ¶16
“Aiǁgau-e ta go mā go”
16 ǁNās ǁkhās khamib ge toroǃkham-aob, Romeǁîba Jesub ai huiba ge ǂgan îb ǁîb ǃgāba ǂgauǂgau. Jesub ge ge ǂan i nē khoeb a ǁore-aosa. ǁNā kurigu ǃnâ gu ge toroǃkham-aoga tsūdīb, ǃgams tsî ama tama ǂgomdi ǃoaba-ao ge i. Xawe Jesub ge nē aob ǃnâ hâ ǃgâi xūn ai gere kō, nē aob mâǂoa ra ǂgomsa. (Mateub 8:5-13) Jesub ge ǁîb xōǀkhā ge ǃgâuhaib ai mâ i tsūdī-aoba ge ǁnama tama hâ i. ǃKharu ge ǁaeb ge dī ǁgai xūn ǃgao. Xaweb ge ge ǂkhâǃnâ bi îb ǃâubasensa ūhâ hānîǁaeb ǃnâ. (Lukab 23:43) Jesub ge ge ǂan i, khoena mîǁgaiǁgais ǁîna nî ǂkhabuǂâi kai ǃkhaisa. ǃGâiba khoen ǃnâ ôas ge ǁîna ra ǂkhâǃnâ în ǃgâise dī.
(Mateub 9:16, 17) Tsî khoe-i xare-i ge ǁkhāti ǀasa ǃnabasa ǀoro sarab ai ǃnaba tama hâ; ǃnabas nî saraba ǀkhausen kai, ǀkhausenni go hâ is ǃgâ-ai xui-ao. 17 Tsî khoe-i xare-i ge ǁkhāti ǀasa ǂauxûiba, ǀoro ǃgapagu ǃnâ ǂnâ tama hâ, ǁnās ga dīhe, o gu ge ǃgapaga nî doa, tsî ǂauxûiba nî ǀkhausen; tsî ǂauxûib nî ǂnâxūhe, o i ge khoe-e ǀasa ǂauxûiba ǂuru ǃgapagu ǃnâ ra ǂnâ, o kha ge hoakha ǂgause ra hâ.
jy-E 70 ¶6
Jesub ǁkhāǁkhāsabega tae-i ǃaroma ǂû-e gaxu ǁaeba ǂû tamase ge hâ tama hâ i?
Jesub ge Johaneb ǁĀǁnâ-aob ǁkhāǁkhāsabega ge mûǂan kai, ǁîb ǁkhāǁkhāsabegu Jodeǁîn ǀoro ǂgom ǀgaub ǁnaetiga sao tide ǃkhaisa. ǁNās ge gaxuse ǂû tamase hâsa ge ǃkhōǂgā hâ i. Jesub ge ge hā tama hâ i, îb ǁnā ǀoro Jodeǁîn ǂgom ǀgauba aiǃgû kai. ǁNā ǃoaba ǀgaub ge bē nîse ge ī-i. Jesub gere ǂkhâǃnâ ǃoabas ge khoesi ǁnaetiga ge ǃkhōǂgā tama hâ i. Jesub ge ǀasa xū-eb nî ǀoro-i ai ǃnaba ga ge hā tama hâ i.
Elobmîs khomai ǃâs
(Mateub 8:1-17) Tsî ǃhomma xub ge ǁgôaxa ǃnubais ge kai ǂnubisa ge sao bi. 2 Tsî mû, ǃomamaxab ge hā ǀgoreǀî bi tsî ge mî: ǃKhūtse, ǂgaots ka ots ge a ǂgauǂgau te ǁkhā. 3 Ob ge Jesuba ǃomma ǀhōǂui, tsî tsâǀkhā bi, tsî ge mî: ǂGao ta ra, xuige ǂgau! Ob ge ǁnātimîsi ǃomamasis âba xu ge ǂgau. 4 Ob ge Jesuba ǁîb ǃoa ge mî: Kō, khoe-i xare-ets mîba tide, xawe ǃgû, ǁî-aitsama pristera sī ǁgausen, î Moseb ge mîmā ǁguibasa ǁguiba, ǁîgu di mîdansa ǃoa. 5 Tsî Jesub ra Kapernaums ǃnâ ǂgâ hîab ge kaidisigu danakhoeba ǁîb ǃoa hā tsî ǀkhoma bi 6 tsî ge mî: ǃKhūtse ti ǃgāb ge oms ǃnâ ǁgoe ǃhomsib xa, tsî kaise ra tsû. 7 Ob ge Jesuba ǁîb ǃoa ge mî: Tita ge sī tsî nî ǂuruǂuru bi. 8 Ob ge kaidisigu danakhoeba ǃeream tsî ge mî: Anu tama ta hâ, ti oms ǃnâts nî ǂgâ ǃkhaisa; îts ǀgui mîs ǀguisa mî, ob ge ti ǃgāba nî ǂgau. 9 Tita on ge a khoe, ǂamkhoegu ǀgaib ǃnâ mâ ta, tsî ta ge toro-aoga ti ǃnaga ūhâ. Tsî nēb ǃoa ta ga: ǃGû ti mî, ob ge ra ǃgû, tsî naub ǃoa: Hā, ob ge ra hā tsî ǃgāb ǃoa: Dī nēsa, ob ge ra dī. 10 Tsî Jesub ge ǁnâu, ob ge buru tsî sao bi ran ǃoa ge mî: Amase ta ra mîba du, tātsē ta Israelǁîn ǃnâ ǁnāti ī ǂgom-e hō tama hâ. 11 O ta ra mîba du, ǂguin ge aiǂoas tsî huriǂoas ǀkhāba xu nî hā, tsî Abrahammi tsî Isaki tsî Jakob tsîgu ǀkha gaosib ǀhommi dib ǃnâ nî ǂnû, 12 xawe gaosib di ôan ge nî ǂhāǂuihe, ǃaugakam ǃkhaenab, ās tsî ǁaninǁgûs tsîra hâǃnâba ǃoa. 13 Ob ge Jesuba kaidisigu danakhoeb ǃoa ge mî: ǃGû, î ǂgomts go khami ībahe! Ob ge ǃgāb âba ǁkhā ira xu ge ǂgau. 14 Tsî Jesub ge Petrub oms ǃnâ sīo, ob ge Petrub ǀuiǁgûs ǁkhaisa ūhâse ǁgoe ǃkhaisa ge mû. 15 Ob ge ǁîs ǃomma ge tsâǀkhā, tsîs ge ǁkhaisa ge ǁnāxū si; os ge khâi tsî ge ǃoaba bi. 16 Tsîn ge ǃui-amǁae ǂguin ǁgâuab xa hâǃnâhena ǁîb ǃoa ūhā, ob ge gagaga mîs ǀkha ge aoǂui, tsî tsû hân hoana ge ǂgauǂgau, 17 Jesajab kēbo-aob xa ge mîhes nî ǀoase: ǁÎb ge sada ǂkhabusasiga ge ūbasen, tsî sada ǀaesenga ge tani, ti ra mîba.
JANUARIB 29–FEBRUARIB 4
ELOBMISA XU HÂ ǂÛǂÛSA MÎDI | Mateub 10–11
“Jesub ge khoena ra khoakhoa”
(Mateub 10:29, 30) Khoe-e kha ǀgam guninira ǀgui mariros ama ǁamaxū tama i hâ? Tsî ǀgui-i xare-i ân ge sadu di Îb ose ǃhūb ai ǁnā tama hâ. 30 Tsîn ge ǁkhāti danaǀûn sago din hoana ǃgôahe hâ.
nwtsty study notes on Mat. 10:29, 30
guninira [anirodi]: Grikegowab mîs strou·thiʹon di hâs ge ǂhari aniros xa ra ǃhoa. Tsî nē aniros ge ǀoro marisa ra ǂgan tsî ǂû-es tsîna ra dīhe.
ǀgui mariros: “Assarion” di hâ marisa i ge khoe-e 45 haiga i gere sîsen ǃkhais ǃaroma gere matare-e (App. B14 nî ǃnâ kō re.) Galileaǁîb ǃnâb ge hâ i o, ob ge Jesuba ge mî ǀui-anirodi ge ǀgam assarionsa gere ǂgan ti. (Luk. 12:6) Nēs ra ǁgaus ge nē ǀui-anirodi ge ǁnātikōse ǀgapi tama hâ isa, ǁnās ǀkha gu ge ǁamaxū-aoga khoe-i ge koro de gere ǁama o, o ǀguisa marioǃnâse gere mā.
danaǀûn sago din hoan ge ǃgôasa: Khoe-i danas ai hâ ǀûn ge 100 000 xa a ǃnāsa. Nēs ge Jehovab di mâǂoa ra gā-aisiba ra ǁgau da. Tsî nēs ǀkha ra ǁgau, ǁîb sida ǀkha ǁae hâsa.
nwtsty mediab
Guninira [anirodi]
Guniniradi ge ǀoro marisa gere ǂgan tsî ǂû-es tsîna gere dīhe. Khoe-i ge 45 haiga i gere sîsen ǃkhais ǃaroma ǀgam guninira gere matare-e. Grikegowab mîs ge ǂkhari anirode ǃkhōǂgā hâ, ǀawaǃao gowab ǃnâs ge house sparrow (Passer domesticus biblicus) tsî Spanish sparrow (Passer hispaniolensis) ti ra ǂgaihe. Nē anirodi ge noxoba Israeli ǃnâ ra hō-e.
(Matthew 11:28) Tita ǃoa hā re ǀhupu hâdu tsî ǃnaohe hâdu hoado, o ta ge tita nî khoakhoa du.
nwtsty study notes on Mat. 11:28
ǃnaohe hâdu: Jesub ge nēba ǁîn hîna ǂâiǂhansendi xa “ǃnaohe” hân hoana gere ǀkhoma. Moseb di ǂhanub tawa ge ǀarohe khoesi ǃhaoǃnâbe ǂnûiǂgādi ge ge ǃaroma în khoena ǃgoma hōǃâ Jehovaban ra ǃoaba ǃkhais ǃaroma. (Mat. 23:4) Sâ tsēs hîna ge ǁîn nî khoakhoasen ǃkhais ǃaroma ǂnûiǂgāhes ge kaise ge ǃgomba nî.—Eks. 23:12; Mrk. 2:23-28; Luk. 6:1-11.
Tita nî khoakhoa du: Grikegowab mîs “khoakhoas” ge sâs (Mat. 26:45; Mrk. 6:31) tsî ǃgomsiga oresa hōba tsî ǀgaiba hō-oas ǀkha a ǀgui. (2Kor. 7:13; Flm. 7) Nē xoaǀgoras ra ǁgaus ge Jesub di ‘ǃnaob’ (Mat. 11:29) sîsenn-e ǃkhōǂgā hâsa. Grikegowab di mîs tsîn ra ǁgaus ge Jesub ge ra khoakhoa da tsî ǀgaiba ra mā da tsî ra ǂkhâǃnâ da î da ǁîb di ǃnaoba ūkhâi.
(Mateub 11:29, 30) Sadu ai ūkhâi ti ǃnaoba, î tita xu ǁkhāǁkhāsen tsamtsiǃnâ tsî ta ǂgaob ǃnâ a ǃgamǃgamsensa ǃkhaisa, o du ge sadu ǀomde khoakhoasa nî hōba. 30 Ti ǃnaob a ǃgâi, tsî ti ǃgommi a supu xuige.
nwtsty study note on Mat. 11:29
ūkhâi ti ǃnaoba: Nēbab ge Jesuba nē mîs “ǃnaob” ti hâsa gere sîsen-ū, îb ǁgau matikōse i a ǂhâǂhâsasa î da ǁgaragu tsî daoǁgausa ǃnaga hâba. ǀGam ǃnâgu ǃnaob ga hâhâ o Elob ge Jesub ai ǁguiba, ob ge ǁîb ǁkhāǁkhāsabega ǁnā ǃnaob ǃnaga ga ǁkhau hâ ǁîb ǀkha ǀguiba. ǂÂibasens ga di hâhâ o, ob ge nēti ga mî hâ: “Ti ǃnaob ǃnaga tita ǀkha hâ re.” Tsî nē ǃnaob ga Jesub xa khoen ai ǁguihe hâ o, on ge Xristub ǁkhāǁkhāsabena ǁîb ǁgaragu tsî daoǁgaus ǃnaga nî hâ.
Gagasi xūna ǀō-aisase ôaǃnâs
(Mateub 11:2, 3) Tsî Johaneb ge ǃkhō-oms ǃnâ Xristub dīga ǁnâuo, ob ge ǁkhāǁkhāsabegu âba sî 3 tsî ǁîb ǃoa ge mî: Satsa, hā nîtsa koma? ǀKharaba da nî ǃâu?
jy-E 96 ¶2-3
Johaneb ge Jesuba xu ra ǁnâu ǂgao
Nē dîsa ǃhaose ra ǀō? Johaneb ge eloǃoaba-aoba. ǁÎb ge Jesubab ge ǁāǁnâ o, Elob gagaba mû tsî ǁîb dommi tsîna ge ǁnâu. Sada ge ǃaroma-e ūhâ tama hâ ǂâisa Johaneb ǂgoms ge a ǂkhabusa. ǁNāti i ga ī hâ o, ob ge Jesuba Johaneb xa ǃgâise ga ǃhoa tama hâ. Xawe Johaneb ga ǂkhabusa tama hâ o, tae-eb ge ǁnā dîsa dîba Jesub xa?
Johaneb ge ǁgauǁgau-e gere ǂhâba Jesuba xu ǁgau ra-e ǁîb a Mesia ǃkhaisa. Nēs ge Johaneb ǂgomsa ga ǀgaiǀgai hâ ǃkhō-oms ǃnâ. Tsî Johaneb dîs ge a ǁnâuǃāxa. ǁÎb ge Elobmîs kēbode ge ǂan i ǂKhauhesab Elob dib nî gao-ao tsî nî ore-ao kai ǃkhaisa. Jesub ge ǁāǁnâhes khaoǃgâb ge Johaneba ǂgui ǁkhâga ǃkhō-oms ǃnâ ge ǂnôa i. ǁNā-amagab ge ge dî ǀnî hâba Jesuba nî ǃkhōǃkhuni. Tsî Mesiab nî dī xūna nî dīǀoaǀoa kēbohe ge khami.
(Mateub 11:16-19) Tsî tare-i ǀkha ta kha nē ǃhaosa nî ǂkhō? ǀGôaron khamin kom io, ǁamaxūǃkhais tawa ǂnû tsî horesan âna ǂgaiǀî 17 tsî ra mîna: Sado da go ǂnuniba, xawe du ǂnā tama, ǃoaǃoaxase ta go ǁnae, xawe du ā tama. 18 Johaneb ge ge hā, ǂû tama tsî ā tamase, on ge ra mî: ǁGâuabab kom ūhâo. 19 Khoen Ôab ge ge hā, ǂû tsî ra āse, on ge ra mî: Mû, ō tsî ǂauxûiba ākhanukhanusen-aob tsî mariǃkhōǃoa-aon tsî ǁore-aon tsîn di ǀhōsab kom ǁîbao; xaweb ge gā-aisiba ǁîb di ôan xa ǂhanu-ai kaihe hâ.
jy-E 98 ¶1-2
Tsūba surib hîna ǃgâ taman ǃoagu
Jesub ge Johaneb ǁĀǁnâ-aoba kaise gere ǀgapiǃgôa. Xawe khoena mati Johaneba gere mû? “Tsî tare-i ǀkha ta kha nē ǃhaosa nî ǂkhō? ǀGôaron khamin kom io, ǁamaxūǃkhais tawa ǂnû tsî horesan âna ǂgaiǀî tsî ra mîna: Sado da go ǂnuniba, xawe du ǂnā tama, ǃoaǃoaxase ta go ǁnae, xawe du ā tama.”—Mateub 11:16, 17.
Jesuba tae-e gere ǂâibasen? ǁÎb ge nēti ge mî: “Johaneb ge ge hā, ǂû tama tsî ā tamase, on ge ra mî: ǁGâuabab kom ūhâo. Khoen Ôab ge ge hā, ǂû tsî ra āse, on ge ra mî: Mû, ō tsî ǂauxûiba ākhanukhanusen-aob tsî mariǃkhōǃoa-aon tsî ǁore-aon tsîn di ǀhōsab kom ǁîbao;” (Mateub 11:18, 19) Johaneb ge Nasarets ǃnâ ǀgui ǃgupu ûiba gere ûi, xûi-eb ge ge ā tama hâ i, xaweb ge nē suriba ra mî ǁîb ǁgâua-e ūhâ di. (Numeri 6:2, 3; Lukab 1:15) Xawe Jesub tsîn ge khoen khami ǀgui gere ûi. ǁÎb ge ǂû tsî gere ā ǀnōsa ǀgaub ai xaweb ge gere ǂhumiǂgā-amhe ǁnāsab ǃnāsase ra dī ti mî-e tsî. Khoena ǂkhîǂkhîs ge ge īǁoa ī.
Elobmîs khomai ǃâs
(Mateub 11:1-19) Tsî i ge ge ī, Jesub ge ǁîb di disiǀgamǀa ǁkhāǁkhāsabega mîmā toao, ob ge ǁnāpa xu aiǃâb ǃoa ge ǃgû, ǁîn di ǃādi ǃnâb ni ǁkhāǁkhā tsî aoǁnâse. 2 Tsî Johaneb ge ǃkhō-oms ǃnâ Xristub dīga ǁnâuo, ob ge ǁkhāǁkhāsabegu âba sî 3 tsî ǁîb ǃoa ge mî: Satsa, hā nîtsa koma? ǀKharaba da nî ǃâu? 4 Ob ge Jesuba ǃeream tsî ge mîǀî gu: ǃGû, î go Johaneba sī ǂhôa, ǁnâu tsî go ra mûna: 5 ǂGī hân ra mûsa, ǃhoran ra ǃgûsa, ǃomamaxan ra ǃanuǃanuhesa, ǂganaǂgae hân ra ǁnâusa, ǁō hân ra ǂkhaiǂkhaihesa, tsî ǀgâsan ǃgâiǂhôasa ra aoǁnâbahesa. 6 Tsî ǃgâiǃō-i ge hâ tita ǃnâ ǁgonǁgonǂgaosen tide-e. 7 Tsî nēgu ge ǃgû, ob ge Jesuba ǂnubidi ǃoa Johaneb xa ge mîtsoatsoa: Tare-e nî mûse du kha ǃgaroǃhūb ǃoa go ǂoa? ǂĀ-i, ǂoab xa ra ǃgomhe-e? 8 Tare-e du nî mûse du kha go ǂoa? Khoe-i, tsamra saran ǀkha anasen hâ-e? Kō, tsamra sarana ana hân ge gao-aogu omgu ǃnâ ra hâ. 9 Tare-e du nî mûse du kha go ǂoa? Kēbo-aoba? Aio, tita ra mîba du, kēbo-aoba xawe ǃnāǂam hâba. 10 Nēb ge a ǁnāb ǁîb xa xoahe hâba: Mû, tita ge ti ǀhomǃgāba ra sî sa aiǃâ, daobab nî sa aiǃâ dī-unuba tsise. 11 Amase ta ra mîba du, taradi xa ge ǁorahen xa i ge Johaneb ǁĀǁnâ-aob ǃgâ-ai kai-e hâ tama hâ, xawe gaosib ǀhommi dib ǃnâ hoan xa ǂkhari-i ge ǁîb ǃgâ-ai a kai-e. 12 Tsî Johaneb ǁĀǁnâ-aob tsēde xu nēsis kōseb ge gaosib ǀhommi diba ra ǁgaribasenhe, tsî ǁgari-aon ge ǁîba ra tsuwubasen. 13 Kēbo-aogu hoagu tsî ǂhanub on ge Johaneb kōse gere kēbo. 14 Tsî ǃkhōǃoa ǂgao du kao, Eliab nē hā nîrab ge ǁîba. 15 ǂGaera ūhâ-e ǁnâu i nîse ī a-i ǁnâu. 16 Tsî tare-i ǀkha ta kha nē ǃhaosa nî ǂkhō? ǀGôaron khamin kom io, ǁamaxūǃkhais tawa ǂnû tsî horesan âna ǂgaiǀî 17 tsî ra mîna: Sado da go ǂnuniba, xawe du ǂnā tama, ǃoaǃoaxase ta go ǁnae, xawe du ā tama. 18 Johaneb ge ge hā, ǂû tama tsî ā tamase, on ge ra mî: ǁGâuabab kom ūhâo. 19 Khoen Ôab ge ge hā, ǂû tsî ra āse, on ge ra mî: Mû, ō tsî ǂauxûiba ākhanukhanusen-aob tsî mariǃkhōǃoa-aon tsî ǁore-aon tsîn di ǀhōsab kom ǁîbao; xaweb ge gā-aisiba ǁîb di ôan xa ǂhanu-ai kaihe hâ.