ǁNaeǁgaudi Sida Xristeǁî ûib tsî aoǁnâ sîsenni ǂkhanib
MAARTI 5-11
ELOBMÎSA XU HÂ ǂÛǂÛSA MÎDI | MATEUB 20-21
“Tsî sago ǃnâ ga ǂguro ǂgaob ge nî sago di ǃoabasabe”
(Mateub 20:3) Tsî ǃnonaǁî iri aib ge ǂoa, ob ge ǀkharaga ǁause gu ǁamaxūǃkhais ai mâ hîa ge mû.
nwtsty mediab
ǁAmaxūǃkhais
ǀNî ǁamaxūǃkhaidi ge daob ǀgūse ge hâ i. ǁAmaxū-aon ge ǁîn gere ǁamaxū xūna daob ǃnâ gere mâi tsîs ge nēsa gere ǃaroma îb daoba ǂganamhe. Khoen ge omǃnāb xūn hîna ǀgapi mari-e ǂgan tamana gere ǁama tsî ǃgâi ǂû-i tsîna. Khoen ge ǂûnan nî ǃkhaiǃkhai-ū xū-e ge ūhâ tama hâ i tsî tsēs hoasa ǂû-e sī ǁamaxūǃkhais tawa gere ǁama. ǁAmaxū ra khoe-i ge nēba ǂhôana gere ǁnâu sari ra khoen, ǀgôan hîna ra ǀhurun tsî khoen hîna sîsen-e ra ôan tsîna xu. ǁAmaxūǃkhaib tawab ge Jesuba khoena gere ǂgauǂgau. Tsî Paulub tsîn ge ǁamaxūǃkhaigu ai gere aoǁnâ. (ǃNǃkh. 17:17) ǀGapiǂâixa xoaǂansabegu tsî Farisegu tsîn ge khoen aiǃâ gere mûmûsen.
(Mateub 20:20, 21) ǃNubais ge Sebedeub ôakha îsa ǁîs di ôakha ǀkha ǁîb tawa hā tsî ǁnāǁgoe, tsî xū-e ge ǂgaoǀkhā bi. 21 Ob ge ǁîs ǃoa ge mî: Tare-es ra ǂgao? Os ge ǁîb ǃoa ge mî: Mîmā î kha nē ti ôakha, ǀguiba sa amǀkhāb tawa tsî nauba sa ǁareǀkhāb tawa gaosib âts ǃnâ ǂnû.
nwtsty study notes Mat. 20:20, 21
Sebedeub ôakha îs: ǁÎs ge apostel Jakobub tsî Johaneb tsîkha di ǁgûsa. Markub ǃnaeǃkhaidi ge ra ǁgau Jakobub tsî Johaneb tsîn ge Jesub ǃoa a īsa. ǁÎkha ge nē ǂgansa ge dī, xawe nēsa ǁîkha ǁgûs Salomis ǃnâ-ū ge dī. ǁÎs ge ǀnîsi ge Jesub ǁgûs di ǃgâsa i.—Mat. 27:55, 56; Mrk. 15:40, 41; Jhn. 19:25.
ǀguiba sa amǀkhāb tawa tsî nauba sa ǁareǀkhāb tawa: Nē ǀgam ǂgan ra ge ǃgôasib tsî gaoǂamsis tsîna ǃoa ra ǁnaeǁgau. Xawe ǀgapi ǃgôasib ǃkhais ge hoaǁae amǀkhāb ai hâ.—Psa. 110:1; ǃNǃkh. 7:55, 56; Rom. 8:34.
(Mateub 20:25-28) Ob ge Jesuba ǁîga ǂgaihā tsî ge mî: ǂAn go kom ao, ǁaedi di danakhoegu ra gaosîsen, tsî kaikhoegu ǁîn ǂama ǀgaiba ūhâ ǃkhaisa. 26 Xawe ǁnāti i ge sago ǃnâ ī tide; sago ǃnâ ga kai ǂgaob ge nî hoagu di ǃgā. 27 Tsî sago ǃnâ ga ǂguro ǂgaob ge nî sago di ǃoabasabe. 28 Khoen Ôab ge hā tama, ǃoabaheb nîse, tsîb nî ǃoaba tsî ǁîb ûiba māse ǂguin di orehesa ǃoa.
nwtsty study notes Mat. 20:26, 28
ǃoabasabe: Tamas ka io “ǃgāb” di hâ mîs ge Grike mîs di·aʹko·nos hîna Elobmîs ǃnâ ra sîsen-ūhes ge ǃgamǃgamsen tsî nau khoena ra ǃoaba khoen ǃoa ra ǁnaeǁgau. Nē mîs ge Xristub ī ǀgauba ra mîǃāǃā (Rom. 15:8), Xristub di ǃoabasabe-i tamas ka io ǃgāgu ǃoas tsîna ra ǁnaeǁgau (1Kor. 3:5-7; Kol. 1:23) ǀhaohâb hui-aogu (Fil. 1:1; 1Tim. 3:8), oms sîsen-aon (Jhn. 2:5, 9) tsî ǂhanub danagu ǃoas tsîna (Rom. 13:4).
khoen Ôab ge hā tama, ǃoabaheb nîse xaweb nî ǃoaba.
Gagasi xūna ǀō-aisase ôaǃnâs
(Mateub 21:9) Tsî ǂnubidi aiǃgû tsî ra saodi ge ǂgai tsî ge mî: Hosiana Davib ôaba! ǀKhaeheb hâ ǃgoaxaba ǃKhūb di ǀons ǃnâ! Hosiana ǀgapiseb ǃnâ!
nwtsty study note Mat. 21:9
Hosiana: Nē Grike mîs hîna Hebregowaba xu ra hās ge “sâu” tamas ka io “ǀgore” di ra ǂâibasen. Ne mîs ge Elob ai oresa ǂgans ǃgaos tsîna ra sîsen-ūhe. Nēs ge ǁaeb ra ī khami ǀgores tsî koas ase a ǂansa. Nē Hebre mîs ge Psa. 118:25 ǃnâ ra hō-e, nēs ge ge Hallel Psalmdi ǃâ-i ǃui ǂûs ǁaeb ǃnâ gere ǁnaehe de. ǁNā-amaga i ge khoena nē mîde ge ǂan i. ǀGui ǀgaub hînab ge Eloba ǁîb ǀgoredi Davib ôaba sâus diba a ǃereams ge ǁîba ǁōba xu khâisa māsa. Mat. 21:42 ǃnâb ge Jesuba aitsama Psa. 118:22, 23 sa ge ǁgae tsî Mesiaba ǃoa ge ǁnaeǁgau.
Davib ôab: Nēs ge Jesub di omaris xa ra ǃhoa tsî ǁîb a Mesia ǃkhais tsîna.
(Mateub 21:18, 19) Tsî ǃnauǁgoaga, ǃās ǃoab gau hîab ge ge ǃâ. 19 Tsî ǀnomahaisab ge daob amǃgâ mûo, ob ge ǁîs tawa sī, tsî ǀnî xū-e ǁîs ai hō tama ge i, ǂgonan ǀguin. Ob ge ǁîs ǃoa ge mî: ǃAruǀî i ge sasa xu tātsēs kōse ǂû-e ǀkhī tide. Os ge ǀnomahaisa ǁnātimîsi ge ǂnâ.
jy-E 244 ¶4-6
ǀNomahais ge ǂgoms di aiǁgaus ase ra sîsen-ūhe
Xawe Jesuba tae-i ǃaroma haisa ge ǂnâ kai? Jesub ge sao rase ge ǃeream: “Amase ta ra mîba go, ǂgomsa go ga ū hâo tsî îganǀgē tama io, o go ga nē ǀnomahais ǀkha go īs ǀguisa dī tama i hâ, tsî go ga nē ǃhommi ǃoa mîo: Ūkhâisen î hurib ǃnâ aoǂgāsen! o i ge nî ī. Tsî ǀgores ǃnâ go ga ǂgom hâse ǂgan xūn hoana go ge nî ǃkhōǃoa.” (Mateub 21:21, 22) ǁÎb ge mî, mîsab ge ra ǁguiǃā, ǂgoms ge ǃhomga ra gon kai di.—Mateub 17:20.
Jesub ge haisa ǂnâ kais ǃnâ-ū ge ǁgau ǂhâǂhâsasib ǂgomsa Elob ǃnâ ūhâs diba. ǁÎb ge ge xoa: “ǀGores ǃnâ du ra ǂgan xūn hoan, ǁîna du nî ǃkhōǃoa ǃkhaisa du ga ǂgomo, on ge a sadu di.” (Markub 11:24) Nēs ge kaise ǂhâǂhâsa ǁkhāǁkhās Jesub saosaben disa! Nēs ge apostelgu ǃaromas tsîna ge ǃgâi i, ǃgomsin hîna gu gere hōǃân ǃaroma. ǀNî hâ ǀgaub ǃnâs tsîna i ge ǀnomahais tsî ǂgoms tsîna a ǀgui.
ǀNomahais khamin ge Israelǁaes khoena gāxaǃnâ ǀgauga ge ūhâ i. ǁÎn ge Elob ǀkhan ǀhōsagusisa ūhâ tsî ǁîb ǂhanuga ra ǁnâuǀnam khami gere tanisen. Xawes ge ǁnā ǁaesa ǂgoms tsî ǃgâi ǂû-i tsîna ge ūhâ tama hâ i. Elob ǀGôab tsînan ge ǁîna ge ǃkhōǃoa tama hâ i. Jesub ge ǀhomahaisa ǂnâ kais ǃnâ-ū ge ǁgau tae-i ǂgomsa ūhâ tama khoen ǀkha nî īsa.
Elobmîs khomai ǃâs
(Mateub 20:1-19) Gaosib ǀhommi dib oms ǀhonkhoeb khami ī xui-ao, ǁgoas ǀkha ra ǂoaba, sîsenaogab nî ǁîb ǂauxûiǂûǃhanaba ǃgaebase. 2 Tsî sîsenaogu ǀkhab ge ǀhûǀguio, ǀgui marisa tsēs ai, ob ge ǂauxûiǂûǃhanab ǃoa ge sî gu. 3 Tsî ǃnonaǁî iri aib ge ǂoa, ob ge ǀkharaga ǁause gu ǁamaxūǃkhais ai mâ hîa ge mû. 4 Ob ge ǁîgu ǃoa ge mî: Sago ona ti ǂauxûiǂûǃhanab ǃoa ǃgû, tsî ǂhanu i a khami ta nî mā go. 5 O gu ge ge ǃgû. ǁKhawab ge ǃnaniǁî tsî khoeseǁî iri ai ǂoa, tsî ǁnās ǁkhās xase ge dī. 6 Tsî disiǀguiǀaǁî iri aib ge ǂoa, ob ge ǀkharagu ǁause mâga hō, tsî ge mîǀî gu: Tarexa go hoaraga tsēsa nēpa ǁause ra mâma? 7 O gu ge ǁîb ǃoa ge mî: Khoe-i xare-i kom ǃgae ge tamao. Ob ge ge mîǀî gu: Sago ona ti ǂauxûiǂûǃhanab ǃoa ǃgû, tsî ǂhanu i a khami go ge nî ǃkhōǃoa. 8 Tsî ǃui i geo, ob ge ǀhonkhoeb ǂauxûiǂûǃhanab diba mûǂam-aob ǃoa ge mî: Sîsenaoga ǂgai, î ǁîgu di amǃnâsa mā gu, î tsoatsoa ǀunigaba xu ǂgurob kōse. 9 O gu ge disiǀguiǀaǁî iri ai go ǃgaehega ge hā, tsî mâb hoab ge ǁîb marisa ge hō. 10 Tsî ǂgurogu ge hā, o gu ge ge ǂâi, ǁnāgu ǂamai gu ga hōsa, xawe gu ge ǁîgu ona mâb hoaba ǀgui marisa ge hō. 11 Tsî ǁîsa gu ge hō, o gu ge ǀhonkhoeba ǀaraǂam, 12 tsî ge mî: Nē ǀunigagu kom ǀgui iri ǀguiba goro sîseno, ots sige ǁîgu ǀkha go ǀguiǀgui, tsēs di ǃgommi tsî ǀgammi tsîkha go tanige. 13 Ob ge ǃeream, tsî ǀguib ǃoa ge mî: Khoetse, ǂkhabase ta kom dī-ū tsi tamao, tita ǀkhats kha ǀgui maris ama ǀgui tama hâ? 14 Sa marisa ū î ǃgû, nē ǀunigagu ona ta ra mā ǂgao sats khami. 15 Mā-amhe tama ta ǁnâi hâ, tin ǀkha ǂgao ta ra khami dīsa? ǀNîsis mûs âtsa a ǂkhaba, tita a ǃgâi amaga? 16 Nētin ge ǂgurona nî ǀuniga, tsî ǀunigan ge nî ǂguro; ǂguin ge ǂgaisana, xawe ǀoron a ǃkhōǂuibasensa xui-ao. 17 Tsî Jesub ge Jerusalems ǃoa ǃapao, ob ge disiǀgamǀa ǁkhāǁkhāsabega daob ai ǀgui ǀkhāb ǁga ū tsî ǁîgu ǃoa ge mî: 18 “Mû, Jerusalems ǃoa ge ge ra ǃapa, tsîb ge Khoen Ôaba ǀgapipristergu tsî xoaǂansabegu tsîga nî māǁnâhe, tsî gu ge ǁîba ǁōb ǃoa nîra ǀgoraǃgâ 19 tsî gu ge ǁîba ǀūbena ǃharaxūhes, ǂnauhes tsî ǃgâuhes tsîn ǃoa nîra māǁnâ; tsî ǃnonaǁî tsēs aib ge nîra khâi.
MAARTI 12-18
ELOBMÎSA XU HÂ ǂÛǂÛSA MÎDI | MATEUB 22–23
“ǀGam kai mîmāra ǁnâuǀnam re”
(Mateub 22:36-38) ǁKhāǁkhā-aotse, mâ mîmā-e a hoan xa kai ǂhanub ǃnâ? 37 Ob ge Jesuba ǁîb ǃoa ge mî: ǃKhūb sa Elobats ge nî ǀnam sa ǂgaob hoab ǀkha, tsî sa ǀoms hoas ǀkha, tsî sa ǂâis hoas ǀkha. 38 ǁÎs ge ǂguro tsî hoan xa kai mîmāsa.
nwtsty study note Mat. 22:37
ǂgaob: Nē mîs ge khoe-i ǂganagaba ǃoa ra ǁnaeǁgau. Xawe i ga ǂgaoba “ǀoms” tsî “ǂâis” tsîn ǀkha ǀguiba ga ra sîsen-ūhe o, o i ge khoe-i tsâsib tsî turagu tsîn xa ra ǃhoa. ǂGaob, ǀoms tsî ǂâis tsîn ge ǂgui ǀgaugu ǃnâ a ǀgui, nēs ge ǀgaugu hîna da Elob ǃoa-ai ǀnamma a ǁgau ǁkhāga ǃkhōǂgā hâ.
ǀoms: tamas ka io “khoe-i.”
ǂâis: Nēb ge gā-aisiba ǃkhōǂgā hâ. Khoe-i ge ǁî-i gā-aisiba nî sîsen-ū î-i Eloba ǂan tsî ǀnam. (Jhn. 17:3, Rom. 12:1) Deu. 6:5 ǃnâ i ge ǃnona Hebre mîde ra sîsen-ūhe, ‘ǂgaob, ǀoms tsî ǁkhāsib’ tsîna. Xawe Mateub ǂkhanis ǃnâ i ge “ǂâis” di hâ mîsa ra sîsen-ūhe “ǁkhāsib” di hâs ose. ǃAroma i ge hâ nē ǃkharagaǃnâgu mîde sîsen-ūs ǃgao. ǃKharu ge ǁaeb ǃnân ge Hebreǁîna “ǂâis” di hâ mîsa ūhâ tama hâ i xawen ge ǁîna nē mîsa “ǂgaoba” ǃoa gere ǁnaeǁgau. Nē mîs ge ra sîsen-ūhe khoe-i di ǂganagab, ǂâi ǀgaub, tsâsib, ǂūb tsî ǂâibasendi ǃoas tsîna ǁnaeǁgausa. (Deu. 29:4; Psa. 26:2; 64:6 mû re study notes di hâ ǃâba ǂgaob xa hâ ǁaraǃādi ǃnâ.) Hebre Xoadi “ǂgaob” di hâ mîsa ra sîsen-ū hînas ge Grike Septuagint sa Grike mîs “ǂâis” di hâsa ra sîsen-ū. (Gen. 8:21; 17:17; ǂKhm. 2:10; Jes. 14:13) ǀNî hâ ǃaromas Mateub ge Deu. 6:5 ǃnâ “ǂâis” di hâ mîsa a sîsen-ū tsî “ǁkhāsib” di hâsa sîsen-ū tama hâ īs ge nē Hebre mîs ge sorosi ǁkhāsib, ǂâis tsî gā-aisib tsîna ǃkhōǂgā hâ. Nē ǃkharagaǃnâgu ǂâi ǀgaugu Hebre tsî Grike mîdi digu ge nî mîǃā tae-i ǃaroma gu ge ǃGâiǂhôas xoa-aoga ǀgui ǂâibasensa ūhâ mîde sîsen-ū tama hâ isa.
(Mateub 22:39) Tsî naus ǁîs ǀkha ǀguitikōs ge: Sa ǀgūkhoebats ge nî ǀnam sats ǁkhāts khami.
nwtsty study note Mat. 22:39
ǀguitikōs: Mat. 22:37 tawa i ge Jesub ge Farisiga a mā ǃereamsa a xoasa, xaweb ge Jesuba ǁnāpa ǀgamǁî mîmāsa ge mā. (Lev. 19:18) Tsî ge ǁgau nē ǀgam mîmāra ǃkharagagusiba ūhâ tama hâsa tsî ǁnā mîmāra ge ǂhanub tsî kēbo-aogu tsîna ǃkhōǂgā hâ.—Mat. 22:40.
ǀgūkhoen: Grike mîs “ǀgūkhoen” di ra mîs ge sadu ǀgūse ra hâ khoen ǃoa ǀgui ǁnaeǁgau tama hâ. Nēs ge khoe-i ra ǁgamǀhao-ū khoen tsîna ǃkhōǂgā hâ.—Luk. 10:29-37; Rom. 13:8-10.
(Mateub 22:40) Nē ǀgam mîmāra ai gu ge ǂhanub hoab tsî kēbo-aogu ona ǂgāsen hâ.
nwtsty study note Mat. 22:40
ǂhanub. . .tsî kēbo-aogu: “ǂHanub” di hâ mîs ge Genesis sa xu Deuteronomiums kōse hâ Elobmîs ǂkhanide ǃoa ra ǁnaeǁgau. Tsî “kēbo-aogu” di hâ mîs ge hoa kēbodi Hebre xoadi ǃnâ hâde ǃoa ra ǁnaeǁgau. Xawe i ga nē mîde ǀguiba sîsen-ūhe o, on ge khoena a ǁnâuǃā ǁkhā nēs hoa Hebre Xoadi xa ra ǃhoasa.—Mat. 7:12; 22:40; Luk. 16:16.
ǂgāsen: Nē Grike mîs hîna “ǂgāsen” di hâs ge ‘xū-i ai ǃâubasens’ di ra ǂâibasen. Jesub ge ge ǁgau disi mîmāde ūhâ ǂhanub ǀguib ge ǀnammi ai ǃgaoǃgaosa tama hâ xawe hoa Hebre Xoadi tsîna.—Rom. 13:9.
Gagasi xūna ǀō-aisase ôaǃnâs
(Mateub 22:21) O gu ge ǁîb ǃoa ge mî: Kaesari dira komo. ǃNubaib ge ǁîgu ǃoa ge mî: Kaesara ǁnâi mā Kaesari di-e, tsî Eloba Elob di-e.
nwtsty study note Mat. 22:21
Kaesara ǁnâi mā Kaesari di-e: Jesub ge nēba a mā ǃereams tsî ǁîb ǂkhōdi Mrk. 12:17 tsî Luk. 20:25 tsîn ǀguin ge Romeǁîn ǂgaeǂgui-aob xa ra ǃhoa. ‘Kaesari di-i’ ge ǂhanuba da ra dība xūn tsî ǃgôasib hîna da ra ǁgaub tsîna ǃkhōǂgā hâ.—Rom. 13:1-7.
Eloba Elob di-e: Nēs ge khoe-i ǃoabas hîna ǂgaoba xu ra hās tsî ǁnâuǀnamxasib tsîna ǃkhōǂgā hâ.—Mat. 4:10; 22:37, 38; ǃNǃkh. 5:29; Rom. 14:8.
(Mateub 23:24) ǂGī ǂgaeǂgui-aogo, ǀûitsibena ǁkhaeǂui tsî ǃnaina ra harago.
nwtsty study note Mat. 23:24
ǀûitsibena ǁkhaeǂui tsî ǃnaina ra harago: ǀÛitsiben ge ǂkhariro xawen ge ǃnain ǀkha ǀguiba ǀurixase gere mûhe Israelǁîn xa. (Lev. 11:4, 21-24) Jesub gere ǂâibasens ge ǂgomdi ǂgaeǂgui–aogu ge ǀûitsiben ǀkha ǀuriǀurisen tama hâ isa. Xawe gu ge ǁîga ǂhanub di ǂûǂûsa xūna ge ǃgôaǃgâ tama hâ i tsî ǁnās ge a ǀgui ǃnaiba haras ǀkha.
Elobmîs khomai ǃâs
(Mateub 22:1-22) Tsîb ge Jesuba ǃeream tsî ǁkhawa ǂkhōdi ǃnâ ǁîgu ǃoa ǃhoa tsî ge mî: 2 Gaosib ǀhommi dib ge ǂanǂansa gao-aob, ǁîb ôaba ǃgameǁâu-e ge ǂhomibab khami ī. 3 Tsîb ge ǁîb ǃgāga ge sîǂûi, ǁkhausabena gu nî ǃgameǁâus ǃoa ǂgaihāse, xawen ge hā ǂgao tama ge i. 4 ǁKhawab ge ǀnî ǃgāga sîǂûi tsî ge mî: ǁKhausabena mîba: Mû, ti tsēǃgâǂûs ge ǂhomihe hâ, ti gomagu tsî kaukauhesa tsâun tsîn ge go ǂāhe; tsî hoan ge ǂhomihe hâ, xuige hā ǃgameǁâusa ǃoa. 5 Xawe gu ge ǁîsa ǃharaxū tsî ge bē, ǀguib ǁîb di ǃhanab ǃoa, tsî ǀnîb ǁîb di ǁamagus ǃoa, 6 tsî naugu ge ǁîb ǃgāga ǃkhō, ǁgaisise sîsenū tsî ge ǃgam gu. 7 Tsî gao-aob ge ǁnâu, ob ge ǁaixa, tsî ǁîb toro-aoga sîǂui tsî ǁnā ǃgam-aoga hîkākā, tsî ǁîgu ǃāsa ge ǃkhāǂhubi kai. 8 ǃNubaib ge ǁîb ǃgāgu ǃoa ge mî: ǃGameǁâus ge ǁāǁāhe gosa, xawen ge ǁkhausabena anu tama hâ. 9 Xuige ǃgû daogu ǀamdi ǃoa, î hō go ga ran hoana ǃgameǁâus ǃoa ǂgaihā. 10 O gu ge ǃgāga ǂoa, tsî hō gu ran hoan, ǂkhaban tsî ǃgâin tsîna ge ǀhaoǀhao; ob ge ǃgameǁâus omma ǁkhausaben xa ge ǀoa. 11 Tsî gao-aob ge ǂgâ, ǁkhausabenab nî kōse, ob ge ǁnāpa khoeb, ǃgameǁâus saraba ǂgaeǂgāsen tamaba ge mû. 12 Tsî ǁîb ǃoa ge mî: Ti khoetse, matits go nēpa ǂgâxa, ǃgameǁâus saraba ūhâ tama hâǃâ? Ob ge ge ǃnōǃari. 13 ǃNubaib ge gao-aoba ǃgāgu ǃoa ge mî: ǃGaeǃnon bi ǂaira tsî ǃomkha, î ǃgâga hâ ǃkhaenab ǃnâ aoǂgā bi; ǁnāpa kha ge āb tsî ǁaninǁgûb tsîkha nî hâ. 14 ǂGuin a ǂgaisana, xawe ǀoron a ǃkhōǂuibasensana xui-ao. 15 ǃNubai gu ge Farisega ǃgû, tsî ǀapeǀhaosa ge dī, mati gu nî ǁîba mîs âb ǃnâ ǃkhōsa. 16 Tsî gu ge ǁîgu ǁkhāǁkhāsabega Herodeǁîgu ǀkha sî tsî ge mî: ǁKhāǁkhā-aotse, ǂan ge ge a ama-aits a ǃkhaisa, tsî Elob daobats amab ǃnâ ra ǁkhāǁkhā tsî khoe-ets sau tama ǃkhaisa, khoen aisats kō tama amaga. 17 Mîba ge ǁnâi re matits ra ǂâi: Mā-amhes hâ Kaesara ǁguibasa māsa? Mā-amhe tamas hâ? 18 Ob ge Jesuba ǁîgu gāxaǃnâsiba ǂan, tsî ge mî: Tarexa go ra ǃâitsâ te, sa hînaxaǃnâgo? 19 ǁGui-aimarisa ǁgau te. O gu ge ǁîba marisa ge ǁgau. 20 Ob ge ǁîgu ǃoa ge mî: Tarib dira īb tsî xoamâis tsîra? 21 O gu ge ǁîb ǃoa ge mî: Kaesari dira komo. ǃNubaib ge ǁîgu ǃoa ge mî: Kaesara ǁnâi mā Kaesari di-e, tsî Eloba Elob di-e. 22 Tsî ǁnâu gu ge, o gu ge buru tsî ǁîba ǁnāxū, tsî ge bē.
MAARTI 19-25
ELOBMÎSA XU HÂ ǂÛǂÛSA MÎDI | MATEUB 24
“Gagasise ǂkhaikari hâ re ǀuniga tsēdi ǃnâ”
(Mateub 24:12) Tsî ǂkhabasib nî ǂguiǂguisen amagab ge ǂguin di ǀnamma nîra ǃkhai.
it-2-E 279 ¶6
ǀNammi
Khoen ǀnammi ge nî ǃkhai. Jesub ge ǁîb ǁkhāǁkhāsabega gere mîba o hānîǁaeb ǃnâ nî ī xūna ob ge ge mî khoen ǀnammi (a·gaʹpe) ge nîra ǃkhai di. (Mat. 24:3, 12) Apostel Paulub ge ge mî ǀuniga tsēdi ǃnân khoena nî “mariǃgunuxa” di. (2Tim. 3:1, 2) Nēs ge ra ǁgau khoen Elob ǁgaraga nî ǀuru tsî ǁîga sao tidesa tsî i ǁîn ūhâ ǀnamma nî bēsa. Nēs ge ǂhâǂhâsasib Elobmîsa ǂōrisase khomais tsî nē da ra khomai xūn xa ǂâiǃgâs tsî sida ûiga Elob ǁgaragu ǃoagu ǀkharaǀkharas tsîna ra ǁgau.—Efe. 4:15, 22-24.
(Mateub 24:39) Tsîn ge mûǂan tama i, kai ǁgammi hā tsî hoana ge ūbēs kōse; ǁnāti i ge ǁkhāti nîra ī Khoen Ôab di hās ǃnâ.
w99-E 11/15 19 ¶5
Sadu ǂgaoǀkhāde du Elob ǃoa-ai ǂgaob hoab ǀkha ra dīǀoaǀoa?
5 Jesub ge ǀuniga tsēdi xa ge mî: “Tsî Noaxi di tsēdi ǃnâ i ge ī khami, ǁnāti i ge ǁkhāti Khoen Ôab di hās ǃnâ nîra ī. Tsî kai ǁgammi di tsēdi ǃnâ i ge ī khami, ǂû tsî ra āǃâ, ǃgame tsî ǃgameb ǃoa ra māǂuiǃâ, Noaxi ge arki ǃnâ ǂgâ tsēs kōse.Tsîn ge mûǂan tama i, kai ǁgammi hā tsî hoana ge ūbēs kōse; ǁnāti i ge ǁkhāti nîra ī Khoen Ôab di hās ǃnâ.” (Mateub 24:37-39) Tsū tama i ge hâ ǃgâi ǀgaub ǃnâ ǂû tsî āsa tsî ǃgameb ge Elob xa ge ǂnûiǂgāhe. (Genesis 2:20-24) Xawe da ga mû o nē xūn ge sida ûib ǃnâ ǂgurose mâ di, tae-i ǃaroma da nēs ǂam-ai ǀgore tama hâ? Jehovab ge nî hui da î da ǁÎb Gaosiba ǂgurose mâi, ǂhanu xūna dī tsî ǁîb ǂgaoǀkhāde ǂgaob hoab ǀkha dīǀoaǀoa.—Mat. 6:33; Rom. 12:12; 2Kor. 13:7.
(Mateub 24:44) ǁNā-amaga, sadu ona ǀhami hâ; ǂâi tama du hâ iri aib Khoen Ôaba nîra hā xuige.
jy-E 259 ¶5
Apostelgu ge ǁgauǁgau-e ge ǂgan
Jesub ge ra mî ǁîb ǁkhāǁkhāsabegu ge ǂkhaikari nî hâ di. Jesub ge nēsa ra ǂkhō mî rase: “Î du nēsa ǂan, oms ǀhonkhoeb ga ǂan io, mâ tsuxuǃûiǁaeb aib nî ǃnari-aoba hāsa, ob ge ga ǃûi tsî oms âba khôaǂgâǃnâ kai tama i hâ. ǁNā-amaga, sadu ona ǀhami hâ; ǂâi tama du hâ iri aib Khoen Ôaba nîra hā xuige.”—Mateub 24:43, 44.
Gagasi xūna ǀō-aisase ôaǃnâs
(Mateub 24:8) Tsî nēn hoan ge tsûn di tsoatsoas ǀguise nîra ī.
nwtsty study note Mat. 24:8
tsûn: Nē Grike mîs ge tsûb hîna ǀgôa hōb ǃnâ ra hōǃâheb xa ra ǃhoa. Nēs ra ǂâibasens ge ǀgôa ǁorab ǃnâ ra hōǃâhe tsûb khami i ge hānîǁaeb ǃnâ ǃgomsina hoaǁae nî ǂguiǂguisen tsî nî ǀgaisa. Nēs ge kai tsūǀkhāgu hîna Mateub 24:21 ǃnâ ra mîhe gu khami nî ī.
(Mateub 24:20) ǀGore ǁnâi re, îs ǃhūs âdo tā saob tsî sâtsēs ai ī.
nwtsty study note Mat. 24:20
saob: ǀGaisa ǀnanub, ǁgam dâub tsî ǃkhai ǂoa mâsigu tsîn ge nî ǃaroma î-i ǂû-i tsî hâǃkhais tsîna hōsa ǃgom.—Esr. 10:9, 13.
sâtsēs: Judeab ǃnâ i ge kaise ge ǃgom-i sâtsēs ai ǃnū ǃāde ǃoa īsa tsî ǃgom xūna ūsaosa dao-amdi gere ǂganamhe xui-ao sâtsēs ai.—ǃNǃkh. 1:12 tsî App. B12 tsîna mû re.
Elobmîs khomai ǃâs
(Mateub 24:1-22) Tsî Jesub ge ǂoa tsî tempela xu bēo, o gu ge ǁkhāǁkhāsabegu âba hā, tsî ǁîba tempeli di kuru-aiga ge ǁgau. 2 Ob ge Jesuba ǁîgu ǃoa ge mî: Mû go ra nēn hoana? Amase ta ra mîba go: Nēpas kom ǀgui ǀuis tsîna naus ai ǁnāxūhe tideo, khôaǁnâhe tidesa. 3 Tsî ǀKheraǃhommi aib ge ǂnû, o gu ge ǁkhāǁkhāsabega ǁîb ǃoa ǀguri hā tsî ge mî: Mîba sige re, mâǁaen nēna nîra īsa, tsî mâs a saos sa hās tsî nē hâ ǁaeb ǀams disa ǃkhaisa. 4 Ob ge Jesuba ǃeream tsî ǁîgu ǃoa ge mî: Mûbasen re, î-i tā khoe-e ǂgaeǂhapu go. 5 ǂGuigu kom ti ǀons ǃnâ hā tsî nîra mîo: Xristuta ge tita ti; tsî gu ge ǂguina nîra ǂgaeǂhapu. 6 Tsî torogu tsî torogomgu xa go nîra ǁnâu. Kō, î go tā ǃao re. Nēn hoan aibe nîra ī, xawen ge ganupe ǀam tama hâ. 7 Nē ǁaes ge nau ǁaes ǃoagu tsî nē gaosis ge nau gaosis ǃoagu nîra khâima tsî ǂhī ra ǀaesenaigu, ǃâtsūǀkhāgu tsî ǃhūǂgubigu tsîgu ǃkharaga ǃkhaidi ǃnâ nîra ī xui-ao. 8 Tsî nēn hoan ge tsûn di tsoatsoas ǀguise nîra ī. 9 ǃNubain ge sago tsūǀkhāb ǃnâ nîra māǁnâ, ǃgam tsî go ge hoa ǁaedi xa nîra ǁkhanhe, ti ǀons ǃaroma. 10 Tsî ǁnāǃnubain ge ǂguina nîra ǁgonǁgonǃnâhe, māǁnâgu tsî nîra ǁkhangu. 11 Tsî ǂgui ǂkhaba kēbo-aogu ge khâi tsî nîra ǂguina ǂgaeǂhapu. 12 Tsî ǂkhabasib nî ǂguiǂguisen amagab ge ǂguin di ǀnamma nîra ǃkhai. 13 Xawe ǀunis kōse ga mâhō-i ge nîra ǃgâiǃō. 14 Tsî ǃgâiǂhôas gaosib dis ge ǃhūbaib hoab ai nîra aoǁnâhe, hoa ǁaedi mîdansa ǃoa; tsî ǁnāǃnubais ge ǀamsa nîra hā. 15 ǁGaidīb hîǀhurus dib, kēbo-aob Danieli ge ǁîb xa ǃhoaba du ga ǁnâi ǃanu ǃkhais tawa mûmâo, (khomai ra-e a-i ǃgaoǃgâ!): 16 ǃNubai an Judeab ǃnâ hâna ǃhommi ǃoa ǁhai. 17 Tsî oms ǂamǃnâb ai ga hâ-e, a-i tā ǁgôaxa, xū-e-i nî omsa xu ūbēse. 18 Tsî ǃhanab tawa ga hâ-e, a-i tā khaosǀkhābǀî oa, ǁî-i sarana nî ūbēse. 19 Tsî tsūba di ǀgamǀkhā hâdi tsî daisi radi tsîde ǁnā tsēdi ǃnâ. 20 ǀGore ǁnâi re, îs ǃhūs âdo tā saob tsî sâtsēs ai ī. 21 ǁNāǃnubai gu ge kai tsūǀkhāga nîra hâ, ǃhūbaib di tsoatsoasa xu nēsis kōse ge ī tama hâ iga, tsî ǁkhāti ī tidega. 22 Tsî ǁnā tsēdi ga ǃnubuǃnubuhe tama io, o i ge ǀgui khoe-i xare-e ga ǃgâiǃō tama i hâ, xawe ǃkhōǂuibasensan ǃaroma di ge nîra ǃnubuǃnubuhe.
MAARTI 26-APRILI 1
ELOBMÎSA XU HÂ ǂÛǂÛSA MÎDI | MATEUB 25
“ǂKhaikari hâ”
(Mateub 25:1-6) ǃNubaib ge gaosib ǀhommi diba disi ǂkhamkhoedi khami nîra ī, ǁîdi ǃamamǀaede ū tsî dî-amaoba ge ǃgûǃoade. 2 Tsî korodi âdi ge ge gā-ai i, tsî korodi âdi ge ge gâre i. 3 Tsî gâredi ge ǁîdi ǃamamǀaede ū, tsî oli-e ǁîdi ǀkha ū tama ge i. 4 Xawe gā-aidi ge ǁîdi ǃamamǀaedi ǀkha oli-e ǁîdi xapadi ǃnâ ge ū. 5 Tsî dî-amaob ge ǀhaweo, o di ge hoade ǂomhî tsî ge ǁom. 6 Tsî tsuxuǃgâb aib ge ǂgaiba ge hā: Mû, dî-amaob ge ǃgoaxa; ǂoa î so ǃgûǃoa bi, ti.
(Mateub 25:7-10) ǃNubai di ge ǁnā ǂkhamkhoedi hoade khâi tsî ǃamamǀaedi âde ge ǂhomi. 8 O di ge gârede gā-aidi ǃoa ge mî: Saso oli-i xa mā se re, sise ǃamamǀaedi ra ǀari xuige. 9 O di ge gā-aide ǃeream tsî ge mî: ǀNîsi i ge sise tsî saso tsîn ǃaroma ǂâu tide. ǃGû ǁamaxū-aon ǃoa, î so sī ǁamabasen re. 10 Tsî ǁama nîse di ǃgûgau hîab ge dî-amaoba ge hā; o di ge ǂhomisen hâde ǁîb ǀkha ge ǂgâ ǃgameǁâus ǃoa, tsîs ge dao-amsa ge ǂganamhe.
(Mateub 25:11, 12) Ega di ge nau ǂkhamkhoedi ona hā tsî ge mî: ǃKhūtse, ǃKhūtse, ǁkhowa-amba se re. 12 Xaweb ge ǃeream tsî ge mî: Amase ta ra mîba so, ǂanso tama ta hâ!
Gagasi xūna ǀō-aisase ôaǃnâs
(Mateub 25:31-33) Tsî Khoeb ôab ge ǁîb ǂkhaisib tsî ǁîb di ǃanu ǀhomǃgāgu hoagu ǀkha hā, ǃnūbaib ge ǁîb ǂkhaisib di trons ai nîra ǂnû; 32 Tsîti ge hoa ǁaete ǁîb aiǃâ nîra ǀhaoǀhaohe, tsîb ge ǁîna nîra ǀgoraǃa, ǃûi-aob ta gūna pirina xu ǀgoreǃa khemi; 33 Tsîb ge nîra nâi in: Gūna ǁîb am-ǀkhāb ai, tsî pirina ǁîb ǁareǀkhāb ai.
w15-E 3/15 27 ¶7
ǂGomǂgomsase Xristub ǃgâsana ǂkhâǃnâ re
7 Nētsē da ge ǃamkuse gūn tsî pirin tsîn di ǂkhōde ra ǁnâuǃā. Nē xoahe hâ xūn ge ra ǁgau Jesub a “Elob ôa” ǃkhaisa. Tsî “ti ǃgâsa” di i ga ra mîhe o, o i ge ǂkhauhesa khoen hîna Xristub ǀkha ǀhommi ǃnâ nî ǂgaeǂguina ǃoa ra ǁnaeǁgau. (Rom. 8:16, 17) “Gūn” tsî “pirin” tsîn ge khoen hoa ǃhaode xu ra hāna ra ǂnûiǁkhaeba. ǁÎn ge ǃanu gagab xa ǂkhauhe tama hâ. ǀGoraǃgâs di ǁaeb xa i tae-e ra mîhe? Nē ǀgoraǃgâs ge kaiǁgâiǀāb ra toa hîna nî tsoatsoa. Khoen gūn tsî pirin ase nî ǀgoraǃgâhe ǃkhaisa tae-e ra ǂâibasen? Nēs ge ǁîn Xristub ǂkhauhesan hîna ǃhūbaib ai hânan ra hâ-ū ǀgauba xu hâ. Nē ǃhūbaib ǀams ra ǀgū khami da ge ra ǂkhî mûsa Jehovab ǃnâba ǁîb nau ǂkhōdi tsî Mateub 24 tsî 25 tsîn ǃnâ xoasa ǂkhōdi ais tsîna ra māsa!
(Mateub 25:40) Ob ge gao-aoba ǃeream, tsî ǁîn ǃoa nîra mî: Amase ta ra mîba du, ǀgui-i nē ti ǃgâsan xa ǂkhari-e du ga dība hâ-i hoa-e du kom tita ge dībao.
w09-E 10/15 16 ¶16-18
“Sadu ge ti ǀhōsa”
16 ǃHūbaib ai du ga Elob Gaosib ǂgaeǂguis ǃnaga ga ra hâ ǂgao o, o du mati ǀhōsagusisa Xristub ǃgâsan ǃoagu nî ǁgau? Hā re î da ǃnona ǀgauga kō. ǂGurose ǂōrisase aoǁnâ sîsenni ǃnâ ǁhao re. Xristub ge ǁîb ǃgâsana ge mîmā în ǃhūbaib ǂhawase aoǁnâ. (Mat. 24:14) Xawe î ge nētsē ǃhūbaib ai hâ Xristub di ǃgâsaga nî ǃgomba nē sîsen-e dīsa nau gūn di huiba gu ga ūhâ tama io. Nau gūn ga aoǁnâ sîsenni ǃnâ ga ra ǁhao khamin ge ǁîna Xristub ǃgâsaga ra hui ǁîgu mîmāsa dīǀoaǀoas ǀkha. ǂGomaǂgomsa tsî gā-ai ǃgāb tsî Xristub tsîn ge nē ǀhōsagusisa ra ǃgôaǃgâ.
17 ǀGamǁî ǀgaub hînan nau gūna Xristub ǃgâsaga a hui ǁkhāb ge aoǁnâ sîsen-e marisise ǂkhâǃnâsa. Jesub ge ǁîb saosabena ge mîba în ǀhōsagusisa “ǂhanuoǃnâ ǃkhūsib” ǀkha kuru. (Luk. 16:9) ǀHōsagusisa da ge Jesub tsî Jehovab tsîn ǀkha a ǁama ǁoa. Sida ūhâ xūna da ga ra sîsen-ū o îb Gaosib amaba aiǃgû, o da ge ǀhōsagusis tsî ǀnammi tsîna ra ǁgau mîs ǃnâ-ū ǀguis ose xawe “dīs tsî amab” tsîn ǃnâ. (1Jhn. 3:16-18) Sida ge marisi ǂkhâǃnâsa ra ǁgau aoǁnâ sîsenni ǃnâ da ga ǁhao o. Marisi huiba da ge ǀhû-omga om kais tsî ǀhû-omga kōǃgâs ǃgao ra mā. Tsî ǃhūbaib ǂhawase ra dīhe aoǁnâ sîsenni ǃgaos tsîna ra mā. Sida ra mā maris ga ǂkhariro tamas ka io kai i xawe kha ge Jehovab tsî Jesub tsîna nēsa kaise ra ǃgôaǃgâ.—2Kor. 9:7.
18 ǃNonaǁî ǀgaub hîna da sida ǀhōsagusisa Xristub ǃgâsagu ǃoa ra ǁgaus ge daoǁgaudi ǀhaohâb ǃûi-aoga xu ra hāde ǁnâuǀnamsa. Nē aogu ge ǃanu gagab xa ǁhûisa Xristub daoǁgaus ǃnaga. (Efe. 5:23) “Sadu aiǃgû-aoga ǁnâuǀnam, î ǁîga ǃnaga hâba,” dib ge apostel Pauluba ge xoa. (Heb. 13:17) ǀNî ǁaegu ai î ge kaise a ǃgom Elobmîs ai ǃgaoǃgaosa daoǁgaudi ǀhaohâb ǃûi-aogu ra māde ǁnâuǀnamsa. ǁÎgu ǂkhabusasiga da a ǂan ǃkhais ǃgao da ge ǀnîsi ǁîgu ra mā da ǁnamade ūǃoa ǂgao tide. Xawe Xristub hîna a ǀhaohâb di danab ge ra ǃgâiaǂgao nē ǀoasa kurusa ūhâ tama aoga sîsen-ūsa. ǁNā-amaga î ge ǁîgu daoǁgaude da ra ǃkhōǃoa ǀgausa sida ǀhōsagusisa Xristub ǀkha ra ǁgau. ǀHaohâb ǃûi-aogu ǂkhabusasiga da ga mû ǃkharu tsî ǁîgu daoǁgaude ǁnâuǀnam o, o da ge sida Xristuba ūba hâ ǀnamma ra ǁgau.
Elobmîs khomai ǃâs
(Mateub 25:1-23) ǃNubaib ge gaosib ǀhommi diba disi ǂkhamkhoedi khami nîra ī, ǁîdi ǃamamǀaede ū tsî dî-amaoba ge ǃgûǃoade. 2 Tsî korodi âdi ge ge gā-ai i, tsî korodi âdi ge ge gâre i. 3 Tsî gâredi ge ǁîdi ǃamamǀaede ū, tsî oli-e ǁîdi ǀkha ū tama ge i. 4 Xawe gā-aidi ge ǁîdi ǃamamǀaedi ǀkha oli-e ǁîdi xapadi ǃnâ ge ū. 5 Tsî dî-amaob ge ǀhaweo, o di ge hoade ǂomhî tsî ge ǁom. 6 Tsî tsuxuǃgâb aib ge ǂgaiba ge hā: Mû, dî-amaob ge ǃgoaxa; ǂoa î so ǃgûǃoa bi, ti. 7 ǃNubai di ge ǁnā ǂkhamkhoedi hoade khâi tsî ǃamamǀaedi âde ge ǂhomi. 8 O di ge gârede gā-aidi ǃoa ge mî: Saso oli-i xa mā se re, sise ǃamamǀaedi ra ǀari xuige. 9 O di ge gā-aide ǃeream tsî ge mî: ǀNîsi i ge sise tsî saso tsîn ǃaroma ǂâu tide. ǃGû ǁamaxū-aon ǃoa, î so sī ǁamabasen re. 10 Tsî ǁama nîse di ǃgûgau hîab ge dî-amaoba ge hā; o di ge ǂhomisen hâde ǁîb ǀkha ge ǂgâ ǃgameǁâus ǃoa, tsîs ge dao-amsa ge ǂganamhe. 11 Ega di ge nau ǂkhamkhoedi ona hā tsî ge mî: ǃKhūtse, ǃKhūtse, ǁkhowa-amba se re. 12 Xaweb ge ǃeream tsî ge mî: Amase ta ra mîba so, ǂanso tama ta hâ! 13 ǂKhaikari ǁnâi hâ re; tsēs tsî iri Khoen Ôab nî hāǃnâba du a ǀū xuige. 14 Khoeb, ǃhūba ge doexūb khami i kom īo, tsî ǁîb ǃgāga ǂgai tsî ǁîb xūna ǁîga ge ǁnākhaobaba. 15 Tsîb ge ǀguiba koro talende ge mā, tsî nauba ǀgamra, tsî ǃnonaǁîba ǀguisa, mâb hoaba ǁîb a ǁkhāba ǀgausa ǃoa, tsîb ge ǁnātimîsi ge dāǁnâ. 16 Ob ge ǁnāb, koro talende ge māheba, ǃgû tsî ǁîdi ǀkha ǁamagu tsî ǀnî koro talende ge hō. 17 ǁNās ǁkhās xaseb ge ǁnāb, ǀgamra ge māheba ǀnî ǀgamra ge hō. 18 Xawe ǁnāb, ǀguisa ge māheb ge ǃgû tsî ǃhūb ǃnâ ge khaoǂgā si, tsî ǁnāti ǁîb ǀhonkhoeb di marisa ge sâu. 19 ǂOmxa ǁaeba ǁnās khaoǃgâb ge ǀhonkhoeb ǁnā ǃgāgu diba hā tsî ǃereamsa ge ǂgan. 20 Ob ge ǁnāb koro talende ge ǃkhōǃoaba hā, tsî ǀnî koro talende ūhā tsî ge mî: ǃKhūtse koro talendets ge tita ge mā; kō, ǀnî koro talende ta ge ǁîdi ǀkha ge ǃoaǂui. 21 Ob ge ǀhonkhoeb âba ǁîb ǃoa ge mî: Aio, ǃgâi tsî îǂhôa ǃgātse, ǀoron ǂamats ge ǂgomǂgomsa i, o ta ǂguin ǂama nî mâi tsi: ǂGâ sa ǃKhūb di ǃgâiaǂgaob ǃnâ. 22 Ob ge ǁnāb ǀgam talendra ge ǃkhōǃoab ona hā, tsî ǁîb ǃoa ge mî: ǃKhūtse ǀgam talendrats ge tita ge mā; kō, ǀnî ǀgam talendra ta ge ǁîra ǀkha ge ǃoaǂui. 23 Ob ge ǀhonkhoeb âba ǁîb ǃoa ge mî: Aio, ǃgâi tsî îǂhôa ǃgātse, ǀoron ǂamats ge ǂgomǂgomsa i, o ta ǂguin ǂama nî mâi tsi: ǂGâ sa ǃKhūb di ǃgâiaǂgaob ǃnâ.