Xristesi Grikeǁî Xoadi ge ǃnâs hoasa apostel Barnabab tsî Paulub xa ra ǃhoa. Nē khoega ge ǃnarima mûǂam-aokha axase aibekam ǁaeb ǀhaohâga gere sari. Mati i io? ǁÎgu ge ǂgaob ǃgamsiba xu ǁîgu di gāgāsi ǃgâsan ǂurusib ǃaroma gere ǂhansen. Paulub ge ge mî “Akhom ǁkhawa oa” tsî mû matin hâsa. ǁÎb ge ge māsenxa i 100 xa ǃnāsa kilometerte ǃgû tsî ǁîna sī ǀgaiǀgaisa. (ǃNaeǃkhaidi 15:36) Nē turab ge sida di ǃnarima ra mûǂam-aogu nētsē ūhâba.

ǁÎgu ge sida ǀgaiǀgais ǃaroma ra hā. Mâ !Narimara mûǂam-aob hoab ge ǀgamdisi ǃnāte ǀhaohâga ra sari wekheb hoaba ǀgui ǀhaohâb tawa tsî kurib ǃnâ ǀgam ǃnara ǁkhā ǀhaohâb tawa. Nē ǃgâsagu ge kaise a huida ǁkhā ǁîgu di ûib ǂansa xu tsî ǃgamehâgu di tarade xu. ǁÎgu ge ǁnās kose ra dītsâ mâ ǂkham tsî kaira khoen hoana ǂansa tsî ǁîn ǀkha aoǁnâ sîsena dī tsî Elobmîs ǁkhāǁkhās ǃoa saosa. Nē mûǂam-aogu ge ǀhaohâb ǃûi-aogu ǀkha ǃgâsana gāgāsise ǀgaiǀgais ǃaroma omdi tawas tsîna ra sari tsî gāgāsise ra ǀgaiǀgai ǃhoaǃâdi tsîna ra mā.—ǃNaeǃkhaidi 15:35.

ǁÎgu ge ra ǁgau hoa khoena gu ra tsâba ǃkhaisa. ǃNarimara mûǂam-aogu ge ǀhaohâb nî gāgāse kaise ǀgais ǀkha ǁaehâ. ǁÎb ge ǀhaohâb ǃûi-aogu tsî ǀhaohâb hui-aogu ǀkha ǀhao tsî ra ǁgamǁgae ǀhaohâb da mati gāgāsise aiǃgû tsî mati gu harebese ǁîgu sîsenni tsî ǃereamde nî di ǀgausa. ǁÎgu ge aimâba-aona ra hui ǁîn aoǁnâ sîsena dans ǀkha aoǁnâ tsî ǀasase tsoatsoa hâna gāgāsise ǀgaiǀgaisa. Mâ ǃgâsab hoab ge māsenxase ‘sîsenǁare aob’ ase i. (2 Korinteǁîn 8:23) Sada tsîn ge ǁîn aiǁgausa nî sao ǂgoms ǃnân mâǁnāsen hâ ǀgausa.—Hebreǁîn 13:7.

• Tae-i ǃaromab ǃnarimara mûǂam-aoba ǀhaohâga ra sari?

• ǁÎgu di sarisa satsa mati a hui ǁkhā?

Tsūkēǃgâb ga hâ o, on ge Jehovab di ǀHûǀguitimî-aona kaise a ǃhae ǁîn ǃgâsan tsūkēǃgâb xa ǃoahehâna huis ǀkha. Nē huib ge ra ǁgau ǂgaoba xu da ǀnam gu ǃkhaisa. (Johaneb 13:34, 35; 1 Johaneb 3:17, 18) Mâ ǀgaugu ai da hui ǁkhā?

Marina da ge ra ao. Judeab ǃnâb ge ǂûǀorosiba hâ i o, on ge aibekam Xristeǁîn Antioxias dina marin ǀkha ǁîn gāgāsi ǃgâsana ge hui. (ǃNaeǃkhaidi 11:27-30) ǁNās khami nētsē, da ge sida ǃgân ǀnîhâ ǀkhāb ǃhūbaib dib ai ǁanhân ga tsûsasib ǃnâ hâ o ra hui ǀhaohâb ǃnâ-ū ǂhâǂhâsa xūn huib ǀkha ǁîn ǂhâsib !oa.—2 Korinteǁîn 8:13-15.

ǁKhā da a ǀgaub ai da ge ra hui. Tsūkeǃgâb ga hâ o, o gu ge ǀhaohâb ǃûi-aoga mâ khoe-i ǀhaohâb ǃnâ hâ-i hoa-e ôaǂui tsî ra kēǃgâ ǂuru tsîn a ǃnorasa ǃkhai-e. Huira ǀapeǀhaos ge ǂûn, ǃanu ǁgami, saran, ǂurusib tsî hâǃkhai-i ǀkha ra hui. ǂGui ǀHûǀguitimî-aon hîna ǂansa ūhân ge māsen tsî ǁîn marin tsî xūn ǀkha nē ǃgâsana hui tsî kuru-unuhe ǁkhā xūna ǀHû-omi tsî khoen omdi tawa ra hui. Sida di ǀguiǃnâxasib tsî ǂkhîb ǃgaeǁaes tsî ǂans hîna da ra hōs ǀguiba sîsenǁaes ǃaromas ge ra hui i da ǃhaese huib ga ǂhâbasa o khâimâsa. Sida ǃgâsana da ra hui xawe da ge ǁnān sida ǀkha ǀgoreǀhao tama hân tsîna ra hui.—Galateǁîn 6:10.

Gāgāsise tsî tsâbarase da ge ra hui. Tsūkēǃgâb ǃnâ ǃkharu hâ khoen ge ǃnāsase huiba ǂhâba hâ. ǁNā ǁaeb ai da ge ǀgaiba Jehovaba xu ra hō “Elob ǁkhaeǂgaos hoas diba.” (2 Korinteǁîn 1:3, 4) ǂKhîb ǀkha da ge tsūkēǃgâb ǃnâ hâ khoena Elobmîs mîmâis, ǀāǁaeb Elob Gaosiba hoa tsûb tsî ǃgomsin tsūkēǃgâb xa ǃaromahe hâna nî ūbesa ra ǀgoragu.—ǂHaiǂhais 21:4.

• Tae-i ǃaroman ǀHûǀguitimî-aona kaise ǃhaese ra hui tsūkēǃgâb ga hâ o?

• Tae gāgāsi huiba da a ǀgoragu ǁkhā ûiǃkharuga khoen ǀkha?

ǁŌb nîs aiǃâb ge Jesuba ǁîb di haka ǁkhāǁkhāsabegu Petrub, Jakobub, Johaneb tsî Andreab ǀkha ǀgurihâse gere ǁgam. Jesub ge saos ǁîb nî has dis xa gere ǁgam hînab ge kaise ǂûǂûsa dîsa ge dî: “Mâba a ǂgomǂgomsa tsî a gā-ai ǃgāb ǀhonkhoeb omi din ǂama ge mâiba, ǁaeb aib nî ǁîna ǂûmāse?” (Mateub 24:3, 45; Markub 13:3, 4) Jesub ge ǁîb ǁkhāǁkhāsabega ǂgomǃgâsa ge mâ “ǀhonkhoeb” nî ǁnāna ǁgaumâi hoa ǁae gāgāsi ǂûna ǁaeb ai ǁîb saosabena nî mâ ǀunis tsēti ǃnâ. Nē ǂgomǂgomsa ǃgāba hamna xu ǃkhōǂuisa?

ǁÎn ge amab ǃnâ gāgāb xa ǂhauhesa Jesub saosabena. “ǃGāb” ge gāgāsi ǃgâsan Jesub dina ǁkhoreǁharexase mîmâisa ǁaeb ai gāgāsi ǂûna Jehovab ǂgomsabena ra mā. Nē ǂgomǂgomsa ǃgān ai da ge ra ǂgomǃgâ “mîmâisa ǁaeb ain ǁîna ǂûna” nî mā da ǃkhaisa.—Lukab 12:42.

Elob omsa ra kēǃgâ. (1 Timoteub 3:15) Jesub ge ǂgomǂgomsa ǃgāba ǃgom ǁgui-aisa ge mâ ǁîb sîsena nē ǃhūbaib ai ǁîb ǀapeǂhumis ǃnâ-ū—kēǃgâsa sorosise tsî aoǁnâ sîsenni daoǁgausa ǀhaohâgu ǃnâ-ū. Nēs ǀkha ǂhâba da hâ xūna ra mā da, “ǂgomǂgomsa ǃgāb ge” gāgāsi ǂûn sida ǂkhanin aoǁnâ sîsenni ǃnâ da ra sîsenūn tsî ǀapeǁguib ǀhaodi tsî kai ǀhaodi tawa ra sîsenūn tsîna.

ǂGomǂgomsa ǃgāb ǃgubis ge ǂgomǂgomsa Elobmîs amab ai, ǃgâiǂhôasa ra aoǁnâ tsî ǂōrisase Jesub di turaxasiba nē ǃhūbaib ai ra aiǃgû kaisa. (ǃNaeǃkhaidi 10:42) Jehovab ge ǁîb sîsena ra ǀkhae kaisib tsî ǀoahâ gāgāsi ǂûn ǀkha.—Jesajab 60:22;65:13.

• Ham-e ge ǁgaumâihe Jesub xa ǁîb di ǁkhāǁkhāsabena gāgāsise ǂûmāsa?

• Mâ ǀgaub aib ǂgomǂgomsa ǃgāba ama tsî a ǂōrisa?